قېنى سەن ھەي گادىرماچ خىيال

قېنى سەن ھەي گادىرماچ خىيال
  
ئابدۇقەييۇم سامساق پاكزات
  
ئۇيقۇسىز لىق ئەجەپكەن توۋا  
بۈگۈن يەنە ئۇخلىيالمىدىم .  
قايدىن كەلدىڭ گادىرماچ خىيال  
سەندىن ھېچ بىر قۇتۇلالمىدىم .  

مانا مەرھۇم دادام ئالدىمدا ،
تەببەسۇمدا باغرىغا باستى.
سېغىنىشنىڭ ھىجرانلىرىدىن  
بۇلدۇق -بۇلدۇق ياشلىرىم ئاقتى .

يانا ئېلىپ كەلدىڭ ئۆيۈمگە ،
يالغۇز ،مىسكىن ئانام يېنىغا .
كۆرۈپ  ئۇنىڭ ئىللىق چېھرىنى،
كۇچ قوشۇلدى قايتا جېنىمغا .  
  
نىچۈن  ئەمدى  باشلاپ مەكتەپكە ،  
پەن بابىدا يانسۇن دېدىڭمۇ ؟
ياكى دىلدىن سۆيگەن شۇ قىزنىڭ ،
ئوت باغرىغا قانسۇن دېدىڭمۇ ؟  
  
ئۇخلىيالماي قالغاندا بايام ،
سەندىن نېرى بولاي دېگەنتىم .
ئەمدى خوش بوپ مىننەتدارلىقتا ،
ساڭا گۈللەر سۇناي دېگەنتىم .  

ئۆزۈڭ قېنى ، قاياندا ئەمدى  ،
باشلا مېنى بالىلىقىمغا
ئوينىۋالاي غەمسىز ئېغىناپ،
يېزامدىكى  توپىغا، لايغا.  

قايتۇرۇپ كەل  ياشلىقىمنى سەن ،   
ئاتا -ئانام مېھرىگە قاناي.
چىن ئىخلاستا ئىگىلەي ئىلىم
پەۋاز قىلاي ،پەندە مەن ،چاقناي .  
  
ئۆزەم سۆيگەن ئاشۇ لېۋەننىڭ،   
ۋاپادارى ، مەشۇقى بولاي .
ماڭا سادىق بولسۇن-بولمىسۇن  
چىن سۆيگۈمدىن گۈللەرنى سۇناي .

ھەممە شۇنداق خىياللار بىلەن ،
ئۆتۈپ كەتتى يىرتىپ كالىندار.
بۈگۈن كېچە ھېچ بىر ئۇيقۇ يوق،  
ھەمرا بولدى ئاي ۋە يۇلتۇزلار .

ئاتا-ئانام ،يۇرتۇم ،سۆيگۈنۈم
قىلدى بۈگۈن دىللىرىمنى لال.
شۇنچە شېرىن بىلىندىڭ ماڭا،
قېنى سەن ھەي گادىرماچ خىيال.

2011-يىل 3-ئاينىڭ 24-كۈنى ،يەكشەنبە ،ئاقسۇ،سەھەر سائەت 4.40مىنۇت ئۆتكەندە يېزىلدى .