بارلىقىمنى بېرەي ساڭا

مايسىخان

	كەل قەدىردان قولۇڭنى بەر قەلبىمنى بېرەي، ھايات شېرىن- مۇھەببەتتە، مېھرىمنى بېرەي. تىك ياشىغىن، نىسىۋەڭ بار ئايدا، قۇياشتا، گۈل بېغىڭغا ھارارەتتىن تەپتىمنى بېرەي. داستىخان سالاي خامىنىڭنى سوقسا جۇت بوران، چاي ئىچەيلى بىر چىنىدىن تۇرۇپ يانمۇ- يان. ئالتە كۈنلۈك قونالغۇ بۇ، ھەممىمىز مېھمان، ئادەملەرگە ئادىمىيلىك قەرزىمنى بېرەي. گەر چاڭقىساڭ مېنى بۇلاق دەپ بىلگىن، قانات قاقساڭ يەنە سۈزۈك ئاسمان دەپ بىلگىن. غەملەنمىگىن مۈشكۈلىڭدە خاقان دەپ بىلگىن، ئاتەش قوللار ساڭا تاجۇ- تەختىمنى بېرەي. مېھىر- ۋاپا ئېقىن بولۇپ قالسۇن يۈرەككە، چىن سۆيگۈدىن تولسۇن ئالەم گۈلگە- چېچەككە. نېمە يەتسۇن بۇ دۇنيادا باغرى كەڭلىككە، تەڭ كۈلەيلى، كېرەك قىلساڭ بەختىمنى بېرەي. بۇنىڭدىن ئۈچ يىل مۇقەددەم سەن قوللىرىمنى چىڭڭىدە سىقىپ ئوتلۇق مېھرىڭ بىلەن، ئىشەنچكە تولغان كۆزلىرىڭنى كۆزلىرىمگە تىكىپ تۇرۇپ: -مەرىم،  سېنى ئۆمۈرۈمنىڭ ئاخىرغىچە كۈلدۈرىمەن، كۆزلىرىڭدىن چىققان ياشمۇ خوشاللىق يېشى بولىدۇ، دېگەن ئىدىڭ. مانا ئۈچ يىل ئۆتۈپ، بۈگۈنگە قەدەر سەن دېگىنىڭنى قىلىپ كەلدىڭ، بەرگەن ۋەدەڭنى ئورۇنلاش ئۈچۈن قىلىشقا تېگىشلىك ئىشنىڭ ھەممىنى قىلدىڭ، مەرىڭنى ۋە پەرىشتە سۈپەت شۇ ئوماق گۈللىرىڭنى كۈلدۈرۈش ئۈچۈن ھەر جاپالارنى بېشىڭدىن ئۆتكۈزدۈڭ.   بىز كۈلدۇق، بىزنىڭ كۈلكىمىزگە قاراپ سەنمۇ كۈلدۈڭ، ئەمما سەن بۇ كۈلكىلەرنى قولغا كەلتۈرگىچە قانچىلىك جاپالارنى چەكمىدىڭ؟ قانچە كېچىلەرنى ئۇيقىسىز ئۆتكۈزدۈڭ؟ لېكىن سەن ۋايسىمىدىڭ، مەيلى چارچىغىن ۋە مەيلى خاپىلىق تارتقىن بىزنىڭ ئالدىمىزدا چېھرىڭدىكى شۇ كۈلكەڭنى زىنھار يوقاتمىدىڭ. ھېلىمۇ ئېسىمدە سەن بىلەن تۇنجى قېتىم كۆرۈشكەندە كەڭ پېشانىلىرىڭ پارقىرىپ تۇراتتى، نە قورۇقتىن ئەسەر يوق ئىدى، مانا بۈگۈن پېشانەڭ ۋە كۆزلىرىڭ چۆرىسىدىكى بىزئۈچۈن چۈشكەن ئەشۇ قورۇقلىرىڭىنى كۆرگىنىمدە ئىچىلىرىم ئاچچىق بوپ كېتىدۇ. بۇ قېتىم مەن يۇرتقا قايتقاندا<< بىر خىزمەتدېشىم، مېنى چاچلىرىڭدىكى ئاقلار كۆپىيىپ، قورۇقلىرىڭ جىقىيىپ قاپتۇ، قېرىپ قاپسەن دېدى>> دەپ، ساڭا نارازى بولغاندەك ئۇچۇر يازغىنىمدا سەن: - ئەمەليەتتە بەخت ئىچىدە ياشاۋاتقانلار ئۈچۈن بۇ قورۇق ۋە ئاق چاچلار بىر زىننەت، دېدىڭ، بۇ سۆزۈڭنى ئاڭلاپ يازغان ئۇچۇرۇمغا خىجىل بولدۇم. قەدىرلىك قىسمەت، بۈگۈن مەن بۇ يەردە سېنىڭ ئەتىكى شۇ مۇبارەك كۈنىڭگە، يەنە ئانامنىڭ سېنى ئاپىرىدە قىلغان كۈنىگە، بەخت تۇيغۇسىغا چۆمۈلگەن شۇ خانىمىزدە يالغۇز ئولتۇرۇپ، بەكلا ئاددى، ئەمما قەلبىمنىڭ چوڭقۇر قاتلاملىرىدىن چىققان ھەققىقىي مۇھەببەتكە يۇغۇرۇلغان، چىن ئەقىدەمنىڭ سېمىۋۇلى سۈپەت سۆزلىرىم بىلەن ساڭا تەبىرىكنامە يېزىپ ئولتۇرۇپتىمەن. كاللامدا نۇرغۇن گەپلەر بار، ئەمما مېنىڭ قەلەم قۇۋىتىم ساڭىمۇ ئايان، مەن قانداقتۇر سېنى ھاياجانغا سالىدىغان پاساھەتلىك سۆزلەرنى قىلالمايمەن، پەقەت ئەڭ ئاددى سۆزلەر بىلەن ساڭا بەخت ۋە ئامانلىق تىلەيمەن! مېنىڭ بارلىق يۈرەك سۆزلىرىم يۇقۇردىكى ناخشىدا بار ئىكەن، ئەگەر نەچچە يىللار ئىلگىرى بولغان بولسا، چوقۇم ئۆزۈم ئېيتىپ بەرگەن بولاتتىم، لېكىن ھازىرقى تۇرۇقۇم ئۆزۈڭگە ئايان (سەھنە مېنى تېپىپ چۈشۈرۋېتىدۇ ھازىر) قىسمەت، ئەتە مېھرىبان ئانىمىزنىڭ سېنى يورۇق دۇنياغا ئاپىرىدە قىلغان كۈنى، مەن ئوماق قىزلىرىم  بىلەن بىرلىكتە سېنىڭ تۇغۇلغان كۈنىڭنى تەبىرىلەيمەن، ئۇلۇغ ئاللاھتىن مېھرىبان ئانىمىزغا جەننەت ماكان تىلەيمەن! تېنىڭ سالامەت، ئىشلىرىڭ بەرىكەتلىك بولسۇن! بەختلىك تۇرمۇشىمىز يامان كۆزلەردىن نېرى بولسۇن!

غۇنچەقىز

	يەنە بىر تېمىغا ئىنكاس يېزىۋاتاتتىم،مۇشۇ مەرىمگۈل(مەنمۇ شۇنداق دەۋالاي ھە)ھەدىنىڭ بۇنداق يازمىلېرى ئادەمنى بىرخىل تەسىرلەندۈرىدۇ.مانا بۇ مۇھەببەت،بۇنى ئوقۇپ تەسىرلەندىم،مەرىمئاي ھەدە ئەلۋەتتە ئېيتىپ بولغۇسىز ھاياجاندىدۇرمۇشۇنداق چىن نەرسىنىڭ ئادەمنى تەسىرلەندۈرۈش كۈچى ئەڭ زور بۇلىدىكەن،نېمە دەيمەن؟ھەقىقى بەخىتنىڭ،بەخىتلىك ئائىلىنىڭ سىماسىنى كىتابلاردىن كۆرۈپ قالغانمەن،ھەدەمنىڭ بۇنداق يازمىلېرىدىن بەخىتنىڭ شەجەرىسى مەۋج ئۇرۇپ تۇرىدۇ ،تور گەرچە مەۋھۇم دۇنيا بولسىمۇ بۇ مۇنبەردە بىزنىڭ كۆزىمىز ئەمەس،يۈرەكلېرىمىز شاۋقۇنسىز سۆزلىشىدۇ،..................(ھاياجاندا تېمىدىن چەتنەپ كەتمەكچى بولۇۋاتىمەن).........سىلەرگە ئۇلۇغ ئاللاھنىڭ سالامى بولسۇن،چىن قەلبىمدىن ئائىلەڭلارغا بەخىت تىلەيمەن،قىسمەت ئاكامنىڭ توغۇلغان كۈنىگە مۇبارەك بولسۇن.

ئەسمەتۇللاھ

	قىسمەتكامنىڭ تۇغۇلغان كۈنىگە مۇبارەك بولسۇن . تۇغۇلغان كۈنلەرنى دائىم مۇشۇنداق قۇرۇقلا تەبرىكلەمدۇق دەيمەن .

مايسىخان

	ئەسمەتۇللاھ يوللىغان ۋاقتى  2012-يىلى 9-ئاينىڭ 7-كۈنى 15:29 قىسمەتكامنىڭ تۇغۇلغان كۈنىگە مۇبارەك بولسۇن . تۇغۇلغا ... ئۈرۈمچىگە كېلىڭە تازا ھۆل تەبىرىكلەيمىز

قەمبەرنىسا

	مەرۋەرى ھەدەمنى تۇتۇش بۇيرىقى چىقىرىلىدىغانلار قاتارىغا كىرگۈزۈپ قويۇشنى ئىلتىماس قىلىمەن. بەزى يەرلىرىنى ئوقۇپ ھەقىقەتەن ھاياجانلاندىم. ھەركىمنىڭ ئۇنداق كۆڭۈللۈك، خاتىرجەم تۇرمۇشى بولىۋەرمەيدۇ. سىلەرگە بەخت تىلەيمەن مەرۋەرى ھەدە .

باتۇرچەۋەنداز

	قىسمەت ئەپەندىنىڭ تۇغۇلغان كۈنىگە مۇبارەك بولسۇن

باتۇرچەۋەنداز

	ئەسمەتۇللاھ يوللىغان ۋاقتى  2012-يىلى 9-ئاينىڭ 7-كۈنى 15:29 قىسمەتكامنىڭ تۇغۇلغان كۈنىگە مۇبارەك بولسۇن . تۇغۇلغا ... سىزگە ئەۋەتكەن سوۋغام قۇرۇقمىكەن

ئاھۇ

	قىسمەتنى يەنە بىر ياش قېرىتىۋەتكىنىڭىزنى تەبرىكلەمدۇقئاياللارغۇ تۇغۇتتىن كىيىن ئون ياش ياشىرىدۇ

مودەن

	تۇغۇلغان كۈنىڭىزگە مۇبارەك قىسمەتكا.مەرىم سىلەرگە بەخىت-ئامەت يار بولغاي،سىزدەك بىر مىھىربان ئايالى ،ئۇماق پەرزەتلىرى بولغاشقا قىسمەتكام جاپا تارتسىمۇ بىلىنمەيدۇ ئەلۋەتتە. سىز ناخشا ئېيتالمىسىڭىزمۇ،ئۇنىڭغا ئاتاپ شېر-رومانلارنى يازالمىسىڭىزمۇ لىكىن سىزنىڭ ئېيتقان ھەر-بىر سۆزلىرىڭىز بىر كۈيۈمچان ئايالنىڭ بىر  مىھىربان ئانىنىڭ چىن يۈرەك سۆزى ئەلۋەتتە.خوشاللىق سىلەرگەمەڭگۈ يار بولغاي

Aydar

	قىسمەتكا: تۇغۇلغان كۈنىڭىزگە مۇبارەك بولسۇن. راست گەپنى دىسەم سىلەرنىڭ ئائىلەڭلارغا كۆزۈم بەك قىزىرىدۇ، بوپمۇ نوپۇسۇڭلارنىڭ كۆپلىكىگە، ھەم قايىل بولىمەن. ئاللاھ سىلەرنى ئىناق، قوۋناق قىلغاي. مەرىگۈل: سىزمۇ بەك جاپا تارتتىڭىز. بالىڭىز تۇغۇلسا جاپا تارتىپ بېقىپ يۈرمەسلىكىڭىز ئۈچۈن ماڭا بىرىۋىتەرسىز.