ئۆزيول: مۇسەللەس مۇۋەششەھلىرى

ئۆزيول · ۋاقتى: 2013-4-2 21:07:54


	مۇسەللەس مۇۋەششەھلىرى مۇختار داۋۇت ئۆزيول ـــ 1 ـــ ئاقتى دىل شەربەتلىرى ئارماندا دوستلار ئەسسالام، سېغىنىش پايانىدا كۆيگەن قاياشلار ئەسسالام. ۋەسلىگە تەشنا كەبىي يار ئىشقىدا بەرنالىرى، سەبرى-تاقەت يولىدا تويماي قاراشلار ئەسسالام. ئاي كۈلەر ئاپئاق كۆڭۈل ئاسمانىدا جىلۋە قىلىپ، بىر ھەۋەس دەرياسىدا ئاققان ئاداشلار ئەسسالام. تاشتى دىلدىن مۆرۈۋەتلەر پاك نىيەتلەر ئەۋجىدە، گۈل چېكىپ كەچمىش ئارا زەمزەم سوراشلار ئەسسالام. تا ئەزەلدىن قوشنىلارنىڭ ھۆرمىتى كىشنەپ تۇرار، قوللىشىپ ئاچقان قۇچاق ــ ئىللىق باغاشلار ئەسسالام. ئاشىقى بىدارىغا كۆيگەن كۆڭۈل مەستانىدۇر، بىر ئۆمۈر سۆيگەن قەلەم، دۇردانە باشلار ئەسسالام. بىز قاچان كۈلدۇق كەيىپ، شۇندا مۇسەللەس بايرىمى، ئول شېرىن تەم ئەۋجىدە يانغان قۇياشلار ئەسسالام. ئىلگىرى مەنسۇپ ئەمەس بىزگە دولان ئەپسانىسى، شۇ قەدىم تارىخقا ھەم ئارزۇ ئوراشلار ئەسسالام. زوقى يوق ناكەس كۆڭۈل ئۆتمەس سىناقلار پەسلىدىن، دوستنى دەپ نى مۈشكۈلات-قەستنى توراشلار ئەسسالام! . 2012-يىل30-سېنتەبىر، ئۇچتۇرپان ـــ 2 ـــ يۈزلىنىپ ئەجدادىغا، نۇرانە يول تاپقان ئاداش، ئەيشى-ئىشرەت مەپىسىدىن ھەقنى دەپ قاچقان ئاداش. ئۈجمىلەرنىڭ سايىسىدىن ئىزلىمەي خام ھالۋىنى، چىن ساداقەت-ھىممىتىدىن يېڭى بەت ئاچقان ئاداش. سۆھبىتى دىلغا ھوزۇر، تامغىنى شەربەت-غۇرۇر، خۇش ئىلىم ھېكمەتىدىن نۇر-زىيا چاچقان ئاداش. ئۈزگىلى مېھنەت-ئىجاد ئوكيانىدا تاشلاپ غۇلاچ، مەنزىلى ئەشئارلىرىغا يېڭى كۈي قاتقان ئاداش. پەللىلەرنىڭ ئالۋۇنىغا مىنگىشىپ تىزگىن سىيرىپ، چىن ئىرادە تۇغىنى نۇسرەتكە چىڭ چاتقان ئاداش. جەم بولۇش پەيتىدە دىلبەر نازىدا ئويغاق ھامان، ياتسىمۇ سۆيگەن ئىجادى باغرىدا ياتقان ئاداش. ئار-نومۇس، ۋىجدان ئۈچۈن كەچكەن ھاياتتا بارىدىن، ياۋغا خەنجەر، دوستقا ئەنبەر بولغۇسى قالقان ئاداش. نە كېرەك بىزلەرگە ئارمان، كۆكلىسەڭ بارخان ئارا، ئول ۋۇجۇد تۇغيانىدا ئەزگۈ داۋان ئارتقان ئاداش! ـــ 3 ـــ بىر كۈلۈپ بەرسەڭ مېھىرلىك كۈلكىلەر ۋەيرانىدۇر، يوللىرىڭدا قانچە دىلبەر نازى خۇش سەرسانىدۇر. ئالما يۈزلۈك قاش-سىياقلار سېھرىدە خۇش جىلۋىلەر، بولسا دىلبەر ھۆسنى پەيدا، سۆيگىلى جانانىدۇر. تاشقىنى يامراپ كۆزۈڭدىن ئون قۇياش ئەپسانىسى، ئۇندا ھېكمەت سۆزلىسەڭ، بولغۇسى مىڭ دانىدۇر. ئۇل مېنىڭ ساياقلىقىم يالقۇنلىرىڭدىن كەچمىسۇن، قانچە ئۇرسام نۇرغا تەشنا ئاشىقىڭ-پەرۋانىدۇر. رازى بول دەپ ئېيتتى كىملەر روزىغار چاغلىق تۇرۇپ، شۇ سەۋەپ ۋاقتىڭ كىتاپ دۇنياسىدا مەستانىدۇر. جانغا ئېكەك سالغىلى خۇشتارمۇ بىزلەر بىزۇۋان، زەررە شەپقەت ئەيلىسەڭ ئەلگە تۈمەن دۇردانىدۇر. ئاچ دېسەم، باغرىڭنى مەنچۈن ئەيلىدىڭ دەريا-دېڭىز، دوستقا دوستنىڭ باغرى ئىللىق، بىھىساپ مەردانىدۇر. نام-ئاتاقنىڭ كارى چاغلىق، ئۆڭمىسۇن ئەزگۈ نىيەت، قۇرىغار دەشتىدە كەزگەن ئاق كۆڭۈل دوستانىدۇر! ـــ 4 ـــ تۇت ۋاقىتنىڭ تىزگىنىنى ئۇ ساڭا بولسۇن سەنەم، باتنىسا ئىلھام باھارى ھەۋىسىىڭگە نە ئەلەم. ئۇرسا دەرت ۋاقتىڭ كېتىپ ئاشقايمۇ يىللار قىممىتى، قۇرمۇ-قۇر ئۈزمەي تۇرۇپ، گۈلدەستىلەر بولغايمۇ جەم. رەغدى بارلار تاللىغان، بۇ يولدا چەكسىز ئىزتىراپ، ساقىماي قەغەزگە قانلار، شان بېرەرمۇ بۇ قەلەم. سورىساڭ بىزدىن سوئال قالدى جاۋابسىز بەزىدە، سورىغىن بۇ يوللىرىڭدا نېمە ئارتۇق، نېمە كەم؟ ئۇ سېنىڭ باغرىڭدا كۈلگەن قانچە تۈننىڭ غۇنچىسى، نازىنىن تۈنلەر غاجاپ كەلدى زوقۇڭنى دەممۇ-دەم. نان بېرەي دەپ ئويلىغاچ سەندە ئەقىلنىڭ بارچىسى، كىرگۈزۈپ مىسراغا ئۆتتۈڭ قانچە يىللار شۇنچە تەم. جار سېلىشتىن نېرى تۇردى تۆھپە بولغاچ بىر قۇچاق، ئىز سېلىپ ئىجاد يولىدا كەلدى تەمكىن شۇ قەدەم. ئاز قېلىپ ئۆمۈر بېتى ئويلاشقا پەرمان ئەيلىدى، قالدى قانچە نام-نىشان دەپ، بىزدە باردۇر شۇلا غەم. نازى بار ۋەسلىدە يوق قۇرۇق خىيالدىن قاچ نېرى، قالغۇسى دوستلارغا سەندىن بىر نىشانە مۆھتەرەم! 2012-يىل1-ئۆكتەبىر، ئاۋات. ـــ 5 ـــ توغرا يولغا ئات سېلىپسەن چاقنىغان چولپان مىسال، ئۇزلىقى بەرناغا ئەنداز، سۈرگىنىڭ گۈلدەك خىيال. ئۇھ دېمەي قىلدىڭ ئەجىر ھەر ئىشقا تەرلەر ئاققۇزۇپ، غەيرىتىڭگە ياغسا ئالقىش، سەن ئۈچۈن بىزلەر خۇشال. رازىلىق بوستانىدىن ئالدىڭ ئورۇن خىسلەت بىلەن، غۇنچە قىزنىڭ لېۋىگە سۆيگەن كەبىي نۇسرەتۇ-خال. غەم بىلەن ئۆتكەن ئۆمۈرنىڭ لەززىتى مەۋھۇم ئېرۇر، بۇ ھايات خۇرسەنۇ شۇنچە قادىرى تاپقاچ ئامال. ئۇرغىنى قەلبىڭدە دولقۇن، بىر سەمىمىي ئىزتىراپ، بۇ بۈيۈك دولانىدا مەزمۇت يۈرۈپ كەلمەكتە سال. نان پۈتۈن بولدى دېسەكمۇ، يەنە باردۇر ئەل غېمى، شاد كۈلەرمىز ئىپتىخاردا بارچە دىل تاپسا كامال. جان كۆيەرلىك لەۋزىدە دوستقا چىمەنزار ئەيلىدىڭ، بۇلبۇلى ئاشىقىغا ئاچتى پورەك -تاپتى ۋىسال. ئاقسا باغرىڭدا مۇھەببەت شىرنىسى زەمزەم بولۇپ، يولىمىزدا دوق قىلالماس بىتۇيۇق چەرخى-زاۋال. نەدە بولساق مەپىمىزدە قاينىسۇن شېرىن ھايات، بوپ قالايلى بىر ئۆمۈرلۈك ھەمنەپەس-دوستانە چال! ـــ 6 ـــ جان بىلەن ئويناشقىلى جاھىللىقىڭ ئارمان ئەمەس، بوزلىتىپ ھەسرەتنى كۈلگەن تۈنلىرىڭ سەرسان ئەمەس. ئەر سىياقى تۇردى دەس قەشقەردە «ئەبجەش كۈلكە»لەر، تەخسىكەشلەر دەستۇرىدا ئار-نومۇس ۋەيران ئەمەس. ۋەسلى نازۇك بىر قەلەمدە ئوينىدى ئارزۇلىرىڭ، پەيلى شەيتان ئازدۇرالماس، مەرت يىگىت ئازغان ئەمەس. لەيلىنىڭ سەۋداسى بار مەجنۇنغا ئاشىق كېچىدە، كېچىلەر باغرى دولاندا قاغجىراپ قالغان ئەمەس. ئاتقىنىڭ ئوقيامۇ شېرىن ياكى خەنجەر تىغلىرى، ئاينىغان ئارسىز ساياققا قۇرلىرىڭ قالقان ئەمەس. نى گۈزەل سەۋدالىرىڭ ئىشقىڭدا سەرسان بىر ئۆمۈر، كەز يەنە دەشتلەرنى مەغرۇر، قىلغىنىڭ بوستان ئەمەس. ئىزلىدى دوستلار سېنى جەۋلانىنىڭ ئارمانىدىن، ئۇندا ئارمان يانسا يانسۇن، لەۋزىدىن يانغان ئەمەس! ـــ 7 ـــ مەيگە تەڭ دەپ ئويلىسام، مەيدىنمۇ ئۇز ئىمكانلىرىڭ، سۈرگىنىم جەننەت ھوزۇرى، ئازدۇرۇپ شەيتانلىرىڭ. ئۇنچىلىك مەستلىك نېمە؟ مەست بولمىشىڭ بەكمۇ گۈزەل، يېپىشار دەشتىمگە ھەردەم رەڭلىنىپ بوستانلىرىڭ. سەن بىلەن ئۈلپەتلىشىپ كەزسەم ۋىسال ئاستانىنى، تارتمىساڭ يەلكەننى گاھ دەر، ۋەيران ئىشق كارۋانلىرىڭ. ئەلمىساقتىن قالدۇرۇپ ئالەمنى ھەيران ئۆرلىدى، بۇ دولاننىڭ تاجىسەن-جانانىسى، جەۋلانلىرىڭ. لال بولۇر باغرىڭغا چۆككەن سېغىنىش ئىستەكلىرى، بەختى كۈلگەن ھەر يۈرەكنى كۆيدۈرەر گۈلخانلىرىڭ. لالە-رەيھان باغلىرىڭدا لەۋلىرىڭدىن گۈل ئۈزەر، چاچقۇسى ئالەمگە خۇشھىد، نۇرلىنىپ ئارمانلىرىڭ. ئەل سېنىڭ ئىشقىڭدا ئاتەش ئەقلىنى چاقلار يەنا، ئەجرىدىن شىرنە ياساپ سۇنغاچ سېخىي دېھقانلىرىڭ. سالغىنىمدا كەڭ نەزەر ئاۋات دولان بوستانىغا، بىر بۈيۈك تارىخنى سۆزلەپ تەۋرىنەر بارخانلىرىڭ. 2012-يىل9-ئۆكتەبىر،ئۇچتۇرپان ــــــيۈسۈپجان ئىمىن جەۋلانىنىڭ قەشقەر ئۇيغۇر نەشرىياتى تەرىپىدىن يېقىندا نەشر قىلىنىپ تارقىتىلغان «ئەبجەش كۈلكە» ناملىق پوۋېست-ھېكايىلەر توپلىمى كۆزدە تۇتۇلىدۇ. مەنبە: «دولان» ژۇرنىلى 2012-يىل 3-سان بۇ يازمىنى ئاخىرىدا ئا.ئى.پەروزان تەھرىرلىگەن. ۋاقتى 2013-4-2 21:43

ئۆزيول · ۋاقتى: 2013-4-2 21:35:15


	بۇ يوللانما قانداق چىقىپ كەتتى؟ تەھرىرلەشنى بېسىپ قايتا يوللىدىم، ماس سەھىپىگە يوللانمىغان دېيىلگەندە، شېئىرىيەت سەھىپىسىگە يەنە قايتا يوللىدىم. يەنىلا شۇ تەرتىپسىز پېتى تۇرىدۇ. باشقۇرغۇچىلار ئوڭشاش مۇمكىنچىلىكى بولسا ئوڭشاپ قويساڭلار، بولمىغاندا بۇنداق قويغىچە دەرھال ئۆچۈرىۋەتسەڭلار.

nurdin · ۋاقتى: 2013-4-3 10:41:54


	دولان دىيارىدىن ئالغان ھۇسۇللار ئىكەن- دە بۇ ؟ شائىر مۇخىتەر داۋۇت ئەمدى ئۆزىنى تېپىپتۇ. تېخىمۇ كۆپ ھۇسۇل بېررىشىڭىزگە تىلەكداشمەن.

ekremabdumijit · ۋاقتى: 2013-4-3 11:15:42


	«ئاۋاتتا بىز يۈسۈپجان، باتۇرجان، تۇرسۇنجان، تۇرغۇنجان، جەۋلانى، مۇسەللەس » دېگەن يەرگىچە ئوقۇدۇم. «ئىچىشتۇق» دېگەن يېرى قاپتۇ.

nurdin · ۋاقتى: 2013-4-3 11:25:53


	بۇ مۇۋەششەلەرنى ئوقۇپ مەنمۇ مەسىت بۇپ كەتتىم.

ئابلىكىم ۋارىسى · ۋاقتى: 2013-4-3 11:26:19


	ئۆزيول ئەپەندىمنىڭ ئىجادىيىتىگە تېخىمۇ مۇل-ھۇسۇل ۋە بەركەت يار بولغاي.

ئە.قۇربان ئۇرغۇ · ۋاقتى: 2013-4-3 11:42:46


	ئاۋاتتىكى قەلەمداش دوستلار بىلەن ھەم داستىخان،ھەم سۆھبەتلەر دوستۇم مۇختار داۋۇتنىڭ قەلەم تەۋرىتىشىگە نائىل بوپتۇ-دە؟ يەنىمۇ كۆپلەپ قەلەم تەۋرىتىشىڭلارنى ئۈمۈد قىلىمەن! شېئىرلارنىڭ تىلى شۇنداق يىنىك چىقىپتۇ.

ئۆزيول · ۋاقتى: 2013-4-3 16:18:14


	«ئىچىشتۇق» دېگەن يېرى قاپتۇ.... ئەكرەمجان ئىچىشكەن يەرلىرىنى ئىككىمىزگە شۇنداق بىر پۇرسەتلەر بولۇپ قالسا، ياكى سىز يېزىۋېتەرسىز، ياكى يەنىلا مەن يازارمەن. سالامەت بولۇڭ. ئاددىي يازمامغا نەزەر ئاغدۇرغىنىڭىز ئۈچۈن خۇرسەنت بولدۇم. سىزنىڭمۇ ئىجادىي قەدەملىرىڭىزگە بەرىكەت تىلەيمەن.

yalguzak · ۋاقتى: 2013-4-14 17:07:17


	ئىجادىيەت ئىشلىرىڭىز يەنىمۇ بەرىكەتلىك بولغاي

ئۆزيول · ۋاقتى: 2013-4-14 23:35:54


	يالغۇزەك ئەپەندىنىڭ دوستانە تىلەكلىرىگە سەمىمىي تەشەككۈر.

قەلئە · ۋاقتى: 2013-7-16 19:44:15


	ئۆز يول، شېئىرلىرىڭىزدىن بىر خىل خۇش پۇراق چىقىپ تۇرىدىكەن. مىنىڭ ئۆگىنىشىمگە ئۈلگە بولالىغۇدەك قالتىس شېئىر يازىدىكەنسىز. ئىجادىيىتىڭىزگە ئۇتۇق يار بولسۇن!