سەن كەتتىڭ

نەركىزە

سەن كەتتىڭ

سەن كەتتىڭ، چۈش كەبى يامغۇرلۇق سەھەر،
سەن كەتتىڭ، يىنىمدىن يىراقتىن بەك يىراق.
سەن كەتتىڭ، باقمايلا لەرزان شۇ قەدەر،
سەن كەتتىڭ تۇيغۇمدا ئۈندى مىڭ سوراق.

سەن كەتتىڭ، ئاپتۇبۇس كۈلدى گۈركىرەپ،
سەن كەتتىڭ، چاقماقتا قورشالدى بىكەت.
سەن كەتتىڭ، ئوپۇقتىن قۇياشنى سۆرەپ،
سەن كەتتىڭ، كۈلكىلەر چىللىدى ھەسرەت.

سەن كەتتىڭ، كائىنات تىترىدى دىر-دىر،
سەن كەتتىڭ، يوللارغا يېپىلدى خازان.
سەن كەتتىڭ، باھارمۇ "خوش" دېدى ئاخىر،
سەن كەتتىڭ، ۋۇجودۇم مۇزلىدى شۇئان.

مەنبە ___ قەلىمىم        1991-يىلى سىنتەبىر

pari

ياخشىمۇ سىز نەركىزە ؟ شېىرىڭىز شۇنداق ياخشى چىقىپتۇ ، بېزەكلىرى خۇددى « ئالتۇن ئۈزۈككە ،ياقۇت كۆز » ياراشقاندەك بوپتۇ رەھمەت داۋاملىق مۇڭلۇق كۈيلىرىڭىز ئۈزۈلمىگەي !!!!
شۇنداق ئەگەشىپ يازغۇم كەلدى ئەمما ئاۋۇ شېئىرىغا نوقسان يەتمىسۇن دىدىم .

تەلۋە

نەزكىرەنىڭ شېئىرى ياخشى چىقىپتۇ. ئەمما سۆزلەرنى ئىشلىتىش جەھەتتە يەنىمۇ دىققەت قىلىشقا تېگىشلىككەن.

گۈلزار

ھەقىقەتەن ياخشى يېزىلغان شېئىر ئىكەن .
ئىجادىيەتلىرىڭىزگە ئۇتۇق تىلەيمەن . رەھمەت سىزگە

تەلۋە

پەرى باشلىقنىڭ قىممەتلىك ئەسكەرتمىسىگە رەھمەت.  مەن خاتا كۆرۈۋاپتىمەن. « نەركىزە» ئىكەن.

نازلى

نەرگىزە خانقىز ، شىئېرىڭىز ياخشى چىقىپتۇ .
لىكىن بىرىنچى كۇبلىتنىڭ ئىككىنچى مىسراسىدا بوغۇم سانى ئارتۇق بوپ قاپتۇ ، مۇنداك ئوقۇپ باقايمۇ:

  سەن كەتتىڭ ، چۈش كەبى يامغۇرلۇق سەھەر ،
سەن كەتتىڭ ، يۈرەكنى ئېلىپ بەك يىراق .
سەن كەتتىڭ، باقمايلا لەرزان شۇ قەدەر،
سەن كەتتىڭ تۇيغۇمدا ئۈندى مىڭ سوراق.


بولغاندەكمۇ ؟
ھېسسىيات جەھەتتە ئورتاقلىغالمىغان بولسام ئەپۇ قىلارسىز .