ئايىمنىسا سۇلايمان: چۈش ياپراقلىرى

ayimnisa · ۋاقتى: 2016-2-20 17:02:50


	بۇ يازمىنى ئاخىرىدا parhat kazim تەھرىرلىگەن. ۋاقتى 2016-2-21 11:50 AM (ئىزگۈگە)چۈش ياپراقلىرى ( نەسىر) ئايىمنىسا سۇلايمان قەلب ساھىلى روھ سۈبھىلەرنىڭ سۈزۈلۈۋاتقان پەيتىدە پايانسىزلىقتا قانات قاقىدۇ. مېنىڭ تاڭلارنىڭ ناخشىسىغا قوشۇلۇپ كەتكۈم بار. قۇشقاچلارنىڭ ۋىچىرلاشلىرىدا مېنىڭمۇ ئاۋازىم بارلىقىنى كىم ھىس قىلالايدۇ؟ روھىم كەڭلىكلەرگە يۇلقۇنىدۇ. قەلبىم بىر سۈزۈك مۇناجاتتىن لەرزىگە كېلىدۇ. مېنىڭ يوقلۇققا ئايلىنىشتىن ئىلگىرى نۇرغا ئايلانغۇم بار، ئەبەدلىك نۇرغا! ئىھ، چۈشلەرنىڭ يالقۇنى... كۆڭۈلنىڭ قارا كىچىسىنى كۈتۈۋالغۇم يوق. ئەقىدەمنىڭ، ساداقىتىمنىڭ چاك كەتكەن دەزلىرىنى كۆرگۈم يوق. ھايات مېنىڭ دەپ چۇقان سالغىنىمدا، مەن ھېچكىمدۇرمەن. مۇھەببەت مېنىڭ دەپ شاتلانغىنىمدا، قۇپقۇرۇقتۇرمەن. كىمكلىكىم قەلبىمنىڭ پايانسىزلىقىدا چېچىلىپ ياتىدۇ. ئىچىمدىن ئىچىمگە سوزۇلۇپ ياتقان بوشلۇق مېنى دوقمۇشلاردا پەرىشان قىلىدۇ. تېڭىرقاشلار مېنى ۋەيرانلىققا باشلايدۇ. قەلبىمدىكى سانسىز سوئاللاردىن كۈنلەرنىڭ ھەيرانلىقىغا تاشلىنىمەن. مەن-كىم؟ مەن بىر ئايال، مۇھەببەت ئۈچۈن يارالغان. مەن بىر يۇمران گۈل، بىپەرۋا نەزەرلەردىن مۇھەببەت سوراۋاتقان. مەن بىر ئوت، پەلەكلەرگە سوزۇلغان. مەن-بىر ئايال، چۆل-باياۋانغا ئايلانغان... مەن-بىر ئانا، مۇھەببەتتىن باشقىنى بىلمىگۈچى. مەن-بىر ئانا، بېغىشلاشتىن لەززەتلەنگۈچى. مەن –بىر ئانا، توزۇپ كىتىشتىن ھۇزۇرلانغۇچى! قەلبىم لىققىدە نۇر بىلەن تولغان. تاڭلارغا قوشۇلۇپ يۇرۇيمەن، جاھانغا سىغمايدىغان مۇھەببەتنى كۆتۈرۈپ يۈرۈپ، ئىككى تۈپ دەرەخكە، ئەسلىمىگە، چۈشكە ئايلىنىپ كىتىمەن. ئىھ، غەمخانلىرىم، مېنىڭ مۇھەببەت ئىكەنلىكىمنى بىلەمسىلەر؟ مېنىڭ ھامان نۇرغا ئايلىنىپ كېتىدىغانلىقىمغا ئىشىنەمسىلەر؟ قەلبىمدە باراقسان ئورمانلىققا ئايلانغان چۈشلەر ساھىلى، باغرى چاك-چاك يېرىلغان باياۋان، نۇرغا ئايلانغان يۈرەك ۋە يەنە مۇھەببەتكە ئايلانغان ھايات... مەن كەتكۈچى! روھىمنىڭ مەڭگۈلۈك دەرگاھىغا يوقلۇقۇمنى يادىكار قىلىپ كەتكۈچى! ئىھ، قەدىردانلىرىم، كېتىشتىن ئاۋۋال سىلەرنى بارچە مىھرىم، پۈتۈن مەۋجۇتلىقىم بىلەن شۇ قەدەر چوڭقۇر سۆيىدىغانلىقىمنى بىلدۈرۈشۈم كېرەك. ئاشۇ مۇھەببەت مېنىڭ ھاياتىم . ئەقىدەمنىڭ باراقسان ئورمانغا ئايلانغانلىقىنى سىلەر كۆرمىدىڭلار. ئىزلىرىمنىڭ سىلەرنىڭ ئىزلىرىڭلار ئىكەنلىكىنى بىلمىدىڭلار. يۈرىكىمنىڭ ھەربىر سوقۇشىدا ئىسمىڭلارنىڭ زىكىر قىلىنىدىغانلىقىنى ئۇنتۇپ كەتتىڭلار... -مۇھەببەت، نەپرەت، ئۆكۈنۈش... مەندە مۇھەببەت، ۋەيەنە مۇھەببەتكە ئايلانغان ھاياتلا بار. سىلەرگە بولغان سۆيگۈمنى ساھىللاردىكى نۇر ئۇپۇقى، خىلۋەت ئورمانلىق ۋە غېرىپ شاماللار بىر كۈنلەردە ئىپتىخار بىلەن يادىغا ئالغىنىدا ، ئىسىڭلاردىن كىچىدىغىنىمنى بىلىمەن. ئۇزۇندىن-ئۇزۇن خىياللىرىمغا شاھىت بولغان تاملار، رۇجەكلەر، قۇشلار، دەرەخلەر ۋە يامغۇر تامچىلىرىنىڭ بىر كۈنلەردە كۆزلىرىم ۋە كۈلكىلىرىمنى سىلەرگە تۆكۈپ بېرىدىغانلىقىغا ئىشىنىمەن. قەلبىمدىكى ئېقىنلارنىڭ سۈزۈكلىكىدىن ھەيرانلىققا چۆمگەن كىم؟ مەن بىر ئۇلۇغ گۈزەللىكنى بايقىغۇچى، مەن ئۇنىڭ پايانىدا چۈشكە ئايلىنىمەن. مەن بىر گۈزەل سەمىمىيەتنىڭ نۇرانە سەھىرى. مەن بايقىلىپ قالغاندا، يوقلۇقنىڭ زۇلمەتنى بەربات قىلغۇچى نۇرلىرىغا قۇشۇلۇپ كېتىمەن. -كەل، ئەي، قەدىردانىم! مېنى سەيلە قىل. ماڭا تۆكۈل. مەندە ئاق! -كەل، ئەي، قەدىردانىم! گۈللىرىمگە ئىخلاسىڭنى بەر! -كەل، ئەي، قەدىردانىم! مەندىكى مۇھەببەتنى ئال، ۋە يەنە ئۇنىڭغا مۇھەببەت بىلەن جاۋاپ قايتۇر! مەن كېتىمەن، كېلىشنىڭ ھىكمىتىنى يوللارغا قالدۇرۇپ! مەن كېتىمەن، قايغۇ-ھەسرەتلىرىمنى چۈشلەرگە يادىكار قىلىپ! قەلبىمدىكى بارلىق بىلەن يوقلۇق ئارىسىدا پەقەت بىرلا يول بارلىقىغا ئىشىنەمسەن؟ قەلبىمدىكى ساھىللارنىڭ سېنىڭ ئىزلىرىڭ بىلەن تولغانلىقىغا ئىشىنەمسەن؟ قۇشلىرىم، دەرەخلىرىم ۋە ئاسمانلىرىمدا سېنىڭلا ئېسمىڭ بارلىقىغا ئىشىنەمسەن؟ قەلبىمنىڭ رەڭسىز ساھىلى سېنىڭ رەڭلىرىڭ بىلەن توشۇپ كەتتى. ئىھ قەدىردانىم، ماڭا كەل! نىگاھلىرىڭ مېنىڭ رىئاللىقىم ۋە چۈشلىرىم بىلەن پايانسىزلىققا قوشۇلۇپ كەتسۇن! گۇگۇم قايرىلغاندا يۈرىكىمنى، ياق جاھاننى لەرزىگە سالغان چەكسىز غېرىپلىق ئىچىدە رۇجەكلەردىن يېيىلىۋاتقان قارامتۇل تۈن پەردىسىگە چەكسىز ئىشىق ۋە يەنە غۇۋا ئۈمىد بىلەن ئۇزاقتىن-ئۇزاق تىكىلىمەن. بىراق ئۇ ئۇزاق داۋاملاشمايدۇ. يۈرىكىم قانداقتۇر بىر تىت-تىتلىق ئىچىدە يەنە مېنىڭ رىئاللىقىمغا قايتىدۇ. گۇگۇم قايرىلغاندا چۈشكە ئايلانغان رىئاللىق بىلەن رىئاللىققا ئايلانغان چۈش ئارىسىدا مۇڭلىنىۋاتقان جىمجىتلىققا ئەسىر بولىمەن. چۈشلەر چۈشلەردە داۋاملىشىدۇ. ھايات تىنىقلاردا ئۆزىنى ئايان قىلىدۇ. گۇگۇم قايرىلغاندا، يوقلۇق بىلەن بارلىق ئۆزىنى نامايىش قىلغاندا، جىمجىت، ئەمما شاۋقۇن-سۈرەنلىك تۈنلەر بارچە شاتلىقى ۋە بارچە غېرىپلىقى بىلەن تۇيغۇلارنى چىكىپ ئۆتكەندە، كۆزلەرگە سوقۇلۇپ تۇرغان ھاياتنىڭ بىر پارچە ئەكسى خىياللاردا زاھىر بولىدۇ. گۇگۇم قايرىلغاندا باشلانغىنى نىمە؟ سېغىنىشمۇ؟ بەختمۇ؟ كۆزلەردىن كۆزلەرگە سۇنۇلغىنى تەشۋىشمۇ، ۋە ياكى ۋىسال شارابىمۇ؟ ئۈمىد بىلەن ئۈمىدسىزلىك ئارىسىدا چوقچىيىپ تۇرغان بىر تام بار. ئۇ مېنى قىسمەتلەرنىڭ سىرلىق پايانىغا تاشلاپ قويغان. پەرىشانلىق بىلەن شادىمانلىق ئارىلىشىپ كەتكەن پۈتۈلمىشلەردە مېنىڭ چۈشسىمان ھاياتىم يېزىلىپ ۋە يەنە ئۆڭۈپ بارىدۇ. قۇملاردەك سورۇلۇپ، قۇملاردەك توزۇپ، زاماندىن زامانغا ئاقىمەن. يىراقتىكى، تولىمۇ يىراقتىكى دېڭىزلارنىڭ شاۋقۇنى تۇيغۇلىرىمغا تىگىش قىلغاندا، ئارمانلىرىمنىڭ نەقەدەر كۆپلىكىنى ھىس قىلىمەن. مەن كۆرەلمىگەن سانسىز سۈرەتلەر، مېنى كۆيدۈرۈپ، ئەمما مەن ئۈچۈن كۆيمىگەن ئاسمان پەلەك گۈلخانلار مېنى ئەپسۇسلۇق ئىچىگە باشلاپ بارىدۇ. ئەمما، بۇ ھاياتنىڭ قايغۇرغۇدەك نىمىسى بار؟ ئادەملەرنىڭ ئاغرىنغۇدەك نىمىسى بار؟ ھەممە ئۆزى ئۈچۈن ياشايدۇ. ۋە يەنە ھەممە ئۆزى ئۈچۈن مەۋجۇت! گۇگۇم قايرىلغاندا، خىياللار ئۆز ئالىمىدە سەير قىلىدۇ. كىچە، يۇلتۇزلار چاراقلاپ يېنىپ تۇرغان كىچە نىمىلەرنىڭ شاھىدى ئەمەس؟ ئۇ يەردە بەخت، ئازاپ، ساداقەت، خىيانەت... ھەممىسى ئۆزىنى تاپشۇرىدۇ. نىقابلىق سەھەرلەر كىچىلەرنىڭ نىقابى! گۇگۇم قايرىلغاندا چۈشلەر ئۆزىنى داۋاملاشتۇرىدۇ. ۋاقىت ئۆز ئېقىنىدا جىمجىت ئاقىدۇ. يۇلتۇزلار ئۆزىنى ئۆزىگە سۆزلەيدۇ. ھايات ئۆز تەشۋىشىگە قۇيۇلىدۇ. گۇگۇم قايرىلغاندا مەن بەخت ئىلكىدىكى سەبىيلىكىمنى، ئۆزۈمگە قايتىۋاتقان تەشۋىشلىرىمنى چۈشلىرىمگە يادىكار قىلىمەن. رۇجەكلەردىن غۇۋا سىپىلىۋاتقان ئاي نۇرىغا قاراپ، قەلبىمنىڭ ئاپئاق نۇرلىرىغا چېچىلىمەن. كۈمۈش رەڭ نۇرلار، قارلىق دالالار، سىرلىق قىسمەتلەر ھامان پايانىمدا سوزۇلۇپ ياتقان رىۋايەتلەرگە ئايلىنىدۇ. مەن ئۇنى يۈرىكىم بىلەن كىچىلەرنىڭ جىمجىتلىقىغا ئوقۇپ بىرىمەن. ئۇنى يەنە يوقلۇقۇمغا قۇشۇپ، زامانلارنىڭ ئېقىنلىرىغا تاشلايمەن. ھايات شۇنداق! گۇگۇم قايرىلىدۇ، نىقابلىق سەھەرلەر باشلىنىدۇ. يۈزلەرنىڭ يالتىراقلىقى، كۆزلەردىكى ساختا كۈلكىلەر زاماننىڭ مەسخىرىلىك تىكىلىشلىرىدە توزىماي قالمايدۇ. بەخت ئېرىشكىنىڭ ئەمەس، بەختسىزلىك مەھرۇملۇق ئەمەس! ياشاش بىر ھىكمەتلىك ھىكايە. ئۇ تۈنلەردىن باشلىنىدۇ، كۈنلەردە ئۆزىنى يېزىپ چىقىدۇ. گۇگۇم ئۇنىڭ خىيالى، ئۇنىڭ مۇقەددىمىسى! يۈرەكتىكى مۇساپە تۇنۇش يۈرەك بىلەن ناتۇنۇش يۈرەك، ۋە يەنە تۇنۇش يۈرەك بىلەن تۇنۇش يۈرەكنىڭ ئارلىقىدا نىمىلەر بار؟ ئۇ يەرگە سىغدىلىپ تۇرغان زاماننى ھېچكىم چۈشەندۈرۈپ بىرەلمەيدۇ. خىيانەت يۈرەك بىلەن يۈرەكنىڭ ئارىلىقىدا يۈز بىرىدۇ. يۈرەك بىلەن يۈرەكنى باغلاپ تۇرغان مىھىر-ۋاپا، ساداقەت يۈرەكلەردىكى تامامى ئارىلىقنىڭ ئۆز مەنزىلىگە قايتىۋاتقان مەڭگۈلۈك بېغىشلىنىشى! ھىجران يۈرەكتىكى مۇساپىلەرنىڭ چەكسىزلىكتىكى پايانى. ۋىسال ئۇنىڭ ئۆزىگە قايتىشىدا تاماملىنىدۇ. ئەي، مەنزىلسىز سەيياھ، ھاياتىڭ بىلەن يۈرەكتىن يۈرەككە يېقىنلاپ بار، ۋە يەنە ھاياتىڭ بىلەن ساڭا مەنسۈپ بولمىغان يۈرەكلەردىن، ساڭا مەنسۈپ بولمىغان مەنزىللەردىن ۋاز كەچ! ئۇ يەردە ساداقەت بىلەن خىيانەت ئېلىشىدۇ. ئۇ يەردە قەلبىڭنى يۇرۇقلۇققا باشلايدىغان ئازاپ بىلەن ھاياتىڭنى زۇلمەتكە باشلايدىغان شادىمانلىق بىر-بىرىگە قارىشىپ تۇرىدۇ. يۈرەكتىكى مۇساپە، ئۇ-دەقىقىلىق يول! يۈرەكتىكى مۇساپە، ئۇ- مەڭگۈ ئاخىرىغا يەتكىلى بولمايدىغان يول! ئۆزىگە سادىق بولالمايدىغان يۈرەك ئەبەدىي خاتىرجەملىككە ئېرىشەلمەيدۇ. ئۆزىگە سادىق بولالمايدىغان يۈرەك ئەبەدىي ئۆزىنىڭ كىملىكىگە يۈز كىلەلمەيدۇ. يۈرەك-ئاسمان پەلەك بىر گۈلخان! يۈرەك بىر ئېقىن دەريا! قايتىش-چۈشلەرنىڭ قايتىشى ئەمەس، قايتىش-مۇساپىلەرنىڭ قايتىشى ئەمەس! قايتىش-يۈرەكنىڭ ئۆزىگە قايتىشى. قايتىش-يوقلۇقنىڭ يەنە يوقلۇق بولۇپ تاماملىنىشى! ۋاقىت يۈرەكتىكى مۇساپىلەردە ئىزاھلىنىدۇ. قەلبىمدىن تېشىپ تۇرغان ۋاپا، ساداقەت بۇلاقلىرىنى ئەبەدىي ئىچىپ تۈگىتەلمەيسەن، ۋە يەنە قەلبىمدىن قەلبىڭگە سىنچىلاۋاتقان مىھىر تۆكۈلۈپ تۇرغان كۆزلەرنى ئەبەدىي ئوقۇپ بولالمايسەن. مۇھەببەت-نەپرىتىم، يىرگىنىشلىرىم، كۈيۈملىرىم ۋە يەنە بىپەرۋالىقىم يۈرىكىمدە تاماملىنىپ بولغان مۇساپىلەرنىڭ ئۆچمەس ئىزلىرى. مۇھەببەت ئۈچۈن يارالدىم، يەنە مۇھەببەت ئۈچۈن يوقلۇق ئەپسانىسىگە قوشۇلۇپ كىتىمەن. يۈرىكىمدىكى بارچە مۇساپىلەر چۈشكە ئايلىنىدۇ. سەن ئېزىپ كىتىۋاتقان قەدەملىرىڭ بىلەن يۈرىكىمگە يېقىنلاپ بېرىۋاتقىنىڭدا، يۈرىكىمنىڭ ساڭا ئايلىنىپ كەتكەن سانسىز گۈللىرىنى كۆرىسەن. قەدەملىرىمنىڭ ساڭا ئايلىنىپ كەتكەن رىۋايەتلىرىنى چوڭقۇر ئۆكۈنۈش بىلەن ئەسلەيسەن. ئەپسۇس! يۈرىكىمدە تاماملىنىپ بولغان مۇساپىلەر ئىچىدە سەن بار-يۇ، ئەمما مەن يوق. مەن ئارىلىقسىزلىق ئىچىدە يوقلۇققا قايتقاندا، مەڭگۈلۈك خاتىرجەملىككە پاتىمەن، سېنىڭ ئازاپ ۋە ئۆكۈنۈشلىرىڭ، دەرت-پىغانلىرىڭ شۇ يەردىن باشلىنىدۇ. ئاخىرلىشىش بىلەن باشلىنىش يۈرەكتىكى مۇساپىلەردىن چەكسىزلىككە قاراپ يامرايدۇ. ھەممە چۈشكە ئايلىنىدۇ. يۈرەكتىكى مۇساپە ئاسماندەك يىراق، ۋە يەنە خىيالدەك يېقىن. ئۇ يەردە تۇنۇش ناتۇنۇشلۇق ھۈكۈم سۈرىدۇ. ئۇ يەردە مەۋجۇت چۈشلەر داۋاملىشىدۇ. ئىنسان پەقەت ئۆزىگە مەنسۈپ يولنىلا داۋاملاشتۇرالايدۇ. ئىنسان پەقەت ئۆزىنىڭ يۈرىكىگىلا قايتالايدۇ. يۈرەكتىكى مۇساپە ،ئۇ- بىر سىرلىق تېپىشماق! يۈرەكتىكى مۇساپە، ئۇ بىر ناتۇنۇش قىسمەت! ئۇ يەردىن كېلىۋاتقىنى سەن! ئۇ يەردىن كېلىۋاتقىنى كەچمىش! ئۇ يەردىن كېلىۋاتقىنى رىۋايەت! يۈرەكتە تەكرار ئېچىلىۋاتقىنى پەقەت بىرلا ئىسىم! يۈرەكتىكى مۇساپە ۋاقىتنىڭ ئىزاھلىنىشى! مەن ئۆزۈمگە قايتىش ئۈچۈن ۋاقىتقا موھتاج، مەن پەقەت ئۆزۈمدىلا ھەممە، ۋە يەنە ئۆزۈمدىلا ھېچنەرسە! يۈرەك مۇساپىلەردە توزۇپ بارىدىغان گۈل! ھايات مۇساپىلەردە چۈشكە ئايلىنىدىغان رىئاللىق! كەچمىشلەردە يۈرەككە يېيىلىپ ياتقان باياۋان ھىدى. بارچە مۇساپىلەر ھامان تاماملىنىدۇ. بارچە ھايات ھامان مەڭگۈلۈكلىكىگە قايتىدۇ. يېشىل ۋادىلار مىڭ-مىڭ يىللاردىن كىيىن رىۋايەتكە ئايلىنىدۇ. بىر يۈرەك-بىر چۈش-بىر ئادەم، تەنھالىقىدىن زوقلىنىۋاتقان بىر ئايال، بۇلارنىڭ ھەممىسى ئۆزىنى ئۆزى بىلەن ئىزاھلىماقتا... يوللار، يۈرەكنىڭ يوللىرى ئۆزىدىكى تامامى ئۈچۈن ئۆزىگە قايتماقتا! ئىھ، ئۆزى ئۈچۈن يېزىلىش نەقەدەر گۈزەل، نەقەدەر ھەسرەتلىك! ۋاقىت توزانى بۇ چۈشلەر ماڭا كىرەك ئەمەس. قەلبىمنى تىنىمسىز غاجىلاپ، يۈرىكىمنى قانسىرىتىپ تۇرغان ئەسلىمىلەرمۇ ماڭا كىرەك ئەمەس. ۋاقىت توزانلىرىدا كۆمۈلۈپ كىتىۋاتقان ئۆزۈمنى ئىزدىمەكتىمەن. ۋاقىت توزانلىرىغا يېيىلىۋاتقان ئىزلىرىمغا چۆكمەكتىمەن. ۋاقىت بىر يوقلۇقتىن يەنە بىر يوقلۇققا جىمجىت ئېقىۋاتقاندا، ۋاقىت چۈشلەردىن رىئاللىققا قايتىۋاتقاندا، ۋاقىت ھايات بىلەن ئۆلۈمنىڭ ئارىسىدا تەكرارلىنىۋاتقاندا، مەن ئۇنىڭ يىپلىرىغا سۆرۈلۈپ، تاماملىنىپ بولغان ئۆزۈم ئۈچۈن چەكسىز سۈكۈتكە پاتىمەن. ۋاقىت مېنى ئىزاھلايدۇ، سۈكۈتلەر مېنى سۆزلەيدۇ. يوللار قۇپقۇرۇق ئىزلىرى بىلەن ماڭا قايتىدۇ. شاماللار سارغايغان ياپراقلار بىلەن مەندە تىمتاسلىققا ئايلىنىدۇ. پەرىشانلىق مۇمكىنسىزلىكنىڭ ، ھەسرەت-نادامەتنىڭ بەلگىسى ئەمەس. غېرىپلىق يالغۇزلۇقتىنلا تۇغۇلمىغان. قەلبىمدە ھېچكىمگە چۈشەندۈرۈپ بىرەلمەيدىغان بىر ئەزەلىي غېرىپلىق بار. جاھاننىڭ بارچە غېرىپلىقى قەلبىمدە ئۈنسىز ھۇۋلاپ تۇرىدۇ. قەلبىمنىڭ ئاچلىقى كۇللى جاھانغا مەسخىرىلىك باقىدۇ. ماڭا قايتىدىغان يەنە نىمە بار؟ مېنى باشلاپ كېتىدىغان يەنە قانداق چۈش بار؟ مەندە باشلانغان ۋاقىت يەنە مەندە تاماملانغاندا، ئۇنىڭغا نىمىلەرنى تاشلاپ كىتەلەيمەن؟ ۋاقىت، مەندە توزۇۋاتقان ۋاقىت مېنىڭ ئىختىيارىمدا ئەمەس. ۋاقىت، مېنى توزۇتۇۋاتقان ۋاقىت مېنىڭ ئىختىيارىمدا ئەمەس. ۋاقىت توزانلىرى رىئاللىقىمنى چۈشكە ئايلاندۇرىدۇ. ۋاقىت توزانلىرى مېنى ئەپسانىگە ئايلاندۇرىدۇ. مەن كۆكتىكى بىر تال يۇلتۇزغا ئايلىنىپ كىتىمەن. مەن ئەسلەردىكى غۇۋا چۈشلەرگە ئايلىنىپ كىتىمەن. مەن پەرۋاسىز كۆڭۈللەرنىڭ ئازابىغا ئايلىنىپ كىتىمەن. مەن مېنى ئازابلىغانلارنىڭ ۋىجدانىغا ئايلىنىپ كىتىمەن. ۋاقىت توزانلىرىدا كۆمۈلۈۋاتقان كۈنلىرىم ئۈچۈن قايغۇرغۇم يوق. سۆيۈلمىگەن كۈنلىرىم ئۈچۈن جاۋاپ ئىزدىگۈم يوق. يۈزۈمنى سىلاپ تۇرغىنى تەڭرىنىڭ مىھرىبان قوللىرى. ھاياتنى ئىزاھلاۋاتقىنى تەڭرىنىڭ پۈتمىشلىرى. ۋاقىت توزانلىرى ئىچىدە سۇس پىلدىرلاۋاتقان ھايات شامىم تەڭرىنىڭ ئىلكىدە. ۋاقىت قەلبىمنىڭ يۇرۇقلىقىدا نۇرغا ئايلىنىدۇ. ۋاقىت قەلبىمنىڭ زۇلمەتلىرىدە كۇكۇم-تالقان بولىدۇ. مەۋجۇتلۇق بىلەن يوقلۇق ئارىسىدىكى دەقىقىلىق چۈش ۋاقىت توزانلىرىنى ئاخىرلىشىش بىلەن مەڭگۈلۈك باشلىنىشقا ھەدىيە قىلىدۇ. دۇنيا ئەپسانە ئەمەس، بىراق، ئۇ ئەپسانىگە ئايلىنىدۇ. ھاياتلىق چۈش ئەمەس، بىراق ئۇ چۈشكە ئايلىنىدۇ. ئىھ قەدىردانلىرىم، ھەممە، ھەتتا ۋاقىت ئۆزىگە قايتقاندا، مېنى ھەم سىلەرنى ئىزاھلايدىغان نىمە بار؟ ھەممىمىز ۋاقىت توزانلىرى ئىچىدە كۆمۈلۈپ بارىمىز. بىلەمسىلەر؟ ئۇ يەردە كۆمۈلمەيدىغان بىر يۈرەك بار. ئۇ يەردە كۆمۈلمەيدىغان بىر دەستە نۇر بار. ئۇ-ھەممىگە بەرداشلىق بىرەلەيدىغان ئىنساننىڭ نۇرى، ھەقىقى ئىنساننىڭ نۇرى! ئۇ-تەڭرىنىڭ ئىھسانى! ھېچنىمىگە قايغۇرما! قىممەتسىز شاتلىقنىڭ نۇر ئوقچۇپ تۇرغان يۈرەكلەرگە نىمە كېرىكى؟

دىلداش · ۋاقتى: 2016-2-21 20:04:41


	ئىلھاملىرىڭىز ئۈزۈلمىگەي

ناچۇق0998 · ۋاقتى: 2016-2-21 20:12:48


	ياخشى يېزىلغان نەسىرلەر ئىكەن. بولۇپمۇ قايناق ئىلھام بىلەن پەلسەپىۋىيلىكنى يۇغۇرىۋىتىش جايىدا بوپتۇ. تېخىمۇ زور مۇۋەپپەقىيەتلەر تىلەيمەن!

ئەنۋەر508 · ۋاقتى: 2016-2-22 13:33:49


	ئاپىرىن، قەلىمىڭىزگە بەرىكەت تىلەيمەن.

ئالىم ياسىن · ۋاقتى: 2016-2-22 13:58:37


	گۇگۇم قايرىلغاندا، خىياللار ئۆز ئالىمىدە سەير قىلىدۇ. كىچە، يۇلتۇزلار چاراقلاپ يېنىپ تۇرغان كىچە نىمىلەرنىڭ شاھىدى ئەمەس؟ ئۇ يەردە بەخت، ئازاپ، ساداقەت، خىيانەت... ھەممىسى ئۆزىنى تاپشۇرىدۇ. نىقابلىق سەھەرلەر كىچىلەرنىڭ نىقابى! گۇگۇم قايرىلغاندا چۈشلەر ئۆزىنى داۋاملاشتۇرىدۇ. ۋاقىت ئۆز ئېقىنىدا جىمجىت ئاقىدۇ. يۇلتۇزلار ئۆزىنى ئۆزىگە سۆزلەيدۇ. ھايات ئۆز تەشۋىشىگە قۇيۇلىدۇ. يۇقۇرقى قۇرلاردىكى تىللار تاگۇرنىڭ نەسرىي تىللىرىغا ئوخشاش لېرىك چىقىپتۇ.

ayimnisa · ۋاقتى: 2016-3-19 01:14:56


	تۇيغۇ چىچىكى 1 سەمىمىيەت ئىزدەپ زار بولغىنىڭدا كىملەردىن ئاغرىنىسەن؟ مەنپەئەت ئۈستىگە قۇرۇلغان بارچە مۇناسىۋەتلەر ھىيلە-مىكىر بىلەن تولغان. ئەتراپىمغا قاراپ ئېغىر ئۇھسىنىمەن، ساختا كۈلكىلەر، ساختا ھەشەمەتلەر ۋەيەنە مەقسەتلىك خۇشامەتلەر... ئادەملەرنى چۈشىنىش نەقەدەر قىيىن-ھە! كىم ئۆزىنى «مەن ئەخلاقسىز» دەيدۇ؟ -ھېچكىم، ھېچكىم ئۇنداق دىمەيدۇ. ئاشۇ ھاياسىز غىدىقلاشلارنىڭ ئارقىسىدا، زامان ۋە ماكاننىڭ بۇزۇلغان ئەپتىبەشىرىسى شۇ قەدەر ئىنىق. ئاياللارنىڭ ئويناپ تۇرغان كۆزلىرى بىلەن نازلىق ئۈنىدە سۇنغان غۇرۇر بىلەن ئېچىنىشلىق پاجىئەنىڭ ھالاكەتلىك كۆلەڭگىسى يوق دەپ كىم ئېيتالايدۇ؟! راست، ئالداپ، ئالدىنىپ كۆنگەن قەۋم ئارىسىدا سەمىمىيەتنىڭ قەدرى يوق. ئاياللارنىڭ ھاياسىز كۈلكىسى ئەرلەرنىڭ غەپلەت ئۇيقۇسىغا باراۋەر. ئادەملەر ئۆزىدىن ياتلاشقاندا، غېرپسىنغان كۆڭلىنى باشقىلار ئارقىلىق ئاۋۇندۇرماقچى بولىدۇ. بۈگۈن ئۆز ۋۇجۇدىنى ئۆز روھى بىلەن تۇيۇندۇرالايدىغانلار قانچىلىك؟! ھەممىمىز قەلەندەرمىز. ئۆزىمىزنى باشقىلارنىڭ ئەكسىدە كۆرمەكچى بولغىنىمىز يالغانمۇ؟ بۇ كەمگىچە ئۆز نەزىرىمىزنى ئۆزىمىزگە قانچىلىك بىرەلىدۇق؟ ئۆزىمىزنى قانچىلىك تىڭلاپ باقتۇق؟ ... ھاياتنىڭ مەنىسى كۈنلەرنىڭ رەڭدارلىقىدا ئەمەس، بەلكى ھىكمىتىدە. ئۇنى سەن چىن مەنىدىكى سەمىمىيەت ۋە ۋىجدانىڭ ئارقىلىق بەرپا قىلىسەن. ئۇنىڭدا يەنە ئۆزۈڭگە بولغان چوڭقۇر مۇھەببىتىڭ ۋە تەلپۈنۈشۈڭ بار. ھەممە يەرنى سەمىمىيەتسىزلىك قاپلاپ كەتكەندە، يۈرەكلەر تىغلىنىدۇ. بىراق، نۇرغۇن ئادەملەر ئۇنى ھىس قىلماسلىققا تىرىشىدۇ، چۈنكى، ياشاشنىڭ ئازابىنى ھىس قىلىش قىيىن. بىزنىڭ كۆزلەيدىغىنىمىز، سەمىمىيەتكە، مىھىرى-ۋاپاغا تولغان مۇھەببەتلىك ھايات. بىراق ئادەملەرنىڭ ئادەملەرگە يۈكلەيدىغىنى نىمە؟ تۈرلۈك كىشىلىك مۇناسىۋەتلەر-مەقسەت ۋە مەنپەئەتلەرگە تولغان. كۈڭۈللەرنىڭ تىگىدە چوڭقۇر ۋە يۇشۇرۇن ئازاپ بار. ھەقىقىي ئىپپەت-نۇمۇس بىلەن مەنىلەنمىگەن ئاياللىق بۇ دۇنيانىڭ ھالاكىتى. كۈلۈشنىلا بىلىدىغانلار يىغلىيالايدىغانلارغا قارىغاندا تېخىمۇ قورقۇنچلۇق. ئەقىل كۆزىدە تارىخنىڭ غەلىبىسى بىلەن مەغلۇبىيىتى تەڭ مەۋجۇت. ئۇنى ئىنسانلار يېزىپ چىققان. بۈگۈن تۇيغۇمدا قىياسلانغان رىئاللىقتىن ئۇزاپ كەتكەن. بۇ يەردە ئۆزىدىن ياتلاشقان بىچارىلەر، ئازغۇنلۇق، خىيانەت، ئازاپ ۋە سانسىز چىگىش مۇناسىۋەتلەر بار. مەن شۇنىڭ ئۈچۈن ئازاپلىنىمەن، شۇنىڭ ئۈچۈن تېخىمۇ،تېخىمۇ چوڭقۇر ئۇھسىنىمەن... 2 مۇھەببەت- بېغىشلاش دىمەكتۇر. سۆيگۈنۈڭگە ھېچنىمە ئاتا قىلالمىساڭ ئۆزۈڭنى مۇھەببەتسىز دەپ جاكارلا. مۇھەببەتلىك قەلپ دۇنيانىڭ چىرىغى، ئائىلىنىڭ ھىماتى. نازاكەتلىك ئايال ئېرى تەرىپىدىن سۈيۈلگەن ئايالدۇر. نازاكەتلىك ئايال سۈيۈش ۋە سۈيۈلۈش شاراپىتىگە مۇيەسسەر ئايالدۇر. ئايالنىڭ غېرىپلىقى ۋە كۆز يېشىدا ئەرلەرنىڭ مەسئۇلىيىتى يوق، دەپ كىم ئېيتالايدۇ؟ ئېرى تەرىپىدىن قەدىرلەنمىگەن ئايالنىڭ قەلبى بىر چۆلدۇركى، چاڭقاشتىن پۈتۈن ۋۇجۇدى ئازاپ بىلەن ئاچچىق كۈيۈپ تۇرىدۇ. ئۇنىڭ مۇھەببەتلىك قەلبىدە نەپرەت تۇغلىرى لەپىلدىگەندە، شۇ مۇھەببەت تۈپەيلى، ھەممىنى ۋەيران قىلىۋېتەلەيدۇ... ئايالنىڭ مۇۋەپپىقىيىتى_ئۆزى سۆيگەن ئەر تەرىپىدىن سۈيۈلۈش! ئېرى تەرىپىدىن سۈيۈلمىگەن ئايالنىڭ بارچە نەتىجىلىرى ئۇنىڭ جاھانغا يايغان مەسخىرىسى. ئاياللار ھەرۋاقىت سۈيۈلۈشكە موھتاج، ئۇ - ئايال قەلبىدىكى «بەخت»كە باراۋەر. مۇھەببەت-ئايالنىڭ ھاياتى، قەلبى، نازاكىتى ۋە خۇلقىدۇر. ئاياللار مۇھەببەت ئۈچۈن ياشايدۇ. ئۇنىڭدىن ئۆز ھاياتىغا مەنا ۋە قىممەت تاپىدۇ. مۇھەببەت دۇنيانىڭ نىجاتكارى! ئۇ قانداقمۇ تىللاردا داستان بولمىسۇن ۋە تەرىپلەنمىسۇن؟ 3 مەدەنىيەت ئىنساننىڭ ئۆزىدىن يىراقلىشىش جەريانىمۇ؟ ئىسىلزادىلەر بىلەن ئالىيجاناپلار ئۆزىنى مەدەنىيەتنىڭ قايسى دەرىجىسىگە قويالايدۇ؟ بۈگۈن بىزنىڭ كۆرگىنىمىز كىشىلەرنىڭ قايسى خىلدىكى ماھىيىتى؟ بىزنىڭ كۆرگىنىمىز ۋە كۆرەلەيدىغىنىمىز نىقاپلانغان كىشىلەر ۋە نىقاپلانغان بۈگۈن. بىز ھامان ئالدىنىپ ياشاشقا مەجبۇر. ئۆزىنى قانچىلىك نىقاپلىيالىسا شۇنچىلىك مەدەنىيەتلىك سانىلىدىغان بۈگۈنكى كۈندە، كىم ئۆزى ھەققىدە سۆزلىيەلەيدۇ؟ كىم ئۆزىنىڭ زامان ۋە ماكاندىن ھالقىغان ئەزەلىي ماھىيىتىگە قايتالايدۇ؟... مەدەنىيەت نىقاپ ئەمەس، ئەمما نىقاپلىنىش مەدەنىيەت دەپ قارالغاندا، ئادەملەر ئاللىقاچان ئۆزىدىن ياتلىشىپ بولغان بولىدۇ. ئۇنىڭ ئىچىگە بارچە ياخشىلىق ۋە يامانلىق، نەپسانىيەت، ھىيلە-مىكىر يۇشۇرۇنغان. بىز مەدەنىيەت دەپ ئاتىغان «نىقاپ» ئىنسان تەبىئىتىدىكى ئاسارەتلەرنى، يامانلىقلارنى، ھايۋانىي شەكىل ۋە سۈپەتلەرنى ئاجىز قالدۇرۇلايدىغان، ئىنساننى ياخشىلىققا ئۈندىيەلەيدىغان بولۇشى كىرەك. شۇنداق بولغاندىلا ئۇ مەۋجۇت ئالەمدىكى ئۆز ئەھمىيىتىنى تاپالايدۇ. سانسىز ۋە سانسىز نىقاپلار ئىچىدە نىمە بار؟ -شۆھرەتپەرەسلىك ، چېكىدىن ئاشقان راھەت-پاراغەت، كەيپ-ساپا! ئادەملەر ئۇنىڭ ئۈچۈن ھېچ ئىككىلەنمەي تۈمەن خىل شەكىللەر بىلەن نىقاپلىنىدۇ. بىزنىڭ ئىنتىلىدىغىنىمىز ۋە ھاياتى پائالىيەتلىرىمىز شۇ بولۇشى كىرەكمۇ؟ ھايات مەۋجۇتلۇق بىلەن باراۋەر بولىدىغان بولسا، تارىخ ۋە تالاي ئەسلىمىلەرنىڭ نىمە كېرىكى؟... شۇنداق، ئادەملەر ئۆزلىرىنى نىقاپلاشنىڭ تۈرلۈك-تۈمەن ۋاستىلىرىنى تېپىپ چىقتى. بىراق ئۇ ئۆزلۈككە يىتىش ئەمەس، باشقىلارنى ئالداش بىلەن نەتىجىلەنسە، بۇنى نىمە دەپ تەبىرلەش مۇمكىن؟...

alipoguz · ۋاقتى: 2016-3-19 09:05:17


	ئەسەر ياخشى ئىككەن ،ئەمما قايسى خىل مەدەنىيەتنى كىشلەرنىڭ ئۆزىلىرگە نىقاپ قىلغانلىقى ھەققىدە ئىزدىنىپ باقىسىكەن دەپ ئويلىدۇم ...

qongkurqak · ۋاقتى: 2016-5-4 17:21:29


	شۇنداق، ئادەملەر ئۆزلىرىنى نىقاپلاشنىڭ تۈرلۈك-تۈمەن ۋاستىلىرىنى تېپىپ چىقتى. بىراق ئۇ ئۆزلۈككە يىتىش ئەمەس، باشقىلارنى ئالداش بىلەن نەتىجىلەنسە، بۇنى نىمە دەپ تەبىرلەش مۇمكىن؟... ئۇنى پەقەت ھېس قىلغىلىلا بولىدۇ. بۇرۇن شىئېرلىرىڭىزنىلا كۆرۈپتىكەنمەن، بۈگۈن كېچىكىپ كۆرگىنىمگە قارىماي ماڭا يېڭى تۇيۇلغان بۇ نەسىرلەردىن ئالغان زوقۇمنىمۇ تىل بىلەن ئىپادىلەشكە ئاجىزلىق قىلدىم.

ayimnisa · ۋاقتى: 2016-5-29 01:51:13


	بۇ يازمىنى ئاخىرىدا ayimnisa تەھرىرلىگەن. ۋاقتى 2016-5-29 01:53 AM ئىستىقامەتچى ئۇ ئىستىقامەتگاھىدا يالغۇز ئولتۇرۇپ ئۆزىنى ئۆز قەلبىگە تاپشۇردى. يارالمىش قىسسىسىنى روھى بىلەن ئوقۇپ، جاھان ھىكايەتلىرىگە قۇلاق سالدى. ئۇ ئۆز روھىنىڭ كۆكلەردە قانات چىقىرىپ ئۇچۇۋاتقانلىقىنى ئۆز كۆزى بىلەن كۆردى. ئۇنىڭدىن سوئال سورىماقچى ئىدىم، بىراق، سورىماستىلا، ئۇ سۆزلەشكە باغلىدى: -روھىڭنىڭ موھتاجلىقىنى قاندۇرمىساڭ، ئەبەدىلئەبەد ئاچ ياشايسەن. تەڭرى سەن نېمىنى ئارزۇ قىلغان بولساڭ، شۇنىڭغا ئېرىشتۈرىدۇ. كۈچلۈك يىمىرىلمەس خاراكتىر، سۇنماس ئىتىقاد روھى قۇۋۋەتتىن كېلىدۇ. ھاياتتا روھى دۇنياسى قۇرۇق تالاي سەپسەتىۋازلارنى ئۇچرىتىپ ياشايسەن، ئۇلار سېنى ئازاپلاشتىن ھۇزۇرلىنىدۇ، كىشىلەرنى قانچە كۆپ ئالدىيالىسا، شۇنچە خۇشال بولىدۇ. كىملەرنى شادىمان دىيەلەيسەن؟ «توققۇزى تەل» كىشىلەرنىمۇ؟ روھى شاتلىق، روھى بەردەملىك ئۇنداق ئاسان ئېرىشكىلى بولىدىغان نەرسە ئەمەس. سەن پەقەت ئۆزۈڭ ئىچىدە تۇرغاندىلا، ھېچقانداق تەسىرگە ئۇچرىمايسەن، ھېچكىمگە، ھېچنەرسىگە مۇھتاج بولمايسەن. ئىگىزدە تۇرۇپ يىراققا نەزەر سالغىنىڭدا، نۇرغۇن نەرسىلەرنى كۆرەلەيسەن. روھىڭنىڭ مەغرۇرلىقى بۈيۈكلۈككە، پاكلىققا تولغان بولسا، كۆزلىرىڭنىڭ كۆرىدىغىنى گۈزەللىك، قەدەملىرىڭنىڭ باشلاپ بارىدىغىنى ئىزگۈلۈك بولىدۇ. ئىنسان ئۆزىگە زۇلۇم قىلغۇچىدۇر. ئۆز نەپسىگە قۇل بولغۇچىدۇر. قۇرۇق شان-شۆھرەت ئۈچۈن تىپىرلاۋاتقان سانسىز ئادەملەرنىڭ ئادىمىيلىكىدىن مەنا ۋە قىممەت تاپالامسەن؟ بىر يۈكسەك روھى يىتۈكلۈك ئۈچۈن ئۆز قەلبىڭدە ئۇزۇندىن-ئۇزۇن ياشاشقا بەرداشلىق بىرەلەمسەن؟... مەن جىمجىتلىق ئىچىدە تۇرۇپ، ئۇنىڭ سوئاللىرىغا جاۋاپ بىرەلمىدىم. ئىستىقامەتچى كۆزلىرىنى يۇمۇپ چوڭقۇر سۈكۈتكە چۆمدى. ئۇ تەڭرىنىڭ ھىدايەتنامىسىنى قەلبى بىلەن ئوقۇۋاتاتتى. ئۇنىڭ يۈرىكىدە نۇر چېچىپ تۇرغىنى تەڭرىنىڭ نۇرى، كۆزلىرىدىن تۈكۈلۈپ تۇرغىنى ئىنسانىيەتكە بولغان چەكسىز مىھىر-مۇھەببەت. ئۇ ئۆز مەۋجۇتلىقىنى ئاشۇ نۇرغا قۇشۇلۇپ كىتىش ئۈچۈن ساقلايدۇ. قەلبىدىكى شۇ قەدەر چوڭقۇر مىھىر-مۇھەببەت تۈپەيلى ئىستىقامەتگاھىدا گۈزەل پاكلىنىش پەيتلىرىگە چۈمۈلىدۇ، يەنە شۇ مىھىر-مۇھەببەت تۈپەيلى ئازغۇچىلارنى ئاگاھلاندۇرىدۇ. يۈرىكىنى، ۋۇجۇدىنى كۆيدۈرۈپ تۇرۇپ، كىشىلەر قەلبىگە نۇر چاچىدۇ. قەدىردانلىرىم، ئۇنىڭ ئاۋازى روھىمىزغا سىڭىپ كىرگەندە، بىزمۇ چوڭقۇر سۈكۈت ئىچىدە تۇرۇپ، قەلبىمىزنىڭ سۈزۈك تاۋاشلىرىغا قۇلاق سېلىپ باقايلى. بىز ھاياتنى ئەقلىمىزگە تاپشۇردۇقمۇ ۋەياكى ھىسياتىمىزغىمۇ؟ ھايات يولىدا قانچىلىك ئۇزۇن ماڭالايمىز؟ ھاياتلىق ئورمانلىقىغا نىمىلەرنى تىكتۇق؟ ئۇ كىملەرگە سايە تاشلىيالايدۇ ۋە كىملەرنى بوران چاپقۇنلاردىن توسۇپ قالالايدۇ؟! ئىستىقامەتچى ھاياتىمىزنىڭ خەيرلىكى، ۋۇجۇدىمىزنىڭ ئەبەدىيلىك پاكلىقى ۋە روھىمىزنىڭ سۈزۈكلىكى ئۈچۈن كۈيۈپ تۇرۇپ تىلاۋەت قىلماقتا... مەن يەنە چەكسىز جىمجىتلىق ئىچىگە تاشلاندىم. روھ ھامان پاكلىنىپ تۇرۇشقا موھتاج. ئۇ گۈلگە ئوخشايدۇ. ئۇنىڭ نۇقسانسىزلىقى ۋە ئەبەدىي كۆكلەپ تۇرۇشى ئۈچۈن ئۇنى ھەرۋاقىت پەرۋىشلەپ تۇرۇش كىرەك. سەيياھ دۇنيا مېنى يەنە بىر دۇنياغا باشلاپ ماڭماقتا. ھاياتنىڭ ئازاپ ۋە خۇشاللىققا تولغان ھەربىر دوقمۇشىغا سانسز ئىسمىم يېزىلغان، مەن ئۇنى يۈرىكىم بىلەن ئوقۇپ سۈكۈتكە چۆمگىنىمدە، تەڭرىنىڭ چەكسىزئىلتىپاتىنى ھىس قىلىمەن ۋە ۋاقىتسىزلىققا قاراپ يول ئېلىۋاتقان ۋاقتىم ۋە يوقلۇقتىكى بارلىقىم بىلەن دۇنيانى كۆزىتىمەن. سەيياھ- بىر يوقلۇقتىن چىقىپ يەنە بىر يوقلۇققا ئۇزىغۇچىدۇر. يوقلۇق بىلەن يوقلۇق ئارىسىدىكى ماكان ۋە زامان بىز پۈتكەن ھايات دەستۇرى. ئۇنىڭدىكى سانسىز تىۋىشلاردا، سانسىز ئىزلاردا سېنىڭ ئىسمىڭ، كىملىكىڭ بار. ئۇ سېنىڭ زاماندىن ھالقىغۇچى كىملىكىڭنى ياساپ چىقىدۇ. بەندىلىك ماقامىدا تەڭرى ۋە ئىنسانلا مەۋجۇت. جىمجىتلىق كۆزلەرنىڭ ئالدىنىشى. تىمتاسلىق تۇيغۇلارنىڭ ئۆزىگە قايتىشى. سەيياھ ھىكمەتلىك ۋە ئىبرەتلىك يوللارنىڭ ساھىبى. سەيياھ شەيتاننىڭ ئازدۇرىشىدىن پاناھلانغۇچى. ئەزەلىي پۈتمىشلەردە بىر ئادەم، بىر ئايال بىر مۇقەددەس ھىكمەت تۈرتكىسىدە، يوقلۇقتىن يوقلۇققا قاراپ كىتىۋاتقانۇ-ئەمما، بىر مەڭگۈلۈك بارلىقنى-ئىنسانىيەتنى قالدۇرۇپ قويغان. ئەجەبا، تەڭرى بىلەن ئىنساننىڭ شاپائىتى ۋە ئىختىيارىدا، يىمىرىلمەس بىرلىك ۋە مەڭگۈلۈك پاراغەت بارلىقىنى بىز تېخىچە ھىس قىلالماي قالغاندىمىزمۇ؟... سەيياھ ئېرىشكەن نەرسىلىرى بىلەن ئۆزىنى ھاياتنىڭ بالاغىتىدە نامايىش قىلىدۇ. دۇنيا ئۆزىنىڭ كىلىپ كەتكۈچى ئىكەنلىكىنى بىلمەيدىغان نۇرغۇن كىشىلەر بىلەن تولغان. شۇڭا زىمىندا جىنايەت مەۋجۇت، خىيانەت مەۋجۇت. نەپرەت-يىرگىنىش ۋە ئازاپ-ئوقۇبەت مەۋجۇت. بوشىنالمىغان ئاھاڭلار، قۇرغاق ۋە ئىلتىجالىق تەبەسسۇملار، ساختا گۈزەللىك بىلەن تولۇپ كەتكەن رەڭدار رەستىلەر، ئۆزلىكىنى پايخان قىلىۋاتقان ئازغۇن قەدەملەر مەدەنىيەتلىشىش ۋە شەھەرلىشىشنىڭ ئۆزىدىن يىراقلىشىۋاتقان كىشىلەرگە بەرگەن جاۋابىمۇ ۋە ياكى كىينكىلەرگە قالدۇرغان سوئالىمۇ؟... مەۋجۇتلۇق يوق نەرسە. بىز ئۇنىڭ يوقلۇقتىكى مەۋجۇتلىقىغا قىممەت ئاتا قىلىش ئۈچۈن تىركىشىمىز. ئۈلۈم، سەيياھ ئۈچۈن ئۇمۇ بىر دوقمۇش. ئاشۇ دوقمۇشتا بىزنىڭ مەۋجۇتلىقىمىز سانسىز نەزەرلەردىن ئۆتىدۇ. كىشىلەر ماڭغان يوللىرىمىز ۋە قىلمىش-ئەتمىشلىرىمىز ئارقىلىق بىزنىڭ يەنە بىر بارلىقىمىزنى يىللارغا ئەستىلىك قىلىدۇ. ئىھ، سەپەردىكى ئادەم، ئاشۇ بارلىقىڭ ۋە ئاشۇ ئەستىلىك ئۈچۈن قايسى يولدا كىتىۋاتىسەن؟ قەدەملىرىڭ قەلبىڭنىڭ ئاۋازىنى ئاڭلاۋاتامدۇ؟ روھىڭنى مۇقەددەس نەزەرلەردە كۆرۈۋاتامسەن؟... چوڭقۇر سۈكۈت ئىچىدە ئۈنسىز كىتىۋاتىمەن. ئۈلۈمنىڭ يىراقتا ئىكەنلىكىگە ئىشەنمەيمەن.ئۇ ۋۇجۇدۇمدا ھەرۋاقىت مەۋجۇت. ئەقىل ساھىپخانلىرى ئۈلۈمنى كۈلۈپ تۇرۇپ كۈتۈۋېلىش ئۈچۈن ئۇزاقراق ياشاشقا، نۇرغۇن ئىشلارنى قىلىشقا ئىنتىلىدۇ. مەۋجۇتلىقىڭنىڭ مەڭگۈلىكى ۋە ئىزلىرىڭنىڭ ئۆچمەسلىكى ئۈچۈن روھى تىرەنلىكىڭدە ئىزدىنىۋاتامسەن؟ ئىھ، سۈيۈملۈك يۇلۇچى، قەدەملىرىڭگە مىڭلاپ تەھسىنلەر بولسۇن! ئادەم ئاتىنىڭ كۆلەڭگىسى تېخى غۇۋالاشقىنى يوق. ئەقىل تەڭرىنىڭ ھىكمەتلىك مۆجىزىلىرىنى كۆرۈپ نۇرلانغىنىدەك، مەۋجۇتلۇق يوقلۇقتىن-يوقلۇققا كىتىۋاتقان قىسمەتلىك سەپەردە ئۆز مەنىسىنى تاپىدۇ ۋە ئۆزىنى يارىتىدۇ. قەدىردانلىرىم، بىز-ھەممىمىز سەيياھمىز. ھايات بالاغىتى ئۈلۈمىمىزدە ئەمەس، قەدەملىرىمىزدە، بىز باسقان يوللارنىڭ ھىكمىتىدە! سۈبھى مونولوگى پاكىزە تىنىقلاردىن ئاڭلىنىۋاتقان مۇناجاتلار، يۈرەكلەرنىڭ چوڭقۇرلىقىدىكى سۈزۈك پىچىرلاشلار سۈبھىنىڭ ھىكمىتىنى سەزگۈلەرگە تېخىمۇ ئايان قىلىدۇ. سۈبھى ئۆز تىۋىشلىرىنى بايان قىلماقتا: -ئەي غەپلەتتە قالغۇچى، مەن سېنى ئۆزۈڭگە چىللاۋاتىمەن. ھىكمەت نۇرلىرى كۆزلىرىڭگە سۈركىلىپ ئۆتكەندە، كۆرۈۋاتقىنىڭ قانداق چۈش؟... يىراقلاردىن سوزۇپ ئېيتىلغان ئەزان ئاۋازى رۇجەكلەرنى چىكىپ ئۆتۈپ كەتتى. قۇياش سەجدىگاھىدىن باش كۈتۈرگەندە، سۈبھى يەنە ئۆزىگە سۆزلەۋاتاتتى. -پاكلىنىش پەيتى يىتىپ كەلگىلى نەۋاخ. ئادەملەر پاكلىنىشى كىرەك. پەلەك چەرخى ئۆز قانۇنىيىتى بويىچە داۋام قىلىدۇ. ھەرقانچە ئۇلۇغ سەۋر-تاقەتنىڭمۇ ھامان چېكى بولىدۇ. چەكتىن ئېشىپ كەتكەن بارچە نەرسىلەرنىڭ ئاقىۋىتى - ھالاك بولۇشتۇر! قاراڭغۇلۇق قاپلاپ كەتكەن كۈڭۈلدە پەقەت زۇلمەتلا بولىدۇ. سۈبھىنىڭ سۈزۈكلىكى كۆزدە ئەمەس، ئاۋۋال كۈڭۈلدە ئايان بولغاندا، ئىنسان ھەقىقىي يۇرۇقلۇقنى كۆرەلەيدۇ. ھەقىقەت شۇ قەدەرروشەن تۇرۇپ ئۇنى كۆرمەسلىك كىمنىڭ گۇناھى؟ تەڭرىنىڭ ئىختىيارىدا ئىنساننىڭ سائادىتى بىلەن ھالاكىتى تەڭ مەۋجۇت. ئەمما، ئىنسان ئۇنى ئۆز مەۋجۇتلىقى بىلەن پۈتتۈرۈپ چىقىدۇ. ئەقىل قوڭغۇرىقى سېنى سۈبھىنىڭ سۈزۈكلىكىگە قايتۇرغاندا، سەن ئۆز ئالىمىڭنىڭ شۇ قەدەر كەڭ ۋە شۇ قەدەر غۇبارسىزلىقىنى ھىس قىلىپ باق. ئۇ يەردە ھاياتنىڭ بارچە ئىزگۈلىكى، گۈزەللىكى ئەبەدىي كۆكلەپ تۇرىدۇ ۋە سېنى ھەرۋاقىت ئىنسانلىققا دالالەت قىلىدۇ. سۈبھىنىڭ ئاپئاق نۇرلىرى كۈڭۈل كۆزلىرىڭگە ئۇرۇلغاندا، مەۋجۇتلۇقنىڭ يارالمىشىدىن بىر ئۇلۇغ ھىكمەتنى، سىر-مۆجىزىلەرنى بايقىماي قالمايسەن. جاھان سىرلىرى ئەقىل ئەينىكىدە ھەرۋاقىت ئايان. سۈبھىلەرنىڭ سۈزۈكلىكىگە ئويغاقلىقىڭنى تاپشۇرالمىساڭ، ئادىمىيلىكىڭدىن شۈبھىلەن. ئۆزىگە قايتمىغان، ئۆزىنى ئۆزلىكىدە ساقلاپ قالالمىغانلارنىڭ نە كىملىكى، نە ئىزگۈلۈككە تولغان ھاياتى بولسۇن؟ ئۇيقۇلۇق كۆزلىرىڭنى ئاچ. سۈبھىلەردە ئۆزلۈكىڭگە تېۋىنىپ باق. پاكلىنىش پەيتى ھەرۋاقىت سېنىڭ بالاغىتىڭگە، روھىي كامىللىقىڭغا موھتاج! كۆز ئۇپۇقى كۆز ئۇپۇقىدا ئايان بولغان سانسىز كۈرۈنۈشلەر ھىكمەت ۋە ئىبرەتكە تولغان. ئىستىقامەت دەملىرىدە ئۆزلىكىم روھ كەڭلىكلىرىگە سوقۇلۇپ ئۆتكەندە، رىئاللىقىم سۇنۇپ چۇل-چۇل بولىدۇ-دە، ئۇ يەردە ئۆزۈمنىڭمۇ مىڭ پارە بولغان ئەكسىنى غېرىپسىنىپ تۇرۇپ كۆرۈپ قالىمەن. كۆزگە نىمىلەر ئايان بولمىغان؟ تەقدىر نىسىپ ئەتكەن ھايات سەپىرىدە جۇلالاپ تۇرغان نۇر چېقىنلىرى كۆزلەردىن ھالقىپ قەلب كۆزىگە يىتىپ بارغاندىلا بىز ھەقىقىي نەرسىلەرنى كۆرەلەيمىز. كۆزلەر ئۇپۇقىدا يالتىراپ تۇرغان سانسىز قۇرۇق جۇلالار بىزنى قۇرۇق ھەشەم، قۇرۇق شان-شۆھرەت ۋە ھاياتنىڭ بىمەنىلىكىگە باشلاپ بارىدۇ. كۆز ئۇپۇقىدا يېيىلىپ ياتقان تەقدىرنىڭ قىسمەتلىك جەريانلىرى قەدەملىرىمىزدىن بىزنىڭ كىملىكىمىزنى پۈتتۈرۈپ چىقىدۇ. كۆز ئالدىمدىكى غايەت زور بوشلۇق ئۇ كائىناتنىڭ بوشلۇقى ئەمەس، قەلبىمدىكى بوشلۇق. بىز ئادەملەر بىلەن بىللە ياشاپ كۈنۈپ كەتكەن. شۇڭا ئادەملەرنىڭ ياخشىلىقى بىلەن يامانلىقى ئوتتۇرىسىدا دائىم تېڭىرقاپ قالىمىز. ھەقىقىي ئىتىقادلىق ئادەم نىمىنى مەدھىيلەشنى، نىمىدىن يىرگىنىشنى بىلىدۇ. مەدھىيە چىن يۈرەكتىن چىققان ۋە جان بېقىشنىڭ ۋاستىسىگە ئايلىنىپ قالمىغانلا بولسا، بارلىق مەدھىيلەنگۈچىلەر ئىپتىخارلانسۇن. يارالمىش قىسسىسىدە ئىزگۈلۈكنىڭ نىشانلىرى شۇ قەدەر ئىنىق ۋە روشەن. ئۇنى كۆرمەيدىغان كۆز، بايقىمايدىغان ئەقىلنىڭ ساقلىقى ۋە ساپلىقى شۈبھە، گۇمان بىلەن تولغان. ئەي قەدىردانلىرىم، ساختا جۇلا، ساختا تەبەسسۇملارنىڭ مەپتۇنلىقىغا تاشلانغان بولساڭلار، قەلبىڭلارنىڭ قاراڭغۇلىقىدىن ئىھتىيات قىلىڭلار. بىلەمسىلەر، كۆزنىڭ كورلىقىدىن قەلىپنىڭ كورلىقى يامان. كۆز ئۇپۇقىدا ھۈكۈم سۈرگەن مەۋجۇتلۇقنىڭ ئەبەدىيلىكىدىن سۆز ئاچماڭلار. ئەمىلىيەتتە مەڭگۈلۈك مەۋجۇتلۇقنىڭ تەڭرىگىلا مەنسۈپ ئىكەنلىكىنى ھىس قىلالايمىزۇ، ئەمما ئۆزىمىزنىڭمۇ يوقلۇققا ئايلىنىپ كىتىدىغانلىقىمىزنى ئۇنتۇپ قالىمىز. مەۋجۇتلۇقنىڭ ئازابى يوقلۇق بىلەن ئاخىرلاشمايدۇ. ئەمما، ئاشۇ يوقلۇق ھاياتىمىزنى قىممەتكە ئىگە قىلىدىغان بۈيۈك سوۋغات. شۇڭا ھاياتنى قەدىرلىگىمىز، كۈنلەرنى مەنىگە، بەخت-سائادەتكە ئىگە قىلغۇمىز كېلىدۇ. ئەي ئىنسان، كۆزۈڭگە تاشلانغان بارچە نەرسىلەرنىڭ مەۋجۇتلىقى ھەققىدە ئۇزاق تەشۋىشلەنمە. بارلىققا كېلىش يوقىلىشتىن دېرەك بىرىدۇ. ئەمما، ھاياتىڭدىن ئەسىرلەرگە ھەدىيە قالىدىغىنى، سېنىڭ ئۆز مەنىسىنى تاپقان ھەقىقى كىملىكىڭ. ھەقىقىي نۇرلۇق كۆز ئىنساننىڭ ھاياتىنى يۇرۇتۇپ بىرىدىغان چىراق. قەلبىڭ كور بولسا، ھاياتىڭمۇ زۇلمەتلىك بولىدۇ. زۇلمەتلىك ھايات يوقلۇقنىڭ ھالاكىتى. كىينكىلەرنىڭ ھاياتىغا نۇر چاچقۇدەك، ئۇلارنىڭ ئەسلىشىگە ئەرزىگۈدەك ھېچ نەرسە قالدۇرالمىساڭ، ياشىغىنىڭنىڭ نىمە ئەھمىيىتى؟ ياشاش ھاياتنىڭ ئىزاھى بولالىسا، ئۇنىڭ بالاغىتىنى قەيەردىن تاپىمىز؟ كۆز كۈڭۈلنىڭ ئەينىكى. ئەمما ئۇ كۈڭۈللەرنىڭ چىركىنلىكىنى كۆرسىتىپ بىرەلمەيدۇ. ھاياتلىق سەمەرىسىدە ئىزگۈلۈك مۇئەككىلى نۇر چېچىپ تۇرمىسا، چېپىپ تۇرغان قەدەملەرمۇ ئەھمىيەتسىز، پارقىراپ تۇرغان كۆزلەرمۇ ئەمادۇر. ھايات ھەسرىتى مەۋجۇتلىقىڭغا شولا تاشلىغاندا، ھاياتقا كۈلۈپ باقالامسەن؟ كۆز ئۇپۇقۇڭغا تاشلانغان مەۋجۇدىيەت رىئاللىقىڭنىڭ پۈتكۈچىسىمۇ؟ بىز ئاخىرقى دەملەردە مەۋجۇتلۇقنىڭ قايسى خىل ماھىيىتىنى ئېچىپ بىرىش ئۈچۈن ياشاۋاتقانلىقىمىزنى تۇنۇپ يەتكەندە، ئۆز ھاياتىمىزدىن ئۆكۈنمەيدىغان بولۇشىمىز كىرەك. ئىنساننىڭ ئۆز بەندىلىكىگە قايتۇرغان جاۋابى ئەنە شۇ يەردە!...

ئايىمنىسا سۇلايمان: چۈش ياپراقلىرى

باھا سۆز