تاشقىن: ئايال

           ئايال

گۈلباھار ئابدۇقادىر تاشقىن

سەن شۇنداق ئايال،
تۈنۈگۈنۈڭنى،
ئەتەڭنى،
بۈگۈنۈڭنى باغاشلىغاندەك باغاشلايدىغان.
ئىرىڭنى قىڭغىر قاقشىتىپ،
ئۆي ئىچىنى بېشىڭغا كېيىپ،
بالىلىرىڭنىڭ چېھرىنى سارغايتىپ ،
ھويلاڭنى ئەخلەتكە تولدۇرۇپ،
بازارغا چاپمايدىغان.

سەن شۇنداق ئايال.
ئۈنتىنسىز تۈننى تاڭغا ئۇلاشلىرىڭ بىلەن،
كەچ يېتىپ،سەھەر تۇرۇشلىرىڭ بىلەن،
بەخت ئىزدەيدىغان.

ئېتىزغا سۇ تۇتىسەن.
ئورما ئورىيسەن.
قوناق چاپىسەن.
قوي،كالىلىرىڭ ئوت سورايدۇ.
توخۇ،كەپتەرلىرىڭ دان سورايدۇ.
بۇ ئىشلار كۈندە تەكرار.
بالىلىرىمنىڭ ھەققى دەيسەن،
ئىرىمنىڭ ھەققى دەيسەن،
ئاتا-ئانامنىڭ ھەققى دەيسەن،
چېچىڭنى سۈپۈرگە،قولۇڭنى كۆسەي قىلىسەن.
ئاش ئىتىسەن.
نان ياقىسەن.
ھەممە چىرايدا كۈلكە.
مەڭزىدە قىزىللىق.

سەن شۇنداق ئايال،
سەن-مەنچىلىكنى بىلمەيدىغان.
ئۇپپا-ئەڭلىك سۈرمەيدىغان.
سەندە ھېچبىر بايرام بولمايدۇ.
ۋۇجۇدۇڭدا كۈندە بايرام.
ئائىلەڭدە كۈندە بايرام.
مۇھەببىتىڭدە كۈندە بايرام.
ساداقىتىڭدە كۈندە بايرام.

سەن شۇنداق ئايال،
ھاياتلىقنى قاقشاتمايدىغان.
ياشاشقا يۈك ئارتمايدىغان.
جاپا-مۇشەققەتتىن باش تارتمايدىغان.
چارچىمايدىغان.
چارچاشلاردىن ۋايسىمايدىغان.
ساڭا بىرەرسى گۈل دەستە بەرمەيدۇ.
ئانا-ئانا دەپ ئىسمىڭنى چاقىرىدۇ بالىلىرىڭ.
قولۇڭغا ئېسىلىدۇ ئەركىلەپ تۇرۇپ.
مەڭزىڭگە سۆيىدۇ ئىزىپ تۇرۇپ.

سەن شۇنداق ئايال،
چىنلىقنى يۇرىتىدىغان.
ئاياللىقنى كۆز-كۆز قىلالايدىغان.
بارچە خۇشاللىقنى ئۆز-ئۆزۈڭدىن ئىزدەيدىغان،
مېھرىڭ بىلەن بارچە قەلىپلەرنى ئىللىتالايدىغان.

ئەي ئايال،
ساڭا باش باھاردىن سالام.
ئەگىزلەردىن سالام.
چېچەكلەردىن سالام.
مامىكاپلاردىن سالام.
دىللىرى يورۇق،
كۆزلىرى روشەن،
بارچە پەرزەنتلەردىن سالام.
تەبىئەتتىن سالام.
كائىناتتىن سالام.
ئەي ئايال سالام ساڭا،

سەن شۇنداق ئايال سەن،
كۈندە بايرام قىلالايدىغان.

2016-يىلى 8-مارت

     بۇ شېئىرنى ئوقۇپ ئانىلىرىمىزنىڭ ئەينى ۋاقىتتىكى جاپالىق تۇرمۇش شارائىتىدا قەيسەرلىك بىلەن ياشاپ، بىزدەكلەرنى قاتارغا قوشقان مېھرىبان، مىننەتسىز تۇرقى كۆز ئالدىمغا كەلدى. ئاپتورنىڭ ئىپادىلەش ماھارىتىدىن سۆيۈنۈپ قالدىم. ئېتىز-ئېرىق، ھويلا-ئارملارنىڭ تۈگىمەس ئىشلىرىدىن باش كۆتۈرەلمەيۋاتقان شۇ ئانىلارغا بىر پىيالە ئىسسىق چاي، بىر دەستە گۈل بېرەلمىسەكمۇ بۈگۈنكىدەك بايرام كۈنىدە مۇشۇنداق ياخشى شېئىرنى پىچىرلاپ ئوقۇپ بېرەلىگەن بولساق نەقەدەر ياخشى بولار ئىدى-ھە...؟!   ئاپتورغا ئېھتىرام ۋە رەھمەت!

   ياقتۇرغىنىڭىزدىن تولىمۇ خۇش بولدۇم.قىممەتلىك پىكىر تەكلىپلىرىڭىزنى ئايىمىغايسىز.

شىئېرىڭىز تۇرمۇشنى ئەينەن سۆزلەپتۇ ھەدە .

   رەھمەت سىڭلىم.

راست-ھەق...

شېئىرىڭىز بەك ئوبدان چىقىپتۇ! ئۇيغۇر ئاياللىرىنىڭ پەزىلەتلىرىنى ھەقىقى نامايان قىپسىز! تەكلىۋىم: تىلىغا يەنە بىر ئىشلەپ باقسىڭىز! ئىماگىزىمنىڭ مۇۋاپىق كېلىدىغان تەرەپلىرىدىن پايدىلىنىپ، ئادىل تۇنياز، زۇزى مۇھەممەت مۇھەممەت ئەپەندىنىڭ ئۇسلۇبلىرىغا يېقىنراق قىلىپ بىر ئۆزگەرتىپ باقسىڭىز، شېئىرنىڭ ئۆمرى ئۇزۇنراق بولىشى ھەتتا دۇنياۋى شئېىرلار قاتارىدىن ئورۇن ئېلىپ قېلىشى مۇمكىن، قىسقىسى شېئىرىڭىز ماڭا بەك يارىدى، سەۋىيەمنىڭ تۆۋەنلىكىدىن سىزگە ئىچىمدە ئويلىغانلىرىمنى ئۆلچەملىك نەزەرىيۋى تىل بىلەن ئىپادىلەپ بىرەلمىدىم..............

   ئىنىم ئادىلجان قادىر،سەمىمى تەكلىپ پىكىرلىرىڭىز ماڭا بەك ياقتى.بولۇپمۇ يىتەكلەش ئۇسۇلىڭىز ماڭا رىغبەت بولدى.سىز دېگەندەك شېئىرنىڭ مەزمۇنىغا ئىچكىرىلەپ كىرىپ، تىلىغا ئوبدانراق ئىشلەي.
   رەھمەت سىزگە.

ناھايتى ساپ ، سەمىمى تۇيغۇ ، چىن ھېسىيات ، ھەقىقى بىر تۇرمۇش كارتېنىسى ، خۇددى شېئىردىكى ئايالدەك پەردازسىز، ئاددى مىسىرالار ...ماڭا شۇنداق ياقتى .

شېئىرىڭىزدىكى يارقىنلىق مېنى بەك سۆيۈندۇردى

رەھمەت.

ياقتۇرغىنىڭىزغا رەھمەت.يەنىمۇ تىرىشاي.

بۈگۈنۈڭنى باغاشلىغاندەك باغاشلايدىغان.

ھويلاڭنى ئەخلەتكە تولدۇرۇپ،

كۈندە بايرام قىلالايدىغان.


   بۇ مىسرالار ئۈستىدە قايتا ئويلۇشۇپ باقسىڭىز-تەكلىپ.


  سەن -"مەنچىلىكنى" مۇ مەنمەنچىلىكنىمۇ؟
  "ئانا-ئانا" مۇ ئانا،ئانىمۇ؟
  قەلىپ-قەلىب...ۋاكازالار

ئالتۇندەك تەكلىۋىڭىزگە رەھمەت.چوقۇم ئويلۇشۇپ باقاي.

تاشقىن خانىم ، ئاياللارنى ئۇلۇغلاپ يازغان چاچما شىئېرىڭىز ناھايىتى مەزمۇنلۇق، ھېسياتلىق چىقىپتۇ. بىراق، بېشىدىكى بىر كۇبلىت شىېىرنىڭ ئومۇمى نىشانىغا ماس كەلمىگەندەك ھىس قىلىپ قالدىم. ئويلاپ باقارسىز. چوڭ جەھەتتىن مەدھىلەشكە ئەرزىيدۇ.