بىلال نازىم شېئىر لىرىدىن-توپلام

bagyar · ۋاقتى: 2013-5-6 23:28:03


	بىلال نازىم شېئىرلىرىدىن (مەزكۇر توپلامدىكى شېئىرلار ئىنكاس شەكىلدە پۈتۈن يوللىنىدۇ. مۇنبەر نەشىرگە تەييارلىغۇچى ۋە مۇنبەر مەسئۇلىنىڭ رۇخستىسىز باشقا مۇنبەرلەرگە كۆچۈرۈپ چاپلاشقا، كۆچۈرۈپ نەشر قىلىشقا بولمايدۇ) 18 ئەي نىگارا، قەتلى قىلماققا مېنى قىلما شىتاپ، خۇپ ئەمەسمۇ داغى ھىجرڭ بىرلە سالساڭ ئىزتىراپ. بەس ئىدى بىر تالە زۇلفىڭ ئاشىغىڭ بەند ئەتكىلى، نە ئۈچۈن تاپماققا بۇندا ئىزلىدىڭ ئۆزگە تاناپ. داغ ئۈزە داغلارنى قويدۇڭ يۇشۇرۇپ چېھرىڭنى كىم، ئاي يۈزۈڭنى يۇشۇرۇپ، ئەي جان، نىچۇن تارتتىڭ نىقاپ؟ بەس ئەمەسمۇ بۇ ئىتابلار مەن پەقىر بېچارىگە، قەتلى قىلغاندىن مېنى نىچۈك ساڭا بولغاي ساۋاپ؟ ئەمدى بىلدىم، قانىمى تۆكمەك ئىكەن قەسىتىڭ سېنىڭ، بۇ سەۋەپتىن رەھىم قىلماي قىلغان ئەرمىش سەن ئازاپ. گەر ئەزەلنىڭ تەقدىرى بارسا بىلالغا چارە يوق، خاھى ئۆلتۈر،خاھى كۇيدۇرگىل بۈگۈن تۇردى قاراپ. 19 چىقساڭ تاماشاغا، دائىما قىلماغىل شىتاپ، زىنھار كېزەرگە چىقما يۈزۈڭدىن ئېلىپ نىقاپ. زۆھرە، زۇھەل،شەمىس بىلە مۇشتەرى خىجىل، يوقتۇر ئەجەپ ئايغا يۈزۇڭ سالسا ئىزتىراپ. لەئىلىڭ بويىدىن بوي ئېلىپ رەشىك ئەيلىگەي، ئۇيالغاندىن مۇشكى خوتەن، زەپىران گۇلاپ. لەئىل لىۋىڭنى كۆرسە بۇلۇر غۇنچە شەرمىسار، يۈزۈڭ گۈلىنى كۆرۈپ، بولدى ئەندەلىپ خاراپ. ئۇل ئاي يۈزۇڭ شولاسىنى كۆرسە ھەر كىشى، ھىجرىڭ ئوتىدا ئۆرتەنىبان بولغۇسى كاۋاپ. بىكەس بىلالىڭ نەئۈچۈن فىغان قىلماسۇن، ۋەسلىڭ غېمىدە ئاقتى جىگەر قانى تىرقىراپ. 20 ئەيلىدى بۇلبۇل ناۋالار گۈل يۈزىن رەيھان كۆرۈپ، ساچى زەنجىرى ئارا گۈل غۇنچىنى پىنھان كۆرۈپ. پادىشاھى ھۆسىن ئەردى ئۇل زىلەيخائى جاھان، كىم ساڭا قويغاي مۇھەببەت ھۆسىن ئارا سۇلتان كۆرۈپ. ھەم لاتاپەت گۈلشەنىگە لەيلى ئەردى پىشۋا، ئەمدى زىبالىقتا تەنئالغاي سېنى تابان كۆرۈپ. بولسا شىرىن بىرلە ئۇزرا ئىككى دىل سۆزى جاھان، قىلغاي ئەردى تۇرپە خىزمەتلەر سېنى مېھمان كۆرۈپ. ھەم ئېرەم بارغىدا ئەردى ئول بەدىنى چۈن قامار، ئۇيالۇر سەن ھۆرنى كۆرگەچ ئۆزننى غىلمان كۆرۈپ. گويا قۇشتەك ئېرۇر مەن چۈن سېنىڭ ئىشىقىڭدا كىم، بول سەۋەپتىن تەلپۈنەرمەن ئاي يۈزىڭدە دان كۆرۈپ. ھاتەمى تاي زەر ساخاۋەت ئەيلىسە، سەن-ۋەسلىڭنى، چۈن بىلال ۋەسلىڭ تىلەيدۇر ھاتەمى دەۋران كۆرۈپ. 21 ھەق ئۈچۈن بىزنى يىراق قىلما ئۆزۈڭدىن، ئەي ھەبىب، پەردە تارتىپ بىنەسىپ قىلما يۈزۈڭدىن، ئەي ھەبىب. سۇرمە ئەيلەرگە تىلەپ كەلسە ساڭا ئاشىقلىرىڭ، نائۇمىد قايتۇرمىغىل باسقان ئىزىڭدىن،ئەي ھەبىب. باقمىساڭ بىزگە، نىگارا، ئۆزگىگە ھەم باقماغىل، ياكى بىزنى قۇغلىما ئاھۇ كۆزۈڭدىن، ئەي ھەبىب. گەر سۆزۈڭ بولسا ماڭا ئېيىت، قىلماغىل ئەلدىن ئىبا، بەھرە ئالسۇن بۇ دىلىم شىرىن سۆزۈڭدىن، ئەي ھەبىب. گەرچە بولدى بۇ بىلال ۋەسلىڭ تىلەپ خەشەك سۈپەت، ئەمدى خەۋپ ئەتمەك نەدۇر بۇ قەقنۇسىڭدىن، ئەي ھەبىب. 22 ناگاھان يۈزۈڭنى كۆرسەم كۆيىدۇ دىلىم بە غايەت، غەم قىلىپ يۇشۇرماقتىن بۇ يۈرەك بۇلۇر جاراھەت. كۆرمىسەم يۈزۈڭنى، ئەي جان، سۆڭەكلىرىم بۇلۇر خەشەك، تەرك بۇلۇر ئۇشبۇ سەۋەپتىنكىم ھەممە زۇھدۇ تائەت. ھەم سېنىڭسىز، ئەي نىگارىم، ماڭا نە كېرەك تىرىكلىك، ماڭا كەلسە گەر ھۇمائې بۇ يەرۇر تاغىن پالاكەت. ۋەسلىڭ بولمىدى مۇيەسسەر، ئەي لەبى غۇنچە نىگارىم، تىلەك ئەيلىدىم ۋىسالىڭ بولمىدى دۇئا ئىجابەت. بارچە بىزگە بولدى دۈشمەن، ساڭا مەن يار، ئەي پەرى، قىلمايىن ماڭا تەرەھھۇم كۆرمەيىن دەمى ھالاۋەت. ھەدىدىن ئاشتى ئەمدى دەردىم، كۆرگىل بۇ رويى زەردىم، قۇتىلالمىدىم بۇ غەمدىن،ماڭا ئىرۇر بۇ ئىرادەت. دەمبىدەم بۇلۇپ بىدەرمان، ئەمدى نە ئىلاج ئىتەر مەن، تىۋىپ ئىزلەبان كېتەرمەن، قانچىكى تارتسام رىيازەت. كېسىلۇر بولدى ھاياتىم، يىتىشىپ تۇرۇر ماماتىم، لەھزە قالمىغاي نىجاتىم، ئەيلىسەڭ مېنى شاھادەت. ئۇشبۇ بائىستىن مېنى زار، دامى ۋەسلىڭگە گىرپتار بولغالى چېكەرمەن ئازاپ، ئەل ئەرا چېكىپ مالامەت. بۇ يازمىنى ئاخىرىدا bagyar تەھرىرلىگەن. ۋاقتى 2013-5-6 23:30

bagyar · ۋاقتى: 2014-6-2 15:31:59


	بىلال نازىم شېئىرلىرىدىن (مەزكۇر توپلامدىكى شېئىرلار ئىنكاس شەكىلدە پۈتۈن يوللىنىدۇ. نەشىرگە تەييارلىغۇچى ۋە مۇنبەر مەسئۇلىنىڭ رۇخستىسىز باشقا مۇنبەرلەرگە كۆچۈرۈپ چاپلاشقا، كۆچۈرۈپ نەشر قىلىشقا بولمايدۇ) 23 ماڭا بولدى ئەمدى مەلۇم، چۈن ئىكەن بۇ تەليىم شۇم، ئشقىدا بۇلۇپ چۈن بۇم، چىللىماق ئەيلەپ ئادەت. بۇ نىچۈك ئەلەمدۇر، ئەي يار، كۆرەدۇر يۈزۇڭنى ئەغيار، مېنى سورغالى قىلىپ ئار، كۆرەرسەنمۇ فەقىر غايەت؟ يوقسا ئەيلەگىل تەرەھھۇم زەئىپ بىلالىڭغا، ئەي يار، نە يۈزىدە رېڭى قالدى، نە دىلىدا سەبرۇ تاقەت. 24 كى ئەرزىمنى ئېيىتاي،دىلرەبا ئىشىت، ئايا غۇنچە ۋاش يۈزى، بەرنا ئىشىت. بۇلۇبدۇر مېنى مەپتۇن قىلماق ئۈچۈن، قەددى قامەتىڭ تۇرفە زىيا، ئىشىت. قاشىڭ يايىغا كىپرىگىڭ ئوق ئېتىپ، ئاتارسەن دەممۇدەمكى گويا، ئىشت. سەۋەپ بۇ ئېرۇر يىغلاماقىم مانى، بېشىمغا چۈشۇبدۇركى سەۋدا،ئىشىت. ساچىڭ ئەجدەرىي بىزنى دەم تارتادۇر، نەدىن قىلمايىن ئەمدى، غەۋغا، ئىشىت. كى يالدا تۈنىدە كۆتەرسەڭ نىقاپ، يۈزۇڭدىن پەرۋەرش ئىتتىفاقا ئىشت. كۈنگە ئايلانغۇسى ئۇشبۇ قارا تۈن يۈزۇڭ نۇرى ئاپتاپ بولسا، ئىشىت. سېنى كۆرسە ناگاھ بارلۇر بەندىلەر، كى بەھرام ۋەيا بولسا دارا،ئىشىت. كى ھۆرمەت قىلۇر گۈل نىھالىڭ كۆرۈپ، ئېرەم بارغىدا گۈل ھەم ئەنۋا، ئىشىت. تەقى زوق ئېتەرلەر يۈزۇڭنى كۆرۈپ، يەنە لەيلى، شىرىنۇ ئۇزرا، ئىشىت. ئۆتۇپدۇر ۋادىيۇ رەبىئۇلجامال، بۇ ئەسىردە سەنسەن زۇلەيخا، ئىشىت. يۈزۇڭ غۇنچە گۈلدۇر، بىلالىي بۇلبۇل، كۆرۈپ غۇنچىنى بولدى، شەيدا ئىشىت. 25 ساقىيا،دىلخەستەمەن كەلگىل بۈگۈن پەيمانە تۇت، تولدۇرۇپ پەيمانىنى لەئىلگۇل مەيى جانانە تۇت. سىپقىراي ئول بادەنى يارى ۋاپاسىز ئىشىقىدا، قالمىسى پەيماندا گەر، تولدۇرۇپ سەن يەنە تۇت. دەممۇ-دەم، سائەتمۇ-سائەت مەينى كەلتۈرگىل، ئىچەي، تۈنۇ كۈن،بەلكى داۋام ئۆتكۈزمەيىن بىر ئانە تۇت. ئەمدى مەسخۇش بولدى دەپ، قىلما خىيال، ئەي ساقىيا، دەفئي غەم ئەيلەر ماڭا،سەن بادە بىپايانە تۇت. يارنىڭ دەردۇ پىراقىنى ئۇنۇتقۇم بنر يولى، ھەم ئۆزۇڭنى، ساقىيا، ئەيلەپ ماڭا مەيخانە تۇت. بادەنى ھەر قانچە تۇتساڭ،ھەم بىلال لەۋ تامشىتۇر، شامدىن تا سۈبھى-يۇ، سۈبھىدىن تا دەمى خۇپتەنە تۇت. 26 نە بولغاي زەررە رەھىم ئەتسەڭ، بۇلۇپمەن بىقارار، ئەي دوسىت، يۈرەرمەن دەردى ھىجرىڭدە كى يىغلاپ زار-زار، ئەي دوسىت. تىلەپ دائم ۋىسالىڭنى كويىڭدا تەلمۈرۈپ يۈردۈم، كۆرەلمەي نائۈمد بولدۇم، ئېلىپ كۆزلەر غۇبار،ئەي دوسىت. ئەگەر رۇمۇ تامان كەتسەم، ئۈزۈلمەس بۇ دىلىم سەندىن، قىلىپ سەن مەن غېرىپنى غەمزە بىرلە بىقارار، ئەي دوسىت. جامالىڭ شەمئىدە كۆيدۇم بۇلۇپ مەن مىسلى پەرۋانە، مېنى قىلدى پىراقىڭ خەلقى ئالەم ئىچرە خار،ئەي دوسىت. قېلىپ مەن خىرمانى ئوت ئىچرە كىم گويا سەمەندەردەك، ئول ئوتتىن ئاجرىتىپ ئالماققا قىلدىڭ بىزنى ئار،ئەي دوسىت. كى بۇلبۇل،شاتۇتى،قۇمرى،سەئىۋەلەر ھالىمغا زار يىغلار، تەرەھھۇم قىلمىدىڭ بىر دەم بۇلۇپ مەن خار-زار، ئەي دوسىت. ئەلەم دەشتىدە مەجنۇندەك بۇلۇبدۇر بۇ بىلالىڭ ھەم، ئايان ئىشق زورىدىن رۇستەمى داستان بىمادار، ئەي دوسىت. 27 ئاھ كىم، كۆڭلۈمنى ئالدى بىر لاتاپەتلىك يىگىت، ئوينىتىپ تۇمقارا تۇلپار ئول كامالەتلىك يىگىت. قامەتى شەمشادىغا ئەيلەي تۈمەن مىڭ جان پىدا، ھۆسى ئىقلىمىدا يوق ئانداغ مالاھەتلىك يىگىت. بولغۇسى ھەيران قەمەر يۈزى زىياسغا ئۇنىڭ، بولمامىش پەيدا يەنە ئانداغ سائادەتلىك يىگىت. ماڭا نەدوست ئەلگە ۋەسفىن لازىم قىلماققا ۋەلىك، ھېچ شاھلار ئىچرە يوق ئۇنداق ئادالەتلىك يىگىت. ۋەسفىنى ھەددىن ئاشۇرساڭ، ئەي بىلال، يوقتۇر ئەجەپ، كائىنات ئىچرە ئانىڭدەك يوق دىيانەتلىك يىگىت. بۇ يازمىنى ئاخىرىدا bagyar تەھرىرلىگەن. ۋاقتى 2014-6-2 15:35

sakarauli · ۋاقتى: 2014-6-2 17:01:29


	بىر يىلدىن كېيىنمۇ ۋەدىسىنى ئۇنۇتۇپ قالمىغان بەگيار ئەپەندىنىڭ مىھنىتىگە ئاپىرىن!

bagyar · ۋاقتى: 2014-6-6 20:34:54


	28 ئەرزىم ئىشتگىل،ئەي بىلاتاپەت، قىلغىل تەرەھھۇم، ئەيلەپ شاپائەت. سەن بىر ھۇمايۇ مەن بىر گادايىڭ، تاشلاپ كۆلەڭگە، بەخشئەت سائادەت. نە يىغى قىلماي، نە زار بولماي، نە غەمگە قالمەي، ئەي سەرۋ قامەت. دەردىم بەكمۇ كۆپ، ھەددىن زىيادە، دائىم كۆرەرمەن ئەلدىن مالامەت. مەجنۇنلىقىمدا بىمېھر گەردۇن، باشىمغا ئۇردى زەربى پالاكەت. مەن زارنىكىم يارى ۋاپاسىز، دىلخەستە قىلدى ئەيلەپ زەرافەت. پېقىر بىلالىي، قىلغىل دۇئايى، يارغا يىتەرسەن بولساڭ سالامەت. 29 ئەرزىمنى ئىشت بۈگۈن، ئەي يارە بىلاتاپەت، كۆرگەن ئەلەمنى بىر-بىر قىلغۇم ساڭا شىكايەت. ئىشىم پىغان بولدى، زەرداپ يۈرەككە تولدى، ياشىمغا يەر سۇ بولدى، مۇنداغ ئىكەن ئىرادەت. لەئىلى لەبىڭ ئۇزارى، ئاپپاق يۈزۇڭنى نۇرى، ئەيلەپ ماڭا ۋاپايە، قىلغىل ماڭا ساخاۋەت. يوقسا مېنى ھالاك ئەت، خەستە يۇرەكنى چاك ئەت، بىر يولى دەرتناك ئەت، ئەيلەپ شاھانە ئادەت. بۇنداق سۆز قىلىپ مەن، رەھىم ئەيلىسەڭ ماڭا سەن، قىلغىلكى نۇقتەئى پەند، بولغاي دېسەڭ سالامەت. ھەر دەم بىلال ئول ئايدىن تارتار ئىمىش ئىزالار، ئەلدىن كۆرۈپ مالامەت، بولدى ئەجەپ خىجالەت. 30 مېنى غەمكىن قىلماققا ئېرۇر ئۇل دىلرەبا بائىس، كېچەلەر زار بولماققا ئېرۇر يۈزدە جىلۋە بائىس. يەنە پەرۋانە بولماقلىق،ئۇنىڭ شەمئىدە كۆيمەكلىك، ھەمىشە يىغا قىلماقلىققا ئىشىقى مەھلىقا بائىس. ئول ئاي يۈزىنى كۆرمەككە،ئانىڭ كويىدا يۇرمەككە، ئانىڭ قولىنى تۇتماققا،بۇ كۆز ھەم دەستۇ پا بائىس. فىراقىدا فىغان قىلماق، ۋىسالىنى تىلەپ يۈرمەك، يىتەر مەن دەپ ئۈمىد قىلماققا دىلدا مۇددىئا بائىس. ئاڭا مەن ۋالە بولماقلىق،كى ياشىم جالا بولماقلىق، دىلىم ئەفگارە بولماققا ئشقى كىمىيا بائىس. كى يەتمەك جۈملە مەقسەتكە، يۈلەنمەك ئەينى دۆلەتكە، يتىشمەك ئەمەل، ئىززەتكە سەھەر قىلغان دۇئا بائىس. بىلۇرسەنمۇ، بىلالىي سەن، بۇلار بولغاندا بائىس دەپ، بىلىڭ بۇ بارچىغا دوسىتلار كى تەقدىرى خۇدا بارئىس. 31 مەھلىيا بولۇپمەنكى ئۇشبۇ يارەنى كۆرگەچ، بولدۇمكى ئەسر لەۋلىرى گۇلنارەنى كۆرگەچ. كۆيدۈرمەك ئۈچۈن جىلۋە قىلىپ ناز ئىلە ھەردەم، ياندۇردى چىراغ مەن كەبى پەرۋانەنى كۆرگەچ. كۆيدۈمكى ئۇنىڭ ئىشقىدا قەقنۇس كەبى، ئەي دوسىت، رەھىم ئەيلەمەدى مەن كەبى ئاۋارەنى كۆرگەچ. بىخۇد بولۇبان ياتتىم ئانىڭ كويىدا مەنكىم، مۇسا كەبى يەلكىنى ئەنۋارەنى كۆرگەچ. بۇلبۇل بۇلۇبان نالە قىلارمەنكى، ئول ئايغا، ئانداغكى ئوشۇل كۆزلەرى خۇنخارەنى كۆرگەچ. مانەندى سەمەندەر بۇلۇبان ئوت ئارا قالدىم، نەچۈنكى ئوشۇل چىشلارى دۇردانەنى كۆرگەچ. ھىجرىدە ئۇنىڭ كۆيدۈمۇ ئۆچتۈم، خەۋەرى يوق، ياد ئەيلەمەدى مەن كەبى بىچارەنى كۆرگەچ. بۇ خەستە بىلال يىغلادى تىنماي كېچە-كۈندۇز، دۇنياغا كېلىپ دىلبەرى ئەييارەنى كۆرگەچ. 32 يىتەر ئىدىم جاھان ئەھلىگە كۆپ بىئېتىبار بولغاچ، يۈرەلمەي ئەل ئارا ھەم تەنىگە فەقرى بېشۇمار بولغاچ. كېچەلەر تۇرفا بىر ھال ئەردىمۇ، كۈندۈز مالامەتلىك، كىبارلار دەۋلىتىگە چۈن يىتەلمەي تۇرفا زار بولغاچ. كىزىپ ئەردىمكى بىر كۈن سەير قىلماقنى ھەۋەس ئەيلەپ، بۇ كۆڭلۇم زەررە خۇش بولغان ئىدى پەسىلن باھار بولغاچ. توساتتىن جىلۋىلەر بىرلە كۆرۈندى بىر پەرى پەيكەر، جامالىنى كۆرۈپ شەيدا بۇلۇپ مەن بىقارار بولغاچ. كى مانەندى بۇلۇپ ۋامۇق تىنىمسىز ئاھلار ئۇردۇم، يۇرەلمەي ۋادىئى ئىشقىدا يىقىلدىم بىمادار بولغاچ. ئىنانى ئىختىيارىمنى ئېلىپدۇر يارىنىڭ ئىشىقى، ئۆمۈچۈكتىن چىۋىن زىنھار قۇتۇلماس بەندى تار بولغاچ. كى ھەر كىم كۆردى ئول ئاينى، ئىلىندى ئىشىق تۇزاغىغا، كى ئەقىلىن ئالدۇرۇپ مەجنۇن بۇلۇبدۇر خاكىسار بولغاچ. پەرىۋەشنىڭ جامالىنى كۆرەلمەي ھىجرىدە ناچار، دەمادەم قان يۇتارمەن ئتلەرىدىن بەلكى خار بولغاچ. نېسىپ ئەتمەس ئىمىش ئەمدى بىلالغا، شۇبھىسىز، دوسىتلار، كى دىلبەرنىڭ ۋىسالىغا خالايىق ئىنتىزار بولغاچ.