سىنىپ مۇدىرلىق خىزمەت پىلانىنى قانداق تۈزۈش كېرەك

alahidin

سىنىپ مۇدىرلىق خىزمەت پىلانىنى قانداق تۈزۈش كېرەك
1. سىنىپ كوللېكتىپىنىڭ ئاساسىي ئەھۋالى تەھلىلى
سىنىپ مۇدىرلىرى سىنىپ مۇدىرلىق خىزمەت پىلانىدا ئالدى بىلەن سىنىپ كوللېكتىپىنىڭ ئاساسىي ئەھۋالى ھەققىدە ئومۇميۈزلۈك تەھلىل ئېلىپ بېرىشى كېرەك. سىنىپ كوللېكتىپىنىڭ ئاساسىي ئەھۋالى تەھلىلىنىڭ كونكىرت مەزمۇنى تۆۋەندىكىلەرنى ئۆز ئىچىگە ئالىدۇ:
1) سىنىپ كوللېكتىپىنىڭ ئاساسىي ئەھۋالى ھەققىدىكى ئومۇمىي گەۋدىلىك تەھلىل
بۇنىڭدا سىنىپنىڭ تولۇق نامى، سنىپتا جەمئىي قانچە نەپەر ئوقۇغۇچى بارلىقى، ئوغۇل ئوقۇغۇچى ۋە قىز ئوقۇغۇچىلارنىڭ سانى، ئىتتىپاق ئەزاسى ۋە پېئونېرلار سانى قاتارلىقلار يېزىلىدۇ. يەنە ئومۇمىي ئوقۇغۇچى ئىچىدە ئوقۇش تەۋەلىكى دائىرىسىدىكى ئوقۇغۇچى سانى، سىرتتىن كەلگەن ئوقۇغۇچى سانى، ئوقۇغۇچىلارنىڭ كېلىش مەنبەسى، ئوقۇغۇچىلارنىڭ ئائىلە ئەھۋالى، ئوقۇغۇچىلارنىڭ ئاساسىي ئەھۋالى (ئۆگىنىش ئادىتى، تۇرمۇش ئادىتى، خاراكتېر جەھەتتىكى پەرقلىرى، پىسخىك ئالاھىدىلىكى) قاتارلىقلار يېزىلىدۇ. بولۇپمۇ، نۆۋەتتىكى ئوقۇش مەۋسۇمىدا ئوقۇش ئالمىشىپ كەلگەن ئوقۇغۇچىلار ۋە ئارىيەتتە ئوقۇۋاتقان ئوقۇغۇچىلارنىڭ بار-يوقلۇقى، ئۇلارنىڭ ئائىلە ئەھۋالى، ئاساسىي ئەھۋالى قاتارلىقلار تەپسىلىي يېزىلىدۇ.
2) سىنىپ كوللېكتىپىنىڭ ئاساسىي ئەھۋالى ھەققىدىكى كونكىرت تەھلىل
(1) ئوقۇغۇچىلارنىڭ ئىدىيىۋىي ئەھۋالى ۋە پىسخىك ئالاھىدىلىكلىرى: بۇنى ئومۇمىي گەۋدە بويىچە ۋە يەككىلىك بويىچە ئىككى تەرەپتىن يېزىش كېرەك. مەسىلەن: سىنىپ ئىنتىزامى، ئوقۇغۇچىلارنىڭ روھىي كەيپىياتى، ھېسسىيات مايىللىقى قاتارلىقلار.
(2) ئوقۇغۇچىلارنىڭ ئۆگىنىش ئەھۋالى ۋە ئالاھىدىلىكلىرى: بۇنى ئوقۇغۇچىلارنىڭ ئۆگىنىشتىكى تەشەببۇسكارلىقى، ماسلىشىشى جەھەتلەردىن يېزىش كېرەك. ئوقۇغۇچىلارنىڭ ئۆگىنىش نەتىجىسىنىڭ تەخمىنىي تەقسىملىنىشى، ئۆگىنىشتە قىينىلىدىغان ئوقۇغۇچىلارنىڭ نۆۋەتتىكى ئەھۋالى قاتارلىقلارنىمۇ يېزىش لازىم.
(3) ئوقۇغۇچىلارنىڭ جىسمانىي جەھەتتىكى ئەھۋالى ۋە سالامەتلىك ئەھۋالى: بۇنىڭدا ئوقۇغۇچىلارنىڭ مۇھىت تازىلىقىغا رۇئايە قىلىش ئەھۋالى، شەخسىي تازىلىق ئەھۋالى، سالامەتلىك ئەھۋالى، شۇنداقلا باشقا ئالاھىدە ئەھۋاللار يېزىلىدۇ.
(4) ئوقۇغۇچىلارنىڭ پائالىيەتلەرنى قانات يايدۇرۇش ئەھۋالى: بۇنىڭدا ئوقۇغۇچىلارنىڭ ھەر خىل كوللېكتىپ پائالىيەتلەرنى قانات يايدۇرۇش ئەھۋالى ۋە قىسمەن ئالاھىدە قىزىقىشى بار ئوقۇغۇچىلارنىڭ ئەھۋالى يېزىلىدۇ.
(5) سنىپ ھەيئەتلىرى ۋە ئىتتىپاق-پېئونېرلار ھەيئەتلىرىنىڭ سانى، ئۇلارنىڭ سىنىپ باشقۇرۇشقا قاتىنىشىش ئەھۋالى قاتارلىقلار يېزىلىدۇ. ئۇندىن باشقا، سىنىپ خىزمىتىنى ئىشلەش ئىقتىدارى ۋە مەسئۇلىيەت ئېڭى كۈچلۈك، تەشكىللەش، ماسلاشتۇرۇش قابىلىيىتى يۇقىرى بولغان بىر قىسىم سىنىپ ھەيئەتلىرىنى يەنىمۇ ئىلگىرلىگەن ھالدا تەربىيەلەش قاتارلىق مەسىلىلەر يېزىلىدۇ.
(6) «مەسىلىسى بار» ئوقۇغۇچىلار ئەھۋالى ۋە ئۇلارنى ئۆزگەرتىش نىشانى يېزىلىدۇ.
2. سىنىپنىڭ خىزمەت نىشانى
1) يېقىنقى مەزگىللىك نىشان: بۇنىڭدا قانداق قىلىپ ئاكتىپ، ئالغا ئىنتىلىدىغان، ئىتتىپاقلىشىپ غەلىبە قىلىدىغان سىنىپ كوللېكتىپى بەرپا قىلىش خىزمەت تەپەككۇرى يېزىلىدۇ.
2) ئوتتۇرا مەزگىللىك نىشان: بۇنىڭدا قانداق قىلىپ ئۇيۇشۇش كۈچى ۋە جەڭگىۋارلىقى يۇقىرى بولغان سىنىپ كوللېكتىپىنى بەرپا قىلىش جەھەتتىكى خىزمەت تەپەككۇرى يېزىلىدۇ.
3) يىراق مەزگىللىك نىشان: سىنىپ كوللېكتىپىنىڭ ئېنىق بولغان كۆرەش نىشانى-مەكتەپ، يېزا (بازار)، ناھىيە، ۋىلايەت (شەھەر) دەرىجىلىك ئىلغار سىنىپ كوللېكتىپى بولۇش نىشانى يېزىلىدۇ.
3. سىنىپنىڭ ئوقۇغۇچىلارغا ئېلىپ بارىدىغان تەلىم-تەربىيە مەزمۇنلىرى
1) ئىدىيىۋىي تەربىيە:
(1) غايە، كىشىلىك قاراش ۋە قىممەت قارىشى تەربىيىسى؛
(2) ئۆگىنىش پوزىتسىيىسىنى توغرىلاش تەربىيىسى؛
(3) بەدەن چېنىقتۇرۇش ۋە تازىلىق ئادىتى تەربىيىسى؛
(4) گۈزەللىك تەربىيىسى؛
(5) پىسخىك ساپا تەربىيىسى؛
(6) مەدەنىيەتلىك، ئەدەپلىك بولۇش تەربىيىسى؛
(7) ۋەتەنپەرۋەرلىك، كوللېكتىۋىزىملىق، ئىتتىپاقلىق تەربىيىسى.
2) ئۆگىنىش ئۇسۇلىغا يېتەكچىلىك قىلىش تەربىيىسى
3) ئۆز-ئۆزىنى قوغداش، بىخەتەرلىك تەربىيىسى ۋە قانۇن-تۈزۈم تەربىيىسى
4. ئاساسلىق خىزمەت تەدبىرلىرى
سىنىپ مۇدىرلىرى ئۆز سىنىپىنىڭ ئەمەلىي ئەھۋالى، خىزمەت نىشانى ۋە سىنىپنىڭ تەلىم-تەربىيە مەزمۇنلىرىغا ئاساسەن ئۈنۈملۈك خىزمەت تەدبىرلىرىنى بېكىتىشى كېرەك. سىنىپنىڭ خىزمەت تەدبىرىنىڭ كونكىرت مەزمۇنى تۆۋەندىكىلەردىن ئىبارەت:
1) ئىدىيىۋىي تەربىيەنى دائىم بوشاشتۇرۇپ قويماي چىڭ تۇتۇش
  سىنىپ يىغىنلىرى ۋە ھەرخىل مول مەزمۇنلۇق، شەكلى كۆپ خىل دەرستىن كېيىنكى پائالىيەتلەرنى قانات يايدۇرۇش جەريانىدا تەربىيە ئىشلەش؛ مەخسۇس تېمىلىق سىنىپ يىغىنلىرىنى ياخشى ئېچىش قاتارلىقلار ئارقىلىق ئوقۇغۇچىلارغا مەقسەتلىك، پىلانلىق ھالدا تەربىيە ئېلىپ بېرىش؛ قارا تاختاي گېزىتى، تام گېزىتى، تەشۋىقات سەھنىسى قاتارلىقلارنىڭ رولىدىن ئۈنۈملۈك پايدىلىنىپ ئوقۇغۇچىلارنى ئۈن-تۈنسىز يېتەكلەش ۋە تەربىيىگە ئىگە قىلىش.
2) سىنىپ ھەيئەتلىرىنىڭ رولىدىن ئۈنۈملۈك پايدىلىنىش، ئۇلارنى تەربىيىلەشنى مۇھىم ئورۇنغا قويۇش
سىنىپ ھەيئەتلىرى بېكىتىش، سايلاش ياكى تاللاش ئارقىلىق ۋۇجۇدقا كەلگەن بولسۇن، ئۇلار بىر كۈن سىنىپ خىزمىتىنى ئىشلىسە، چوقۇم ئۇلارنى ئەستايىدىل تەربىيىلەش لازىم. سىنىپ ھەيئەتلىرىنى تاللاپ قويۇپ ئىشلەتمەسلىك ياكى ئىشلىتىپ تەربىيىلىمەسلىكنىڭ ھەر ئىككىسى ياخشى ئەھۋال ئەمەس.
3) سىنىپنىڭ قائىدە-تۈزۈملىرىنى ئەمەلىيلەشتۈرۈشنى مۇھىم ئورۇنغا قويۇش
دۆلەتنىڭ ئۆزىگە خاس قانۇنى بولىدۇ، ئائىلىنىڭ ئۆزىگە چۇشلۇق ئائىلە باشقۇرۇش قائىدىسى بولىدۇ. نەچچە ئون ئوقۇغۇچىدىن تەشكىللەنگەن بىر سىنىپ كوللېكتىپىنىڭمۇ بىر يۈرۈش قائىدە-تۈزۈمى بولۇشى زۆرۈر. قائىدە-تۈزۈم بولغانكەن ئۇنى ئەمەلىيلەشتۈرۈش لازىم.
4) ئۆگىنىش ئۇسۇلى جەھەتتە يېتەكلەشكە ئەھمىيەت بېرىش
ھەر بىر ئوقۇغۇچىنىڭ ئۆزىگە خاس ئۆگىنىش ئۇسۇلى بولىدۇ. ئوقۇغۇچىلارنىڭ ئۆگىنىش ئۇسۇلى ئىلمىيمۇ-قانداق؟، ئۈنۈملۈكمۇ-يوق؟، بۇنى سىنىپ مۇدىرلىرى بايقىشىمىز، تۈزىتىشكە يېتەكچىلىك قىلىشىمىز كېرەك.
5) دەرس ئوقۇتقۇچىلىرىنى ماسلاشتۇرۇش
سىنىپ مۇدىرلىرى يادرولۇق رولىنى تولۇق جارى قىلدۇرۇشى زۆرۈر. دەرس ئوقۇتقۇچىلىرىنى ئاكتىپ ماسلاشتۇرۇپ، ئۆز ئەتراپىغا ئۇيۇشتۇرۇپ، ھەقىقىي بىرىكمە كۈچ ھاسىل قىلىشى لازىم.
6) مەكتەپ بىلەن ئائىلىنىڭ ھەمكارلىقىدا قاتنىشىشنى مۇھىم ئورۇنغا قويۇش
سىنىپ مۇدىرى ئائىلە باشلىقلىرى يىغىنى ۋە بىر قىسىم ئائىلە باشلىقلىرى قاتناشقان سۆھبەت يىغىنلىرىنى ياخشى ئېچىپ، ئائىلە باشلىقلىرىنىڭ مەكتەپتىكى ۋاقتىدىن تولۇق پايدىلىنىپ ئوقۇغۇچىلارنىڭ ئائىلە ئەھۋالى، ئىجتىمائىي ئالاقە ئەھۋالى ۋە بەدەن سۈپەت ئەھۋالىنى تولۇق ئىگەللىشى لازىم. شەخسەن ئۆزى ئائىلە زىيارىتى قىلىپ، ئوقۇغۇچىلارنى چۈشىنىشنى چوڭقۇرلاشتۇرۇشى، مەكتەپ بىلەن ئائىلە باشلىقلىرىنىڭ ئالاقىسىنى كۈچەيتىشى كېرەك.
5. پائالىيەت ئورۇنلاشتۇرۇش
سىنىپ مۇدىرى سىنىپ مۇدىرلىق خىزمەت پىلانىدا ئوقۇغۇچىلارنىڭ ئەمەلىي ئەھۋالى، مەكتەپ ۋە ئەخلاق تەربىيە بۆلۈمىنىڭ خىزمەت پىلانىغا ئاساسەن ھەر خىل ئاساسلىق پائالىيەتلەرنى بىر تۇتاش ئورۇنلاشتۇرۇشى كېرەك. ھەر ھەپتىسىگە 2-3 ئاساسلىق پائالىيەت ئورۇنلاشتۇرۇلسا بولىدۇ. ھەر ھەپتىلىك ئورۇنلاشتۇرۇلغان پائالىيەتلەرنىڭ سىستېمىلىق، تەربىيە خاراكتېرلىك ۋە ئومۇميۈزلۈك بولۇشىنى ئىشقا ئاشۇرۇش لازىم.

زەپەر

ياخشى تەلەپ پىكىرنى ئوتتۇرغا قۇيۇپسىز  يۇقاپ كەتمەي داۋاملىق كىرىپ تۇرشىڭىزنى ئۈمۈد قىلىمەن

ئەنەق

رەخمەت سىزگە جاپا تارتىپسىز