ئاپتورى : ئەلخۇمار
نادانلىق دەشتىگە تىنماي تېرەر رەيھانۇ ئۇستاز-ئۇ،
ۋە غۇنچە پەيزىدىن مەمنۇن، كۈلەر خەندانۇ ئۇستاز-ئۇ.
بۇلۇپ بال لەززىتى گويا، ھوزۇر چاڭقاق كۆڭۈللەرگە،
گۈپۈلدەپ خوش پۇراغى، تارقىلىپ ھەريانۇ ئۇستاز-ئۇ.
جاھالەت قۇزغىنى كۆرسە تىكەندۇر، سانجىلىپ –قوغلار،
ئىلىم بۇلبۇلىغا ھەردەم ماكان –ئورمانۇ ئۇستاز-ئۇ.
ئەجىر سەھراسىنى كەزگەن، بىلىم ئاشناسى-مەجنۇنغا،
كۈلۈپ چىققان كەبى لەيلى، بىرەر جانانۇ ئۇستاز-ئۇ.
ھاياتنىڭ بىپايان- چەكسىز، ئېزىتقۇ چۆللىرى ئىچرە،
بېرىپ مەنزىلنى ئازدۇرماس، نىشان–پەرمانۇ ئۇستاز-ئۇ.
ئەمەس بورنىڭ توزانى، بالقىغان مېھنەت زىياسىدۇر،
دېمەك نۇر تارقىتىپ ھەردەم، يانار گۈلخانۇ ئۇستاز-ئۇ.
قاراڭ! روھى مادار ئىزدەپ، يىغىلغان ناتىۋانلارنىڭ،
قوشار نىمجان جېنىغا جان، قېنىغا قانۇ ئۇستاز-ئۇ.
كېرەكمەس ئاڭا بايرام ھەم، ئەمەستۇر چۈنكى بىر كۈنلۈك،
ئەبەدلىك يادلىنار ئەجرى، شەرەپلىك–شانۇ ئۇستاز-ئۇ.
2015-9-10
ئاتۇش
ئاتۇش سەرخانا oybizak سالونى تەييارلىغان.