ئىسلام ۋە تاشقى پىلانېتتىكى ھاياتلىق

Tlsim

ئىسلام ۋە تاشقى پىلانېتتىكى ھاياتلىق

(تەرجىمە قىلغۇچى: تىلسىم)

     مۇسۇلمانلار يەر شارىنىڭ بىردىنبىر ھاياتلىق مەۋجۇت بولغان پىلانېت ئەمەسلىكىگە ۋە ئاللاھنىڭ ئالەمدە يەر شارىغا ئوخشاش باشقا پىلانېتلارنىمۇ ياراتقانلىقىغا ئىشىنىدۇ.

      65-سۈرە 12- ئايەت: ئاللاھ يەتتە ئاسماننى ياراتتى، زېمىننىمۇ ئاسمانلارغا ئوخشاش (يەنى يەتتە قىلىپ) ياراتتى، ئاللاھنىڭ ئەمرى ئۇلارنىڭ ئارىسىدا جارى بولۇپ تۇرىدۇ، (سىلەرگە بۇنى بىلدۈرۈشۈم) ئاللاھنىڭ ھەممىگە قادىر ئىكەنلىكىنى ۋە ئاللاھنىڭ ھەممە نەرسىنى تولۇق بىلىدىغانلىقىنى بىلىشىڭلار ئۈچۈندۇر.

ئىسلام دىنىدا، يەر شارى بىردىنبىر ھاياتلىق مەۋجۇت بولغان پىلانېت ئەمەس. ئالەمدە يەر شارىغا ئوخشاش ھاياتلىق مەۋجۇت بولغان باشقا پىلانېتلارمۇ ئەلۋەتتە مەۋجۇت. ئەمەلىيەتتە قۇرئان باشقا پىلانېتلاردىمۇ قۇرۇقلۇق ھايۋانلىرىنىڭ بارلىقىنى ئېيتىدۇ.

42- سۈرە 29- ئايەت: ئاسمانلارنىڭ، زېمىننىڭ يارىتىلىشى ۋە ئۇ ئىككىسىدە جاندارلارنىڭ يېيىلىشى ئاللاھنىڭ (قۇدرىتىنىڭ) دەلىللىرىدىندۇر، ئاللاھ ئەگەر خالىسا، ئۇلارنى جەمئىي قىلىشقا قادىردۇر.
*****************************************************************************
بۇ ئايەتنىڭ ئۇيغۇرچە تەرجىمىسىدىكى «جاندارلار» دېگەن سۆز ئىنگلىزچە تەرجىمىدە تېخىمۇ ئېنىق قىلىپ «قۇرۇقلۇق ھايۋانلىرى» دەپ ئېلىنىپتۇ. باشقا مەنبەلەردىمۇ «مِن دَآبَّةٖۚ» سۆزىنىڭ يەر يۈزىدە ياشايدىغان قۇرۇقلۇق ھايۋانلىرىنى كۆرسىتىدىغان سۆز ئىكەنلىكىنى كۆرگەن ئىدىم. ئەرەبچىگە پىششىق قېرىنداشلارنىڭ تەپسىلى چۈشەنچە بېرىشىنى ئۈمىد قىلىمەن.
*****************************************************************************

      يۇقارقى قۇرئان ئايىتىگە ئاساسلانغاندا، ئاسمانلاردىمۇ بىزنىڭ يەر شارىغا ئوخشاش قۇرۇقلۇق ھايۋانلىرى بار (پەقەت پەرىشتىلەرلا ئەمەس). ئەمەلىيەتتە قۇرئان ئاشۇ تاشقى پىلانېت جانلىقلىرىنىڭ بىر كۈنى يەر شارىغا كېلىدىغانلىقىنىمۇ ئېيتىدۇ. كۈنلەرنىڭ بىرىدە تاشقى پىلانېتتىكى ئاشۇ جانلىقلار  يەر شارىغا كېلىش ئۈچۈن قۇرۇت تۆشۈكىنى ئىشلىتىدۇ.
     ئاللاھ پەرىشتىلەرگە ئالەمنىڭ ھەر قايسى جايلىرىغا بېرىپ-كېلىشى ئۈچۈن بىر قاتناش ئۇسۇلىنى ئاتا قىلغان. قۇرئاننىڭ 70- سۈرە 3- ئايىتىدە ئۇلارنى «مەئەرج – مَعارِج» دەپ ئاتايدۇ ۋە شۇنداقلا پەرىشتىلەرنىڭ يىراق ئارىلىققا سەپەر قىلغاندا ئۇلارنى قانداق ئىشلىتىدىغانلىقىنى تەسۋىرلەيدۇ. بۈگۈنكى كۈندە مۇسۇلمانلار بۇ «مَعارِج» لارنىڭ ئالىملار قۇرۇت تۆشۈكلىرى دەپ ئاتايدىغان نەرسىلەر ئىكەنلىكىنى بىلدى.
بۇ بولسا قۇرۇت تۆشۈكىنىڭ بىر پارچە رەسىمى.

   

پەرىشتىلەرنىڭ قانداق قىلىپ ئالەمدىكى ھەرقانداق بىر جايغا سىز مۇشۇ بىر جۈملىنى ئوقۇپ بولغۇچە بېرىپ بولالايدىغانلىقىغا قاراڭ.

           مۇسۇلمانلار يەنە قۇرۇت تۆشۈكلىرىنىڭ پەقەت پەرىشتىلەرنىڭ ئىشلىتىشى ئۈچۈنلا بېرىلگەن ئەمەسلىكىگىمۇ ئىشىنىدۇ. ئۇلارنىڭ پەيغەمبىرى قۇرۇت تۆشۈكىنى «ئىسرا ۋە مىراج» دا بىر قېتىم ئىشلەتكەن (مىراج بولسا مەئەرجنىڭ بىرلىك شەكلى) (17- سۈرە 1- ئايەت). قۇرئان«يەجۇج-مەجۇج» تائىپىسىنىڭ قۇرۇت تۆشۈكى (مىراج) نى ئىشلەتكەنلىكىدەك يەنە بىر ئەھۋالنى تەسۋىرلىگەن.
          بۇ تائىپە (ئىنسانلارنىڭ تىلىنى چۈشەنمەيدىغان يەجۇج-مەجۇج) زېمىنغا ئېغىر بۇزغۇنچىلىق قىلىۋاتاتتى. ئۇلار زۇلقەرنەين ئىسىملىك بىر ئادەم سالغان ئىككى توسمىنىڭ سىرتىدىن كەلگەن. ئۇ بىر مىراجنىڭ ھەر ئىككى بېشىغا بىردىن ئىككى تۆمۈر توسما سالغان. مىراجنىڭ ئىككى بېشى ئىككى قۇلۇلە قېپىغا ئوخشايدۇ (زامانىۋى پەن-تېخنىكا تەسۋىرلىگەن قۇرۇت تۆشۈكىنىڭ كىرىش ئىشىكىگە تامامەن ئوخشاش).

        قۇرۇت تۆشۈكى پۈتۈنلەي سۈزۈك ھالەتتە بولىدۇ بىراق ئۇ ئۆزىنىڭ شەكلىنى ئۆزى قانداق جىسىمنىڭ ئىچىدە بولسا شۇ خىل جىسىمغا ئويىدۇ. بۇنداق ئەھۋالدا، ئۇ تاغنىڭ ئىچىدە شۇڭا ئۇ ئۆزىنىڭ شەكلىنى قۇلۇلە قېپى شەكلىدە تاغنىڭ ئىچىگە ئويغان. بۇ مىراجنىڭ ھەر ئىككى بېشى قۇلۇلە قېپى شەكلىدە. سۈرىدە تىلغا ئېلىنغان ئىككى قۇلۇلە قېپى بولسا مىراجنىڭ ئىككى كىرىش ئىشىكىدۇر.

       زۇلقەرنەين تۆمۈر پارچىلىرىنى ئېلىپ كېلىپ ئۇلارنى تەڭ مىقداردا مىراجنىڭ ئىككى بېشىنىڭ ئارىسىدا بۆلگەن. ئاندىن ئۇ تۆمۈرلەرنى ئېرىتىپ مىراجنىڭ ھەر ئىككى بېشىغا بىردىن توسما ياسىغان. شۇنىڭدىن كېيىن مىراجدىن ئۆتكىلى بولمىغانلىقى ئۈچۈن يەجۇج-مەجۇج زېمىنغا بۇزغۇنچىلىق سالالمىغان. بىر كۈنى بۇ توسما بۇزۇلىدۇ شۇنداقلا يەجۇج-مەجۇج يەرشارىغا قايتا بۇزغۇنچىلىق سالىدۇ.

        18- سۈرە 92- ئايەتتىن 99-ئايەتكىچە: ئاندىن ئۇ (ئاللاھ ئۇنىڭغا قولايلىق قىلىپ بەرگەن) يولغا ماڭدى(92). زۇلقەرنەين ئىككى تاغ ئارىسىغا يېتىپ بارغاندا، ئىككى تاغ ئالدىدا ھېچقانداق سۆزنى چۈشەنمەيدىغان  (يەنى ئۆزىنىڭ تىلىدىن غەيرى تىلنى بىلمەيدىغان) بىر قەۋمنى ئۇچراتتى(93). ئۇلار: «ئى زۇلقەرنەين! يەجۇج بىلەن مەجۇج يەر يۈزىدە ھەقىقەتەن بۇزغۇنچىلىق قىلغۇچىلاردۇر، بىز بىلەن ئۇلارنىڭ ئارىسىغا بىر توسما سېلىپ بېرىشىڭ ئۈچۈن، ساڭا بىر قىسىم مېلىمىزنى (باجغا ئوخشاش) تۆلىسەك بولامدۇ؟» دېدى(94). زۇلقەرنەين ئېيتتى: «ئاللاھنىڭ ماڭا بەرگەن نەرسىلىرى (يەنى كۈچ-قۇۋۋەت ۋە پادىشاھلىق سىلەرنىڭ ماڭا بېرىدىغان مېلىڭلاردىن) ئارتۇقتۇر، ماڭا ئادەم كۈچى ياردەم قىلىڭلار، ئۇلار بىلەن سىلەرنىڭ ئاراڭلارغا مۇستەھكەم بىر توسما سېلىپ بېرەي(95). ماڭا تۆمۈر پارچىلىرىنى ئېلىپ كېلىڭلار، (تۆمۈر پارچىلىرى دۆۋىلىنىپ) ئىككى تاغنىڭ ئارىسى تەكشى بولغاندا، كۆيۈكلەرنى بېسىڭلار». تۆمۈر پارچىلىرى (قىزىپ) ئوتتەك بولغاندا، ئۇ: «ماڭا (ئېرىتىلگەن مىسنى) بېرىڭلار، ئۈستىگە تۆكەي» دېدى(96). ئۇلار (يەنى يەجۇج-مەجۇج) ئۇنىڭ ئۈستىگە چىقىشقىمۇ، ئۇنى تېشىشكىمۇ قادىر بولالمىدى(97). زۇلقەرنەين ئېيتتى: «بۇ (يەنى توسمىنىڭ بەرپا قىلىنىشى) پەرۋەردىگارىمنىڭ نېمىتىدۇر، پەرۋەردىگارىمنىڭ ۋەدىسى ئىشقا ئاشقاندا، ئۇ ئۇنى تۈپتۈز قىلىۋېتىدۇ، پەرۋەردىگارىمنىڭ ۋەدىسى ھەقتۇر»(98). ئۇ كۈندە (يەنى قىيامەت كۈنىدە، قىستاڭچىلىقتىن) كىشىلەرنى بىر-بىرىگە گىرەلەشتۈرۈۋېتىمىز، سۇر چېلىنىدۇ، ئۇلارنى (ھېساب ئۈچۈن) يىغىمىز(99).
***********************************************************************
     يۇقارقى مۇھەممەد سالىھ ھاجىم تەرجىمە قىلغان ئۇيغۇرچە تەرجىمىدىكى ئايەتلەر بىلەن مەن بۇ تېمىنى تەرجىمە قىلغان مەنبەدىكى ئىنگلىزچە تەرجىمىدىكى ئايەتلەر ئارىسىدا قىسمەن پەرقلەر بار. چۈشىنىشلىك بولۇش ئۈچۈن پەرقلىق جايلىرىنىلا ئۆزگەرتىشنى لايىق تاپىم: مەسىلەن:
زۇلقەرنەين (مىراجنىڭ ئىچدىكى) ئىككى توسمىنىڭ ئارىسىغا يېتىپ بارغاندا، توسمىنىڭ سىرتىدا ئىنسانلارنىڭ تىلىنى چۈشەنمەيدىغان بىر قەۋمنى ئۇچراتتى(93).
     ئۇلار (يەرلىك خەلقلەر): «ئى زۇلقەرنەين! يەجۇج بىلەن مەجۇج يەر يۈزىدە ھەقىقەتەن بۇزغۇنچىلىق قىلغۇچىلاردۇر، بىز بىلەن ئۇلارنىڭ ئارىسىغا بىر توسما سېلىپ بېرىشىڭ ئۈچۈن، ساڭا بىر قىسىم مېلىمىزنى (باجغا ئوخشاش) تۆلىسەك بولامدۇ؟» دېدى(94).
      ماڭا تۆمۈر پارچىلىرىنى ئېلىپ كېلىڭلار، (تۆمۈر پارچىلىرى دۆۋىلىنىپ) ئىككى قۇلۇلە قېپىنىڭ (مىراجنىڭ ئىككى كىرىش ئىشىكىنىڭ) ئارىسى تەكشى بولغاندا، كۆيۈكلەرنى بېسىڭلار». تۆمۈر پارچىلىرى (قىزىپ) ئوتتەك بولغاندا، ئۇ: «ماڭا (ئېرىتىلگەن مىسنى) بېرىڭلار، ئۈستىگە تۆكەي» دېدى(96).
ئۇلار (يەنى يەجۇج-مەجۇج قۇلۇلە قېپىنىڭ يەنە بىر تەرىپىدىن) كىرەلمىدى، (تۆمۈر توسمىنى) بۇزۇشقىمۇ قادىر بولالمىدى(97).
***********************************************************************

ئەرەب تىلىدىكى «ٱلسَّدَّيۡنِ» سۆزىنىڭ مەنىسى «ئىككى توسما» دېگەنلىك بولىدۇ، ھالبۇكى بۇ سۆز باشقا تىللارغا «ئىككى تاغ» دەپ خاتا تەرجىمە قىلىنغان. ئەرەب تىلىدىكى يەنە بىر سۆز«ٱلصَّدَفَيۡنِ» نىڭ مەنىسى «ئىككى قۇلۇلە قېپى» دېگەنلىك بولىدۇ، ھالبۇكى بۇمۇ «ئىككى تاغ» دەپ خاتا تەرجىمە قىلىنغان. قۇرئاننىڭ خاتا تەرجىمە قىلىنىشى باشقا تىللاردا خاتا چۈشەنچىلەرنى بېرىپ قويىدۇ. شۇنىڭ ئۈچۈن ئامال بار ئەرەبچە قۇرئاندىن پايدىلىنىڭ.

يەجۇج-مەجۇج تائىپىسى ئىككى توسمىنىڭ سىرتىدا (مِن دُونِهِمَا) توسۇپ قويۇلغان، ھەرگىز ئىككى توسمىنىڭ ئارىسىدا (مِن بينهما) ئەمەس. ناۋادا ئۇلار «ئىككى توسمىنىڭ سىرتىدا»بولسا، ئۇنداقتا قانداق بولۇپ توسۇلۇپ قالىدۇ؟
ئۇلار پەقەت ئىككىنچى توسما يەرشارىدا بولمىغان ئەھۋال ئاستىدىلا توسۇلۇپ قالىدۇ. بۇ مىراجنىڭ ئىككىنچى بېشى يەر شارىدا بولىشىمۇ مۇمكىن، شۇنداقلا ئالەمدىكى باشقا ھەرقانداق بىر جايدا بولىشىمۇ مۇمكىن. بۇنداق ئالاھىدە ئەھۋالدا، ئۇ چوقۇم باشقا بىر پىلانېتتا. شۇنداق بولغاندا يەجۇج-مەجۇج  ئىككى توسمىنىڭ سىرتىدا توسۇلۇپ قالىدۇ بىراق يەر شارىدا ئەمەس باشقا پىلانېتتا توسۇلۇپ قالغان بولىدۇ. كۈنلەرنىڭ بىرىدە بۇ توسمىلار بۇزۇلىدۇ شۇنىڭ بىلەن يەجۇج-مەجۇج تائىپىسى شۇ پىلانېتتىن يەر شارىغا تاجاۋۇز قىلىپ كىرىدۇ.

ئىسلام دىنىدا ھاياتلىق يالغۇز يەر شارىغىلا باغلانغان ئەمەس. باشقا پىلانېتلاردىمۇ يەر شارىدىكىگە ئوخشاش ھاياتلىق مەۋجۇت. شۇنداقلا بارلىق جانلىق ۋە جانسىز نەرسىلەر ئاللاھقا تەسبىھ ئېيتىپ تۇرىدۇ.

         17- سۈرە 44- ئايەت: يەتتە ئاسمان-زېمىن ۋە ئۇلاردىكى مەخلۇقاتلار ئاللاھنى پاك دەپ بىلىدۇ، (كائىناتتىكى) قانداقلىكى نەرسە بولمىسۇن، ئاللاھنى پاك دەپ مەدھىيىلەيدۇ (يەنى ئاللاھنىڭ ئۇلۇغلۇقىنى سۆزلەيدۇ)، لېكىن سىلەر (تىلىڭلار ئوخشاش بولمىغانلىقى ئۈچۈن) ئۇلارنىڭ مەدھىيىسىنى سەزمەيسىلەر، ئاللاھ ھەقىقەتەن (بەندىلىرىگە) ھەلىمدۇر (يەنى ئاسىيلىق قىلغانلارنى جازالاشقا ئالدىراپ كەتمەيدۇ، (تەۋبە قىلغۇچىلارنى) مەغپىرەت قىلغۇچىدۇر.
          16- سۈرە49-، 50- ئايەتلەر: ئاسمانلاردىكى ۋە زېمىندىكى ھايۋاناتلار، پەرىشتىلەر ئاللاھقا سەجدە قىلىدۇ، ئۇلار (ئاللاھقا سەجدە قىلىشتىن) چوڭچىلىق قىلىپ باش تارتمايدۇ(49). ئۇلار ئۆز ئۈستىدىكى پەرۋەردىگارىدىن قورقىدۇ، ئۆزلىرىگە بۇيرۇلغاننى قىلىدۇ(50).

يەرشارىنىڭ ئۆزىدىلا يەر شارى بىلەن ھاياتلىق مەۋجۇت بولغان يەنە بىر پىلانېتىنى تۇتاشتۇرىدىغان بىر قۇرۇت تۆشۈكى بار.

**************************************************************
ئەسسالامۇ ئەلەيكۇم!
        بۇ تېما ئىنگلىزچە مەنبەلەردىن تەرجىمە قىلىنغان. شۇ سەۋەبتىن ئەسلى يازمىنىڭ مەزمۇنىنى ساقلاپ قېلىش ئۈچۈن ئۆز پېتى تەرجىمە قىلىشقا تىرىشتىم. ماقالىنىڭ بىر قىسىم جايلىرىدىن كۆرۈۋېلىش تەس ئەمەسكى، ئەسلى ماقالىنى يازغۇچى مۇسۇلمان بولماسلىقى چوقۇم. شۇڭا كۆپچىلىكنىڭ ئالدىراپ ھاياجانلىنىپ كەتمەسلىكىنى ئۈمىد قىلىمەن.
        مەن ئۆزۈم ھەر بىرىڭىزلەرگە ئوخشاشلا ئاللاھنىڭ ئاددى بەندىسى بولۇش بىلەن بىرگە، چەكسىز كائىنات سىرلىرىغا قىزىققۇچى خىيالپەرەسمەن. تەپەككۇر قىلىش ئىنسان بولۇشنىڭ بىر قىسمى بولۇپلا قالماي ئۈستىمىزدىكى مەجبۇرىيەتتۇر. مېنى ئايەتنى ئۆزگەرتىشكە پېتىنىپسەن دەپ ھۆكۈم پىچىۋەتمەسلىكىڭلارنى   سەمىيمىلىك بىلەن سورايمەن. ئايەتنى ھېچكىم ئۆزگەرتەلمەيدۇ، مەن پەقەت ئىككى خىل تەرجىمىدىكى پەرقنى كۆرسىتىشنى مەقسەت قىلدىم. ئەسلى مەنبەدىكى تەرجىمە بىلەن سېلىشتۇرمىسام يازمىنىڭ تېخىمۇ چۈشىنىكسىز چىقىپ قېلىشى چوقۇم ئىدى.

        مۇشۇ تېمىدىكى نۇقتىلارنى چىقىش قىلىپ كەڭ ئەقلىي ئويغاق قېرىنداشلىرىمنىڭ پىكىر قاتناشتۇرۇشىنى شۇنداقلا چولتا بىلىمىم بىلەن قىلغان تەرجىمەمدە مەسىلە بايقىسا تۈزىتىش بېرىشىنى ئۈمىد قىلىمەن.

تېمىنىڭ ئەسلى مەنبەسى: http://www.speed-light.info/islam_life_other_planets.htm

Weliyop

    ئارىمىزدىن سىزدەك بىلىملىك زاتلىرىمىز تىخمۇ كوپ يىتىشىپ چىققاي ،3تىللىق ئىكەنسىز ئاللا سىزگە تىخمۇ غەيرەت شىجائەت ئاتاقىلىپ ئەجىرىڭىزنى بەرگەي.

katipim

ھەقىقەتەن ياخشى تەپەككۇر. مەنمۇ نۇرغۇن سىرلارنى قۇرئاندىن ئىزدەشكە تىرىشىمەن. ئەمما مەندە ئۇنچىلىك بىلىم يوق.
بەزى جايلىرىنى چۈشەنمىدىم. بەلكىم بىلىمسىزلىكىمدىن بولسا كېرەك.

786t

ناھايىتى ياخشى ئەسەرلەرنى يوللاپسىز ساقلاپ قۇيۇشقا ئەرزىگۈدەك، سىزگە ئاللاھ رەھمەت قىلغاي . تېخىمۇ كۆپ بىلىملەردىن خەۋەردار قىلغايسىز .

Alchvn

ناھايىتى ياخشى تېما ئىكەن

مەنمۇ بىر قېتىم بىر پارچە خەنزۇچە يېزىلغان قۇرئان ۋە ھازىرقى ئىلىم-پەن توغۇرلۇق يېزىلغانىكەن 百度uyghur吧 غا چىقىرىپ قويسام مېنى «دىنسىز»،«كۇفىر» دىيىشىپ كەتتى،ئۇنىڭ سەۋەبى مېنىڭ ئۇلۇغ قۇرئاندا ئاللاھ ئاللا بۇرۇن يېزىپ قالدۇرۇپ بولغان نەرسىلەرنى فىزىكىدا باشقىدىن تەتقىق قىلىپ ئولتۇرۇشۇم ئاللانىڭ كىتابىغا ئىشەنمەسلىك ئىكەن .زادىلا چۈشۈنەلمىدىم ،مېنىڭ ئەقىلىم كاممۇ ياكى باشقىلارنىڭ مەسىلىلەرنى ئويلاش ئۇسۇلى خاتامۇ ؟ پەيغەمبەرمۇ ئوقۇڭلار ئۈگۈنۈش قىلىڭلار دىگەن ، فىزىكا ئۈگەنمەڭلار ،ئالەمنىڭ سىرىنى تەتقىق قىلماڭلار دىمىگەن ئىدىغۇ ؟ نىمە ئۈچۈن بىز دائىملا ئىلم-پەن بىلەن ئىسلامىيەتنى ئايرىپ قارايمىز ؟

مېنىڭچە ئىلىم-پەننىڭ يۇقىرە پەللىسىدە ئىسلامىيەتنىڭ ھەق يول ئىكەنلىكى ئىسپاتلىنىدۇ . مۇشۇنىڭ ئۈچۈن ئىسلامنى بىلىدىغان ئىلىم -پەنگىمۇ ئىشيتىياق بىلىدىغان ئالىم تەتقىقاتچىلىرىمىز كۆپلەپ چىقسۇن ! ھېچقانداق بىر ئەرەب دۆلىتى ئىلىم -پەننى ئىسلامغا ئۇيغۇن ئەمەس دەپ پەننى ئوقۇشنى توختاتقىنى يوق !! كاللىسى ئىشلىسە مۇشۇ سادا خەلقىمىز تىرىشىم بىلىم ئىگەللەپ ئۆزىى بىلىم بىلەن قوراللاندۇرۇپ ئۆزىنىڭ ئەمەلى ھەركىتى بىلەن ئىسلامدىن تېرورچى ئەمەس تەتقىقاتچى چىقىدىغىنى ،بىكار تەلەت ئەمەس بىلىم -پەشۋاسى چىقىدىغىنى ،مۇسۇلمانلارنىڭ كۈندىن كۈنگە زەيىبلىشىۋاتقىنىنى ئەمەس كۈنسىرى تەرەققى قىلىۋاتقىنىنى ،كۈچ قۇدرەتكە تولغىنىنى بىلدۈرۈشى كېرەك ئىدىغۇ !
ئۈگۈنۈش ھەربىر مۇسۇلمان ئۈچۈن سۈننەتدۇر ! ئۈگۈنۈڭ ،ئاللانىڭ كىتابىنىمۇ ئۈگۈنۈڭ ،ئۇقۇپ تۇرۇپ ،مەنىسىنى چۈشۈنۈپ ئۈگۈنۈڭ !بولمىسا بىر كۈنى ئاتالمىش پېشىۋالار سىزنى قانداق ئالدىغىنىنى ،سىزدىن قانداق پايدىلىنىۋاتقىنىمۇ بىلمەيسىز !
ئۈگۈنۈڭ ،تىرىشىپ بىلىم ئېلىڭ !مۇسۇلمانلارنىڭ تەرەققىياتى بىلىم ئىگىلىرىنىڭ قولىدا ،بەلكىم سىزنىڭ تەتقىقات نەتىجىسى مەلۇم بىركۈنلەرردە ئاللانىڭ خاسىيىتىنىڭ دەلىلى بولۇپ تېخىمۇ كۆپ كىشلەرنىڭ مۇئەللەف بولۇپ ئىسلامغا كىرىشىغا سەۋەبجى بولۇپ قالسا ئەجەب ئەمەس !

تاي

قالتىس قالتىس قالتىس

yamdak

ئەسسالامۇ ئەلەيكۇم ،ھاياجانلانمايلى قېرىنداشلار،بۇ پەقەتلا بىر پەرەز.بۇنداق پەرەزلەر ھامىنى چىقاتتى .قېرىنداشلىرىم تاشقى پىلانىتتىكى جانلىقلارنىڭ مەۋجۈت ياكى ئەمەسلىكى ئىسلامدا مۇھىم بولسا چوقۇم پەيغەمبەر سەللەللاھۇ ئەلەيھى ۋەسسەللەم ھەدىس ئارقىلىق بىزگە قالدۇراتتى ۋە ئەگاھلاندۇراتتى .شۇنىسى ئېنىقكى ئاللاھ ئىبلىستىن باشقا بارلىق پەرىشتىلەرنى ئادەم ئەلەھىسسالامغا ھۆرمەت تەزىمى قىلغۇزغان .ئاللاھنىڭ ياردىمى بىلەن قىياماتكىچە كائىناتنى ئىنسانلغا پايدىلىنىش ئۈچۈن بىرىدۇ ،ئۇلاردىكى جانلىقلارنىڭ ئەقىل ئىدىراكى ھامىنى ئىنساندىن تۆۋەن تۇرۇدۇ .يەرشارىنى مىسالغا ئالايلى :ئۆكۈزنىڭ كۈچى ئىنساندىن كۈچلۈك لېكىن ئىنسان چەپداسلىقى ۋە ئىقىل پاراسىتى بىلەن ئۇنىڭ بوغۇزلايدۇ .يولۋاش شىر قاتارلىق ھايۋانلارنىمۇ شۇنداق .بەلكىم باشقا پىلانىتلاردا پەن تېخىنىكىسى ئىلغار كەتكەن جانلىقلار بولۇپ قالسا ئۇلار تاجاۋۇز قىلدى دىگەندىمۇ مەلۇم نەرسە ئىنساندىن چوقۇم كەمتۇك بولىشى ئېنىق .ئاللاھ ئىنساننى سىناش ئۈچۈن ھەر قىسمەتلەرگە دۇچار قىلىدۇ .كائىناتتىكى جانلىقلار مەسىلىسىنى نېرۋىنى جىددىلەشتۇرۇش يۈكسەكلىكىدە قارىمىساقمۇ بولىدۇ .ئاللاھنىڭ مەۋجۇتلۇقىغا تەستىق قىلدۇق ،ئۇنىڭ قانونىنى تەستىق قىلدۇق .ئەگىشىمىز دەپ لەۋزە قىلدۇق ،پەيغەمبىرىگە تەستىق قىلدۇق ،ئەگىشىمىز دەپ لەۋزە قىلدۇق .شۇڭا ئەركەكلىك جاسارىتىمىز بىلەن لەۋزىمىزنى ئەمەلگە ئاشۇرايلى !!!!!!!