مېھرىگىياھ: ھاياتلىق ناخشىسى

ھاياتلىق ناخشىسى
رەشىدە مۇھەممەد مېھرىگىياھ
1
بەخت بەخش ئەتتى بىر يىغا ،
يورۇپ كەتتى غېرىپ كۈلبىلەر .
مەرۋايىتتەك ئوماق بىر بوۋاق ،
ئىنئامىدىن دىلدا كۈلكىلەر .

يۇمران، بۇدرۇق پۇتلىرى بىلەن ،
بۇ زىمىننى ئۆلچىدى بوۋاق .
ئەجىر بىلەن ئۆستى يېتىلدى ،
يولدا توساق مەنزىللەر يىراق .
2
ياشلىق باھار ئاتىدى ئۇزلۇق  ،
سۆيدى ئۆزى سۆيۈلمىسىمۇ .
ھايات ئىكەن مېھمانغا ئوخشاش ،
رەنجىمىدى كۈتۈلمىسىمۇ .

يىغلاشقىلا  يارالماس ئىنسان،
ئېيتتى ئۇمۇ سۆيگۈناخشىسى.
تاتلىق تاتلىق كۈلكىلەر يۈرەر ،
بولمىسىمۇ جاندىن باشقىسى.

دۇنيا ئۈچۈن يەپ كەتمىدى غەم ،
قانائەتتە ياپقاچ ئېتەكنى .
ھەسرەت بىلەن كىرپىك بولماي نەم ،
ئىنتىزارلىق ئەزدى يۈرەكنى .
3
مۇھتاجلىقتا ئىگىلسە باشلار  ،
تۆكتى بەزەن  ئۇمۇ يېشىنى.
تۈگمەن بولۇپ چۆرگىلەپ پەلەك،
يەلكىسىگە باستى تېشىنى.

ئەمما ئۈمىد ئۆچمىدى دىلدىن،
ئارام بەخش بەردى ئۇ  جانغا.
تەلمۈرگەندە ئۇپۇققا كۆزلەر  ،
ئۇلاشقاندەك بولدى ئۇ تاڭغا.

ھايات ئىكەن شۇ قەدەر شىرىن ،
ئىنتىلەركەن ئىنسان ھەممىگە .
لېكىن قىسمەت قويماسكەن ئۇنى،  
ئۆمۈر گۈلى توزار ئەتىگە  .


4
ياشاپ شۇنداق تەشنالىق بىلەن ،
بولدى ساراي چۆل – دەشتىلەرمۇ .
ئارام تاپقان چاغدا پاك تەنلەر ،
ئوراپ ئالدى پەرىشتىلەرمۇ .

شاۋقۇنلارغا قۇلاق سال سەنمۇ  ،
يالاڭ ئاياق ئېيتىلسا ناخشا.
ھايات شۇنداق ئۈزۈلمەس كۈيكەن ،
ئەمما مۇڭى باشقىدۇر باشقا !

ئەسسالام ئەلەيكۈم رەشىدە. ھاياتلىق ناخشىسى بەكمۇ لەرزان ياڭراق ئېيتىلىپتۇ.
ئاخىرقى كوبلېتىغا جور بولغۇم  كەلدى.
شاۋقۇنلارغا قۇلاق سال سەنمۇ  ،
يالاڭ ئاياق ئېيتىلسا ناخشا.
ھايات شۇنداق ئۈزۈلمەس كۈيكەن ،
ئەمما مۇڭى باشقىدۇر باشقا !

ھاياتلىقنىڭ بۇ جاھانغا كۆز ئېچىشى ، گۈەللىككە تەلپۈنىشى ، ئوڭۇشسىزلىقتا ياش تۆكۈشى ، مۇھتاجلىقتا تەمتىرىشى ، ئەمما يەنىلا ئۈمىدۋار ياشاپ دۇنيانىڭ شىرىنلىكىگە شەكسىز ئىشىنىشى ۋە تەشنالىق ئىچىدە ھالال ئەمگىكىگە تايىنىپ چۆلنى ساراي قىلىشى ، شۇ ئارقىلىق پەرىشتىلەرنىڭ ھۆرمىتىگە سازاۋەر بولۇشى …


بوپتۇ ، ھاياتلىق ناخشىڭىزغا مەنمۇ ئەگەشتىم !

ھايات شۇنداق ئۈزۈلمەس كۈيكەن ،
ئەمما مۇڭى باشقىدۇر باشقا !


ھاياتنىڭ جۇلالىق مەنىلىرى ئىچىدە مۇڭنۇڭ ئىنسان قەلبىگە قالدۇرىدىغان تەسىراتلىرى بەكمۇ يارقىن بولسا كېرەك
ھاياتنى كۈيلىگەن قەلىمىڭىز بەركەتلىك بولسۇن!

رەھىمە ، ئا.يۈسۈپ ، قەلبىنۇر قاتارلىق قېرىنداشلىرىمنىڭ شېئىرىمنى ياقتۇرغىنىدىن خوش بولدۇم . سىلەرگە تەشەككۈرلەر بولسۇن .

تەكچەمدە باھار

باھار كېلىپ  قىلدى گۈل ئىنئام ،
سېغىنىشقا تولغان دىلىمغا.
ھەر باھارىم يېڭى بىر ئىلھام ،
بەخش ئېتەر مىسرالىرىمغا .

بولمىسىمۇ ھويلا – ئارامىم،
ئۆيلىرىمدە باھار جۇلاسى.
گۈل سىياقتا ياشاش قارارىم،
كۈيلىرىمدە قۇشلار ناۋاسى .

تىلەكلەر ئاق ، ئىستەكلەرمۇ ئاق  ،  
كۆپ –كۆك دېڭىز بىپايان ئاسمان .                                      
تەكچەمدە گۈل ياپ – يېشىل ياپراق ،
ئۆيۈمدە بار بىر پارچە بوستان .

تەكچەمدىكى رەڭمۇ -رەڭ گۈللەر،
ئۆيلىرىمنى تۇرۇدۇ بېزەپ .
گۈللىرىمدىن تارقىسا ئەنبەر،
جانۇ -  تېنىم قالار يېنىكلەپ.


ئۆيۈم بولسۇن ئەبەدىي باھار ،
چېچەك ئاچقاي ئەجرىم مىۋىسى .
كۆز نۇرۇمغا  يەتمىگەي ئازار ،
دەپ تىلىدىم قەدىر كېچىسى .

يوقالمىغاي تەكچەمدە گۈللەر،
ئۆمۈر گۈلۈم سۇلغانغا قەدەر.
يېقىنلىرىم گۈلگە ئاشىق دەر ،
بەلكى بىر كۈن يەتكەندە خەۋەر  .

(كونا شېئىرىمدىن)


ئۇنتالمايمەن

ئۇنتۇشۇمنى قىپسەن ئىلتىجا ،
سېنى قانداق ئۇنتاي دىلرەبا .
************
قايسى شەيتان ئازدۇردى سېنى ،
ئايرىلىشنى قىپسەن ئىختىيار .
خۇددى كۆكتىن يىقىلغان سىياق ،
مەن ئۆزۈمنى يوقاتتىم نىگار .

بىرگە ئۆتكەن ئاشۇ كۈنلەرنى ،
«شىرىن چۈش» دەپ ئاتىدىڭ قانداق .
دىل رىشتىنى ئۈزۈش ئاسانمۇ ،
يوقالمىسا  قەلبدە  پىراق .

نەدە قالدى ۋەدە ھەم قەسەم ،
نەدە قالدى پاكىز ئەقىدە .
نەدە قالدى قىيا بېقىشىپ ،
چىن يۈرەكتىن ئېيتقان قەسىدە .

نە «شىرىن چۈش »بولسۇن شۇ كۈنلەر ،
يۈرىكىمدىن ئۆچمەيدۇ ئەجەپ .
دېيىشكەنتۇق ئەزىم دەرياغا ،
«سۆيگۈمىزگە گۇۋاھ بولغىن » دەپ .

ئۇنتۇلدىمۇ باھار قۇچقان ساي  ،
ئۇنتۇلدىمۇ گۈزەل چىمەنلەر .
ئۇنتۇلدىمۇ ئەجىر –مېھنەتتە ،
بىرگە باسقان قۇتلۇق قەدەملەر .

مانا بۈگۈن سۆزلىرىڭ يۇچۇن ،
قوغلىدىڭمۇ مېنى باغىڭدىن .
توۋا دەيمەن شۇ گۈزەل كۈنلەر ،
كەچمەپتۇ ھە زىنھار يادىڭدىن .

************
ئۇنتۇشۇمنى قىپسەن ئىلتىجا ،
سېنى قانداق ئۇنتاي دىلرەبا .

رەشىدەم ھەدە، ھاياتلىق ناخشىڭىزنى  تەڭ ئېيتقۇم كەلدى. ھىسلىرىمىز مۇشۇنداق كۈيلەردە ۋىسال تاپقاي.

بىرگە ماھىر كۆپكە قادىر قەلەم ساھىبەسى رەشىدىگە ئىلھاملار ئىنئام بولسۇن!!!

رەشىدەنىڭ ھايات ناخشىسىغا مەنمۇ جۈر بولدۇم. قەلەملەر ھارمىغاي.

بەرگىيە سىڭلىم ،سىزنىڭمۇ  گۈزەل كۈيلىرىڭىز ئۈزۈلمىسۇن .

رەھمەت ئاكا ، مەن پەقەتلا بىر ئاددى ھەۋەسكار خالاس . شۇنداقتىمۇ ئىلھام بەرگىنىڭىز ئۈچۈن خوش بولدۇم .

رەھمەت ئاينۇرى ، سىزنىمۇ يېڭى كىتاۋىڭىز ئۈچۈن چىن دىلىمدىن تەبرىكلەيمەن .

سىز قەلىمى پىشقان شائىرە ھەم يازغۇچىسىز ھەۋەسكار ئەمەس. كەمتەرلىك قىلماڭ.