جۇڭگو كارخانىلىرى قازاقستاندا قانۇن - تۈزۈملەرنى بىلمىسە زىيان تارتىدۇ

      جۇڭگونىڭ قازاقستاندا تۇرۇشلۇق سودا مەسلىھەتچىسى جاڭ دى يېقىندا مۇنداق دېدى: دۆلىتىمىز كارخانىلىرى قازاقستاندا سودا ئىشلىرى بىلەن شۇغۇللانسا ياكى قازاقستانغا مەبلەغ سالسا، ئالدى بىلەن قازاقستاننىڭ دۆلەت ئەھۋالىنى چۈشىنىشى، بولۇپمۇ قازاقستاننىڭ تاشقى سودا سىياسىتى، مەبلەغ سېلىش مۇھىتى، چەت ئەل مەبلىغىنى جەلپ قىلىش سىياسىتى، باج ئېلىش بەلگىلىمىلىرى، چەت ئەللىكلەرنىڭ قازاقستاندا ۋىزا بېجىرىش تۈزۈمى، قازاقستاندا تۇرۇش ۋە ئىشلەش تۈزۈملىرى ۋە قازاقستاننىڭ جەمئىيەت ئامانلىقى قاتارلىق جەھەتلەردىكى قانۇن - تۈزۈملەرنى تولۇق چۈشىنشى كېرەك. جاڭ دى يەنە تونۇشتۇرۇپ مۇنداق دېدى: ئۆزئارا چۈشەنمەسلىك، شۇنداقلا ئۆزئارا ئىشەنمەسلىك سەۋەبىدىن جۇڭگو بىلەن قازاقستان كارخانىلىرى ئوتتۇرىسىدىكى سودىدا ئاساسەن ھېسابات مەسىلىسى جەھەتتە خېيىمخەتەر يۈز بېرىدۇ.
      مەبلەغ سېلىش جەھەتتىكى خېيىمخەتەر بولسا جۇڭگو تەرەپنىڭ قازاقستاننىڭ قانۇن - تۈزۈم جەھەتتىكى تەلەپلىرىنى چۈشەنمەسلىكىدىن كېلىپ چىقىدۇ. مەسىلەن، كېلىشىمگە ئىمزا قويغاندا دېگەندەك دىققەت قىلماسلىق، بۇنىڭ بىلەن قارشى تەرەپ قانۇنىي يوچۇقلاردىن پايدىلىنىپ كېتىش ياكى قازاقستاننىڭ باج ئېلىش جەھەتتىكى بەلگىلىمىلىرىنى تولۇق چۈشەنمىگەنلىكتىن، بۇ جەھەتتە جەرىمانىگە ئۇچراش قاتارلىقلار. شۇڭا، جۇڭگو كارخانىلىرى قازاقستاندا تىجارەت قىلىش ياكى قازاقستانغا مەبلەغ سېلىشتا چوقۇم ئۇلارنىڭ قانۇن - تۈزۈملىرىنى، بولۇپمۇ باج ئىشلىرى جەھەتتىكى بەلگىلىمىلىرىنى تولۇق چۈشىنىشى كېرەك.