مۇھەممەدئىمىن ھەسەن :ئايال بولسا

مۇھەممەدئىمىن ھەسەن

بۇ ھاياتلىق گۈلگە ئوخشار ئايال بولسا،
دەشتى-چۆلمۇ باغقا ئوخشار ئايال بولسا،
تۇغما مېيىپ،ياكى مەجرۇھ ئەركەكلەرمۇ،
ھەقىقى بىر  ئەرگە ئوخشار ئايال بولسا.

ئاياللاردىن  خۇشلۇق تاپار قېرى ھەم ياش،
ئايال بىلەن بۇ ھاياتلىق بولۇر  ھەم شاش،
ئايال بولسا ھەم بولۇرسەن بىر ئۆيگە باش،
ئەركەكلىكىڭ ئەرگە  ئوخشار ئايال بولسا.

كەپە ئۆيلەر  سارايلاردەك  تۈسكە  كېرەر،
نامرات دېمەي ئۆيگە ھەردەم مېھمان كېرەر،
ئاز مېلىڭغا  تەڭرى  يەنە بەركەت  بېرەر،
ئۆيلىرىڭمۇ  ئۆيگە  ئوخشار  ئايال بولسا.

سەپەر قىلىپ دەشتى-چۆل ھەم داۋان ئاشساڭ،
خوتۇن  بىلەن بىللە قوپۇپ  بىللە  ياتساڭ،
ھېچ بىلىنمەس مۇساپىر بوپ غەمگە  پاتساڭ،
ئۆڭكۈرلەرمۇ  ئۆيگە  ئوخشار  ئايال  بولسا.

بىر كۈنلەردە باشقا  يۇرتقا  كېتىپ قالساڭ،
دەرت ئەلەمدە غەم- قايغۇغا پېتىپ قالساڭ،
قەرزدار بوپ ئۆي-بېساتىڭ سېتىپ قالساڭ،
قايتا باشلا، ئىشىڭ  ئوخشار  ئايال بولسا.

كۈنلەر ئۆتۈپ  ياشلىقىڭمۇ قولدىن كەتسە،
قېرىلىقىڭ  سېنى  ھەردەم  بوزەك  ئەتسە،
بىچارىلىق  ھەم  ئاجىزلىق  ساڭا  يەتسە،
  قېرىلىقىڭ  ئەرگە  ئوخشار، ئايال بولسا.

كېسەل بولۇپ  ياتساڭ ئەگەر  ئورۇن  تۇتۇپ ،
تەسەللىي ھەم ھەمرا بولۇر كۆڭلۈڭ  ئۇتۇپ،
ئۆلۈپ كەتسەڭ يىغلار ھەردەم ماتەم تۇتۇپ،
ئۆلۈمىڭدە ‹ھازاڭ› ئوخشار  ئايال  بولسا.

ئاپتور: قاغىلىق ناھىيە شادلىق دوختۇرخانىسىدىن

2016-يىلى 3-ئاينىڭ 3-كۈنى