سىقىلىش: ئابدۇخېلىل مىرخېلىل

سىقىلىش

شېكەستە قەلبنىڭ جاراھىتىدىن،
تۆكۈلەر ئۈمىدنىڭ چېچىكى سويلاپ.
قانائەت قامىدا قاناپ بىر ئايال،
كېلىدۇ ئەرلىكنىڭ يولىنى بويلاپ.

قالدۇرغان ئىزىدا دەردلىك ناخشا بار،
ئاھاڭى ئالۋۇندەك ئازاپتىن پۈتكەن.
تۈگىمەس تۈنلەرنىڭ تىنچلىقىدىن،
ئۆزگىرىپ ئۆزلىكى كىملىكى يۈتكەن.

تەنھالىق تارىغان غېرىب چېچىدىن،
تىنىمسىز تامىدۇ تەلپۈنۈش كۈيى.
چاڭقاقلىق چۇلغۇغان چېھىرلىرىدىن،
چايقايدۇ ئەكسىنى مېھىرنىڭ سۈيى.

كىنىگەن كېچىلەر كىبىر كۆرسىتىپ،
بوغۇزلار ئەڭ شېرىن تۇيغۇلىرىنى.
يىراقتىن ياڭرىغان ناخشىنىڭ ئۈنى،
يېتىلەپ ئېپ كەتكەن ئۇيقۇلىرىنى.

بۇزۇلغان ئارامى دەۋرىگەن قىيان ،
چىدام چېقىنلىرىدا يۇتتى ئۆزىنى.
سىقىلغان سىنەدىن سىرغىغان سەبىر،
ئۇيقۇغا ماڭدۇردى كېچە كۆزىنى...