يېمەكلىكنىڭ تەمى يېمەكلىك ماتېرىيالىنىڭ سۈپىتى، يېڭىلىق دەرىجىسى، تەييارلاش ئۇسۇلى ۋە تەم خۇرۇجلار بىلەن زىچ مۇناسىۋەتلىك بولغاندىن سىرت، يەنە يېمەكلىكنىڭ تېمپېراتۇرىسى بىلەنمۇ مۇناسىۋەتلىك بولىدۇ، بىراق كۆپ سانلىق كىشىلەر بۇ نۇقتىغا سەل قارايدۇ ياكى ئۇنى ئۇنتۇپ قالىدۇ. ئەمما، ئالىي دەرىجىلىق ئاشپەزلەر بۇ نۇقتىغا سەل قارىمايدۇ. ئۇنداقتا، قانداق تېمپېراتۇرىدا يېمەكلىكنىڭ تەمى ئەڭ ياخشى بولىدۇ؟ بۇ، ئەلۋەتتە، يېمەكلىكنىڭ يېيىلگەن پەسلى ۋە يېمەكلىكنىڭ تۈرىگە باغلىق بولىدۇ.

تەتقىقاتچىلارنىڭ يېمەكلىكنىڭ تېمپېراتۇرىسى بىلەن تەمى ئۈستىدە ئېلىپ بارغان تەتقىقاتىنىڭ نەتىجىسىگە قارىغاندا، ئوخشاش بىر خىل يېمەكلىكنىڭ ئېغىزغا سالغاندىكى تېمپېراتۇرىسى ئوخشاش بولمىسا، ئادەمگە بېرىدىغان تەم تۇيغۇسىمۇ ئوخشاش بولمايدىكەن. ئوزۇقشۇناسلار، ئادەتتە، يېمەكلىكنىڭ تەمى بىلەن تېمپېراتۇرىسىنىڭ مۇناسىۋىتىگە ئاساسەن، يېمەكلىكلەرنى سوغۇق يېمەكلىك ۋە ئىسسىق يېمەكلىك، دەپ ئىككىگە ئايرىيدۇ. سوغۇق يېمەكلىكلەرنىڭ تېمپېراتۇرىسى، ئادەتتە، ئون گىرادۇس ئەتراپىدا، مۇزلىتىلغاندا نۆل گىرادۇس بىلەن ئالتە گىرادۇس ئارىلىقىدا تەمى ئەڭ ياخشى بولىدۇ. سوۋۇتۇلغان قايناق سۇنىڭ تېمپېراتۇرىسى 12 گىرادۇس بىلەن 15 گىرادۇس ئارىلىقىدا بولغاندا، ھەم ئۇسسۇلۇقنى قاندۇرىدۇ، ھەم ئادەمنى ھۇزۇرلاندۇرىدۇ. گازلىق سۇنىڭ تېمپېراتۇرىسى بەش گىرادۇس بولغاندا، سالقىنلىتىش ۋە ساقلىقنى ساقلاش ئۈنۈمى ئەڭ ياخشى بولىدۇ، تاۋۇز سەككىز گىرادۇستا ھەم سوغۇق، ھەم تاتلىق تۇيۇلىدۇ.

ئىسسىق يېمەكلىكلەرنىڭ تېمپېراتۇرىسى، ئادەتتە، 60 گىرادۇس بىلەن 65 گىرادۇس ئارىلىقىدا بولغاندا، تەمى ئەڭ ياخشى بولىدۇ. مەسىلەن: كالا سۈتى 65 گىرادۇستا ئىچىشلىك بولىدۇ. ھەسەلنى، ئادەتتە، تېمپېراتۇرىسى 65 گىرادۇستىن تۆۋەن ئىلمان قايناق سۇغا ئارىلاشتۇرۇپ ئىچسە مۇۋاپىق بولىدۇ، بەك قىزىق قايناق سۇ ھەسەلنىڭ تەمىنى ئۆزگەرتىپ، چۈچۈمەللەشتۈرۈپ قويىدۇ، ئوزۇقلۇق تەركىبىنى تۆۋەنلىتىۋېتىدۇ.

ئەلۋەتتە، يېمەكلىكنىڭ تەمى يەنە مۇھىتنىڭ تېمپېراتۇرىسى بىلەنمۇ بەلگىلىك مۇناسىۋەتتە بولىدۇ. ئىسسىق يېمەكلىكلەرنى ئىستېمال قىلغاندىمۇ مۇھىت تېمپېراتۇرىسىغا چوقۇم دىققەت قىلىش كېرەك، ئۇلار قازاندىن چىققاندا تېمپېراتۇرىسى يۇقىرىراق بولىدۇ، ئۇلارنى مۇۋاپىق سوۋۇتۇپ ئىستېمال قىلغاندا تەمى كۆڭۈلدىكىدەك بولىدۇ.

مەنبە : شىنجاڭ گېزىتى  

ئەتتىگەندە  قىسقا  ئېسىل ماقالىدىن بىرنى ئوقۇشقا  پۇرسەت  بەرگىنىڭىزدىن تولىمۇ  سۆيۈندۈم !

بىزئاشپەزلەركۆرۈپ دىققەت قىلىدىغان ياخشى تىما ئىكەن رەھمەت سىزگە!!!!!!!

مانا ماۋۇ ئۆزى ئۆلچەم!  

تاماق دىگەننى قوروشنىلا بىلمەي كەسپى ئەخلاق بىلەن مۇشۇنداق ئىشلارغا كۆپرەك دىققەت قىلغان ياخشى