بىر بەختىڭ -- تىلىڭ

nazinin

	بىر بەختىڭ ـــــــ تىلىڭ ئاي قىزىم ،ئېتىبار بەر :چىش ئاتالغان تاشتىن قورغان ياساپ ،لەۋلەردىن دەرۋازا قۇرۇپ ،تىلىڭنى قاماپ ،بۇمۇ ھەم يەتمىگەندەك ،ئەقىل ئۇنىڭغا پايلاقچى قىلىپ قويۇلمىشتۇر !بۇ يۇقۇرى ئېھتىياتكارلىق سېنى ھۇشيارلىققا باشلىسۇن ! تىلىڭ دىلىڭدىكىنى سېتىپ قويغۇچىدۇر .گاھىدا خېيىم –خەتەردىن قۇتلۇلدۇرۇپ قالىدىغىنىمۇ ،بېشىڭغا ھەر بالانى سالىدىغانمۇ ئەشۇ تىلىڭ . باي بولمىساڭ سېنى باي قىلىدىغان ، ئاي بولمىساڭ سېنى ئايدەك كۆرسىتىدىغان ئەشۇ تىل . دۇنيادا كىم سۆيۈملۈك بولۇپ ياشاپتۇ ، تىلى تۈپەيلىدىندۇر . تىلىڭ ئامىتىڭدۇر ،قىزىم ! سۆزنىڭ ئۇرامىغا قاراپ خۇش كۆرۈشىدۇ ، شۇنداق ئەمەسمۇ ؟ سەنمۇ سۆزلەشكىنىڭدە ، ئاۋال ئاۋازىڭنىڭ ئەڭ چىرايلىق پەدىسىنى تېپىپ سۆزلە . سەن ئادەم تاللىمىغىن ،سۆز تاللا .تېپىپ ئېيتىلغان سۆز دۈشمەننىمۇ دوستقا ئايلاندۇرىدۇ .كىشىنى ئۆزىگە دىققەت قىلدۇرىدىغىنى ھوش  ،ئىتتىرىدىغىنى بولسا سۆزدۇر ! دۇنيادا سۆزۈڭ يېقىملىق بولسۇن ! تېلىفون جىرىڭلىدى . ئۇنى «ۋەي » ياكى «ئوۋ» ۋە ياكى «ھە » دەپ ئەمەس ،«ئەسسالامۇ ئەلەيكۇم » دەپ ئالغىن ، شۇندا جاھىل بىلەن تۇرغان ئادەممۇ مومدەك ئېرىيدۇ . سۆزۈڭ ئۆز ئېغىزىڭغا تولۇپ تۇرغان جاۋاھىرىڭدۇر .ئۇنى ئۇچرىغان يەرگە چېچىپ ئۇۋال قىلما ، ئەمما ،كېرەك جايدىن قىزغىنىپ يۈتۈپمۇ كەتمە ، يەنە ئۇۋالىغا قالىسەن . جەھلىڭ بىلەن تۇرغاندا ،ياخشىسى سۆز ئېيتما .بۇ پەيتتە پېئىلنىڭ چېقىندىلىرى يۇقۇرى كۆتۈرۈلگەن بولىدۇ . سۆزۈڭ ئۇنىڭغا بۇلغىنىپ چىقىپ ئەتراپنى كىر قىلىدۇ .ئۇدۇلۇڭدىكىلەرگە سۆز قىل ،يەنى كىيىمى ياكى ئىش ياكى ئۇنىڭغا تېگىشلىك نەرسە ھەققىدە يېقىملىق پىكىر بىلدۈر .ئەمما ، سوئال سوراۋەرمە ! سورالمىغان نەرسە ھەققىدە ھىكايە قىلىۋەرمە . قىز بالىنىڭ ياخشىسى كەم سۆز قىلىپ ، كۆرەك ئاڭلىغىنىدۇر ! يېنىڭدىكى ئادەم سەندە يوشۇرۇن پەزىلەتلەر كۆپ دەپ بىلسۇن ، سىرلىق ساندۇقتەك تۇرساڭلا ئۇ ساڭا ئىنتىلىدۇ .يېقىن كىشىم دەپ سىر- ئەسرالىرىڭنى تىنماي ئېيتىۋەرسەڭ ،بىرىنچىدىن ، ئۇنىڭ ساڭا نىسپەتەن قىزىقىشى قالمايدۇ .ئىككىنچىدىن ، ئىنسانچىلىق –نۇقسانچىلىق ، ئۇنىڭ قېنىدا زەئىپلىكى بار بولسا ، ھەممە ئىشىڭدىن ئوبدانلا خەۋەردار بولغاچقا ، ساڭا بولغان ھەۋىسى ھەسەتكە ، ھەتتا رەقىپلىككە ئايلىنىپ كېتىشى مۈمكىن . ئەتراپىڭدىكىلەرنى سىنچىلاپ كۈزەت .كىمگە كىم ئەزىز ۋە نېمە ئەزىزلىكىنى دەررۇ پەملىيەلەيسەن .ئورنىنى تېپىپ ئەشۇ ياخشى كۆرگەن كىشىسى ۋە نەرسىسى ھەققىدە ئاڭلىغان ياكى بىلگەن ياخشى گەپلىرىڭ بولسا ئېيت ، كۆڭلى سۇ ئىچىدۇ .ئۇنى يايراتقىنىڭ ئۈچۈن كۆزىگە ئىللىق كۆرۈنىسەن .ئەمما يامان گەپ تەشكۈچى بولما . يېقىمسىز خەۋەرلەرنى سەندىن ئاڭلىمىسۇن .ھەر قېتىم سېنى كۆرگەندە ئەشۇ كۆڭۈلنى غەش قىلغۇچى خەۋەرنى ئەسلەپ ناخۇشلانغان كىشى سەندىن ئۆزىنى تارتىدۇ . ئاي قىزىم ! ئاۋازىڭنى كۆتەرگەن ھامانلا ئۆيۈڭدىن پەيز ،يۈزۈڭدىن ھۆسىن كۆتۈرىلىدۇ .جۈپتىڭنىڭ ساڭا بولغان ئىخلاسىمۇ سۇسلايدۇ .بالاڭنىڭ يۈزىدە كۈلۈپ تۇرغان ئاپتىپى سۇنىدۇ ، بۇ خۇنۈك كۆرۈنۈشىڭنى قوبۇل قىلالماي يۈرۈكى يىغلايدۇ ! چاڭىلداپ تەنبىھ بېرىدىغان ، چاڭىلداپ زارلىنىدىغان ئايال ئۆزى ۋەيران قىلغان كۆڭۈللەر ئىچرە سۆيۈملۈك بولىمەن دەپ ئۈمىد قىلمىسۇن ! بىلگىن ،تىل قىشنى باھارغا ئايلاندۇرىدۇ . ئاپتورى : تۇرسۇنئاي سادىقۇۋا(ئۆزبېكىستان ) مەنبە : ئاپتورنىڭ "قىزلارغا ئاتالغان نەق گەپلەر" دۇردانە توپلىمىدىن

ئەقىدە010

	نازىنىن رەھمەت سىزگە، مۇشۇنداق ئېسىل مەزمۇنلاردىن بىزنى ۋاقىپلاندۇرغىنىڭىزغا تەشەككۇر، سىز ئوقۇغان ئاشۇ كىتاب بىر يىلدىن بۇيان ماڭا ھەمراھ بولۇپ كېلىۋاتىدۇ، ئۇنىڭدىن نۇرغۇن ئىلھام ۋە تەربىيەلەرنى ئالغانمەن، نادىر مەزمۇنلارنى يەنە داۋاملىق يوللاپ خانىم-قىزلىرىمىزغا روھى ئوزۇق بېرىشىڭىزنى ئۈمىد قىلىمەن

dilroh

	ھەقىقەتەن ئېسىل  بىلىشكە تېگىشلىك مەزمۇنلاركەن پۇت يۈگۈرىكى ئاشقا ، ئېغىز يۈگۈرىكى باشقا . باش كېتىدۇ نەدىن ، ئېغىزى بالادىن دەپ تىلىمىزنى گۈزەل ئىلمىي ئەمما كەمتەر قىلىپ ئىشلەتسەك نىمە ياخشى ھە

hilal

	شۇ ... مۇشۇ تىلغا دىققەت قىلسام بولاتتى مەنمۇ ، ئاغزىمنىڭ ئىتتىكلىكىدىن تولا خاپىلىققا قالىمەن .... دىققەت قىلىشقا تىرىشىمەن ، ئىسىل تېمىڭىزغا كۆپ رەخمەت ، شۇ كىتاپنى بىر - بىرلەپ تۈكۈڭە مۇنبەرگە ، ئەجەپ ئىسىل كىتاپكەن دەيمەن ....

دىلەيسەم

	مەن بۇ كىتاپنى تېپىپ ، قىزىمنىڭ 18 ياشلىق تۇغۇلغان كۈنىگە سوۋغا قىلىش ئويىغا كەلدىم، شۇڭا چوقۇم ئىزدەپ تاپىمەن، دېلروھ سىز تاپالىسىڭىز ماڭا ئۇچۇر قىلارسىز ھە

nazinin

	دىلەيسەم ئىنتايىن ياخشى ئويلاپسىز ،قىزلار ئوقۇپ قويۇشقا ئەرزىگۈدەك ھەقىقەتەن ياخشى بىر كىتاپ . بۇ كىتابنى ئوقۇسا كېيىنكى ئائىلە تۇرمۇشىدا ئۇچرىغان مەسىلىلەرنى قانداق بىر تەرەپ قىلش ، قانداق   كېلىن ،ئانا ،قېيانا بولۇش جەھەتتە  بىر قەدەر ئەتراپلىق چۈشەنچىگە  ئىگە بولۇپ قالىدۇ .

دىلەيسەم

	رەھمەت نازىنىن! داۋامىنى يوللاشنى ئۇنۇتۇپ قالماڭ

anar

	جەھلىڭ بىلەن تۇرغاندا ،ياخشىسى سۆز ئېيتما مېنىلا دەپتۇ ،ئاسان رەنجىمەيمەن ئەمما شۇ  جەھلىم تۇتقاندا كىرپىدەك بوپ كېتىمەن دىسە ...شۇڭا ئامال بار گەپ قىلماي جىم تۇرىۋالىمەن ، ئىچىمدە :سەۋر قىل ئانار ، سەۋر ..دەپ يۈزچە قېتىم ئۆزەمگە ئۆزەم سەۋرتىلەپ پەقەت بولمىغاندا چىققان گېپىم نەشتەرلا بولىدۇ زادى ، شۇڭا بۇ تېما نەق ماڭا قارىتىلغانكەن ،كۈندە بىرە قېتىمدىن ئوقۇپ چىقىمەن ، شۇ سەۋەبلىك شۇ يامان خۇيلىرىمدىن قۇتۇلۇپ قالامدىم تېخى [ anar بۇ يازمىنى  2011-يىلى 4-ئاينىڭ 1-كۈنى 11:39  دە تەھرىرلىگەن. ]

Mehbub

	دوستلار مۇنبەرگە ئەزا بۇلۇپ تۇنۇشمايلا ئىنكاس يېزىپ كەتتىم، داۋاملىق ئۇچرىشىپ كىيىنچە ئوبدانلا تۇنۇشۇپ قالارمىز. نازىنىن : ئۇنچە-مەرۋايىتتەك دۇردانىلەرنى يازغان قوللىرىڭىزغا ئاللاھ دەرت بەرمىسۇن. سىز ئوقۇغان ئاشۇ كىتاپتىن ماڭىمۇ بىرنى تېپىپ بىرلەرسىزمۇ ؟ ماڭا ئېيتىلغاندەك سوزلەركەن بۇ، ئۇزۇمنى ھەم قىزىمنى ھەقىقى بىر ئانىلىق سالاھىيىتىگە يەتكۇزگۇم بار. ئىنسان ھەرۋاقىت كەمچىللىكتىن خالى ئەمەستە....

nazinin

	مەھبۇم ، مۇنبەرگە كەلگىنىڭىزنى قارشى ئالىمىز ،سىزنىڭمۇ ماڭا ئوخشاش بۇ  مۇنبەرگە تېزلا كۆنۈپ قالىدىغانلىقىڭىزغا ئىشىنىمەن . بۇ كىتابتىن بىرنى تېپىپ بېرىشىمنى ھاۋالە قىپسىز  ئىزدىنىپ باقاي ،چوقۇم تېپىپ بېرىمەن دەپ ۋەدە بېرەلمەيمەن ،لېكىن مۇشۇ مۇنبەردە  بۇ كىتابنى سىز ۋە مۇشۇ كىتابنى ياقتۇرىدىغان باشقا دوستلار بىلەن بىللە ئوقۇشقا كاپالەتلىك قىلالايمەن  .