پەرىشتە قونغان كېچە (دىلداش) [ئۇلانما كۆچۈرۈش]

پەرىشتە قونغان كېچە

(داستان)

كامىلجان ناسىر(دىلداش)

مۇقەددىمە

ۋاراقلىسام تارىخ بېتىنى،
يۈرۈكۈمگە تولار ھاياجان. 
ئەجدادلىرىم ئاشۇ تارىختا،  
باسقان ئۆچمەس ئىزلارنى ھامان.

قەدىم يىپەك يولىدىن ئىزدە،
شۇ ئەجدادلار رىسالىسىنى.  
ئىپتىخارلىق جامىنى سۇنۇپ،   
مەست قىلىدۇ سۆيگۈدىن سېنى.

تېبابەتتۇر مەدەنىيەتنىڭ،   
دېڭىزىدىن سۈزۈك بىر تامچە.   
شۇ تامچىدا قۇياش ئەكسى بار،
تاڭ قالىسەن نەزەر سالغانچە.

ھېس تۇيغۇڭدا لوقمان ھېكىم ۋە-  
ئبنىسىنا،يۈسۈپ،تەجەللى.  
كۈلۈمسىرەپ شۇنچە يېقىملىق،
غەمكىن دىلغا بېرەر تەسسەللى.

ئانا خەلقىم،ئانىجان ۋەتەن،
قاناتلانغان شۇنداق ئوغلاندىن.  
ئەلمىساقتىن كەلگەن رېتسىپلار،   
بىلسەڭ دوستۇم يېزىلغان قاندىن.
  
يۈرەك ئۆزى كىچىك بولسىمۇ،
ئەمما ئاڭا سىغىدۇ جاھان.  
شۇ جاھاندىن كۆرىسەن تېۋىپ،   
سىپاتىنى سىزىپ ھەر زامان.

تارتۇقلىنار شۇلارنىڭ نامى،
سۆيۈندۈرۈپ ھامان ئەۋلادنى.   
نەقىش قىلىپ ئويار يۈرەككە،   
تېۋىپ دېگەن سۆيۈملۈك ئاتنى.

1-باپ

مەڭگۈلۈك ئۇدۇم

ھاياتنىڭ رېتىمى ئۆتەر تېنىمسىز،   
باقماستىن ھېچكىمنىڭ ئەسلا رايىغا.   
تىرىشچان-ئشچانغا بېرەر نېسىۋە،
ۋەلېكىن پەرۋاھسىز ھورۇن زارىغا.  
  
ئۇ،شۇنداق رەھمسىز ھەم شۇنداق سېخي،   
ئەجىرلىك ئىنسانلار ئۇنىڭدىن كۈلەر.   
مەڭگۈلۈك ئەقىدە باغلاپ ئىشقىدىن،
تەر تۆكسە ئىزىدىن گۈل- چېچەك ئۈنەر.

ئات سالدىم بۇ يولغا ئىشقى مېھرىمدىن،   
مەنزىللەر بويلۇدۇم ئۈمۈد ئىچىدە.
تىبابەت پىرلىرى نۇرلاندى شۇدەم،  
بەك يىراق تارىخنىڭ شانلىق بېتىدە.

تۆھپىدىن تىكلەنگەن پىرامىدالار،
قوزغاتتى قەلبىمدىن تەششەككۈر- ئالقىش.   
ئەجدادىم تارىخنى ئۇلاپ تارىخقا،  
ياراتقاچ دۇنيادا شۇنداق كاتتا ئىش.

غۇرۇرۇردىن غۇرۇم ئالدى ئۇزۇق-جان،  
مۇقەددەس تۇيۇلدى ماڭا تىبابەت.
مەن ئاڭا باغلىدىم مەڭگۈلۈك ھەۋەس،   
سانىلىپ ئىشقىمدا ئۆچمەس مۇھەببەت.

ھاياتلىق قامۇسىم بېتىگە يازدىم،   
"مەڭگۈلۈك ئۇدۇم'' دەپ تېۋىپ بولماقنى.   
ھۆكىما -پىرلىرىم "كەلگىن ئوغلۇم"دەپ،   
مېھرىبان ئاتىدەك ئاچتى قۇچاقنى.

2- باپ

پەرىشتە قونغان كېچە


ئارزۇلار كەپتىرى قاقتى پەر- قانات،
يېڭى بىر مەنزىلدىن ئاچتىم يېڭى بەت.
نۇرلاندى كېلىچەك خىياللىرىمدا،   
سەزدىم مەن ئۆزۈمنى گۇيا شىر سۈپەت.

ئىجادتىن ھاياتقا بەردىم لاتاپەت،   
كېچەيۇ- كۈندۈزى تۆكۈپ ھالال تەر.
بوۋىلار ھېكمىتى يادىمدا ھامان،    
زېمىنغا يۈك بولۇر ئىجتىھادسىز ئەر.

ئۇنتۇغان ھەممىنى تەپپەككۇر كۆزۈم،
ئويلىسام كىتابلار ياستىقۇم بولار.   
ۋۇجۇدۇم ئايلانغان گۇيا پۇلاتقا،   
نە تومۇز،نە سوغۇق قىلالمايدۇ كار.   
  
ئاي كۈلگەن بىر كېچە چۈش پەرىشتىسى،
ئېپ كەتتى باغرىدا سەيلە ئېتىپ مېنى.   
خىزىردەك بىر بوۋاي ئېھتىرام بىرلە،   
تەۋرەتتى قەلبىمدە سۆيگۈ كەلكۈنى.

ئۇ،بىردەم سۆزلىسە "خىلىت" بابىدىن،   
ۋە بىردەم بىرەتتى "مىزاج"دىن ساۋاق.  
ھەر سۆزدە بىر دەنا ھېكمەت بولغاچقا،   
قوزغىلار قەلبىمدە ئاڭا ئىشتىياق.

سۆزلەيدۇ تارىختىن بىتاپتىن يەنە-  
تېۋپنىڭ مۇقەددەس خىسلەتلىرىدىن.  
تىبابەت قۇدرىتى كامالىتى ۋە،  
ئەل ئۈچۈن بەرگۈسى ھېممەتلىرىدىن.

ئۇ،-دەيدۇ:"تىبابەت خىسلەتلىك كەسىپ-   
كۈچىدىن بىتاپلىق قاچىدۇ يىراق.
نەزەر سال، دانىشمەن ،ئەۋلىيالارمۇ،   
تىبابەت كەسپىگە قىلغان ئىشتىياق.   

-شۇ سەۋەب تىبابەت ئىلمىنى بىلىش،
مۇھىمدۇر ھەر قاچان بىزنىڭ قەۋىمگە.
-ئەي ئوغلۇم ئۆتكەنلەر ئۈمىدى سەندە،  
قەلبىڭنى تولدۇرغىن ھېكمەت -ئېلىمگە"

ئۇ دەيدۇ-"ھەر قاچان بولسۇن سەمىڭدە،  
تېۋىپلىك ياقلايدۇ توغرا-راسلىقنى.
ھەقىقىي تېۋىپتۇر داۋاسى ھەمدە،-
ئەخلاقتىن ئەل ئۈچۈن بەرسە ساقلىقنى.  

-تېۋىپكە زۈرۈردۇر كامالەت بىلىم،
بىلىمسىز تېۋىپتۇر جاللاتنىڭ ئۆزى.  
راسچىللىق دانالىق تېۋىپ خىسلىتى:   
ئەل قايىل بولغىدەك بولسا ھەر سۆزى.   

جاللاتلار تىغ بىلەن ئۆلتۈرسە ئەلنى،   
ئۆلتۈرەر دورىدىن بىلىمسىز تېۋىپ.
ئاۋامنىڭ رىسقىغا يوللىما ئەجەل،  
تېۋىپلىك نامىدا  توننى  سەن كىيىپ.

ئەستە تۇت ئالەمچە بىلىممۇ ئازلىق،   
قىلىدۇ ئىنسانغا بۇ بىر ھەقىقەت.
يانمىغىن نىشاندىن،تىرىش ھەردەمدە،  
گەرچە سەن تارتساڭمۇ دەمدە مۇشەققەت.

ئىشقىڭدىن كۆكلىسە ئەقىدەڭ بىخى.
ئەل ئۈچۈن مېۋىلەر بېرىدۇ ھامان.   
كىم بولسا ھاياتتا تۆھپىكار ئىنسان،  
خىسلىتى يادلىنار زاماندىن زامان"

- شۇنداق دەپ كۆزۈمدىن يوقالدى بوۋاي.   
توختاڭ دەپ توۋلىدىم بۇزۇلدى ئۇيقۇم.   
ھەيرانلىق ئىلكىدە ئەقلىم بولدى لال،   
سېھىرلىك سىزىمدا مۇڭلاندى تۇيغۇم.

شۇ تاپتا سۈكۈتكە چۆمۈلگەن خانەم،
ئاۋۇتۇپ بارماقتا خىياللىرىمنى.   
ئەتراپقا قارايمەن ئەنسىزلىك بىلەن،  
غەيرى بىر ئالەمدە سېزىپ ئۆزۈمنى.

ساباھنىڭ ئەلچىسى سەگەك خورىزىم،  
ئورنىمدىن تۇرۇشقا ئۈندەيدۇ مېنى.   
چۈشىمدە كۆرگىنىم زادى كىمدۇر ئۇ؟   
قەلبىمنى باساتتى سوئال كەلكۈنى.
  
ئەشۇ زات يادىمدا شۇ چۈشتىن بېرى،
تىنقتا قەلبىمدىن تۇغۇپ ئىپتىخار.
ئىرادەم تاۋلىنىپ بارار ھەر ئويلاپ،   
تېۋىپ بوپ تىكلىمەك بولدۇم ئىقتىدار.   

(پەرىشتە قونغان كېچە ناملىق داستانىمدىن پارچە) داۋامىنى كىيىن يوللايمەن

بۇ يازمىنى ئاخىرىدا   دىلداش تەھرىرلىگەن. ۋاقتى  2012-4-8 22:31  

ھارماڭ !  داۋامىنى تېزرەك كۆرسەككەن دېگەن ئۈمۈدتەمەن .

نادىرلەپ قويسا بولغۇدەكلا ئەسەر ئىكەن -ھە.

ھازىرقى شىئېرىيىتىمىزدە داستان ژانىرى كەمدىن-كەم يېزىلىدىغان بۇلۇپ قالدى،ھارمىغايسىز!
ئىجادىيىتىڭىزگە بەرىكەت تىلەيمەن. دېلداش ئەپەندى.