سەندەك ئەرگە ئۆچ بولدۇم (ساتىرا)

زەھرا

مەن ئەسلىدە بۇ شېئىرىمنى «سەندەك ئەرنىڭ كېرىكى يوق» دەپ يازغان ئىدىم ،كىيىن توردىشىمىز ئەنگەرنىڭ «ئارام كۈنگە ئۆچ بولدۇم » ناملىق شېئىرىنى ئوقۇپ «سەندەك ئەرگە ئۆچ بولدۇم»دەپ ئۆزگەرتتىم ،شۇڭا تورداشلارنىڭ توغرا چۈشىنىشىنى،ماڭا مەدەت ،ئىلھام بېرىشىنى ،نۇقسانلار بولسا تۈزىتىپ ،سەمىمى پىكىر-تەكلىپ بېرشىنى تۆۋەنچىلىك بىلەن سورايمەن.
سەندەك ئەرگە ئۆچ بولدۇم      (ساتىرا)
ئاپتورى :   زەھرا  (ئۆز يازمام)

ئەر كىشى دېگەن ئائىلنىڭ باشپاناھى ،تۈۋرۈگى،
ئاتا-ئانىسى ،ئايالىنىڭ غەمگۈزارى ،يۆلىكى،
  پەرزەنتلەرنىڭ ئۆلگىسى ،ئىپتىخارى ،يۈرىگى،
ئۆز رولىنى بىلمىگەن ،سەندەك ئەرگە ئۆچ بولدۇم。

ھاراق ئىچىپ تالادا كۈندە ئەلەس ،مەس يۈرگەن ،
قارغىش ئېلىپ ئاۋامدىن ،بىخۇت بولۇپ نەس يۈرگەن،
بىر ئەركەككە ئوخشىماي ،كۆڭلى قارا پەس يۈرگەن،
ئۆزلۈكىنى يوقاتقان ،سەندەك ئەرگە ئۆچ بولدۇم.

كىچىك ئىشنى ياراتماي ،چوڭراق ئىشنى قىلالماي ،
شەھەر ئالغان ئاغزىدا ،پالۋان سۈپەت ھالىغا ۋاي.
يانچۇقىدا پۇلى يوق ،غورۇرى يوق بۇ گاداي.
مىليونېر بوپ بىر كۈنى ئاتىلارمىش كاتتا باي ،
گېپى يوغان ،بېلى بوش،سەندەك ئەرگە ئۆچ بولدۇم.

پولۇ،لەغمەن يېيىشى،كاۋاپخانىدىن كەتمەيدۇ،
مېھىر سىڭگەن ئۆي تامىقى كارنىيىدىن ئۆتمەيدۇ .
مىڭ جاپادا تاپقان پۇل،يەپ –ئىچىشكە يەتمەيدۇ.
نان كۈچۈكى ،لايغەزەل ،سەندەك ئەرگە ئۆچ بولدۇم.

ئۆي دېگەندە ھەر تۈرلۈك ئەرنىڭ قىلار ئىشى بار ،
يازلا بولۇپ ئۆتمەيدۇ ،جۇت شىۋىرغان قىشى بار ،
ساڭا تەگكەن ئايالنىڭ كۆزلىرى نەم ،يېشى بار .
ھېساۋاتلىق ئالەم بۇ، ئاخىرى بار ،بېشى بار ،
باھانەم يوق دېمەسكە ،سەندەك ئەرگە ئۆچ بولدۇم.

ھېلى پۇتۇمنى تۇت دېگەن ،ھېلى كۆڭلۈمنى ئۇت دېگەن ،
سۆزلەپ قالسا بىر ئېغىز «ۋات –ۋات خوتۇن ،يۈت » دېگەن .
گەپ قىلمىسا ناۋادا،قېتىپ قالغان بۇت دېگەن ،
جانغا زالىم ،بىغەرەز ،سەندەك ئەرگە ئۆچ بولدۇم .

بىز ئاياللار تولىمۇ نازۇك ،مىسكىن كېلىمىز،
پەرزەنتنى دەپ ئەرنى دەپ جاننى پىدا قىلىمىز،
ئۆينىڭ تۈگىمەس ئىشىغا سەرىپ يۈرەك قېنىمىز،
يارا بولماي ،پاك بولسۇن ،شۇ ئاجىزە تېنىمىز .
ۋاپا نېمە ؟ بىلمىگەن ،سەندەك ئەرگە ئۆچ بولدۇم.

تۇر ئورنىڭدىن ،ئەي ئوغلان ،غاپىللىقنى تاشلىۋەت ،
بىسمىللا دەپ ھەر ئىشنى يېڭىباشتىن باشلىۋەت .
ئايالىڭ ھەم بالاڭنىڭ دەردىنى سورا ،ھالىغا يەت،
ھالال ئەمگەك تەر بىلەن ،ئۇستىخانغا قونسۇن ئەت ،
شۇ چاغدىلا دېمەسمەن ،سەندەك ئەرگە ئۆچ بولدۇم.

2013-يىل 15-ئىيۇن.   يېڭسار

مەنبە :  ئۆزۈم

ئىلغار

ئاياللار ،ئائىلىدى ئەڭ جاپاكەش ئەڭ سۈۇۈملۈك ،مىھرىبان كىشى  ،بىز ئەرلەر ئاياللارغا  كۆڭۈل بۆلەيلى، ئىشلارنىڭ ھەممىسى ئۇلارغا قالمىسۇن ،ئۇلارنى جاپا سالمايلى.

ئىستەك

ناھايىتى پاساھەتلىك چىقىپتۇ ، ھازىرقى جەمئىيتىمىزدىكى بىر قىسىم لايغەزەل ئەرلەرنىڭ قىياپىتىنى ئەينەن بايان قىلىپسىز ، نادىر تىمللىرىڭىز ئۈزۈلۈپ قالمىسۇن .

يۈسۈف

ياخشى چىقىپتۇ،بارىكاللا،ياشنىسۇن ياشىسۇن ئانىلار دادىلار

بەختىيار(بايقاش

ياخشى يېزىلغان ساتىرا ئىكەن،ئىلھاملىرىڭىزغا بارىكاللا.

خۇمارى

ئىچىۋالسا غېمى يوق ئويناپ يۈرەر تالادا،
ئۆيگە كىرسە يەنە شۇ خۇتۇن قالاريەنە بالاغا.
مائاش چىقسا  كۆكنى شۇ ھامان سورار ساماغا.
بىكار تەلەت لايغەزەل سەندەك ئەرگە ئۆچ بولدۇم.

ئويناپ يۈرۈپ تالادا بىرنى ئىككى قىلمدۇق.
بويىمىزغا تەڭ بولدى بالا بۇنى بىلمىدۇق.
ئۆزىمىزنى سېخى دەپ ئىچمىگەننى تىللىدۇق.
ئىمانى يۇق ۋاپاسىز سەندەك ئەرگە ئۆچ بۇلدۇم.

مەرىپەت

ئاياللارنىڭ كۆڭلىنى چۈشەنگىنىڭىزگە رەھمەت، دىمىسىمۇ ئۆزىنى تاپالمايۋاتقان ، ئۆزىنىڭ ئائىلىدىكى ۋە جەمئىيەتتىكى رولىنى تاپالمايۋاتقان  ئەرلىرىمىز بەك كۆپ...
بۇ شئېرنى ياخشى يېزىپسىز بارىكاللا...