ئىنكاس يېزىپ تۇرۇڭلار
ئىنكاس يېزىپ قۇرداشلار بىلىم –كۈچكە تولۈڭلار،
ئىنكاس يېزىپ سىرداشلار ئۇرۇق-تۇققان بولۇڭلار،
ئىنكاس بىلەن يولداشلار يېقىن بولار يولۇڭلار،
شۇڭا دەيمەن تورداشلار ئىنكاس يېزىپ تۇرۇڭلار.
ئېسىل تېما –ئىنكاستىن خەستە دىللار ئىچىلار،
مۇنبەرلەردە كېسەلگە شىپا –داۋا تېپىلار،
بويۇن قىسىپ قالمىسۇن مۇنبەردىكى تېمىلار،
شۇڭا دەيمەن تورداشلار ئىنكاس يېزىپ تۇرۇڭلار.
ئالدىراشلىق ئىچىدە بوش ئەمەسمۇ قولۇڭلار،
ياكى يوقمۇ تورداشلار ئىنكاس بىلەن خوشۇڭلار،
كام ئەمەسقۇ ھېچكىمدىن بارغۇ ئەقلى-ھۈشۈڭلار،
شۇڭا دەيمەن تورداشلار ئىنكاس يېزىپ تۇرۇڭلار.
ئىنكاس بىلەن ياشنايدۇ ئىجادكارلار يۈرىكى،
سىڭگەن ھەر بىر تېمىغا شائىرلارنىڭ تىلىكى،
تالماس ھەرگىز ئۇلارنىڭ سىلەر ئۈچۈن بىلىكى،
شۇڭا دەيمەن تورداشلار ئىنكاس يېزىپ تۇرۇڭلار.
ياخشى ئىنكاس بېرىدۇ قەلىبلەرگە تەسەللى،
دەۋەرسەڭلار قاملاشماس كۈندە بىر خىل "ھەببەللى"،
ئىنكاس دىمەك شائىرنىڭ ئالغان بايلىق ھوسولى،
شۇڭا دەيمەن تورداشلار ئىنكاس يېزىپ تۇرۇڭلار.
ئىنكاس دىسەم"ياخشى"نى ياغدۇرماڭلار توننىلاپ،
سانچىماڭلار نەشتەرنى ھەقىقەتنى بورمىلاپ،
ئوت ئۈستىگە ياغ چېچىپ تۇغدۇرماڭلار ئىختىلاپ،
شۇڭا دەيمەن تورداشلار ئىنكاس يېزىپ تۇرۇڭلار.
ئەمەس ھەرگىز ۋەزىپە ئىنكاس يېزىش سىلەرگە،
پۇچەك ئىنكاس ياغدۇرۇپ،تۆكمە قىلماڭ مۇنبەرگە،
"ئاز بولسىمۇ،ساز بولسۇن"ھۆسۇن قوشسۇن ئەسەرگە،
شۇڭا دەيمەن تورداشلار ئىنكاس يېزىپ تۇرۇڭلار.
ئېچىلارمۇ باغدا گۈل ،ئاشىق بولبۇل بولمىسا،
يازالمايدۇ شائىرمۇ ئىلھام قانات قاقمىسا،
"بولماپتۇ"نى دەۋېرىڭ ئەسەر سىزگە ياقمىسا،
شۇڭا دەيمەن تورداشلار ئىنكاس يېزىپ تۇرۇڭلار.
ئىنكاس دىگەن ئەينەكتۇر يازغۇچىغا-شائىرغا،
مۇنبەر بولسا كەڭ سەينا سىزدەك،بىزدەك ماھىرغا،
ئۆگۈنۈش ھەم ئۆگۈتۈش چىقسۇن دەيمەن زاھىرغا،
شۇڭا دەيمەن تورداشلار ئىنكاس يېزىپ تۇرۇڭلار.
