2013-يىلى دۇنيا «ئانا تىل بايرىمى» غا ئالاھىدە بېغىشلانغان نەسىر «ئانا تىلىم»
ئانا تىل
قۇتلۇق ھاجى شەۋقىي ئانا تىل بىلگەن كىشىنىڭ ئىززىتىن قىلغۇم كىلۇر، ئانا تىلنى ئاغزىدىن ئالتۇن بېرىپ ئالغۇم كېلۇر. شۇ ئانا تىل بولسا گەر ئامرىكىيۇ ئافرىقىدا، سەرپ ئېتىپ مىڭلارچە تىللا ئاندا مەن بارغۇم كېلۇر. ئەي ئانا تىل بىزگە سەن قالغان ئۇلۇغلاردىن نىشان، سەن بىلەن روھى زىمىندا ئىپتىخارلانغۇم كېلۇر. ئانا تىلىم – دانا تىلىم خىزمەت ئابدۇللىن ئۇلۇغ ئانىنىڭ يۈرەك سۆزىنى، ئاڭلىدىم دەسلەپ ئانا تىلىمدىن. كۆردۈم ئەس كىرىپ ھايات كۆزىنى، مېنى چوڭ قىلغان دانا تىلىمدىن. ئوقۇدۇم مەنمۇ «ئا»، «ب»دىن باشلاپ، ئىلىم تەمىنى تېتىپ بىلىمدىن. ئۆمۈر يۈكىنى ئالدىم ھاپاشلاپ. رەھمەت ئانا تىل، رەھمەت دىلىمدىن ! ئانا تىلىمنىڭ مۇڭلۇق ئەللىيى، تەۋرىتىپ مېنى بۆشۈكتە ياتتىم. ئات ياتسا ئېلىپ غولنىڭ تېلىنى، كېپىنەك قوغلاپ سەيلىتىپ كەتتىم. جاھاندا تەڭكەش كېلەر ئۇنىڭغا، ئارتۇق تىل بارمۇ قەدىردە شۇنچە. چۈنكى شۇ تىلدا ئانا ۋەتەنگە، مۇھەببىتىمدىن تىزىمەن ئۈنچە.
ئانا تىل مۇھاببىتى
مەخمۇت ئاۋۇت (مۇزاتى)
چىن سۆيۈپ ئانا تىلىڭنى، رەڭ-جۇلا قاتساڭ ئەگەر، بىلدۈرەي ئالەمچە ھۆرمەت، سۈيىدە ئاقساڭ ئەگەر.
ئاشقۇسىدۇر بۇ جاھاندا ئانا تىلنىڭ ھۆرمىتى. يار بىلىپ،تانماي ئۇنىڭدىن كۈي-غەزەل يازساڭ ئەگەر.
تىلىمىز ئۇزدۇر،يېقىملىق، بارچە تىللار تىجىسى، بىر ۋاراقلاپ تارىخىڭغا مۇراجەت قىلساڭ ئەگەر.
نە بولۇر تەقدىرى ئۇندا،جۆيلىسەڭ ئەبجەش قىلىپ، ئۇ ئۆڭۈپ بولمامدۇ شالغۇت، ساپ تىلىڭ بۇزساڭ ئەگەر.
بىخ سۈرۈپ كۆكلەيدۇ قانداق،دىل بېرىپ سۆيمەي تۇرۇپ، يوقۇلۇپ،بولمامدۇ نابۇت، ئۇنتۇلۇپ-تانساڭ ئەگەر.
تىل بىلەن بولۇر نامايان، شۇ مىللەتنىڭ خاسلىقى، قوغدىماق تەس ئۇ بۇزۇلسا سۈكۈتتە تۇرساڭ ئەگەر.
تىل ئىگەللەش ياخشى ئامما ئانا تىلدىن چانمىغىن، يۈز كېلەمسەن ئاۋامغا، يەر قىلىپ ئۇرساڭ ئەگەر.
جانغا ئۇ ئابى ھاياتتەك،بىز ئۈچۈن تۇرسا بۈيۈك، بۇ يۈرەك قانداق چىدايدۇ، ئۇنى خار قىلساڭ ئەگەر.
قان بىلەن كىرگەچ ئانا تىل، چىققۇسىدۇر جان بىلەن، بولمىقىم جاندىن جۇدادۇر، ئايرىماق بولساڭ ئەگەر.
|