تاجىكىستاندا تۈرلۈك ماللار سودىسى جانلاندى

      قەشقەر بىلەن قوشنا بولغان تاجىكىستاننىڭ تۈرلۈك ماللار سودا بازىرى غايەت زور يوشۇرۇن كۈچكە ئىگە. تاجىكىستاننىڭ نوپوسى بىرقەدەر ئاز، لېكىن ئافغانىستانغا قارىتا يەتتە سودا ئېغىزى تەسىس قىلىنغان، بازارغا يۈزلىنىش ئەھۋالى ئىنتايىن كەڭ. تاجىكىستاننىڭ تۈرلۈك ماللار بازىرىدىكى تاۋارلار ئاساسەن كىيىم - كېچەك، ئاياغ، بەش خىل مېتال بۇيۇملىرى، ۋېلسىپىت ۋە سۇلياۋ كۈندىلىك تۇرمۇش بۇيۇملىرىدىن ئىبارەت. تاجىكىستاندا چارۋىچىلىق بىلەن ئىلمە توقۇمىچىلىق ئاساسلىق ئورۇندا تۇرىدىغان بولۇپ، يېنىك سانائىتى دېگەندەك تەرەققىي قىلمىغان، بۇ جەھەتتىكى مەھسۇلاتلارنى ئىشلەپچىقىرىشنىڭ تەننەرخى يۇقىرى، مەھسۇلات سۈپىتىمۇ تۇراقلىق ئەمەس. شۇڭا، نۇرغۇن يىللاردىن بۇيان روسىيە ۋە قىرغىزستان قاتارلىق مۇستەقىل دۆلەتلەر بىرلەشمىسىگە ئەزا دۆلەتلەر ئارقىلىق مەملىكىتىمىزنىڭ كىيىم - كېچەك، ئاياغ ۋە باش كىيىملىرى، بەش خىل مېتال مەھسۇلاتلارنى ئىمپورت قىلىپ كەلدى.
      جۇڭگو بىلەن تاجىكىستان ئوتتۇرىسىدا ئېچىلغان قاراسۇ چېگرا ئېغىزى قەشقەردە تەسىس قىلىنغان بولۇپ، بۇ جۇڭگو بىلەن تاجىكىستان ئوتتۇرىسىدىكى تۇنجى قۇرۇقلۇق چېگرا ئېغىزى ھېسابلىنىدۇ. قاراسۇ چېگرا ئېغىزى ئېچىلغاندىن كېيىن، جۇڭگو بىلەن تاجىكىستان ئوتتۇرىسىدىكى ۋاسىتىلىك سودا بىۋاسىتە سودىغا ئايلىنىپ، بۇ جەھەتتىكى تەننەرخنى زور دەرىجىدە تۆۋەنلەتتى؛ جۇڭگونىڭ تاشقى سودا ئىشلىرىمۇ تاجكىستان، ئافغانىستان بازارلىرىنى ئېچىشتا غايەت زور بازار يوشۇرۇن كۈچىگە ئىگە بولدى.
      قەشقەر ۋىلايىتىنىڭ تاشقورغان تاجىك ئاپتونوم ناھىيىسىگە جايلاشقان قاراسۇ چېگرا ئېغىزىنىڭ قەشقەر شەھىرى بىلەن بولغان ئارىلىقى 236 كىلومېتىر بولۇپ، پەسىل خاراكتېرلىك ئېچىلىدۇ. بۇ قۇرۇلۇق چېگرا ئېغىزىدىن جۇڭگونىڭ يۈك ئاپتوموبىللىرى تاجىكىستاننىڭ خولود شەھىرىگە بىۋاسىتە بارالايدۇ.
      جۇڭگو بىلەن تاجىكىستاندىن ئىبارەت بۇ ئىككى دۆلەت 1992 - يىلى دىپلوماتىيە مۇناسىۋىتىنى ئورناتقاندىن بۇيان، ئىككى تەرەپنىڭ ئىقتىسادىي سودا ھەمكارلىقى ئۈزلۈكسىز مۇقىم تەرەققىي قىلىپ كەلدى. جۇڭگو بىلەن تاجىكىستان ئىقتىسادىي جەھەتتە ئەڭ كۈچلۈك بىر بىرىنى تولۇقلاشچانلىققا ئىگە، جۇڭگو تاۋارلىرى تاجىكىستاندا قىزغىن قارشى ئېلىنىدۇ.