ئازادجان ئىبراھىم: كۆرەلمەسلەر

كۆرەلمەسلەر


ئازادجان ئىبراھىم


ئۆز كۈچىگە تايىنىپ باي بولغاننى،
داستىخنى موللىشىپ ماي بولغاننى،
نۇرلاريېغىپ چېھرىدىن  ئاي بولغاننى،
قەبىھ يامان كۆرىدۇ كۆرەلمەسلەر.

مىھنەت قىلىپ ھالاۋەت كۆرگەنلەرنى،
ئېناق، ئىجىل  باياشات يۈرگەنلەرنى،
ئامەت كېلىپ يەنە دەۋرى سۈرگەنلەرنى،
دايىم خاپا قىلىدۇ كۆرەلمەسلەر.

بىرلىرىنى بىرىگە داتلاپ  چېقىپ،
ياخشىلارنى سىغدۇرماي چەتكە قېقىپ،
بىرلىرىنى رەنجىتىپ بانا تېپىپ،
جىدەل قىلىپ تۇرىدۇ كۆرەلمەسلەر.

ئەمگىكىدىن خوشاللىق تاپقانلارغا،
كېلەچەككە يېىڭى يول ئاچقانلارغا،
خەلقى ئۈچۈن زور ھەسسە  قاتقانلارغا،
قاتتىق زەربە بېرىدۇ كۆرەلمەسلەر.
2016-يىلى 2-ئاينىڭ 22-كۈنى كۈنەس  

قاپىيە ئويناشنى قاچانغىچە داۋاملاشتۇرماقچىسىز؟

ئەرچىن ئەپەندى ياخشىمىسىز؟سىز بۇرۇنمۇ كوپ  قېتىم تەكلىپ بەرگەنتىڭىز تەكلىپلىرىڭىزنى قوبۇل قىلىمەن،لېكىن ئىلھام كەلگەندە مۇشۇ خىل شەكىلدە كوپلىگەن شېئىرلارنى يېزىۋەتكەن ئىدىم شۇلارنى يوللاپ تۇرىۋاتىمەن بۇ خىل شېئىر شەكلى ياخشى ئىشلارنى ،ياخشىلارنى مەدىھىلەشكە ناچار ئىللەت ،ناچار ئىشلارنى قامچىلاشقا بەكمۇ ماس كېلىدىكەن.ئۇنىڭ ئۈستىگە مەن مۇشۇ خىل شەكىلدە يېزىشقا ئادەتلىنىپ قاپتىمەن.بۇنىڭدىن كېيىن باشقىچە شەكىلدە يېزىشىم مۇمكىن.بۇمۇ مېنىڭ شېئىر ئىجادىيىتىمنىڭ مەلۇم باسقۇچى بولۇپ قېلىشىمۇ مۇمكىن.راستىمنى دېسەم  ھازىرغىچە گۇڭگا شېئىر يېزىپ باقمىدىم.مېنىڭ يېزىۋاتقانلىرىم ھازىرچە بەك ئاددىي ،ئامما باپ شېئىرلار بۇنىڭدىن كېيىن نادىر شېئىرلارنى يېزىشقا تىرىشىمەن !گېپىمنى قىسقارتسام دېگەنلىرىڭىز ئورۇنلۇق !

شېئىرلىرىڭىزنىڭ ھەممىنى ئوقۇپ چىقتىم ئاساسەن بىرخىل شەكىلدە يېزىپسىز ،بۇنىڭدىن كىيىن تىلغا تىخىمۇ كۈچەشنى ئۇسلۇپ،شەكىلگە تخىمۇ ئەھمىيەت بېرىشىڭىزنى ئۆمۈت قىلىمەن بۇ مۇنبەردىكى نۇرغۇن كىشىلەر سىزگە دىققەت  قىلىۋاتىدۇ.

ئازاتجان ، ئەرچىننىڭ  گېپى سىز ئۈچۈن تولىمۇ مۇھىم ... بۇ تېكىست  مېنىڭچە شېئىر ئەمەس ! شېئىرگە ھېچكىم ھازىرغىچە تولۇق تەبىر بەرمىدى ، چۈنكى شېئىر تۇيغۇ بىلەن تۇتۇشۇپ كەتكەن بىر مەنىۋىي جەريان ... سىزنىڭ تېكىسىڭىز سۆز ئويۇنى خالاس ... بۇ گەپلىرىم قاتتىق كەتكەن بولسا ھوزۇرلۇكمەن ، سىز شىنجاڭ ئۇنۋىرسىتىدا ئەدەبىيات ئوقۇپتىكەنسىز ، بوغدىكامنى بىلەمسىز ؟ ئۇ ئاقساقال پىشقەدەملەر ئىچىدىكى ھەقىقى شائىر ، شۇ كىشىنىڭ شېئىرلىرىنى ئوقۇغان بولۇشىڭىز مۈمكىن ، ئۇ كىشى سىزگە دەرسمۇ بەرگەندۇ ؟ مۇشۇ گېپىمنى ئەستە چىڭ ساقلاڭ ... پىركىرلىشىپ تۇرايلى ، ئامان بولۇڭ ...

قەبىھ يامان كۆرىدۇ.
دايىم خاپا قىلىدۇ.
جىدەل قىلىپ تۇرىدۇ.
قاتتىق زەربە بېرىدۇ.
........
يۇقارقىلار سىزنىڭ 4كۇپلېت "شېئىر''ىڭىزدىكى "يارقىن"مىسرالار... سىز يۇقارقى 4قۇرگەپنى" شېئىر"دېيەلەمسىز ئازادجان؟...

مەنمۇ بۇرۇن يازغان. ھازىرمۇ يېزىۋاتىمەن. يازغانلىرىم سىزنىڭكىدىن ئازراق ياخشى چىققاندەك قىلغان بولسىمۇ، بۇ داستىخانغا تۆككۈم كەلمىدى. سەۋەبى: پىشمىغان غورا-چىشنى قامىتىدۇ ئەمەسمۇ؟..لېكىن مەن بۇ مۇنبەردىكى نادىر،نادىر چىقمىسىمۇ ھەرھالدا ياخشى چىققان ئەسەرلەرنى ئوقۇپ بەھىرلىنىۋاتىمەن. نۆۋىتىدە بۇمۇ  ئادەمگە بىرخىل مەنىۋى خوشاللىق-ھوزۇر بەخش ئېتىدۇ-دەپ ئويلىغانلىقىمدىن.

دۇنيادا گۇڭگا شېئىر يوق، ئەمما شېئىرنى كۆرەلـمەيدىغان ئەمالار نۇرغۇن. بۇ گەپ مەن گۇڭگا شېئىر يېزىپ باقمىغان دېگەن ئازاتجان ئۇكامغا قارىتىلدى. گۇڭگا شېئىر دېگەن ئاتالغۇنىڭ چىقىشى شېئىردىكى گۇناھ ئەمەس ،بەلكى ، شۇنى شۇنداق ئاتىغان ئادەملەرنىڭ ئۆزىنىڭ خاتالىقى. مەدەنىيەت ئىنقىلابىنىڭ ئالدى ـ كەينىدە ئەدەبىيات سىنىپىي دىكتاتورانىڭ قولچومىقىغا ئايلانغانىدى، شۇڭا ئەدەبىياتنىڭ جېنى بولغان سىمۋوللاشتۇرۇش دېگەندەك بارلىق ئىپادىلەش سەنئەتلىرى گۇمران قىلىنغانىدى. ئەدىپلەر تىلدىن قىيىق كەتسىلا ئەتىسىلا پۇت ـ قولى يەرگە تەگكۈزۈلـمەي قىيناقخانىغا ئاپىرىۋېتىلىدىغان بولغاچقا ئەدەبىيات پەقەت دىكتاتور يۈرگۈزىدىغان قوپال يالىڭاچ گەپلەرنىڭ دۆۋىسىگە ئايلانغانىدى. ھەقىقىي ئەدەبىياتنىڭ باھارى قايتا يېتىپ كەلگەندە دىكتاتور ئەدەبىياتىغا كۆنۈپ، زىيادە دۆتلىشىپ كەتكەن كىشىلەر ھېچنېمىنى ئاڭقىرالـمىدى ـ دە، ھەقىقىي ئەدەبىي ئەسەرلەرگە گۇڭگا دەپ نام قويدى. زامانىمىزدا ئاشۇ دەلدۈشلۈكنىڭ ئاسارىتى تېخىچە ساقايغىنى يوق. بايلارنى، رېستۇراننى، قىزلارنى ...ئىشقىلىپ ،ھەممە ئادەم ، ھەممە شەيئىنى بىر ئۆمۈر تىللاپ شېئىر ـ قوشاق يازىدىغانلار يەنىلا زور بىر قوشۇننى تەشكىللەپ تۇرۇپتۇ.

‹‹كۆرەلمەسلەر››ناملىق تۆت كۈپلىت شېئىرىمنىڭ دوستلارنىڭ دېققىتىنى تارتقانلىقىدىن بەكمۇ بەخىرلەندىم.چۈنكى دوستلارنىڭ بۇ شېئىرىم ھەققىدىكى ئىنكاسىنى،باھاسىنى بىلىۋالدىم.ھەممىمىزنىڭ مەقسىتى نادىر ئەسەرلەرنى ئىجات قىلىپ ئوقۇرمەنلەرگە تەغدىم قىلىش.كىشىلەرگە مەنىۋى زوخ ئاتا قىلىش .شۇڭا ھەممىمىز شۇ مەقسەتتە تىرىشىپ كېلىۋاتىمىز ،ئىزدىنىۋاتىمىز.مېنىڭ شېئىرلىرىم گەرچە زاغرا تىلدا يېزىلغان  ئاددىي شېئىرلار بولسىمۇ ئۇنى شېئىر ئەمەس سۆز ئويىنى دېيىشكە بولايدۇ.پەقەت بەدئىلىكىكى تۆۋەن بولىشى مۇمكىن. تۇرمۇشىمىزدا تۈرلۈك تۈمەن ئىشلار يۈزبېرىپ تۇرىدىكەن ئۇنى يازغۇچى شائىرلار ھېس قىلىپ يەتكەندە قۇربىنىڭ يىتىشىچە ھەرخىل شەكىلدە يېزىپ ئىپادىلىشى مۇمكىن.نەتىجىدە بەزى شېئىرلار نادىر شېئىرلار بولۇپ چىقىشى مۇمكىن بەزىلىرى ئادەتتىكىچە بولۇپ چىقىشى مۇمكىن بۇ شائىرنىڭ تۇرمۇشتىن ئالغان ئىلھامى.ھېسياتى ۋە بەدىئى ئىپادىلەش ماھارىتى بىلەن بىۋاستە مۇناسىۋەتلىك.يوقىرىدا ماڭا قىممەتلىك تەكلىپلەرنى بەرگەن دوستلارنىڭ شېئىر ئىجادىيىتىگە كىرىشكەن ۋاقتىڭلار ماڭا قارىغاندا ئۇزۇنراق ،پىشقان شائىرلار سىلەرنىڭ شېئىرلىرىڭلارنى داۋاملىق ئوقۇپ تۇرىمەن.مەنمۇ ئۇزۇن بولمىغان ۋاقىت ئىچىدە كۆپلىگەن شېئىرلارنى يازدىم.ھازىرمۇ ۋاقىت چىقىرىپ چامامنىڭ يىتىشىچە يېزىپ كېلىۋاتىمەن.لېكىن كۈنەستە يازغۇچى ،شائىرلارنىڭ ئىجادىيەت ئۈستىدە ئۆزئارا پىكىر لىشىش ئىشلىرى ،مۇھاكىمە پائالىيەتلىرىمۇ يوق دىيەرلىك.مۇشۇمۇ سىلەر دېگەندەك تەلەپلەرگە كىتەلمەسلىككە سەۋەپ بولۇپ قېلىۋاتقان بولىشىمۇ مكىن.شۇڭا دوستلارنىڭ توغرا چۈشىنىشىنى،توغرا نىيەتتىكى تەنقىدىي ،تەكلىپ پىكىرلەرنى بېرىپ تۇرىشىنى قىزغىن قارشى ئالىمەن!ئۆزئارا ھەمكارلىشىپ،ئۆزئارا قوللاپ،ئۆزئارا ئىلھام بېرىپ،شېئىرىيەتنىڭ يوقرى پەللىسىنى  يارىتىش ئۈچۈن ئورتاق كۈچ چىقىرايلى!