ئىسكەندەر پادىشاھ -‹‹شاھنامە ›› سەككىزىنچى بۆلۈم [ئۇلانما كۆچۈرۈش]

ئىسكەندەر ئۆمرىنىڭ ئاخىرلىشىۋاتقانلىقنى بىلىپ، دۇنيا ۋەسۋەسىسىدە تىرىك ئايرىلغان قاياشلىرىنى بىر كۆرۈۋېلىش ئۈچۈن چىشىنى چىشلەپ شۇنچە تېز ماڭغان ئېدى.ئەمما كىندىك قانلىرى تۆكۈلگەن تۇپراقلار تۇتىيادەك بىلىنىپ ،ۋەتەن ھىدلىرى دىماغلىرىغا ئۇرۇلۇپ،ئانىسى،خوتۇن بالىلىرى،ھەممە قاياشلىرى،كۆز ئالدىدا ئايان بولۇپ ،مۇرادىغا مۇيەسسەر بولۇشقا ئازلا ۋاقىت قالغان چاغدا ئەجەل ئۇنىڭ ئالدىغا توغرا بولدى.خۇددى قىزىق قۇمغا تاشلانغان بېلىقتەك ئازاپلىدى.شۇ تاپتا ئۇنىڭ بېشىدا سىرداش قاياشلىرىدىن بىرىمۇ يوق بولۇپ، تونۇردەك قىزىق باياۋان ئىچىدە خەستە جېنى ئىسسىق ۋە تەشنالىق دەستىدىن قىينالماقتا ئېدى.ئۇنىڭ نالە- زارلىرىغا بىرمۇ داۋا تېپىلمىدى! جاھان ئىشلىرىغا ئارتۇقچە ھەۋەس قىلغۇچىلارغا بۇ ئەپسانە مەڭگۈلۈك ئاچچىق ئىبرەت بولغۇسىدۇر!

رىۋايەت قىلىنىشىچە لوقمان ھېكىم ئەينى دەۋردە پۈتۈن دۇنيانىڭ بايلىقلىرىنى قولغا كىرگۈزۈپ ئەڭ باياشات ياشىيالىغۇدەك قۇربى بار تۇرۇپ ياقا پۇچقاقتىكى بىرئەسكى خارابىنى ماكان تۇتۇپ ياشىغان ئىكەن.ئۇ مىڭ ياشقا كىرگەن چېغىدا بىر ئادەم ئۇنىڭ ھالىنى كۆرۈپ ئىنتايىن ھەيران قالغان ھالدا سورىغان ئىكەن:
-ئەي دانا ھېكىم،سەن شۇ قەدەر دانىشمەنلىكىڭ بىلەن ئالەمنى قۇياش كەبى يورۇتقان تۇرۇپ نىمە سەۋەپتىن دۇنيا مەئىشەتلىرىدىن قول ئۈزۈپ مۇشۇنداق ئەسكى خاربىلىقتا جېنىڭنى قىينايسەن؟! ساڭا شاھانە قەسىرلەر،ئەڭ ئالىي نازۇ- نېمەتلەر،شاھلارغا خاس شاھانە كىيىم كېچەكلەردىن نىمىنى خالىساڭ شۇ نەرسە تېپىلاتتىغۇ؟

-مەن بۇ خارابىلىكتە نەچچە يىللاردىن بېرى ھۇۋقۇشتەك تەنھا  ياشاپ كېلىۋاتىمەن.-دەپ جاۋاپ بېرىپتۇ لوقمان ئۇ كىشىگە، -بۇنداق قىلىشتىن مەقسىدىم،بىھۇد ئىشلار،بىھۇدە ھەۋەسلەردىن قول ئۈزۈش ئۈچۈندۇر.كىشى بۇ دۇنيا مەئىشەتلىرىنى قانچە قوغلاشقانسېرى،قانچە ئىگە بولغانسېرى ئۇ نەرسىلەر شۇ كىشىگە خۇشاللىق ۋە راھەت-پاراغەت بېغىشلاش ئەمەس، ئەكسىچە تۈگىمەس  ھەسرەت -نادامەت ئېلىپ كېلىدۇ.مەن شۇ نوقتىنى تونۇپ يەتكىنىم ئۈچۈن بۇ ئالەم مەئىشەتلىرىگە كۆڭۈل بۆلمىدىم.ھالبۇكى مەن دۇنيايى پانىيدىن دۇنيايى باقىيغا كېتىدىغان چېغىمدا مۇشۇ ۋەيرانە خارابىيلىقمۇ مېنىڭدىن ئېشىپ قالىدۇ ۋە ئارتۇقچە يۈك بولىدۇ!

جاھاننىڭ داراسى بولغان ئىسكەندەر ئەجەل يېتىپ ئۆلۈم زھىرىنى سۈمۈرىۋاتقان شۇ دەمدە قولدىن كېتىۋاتقان دەپىن دۇنيالىرىنى ئەمەس ،بەلكى ئكزىنى بوۋاق ۋاقتىدىن تارتىپ بېقىپ قاتارغا قوشقان،مېھرىبان ئانىسىنى ئېسىگە ئالدى.ئانىسى ئەسكە چۈشۈش بىلەن ئۇنىڭ ۋۇجۇدىغا ئوت تۇتاشتى.ئۇ كۆزلىرىنى ئاران ئېچىپ ھەمراھلىرىغا قاراپ سوغاق بىر ئاھ ئۇردى-دە ئانىسىغا ۋەسىيەت قالدۇرۇش ئۈچۈن پۈتۈكچىگە قەغەز قەلەم كەلتۈرۈشنى تەلەپ قىلدى.ئىسكەندەر ئېغىر- ئېغىر تىنىپ تۇرۇپ قەلبىدىكى ھەسرەت مۇڭلىرىنى تۆكتى.پۈتۈكچى تېز-تېز قەلەم تەۋرىتىپ ھەممىنى قويماي خاتىرىلەپ ماڭدى.

داۋامىنى جىددى يېزىۋاتىمەن.  ئاللاھ ئىگەم ئىشىمنى ئوڭ قىلسا ئاخىرىنى بۈگۈن يېزىپ تۈگۈتۈپچۈشتىن كېيىن يوللايمەن. ئاندىن بۇ ئەسەرنىڭ بەھرام گۆر ھەققىدىكى توققۇزىنچى بۆلۈمىنى يېزىشقا كىرىشىمەن.
نەچچە ۋاىتتىن بېرى مېنى قوللىغان،يازمىلىرىمنى قىممەتلىك ۋاقىتلىرىنى چىقىرىپ ئىزچىل ئوقۇپ ماڭغان دوستلارغا چىن قەلبىمدىن رەھمەت ئېيتىمەن.

‹‹بۇ خەت پۈتۈنلەي دەرتلىك سەھىپىلەردىن ئىبارەتتۇر. ئاللاھ بەدەن ئىچىگە قان جەۋھىرىنى سالغۇچى ۋە ئۆزى بەرگىنىنى ئۆزى يەنە قايتۇرۇپ ئالغۇچىدۇر.تەڭرىنىڭ تەقدىرى بىلەن ئەجەل قادىلىپ كەلگىنىدە ئەمەل ۋە مەنسەپنىڭ ھەشەمەتلىرى ھېچنىمىگە ئەسقاتمايدۇ.ئاللاھنىڭ ھەر بىر قازا ۋە قىسمەتلىرىگە نۇرغۇن ھىكمەتلەر يوشۇرۇنغان.ئۇنى ئەقىل ھەرقانچە پىكىر قىلسىمۇ بىلىپ بولالمايدۇ.ئاللاھنىڭ ئۆزى ھەممىگە قادىر.ئۇ ئۇلۇغلۇق ئىگسىدۇر! ئۇنىڭ ھەم باشلىنىشى يوقتۇر، ھەم ئاخىرلىشىشى يوقتۇر.مەن تەڭرنىڭ ھەمدۇ سانالىرىنى مۇشۇنچىلىك بايان قىلدىم.ئمدى ۋەسىيىتىمنى باشلاي:
ئەجەل قوشۇنى ئىلكىدە جاراھەتلەنگەن تېنىمنىڭ جېنى ھەم ۋۇجۇدۇم گۆھىرىنىڭ خەزىنىسى بولغان ئانامغا دەيدىغانلىرىم تۆۋەندىكىچە:
ئەي ئانا مەن سېنىڭ يېنىڭدىن ئايرىلماي كېچە-كۈندۈز ھالىڭدىن خەۋەر ئېلىپ مېنى باققان ئەقرىڭنى ياندۇرماستىن،سېنىڭدىن ئايرىلىپ جۇدالىق دەردلىرىگە ۋە پۇرقەت ئازابىغا قويدۇم.بېشىمغا بىھۇدە خىياللار كىرىۋېلىپ ‹‹جاھاننى بويسۇندۇرۇش›› قىلا بېرىلىپ كەتتىم.

ئەمدى ئويلىسام قىلغانلىرىمنىڭ ھەممىسى خام- خىيالغا ئوخشاش بىھۇدە ئىشلار ئىكەن.كاللامدا ھۇش ۋە ئەقىل پەيدا بولۇپ ‹‹ئەمدى ئانامنىڭ خىزمىتىنى قىلاي›› دېگەن چېغىمدا بولسا ئاللىقاچان پۇرسەت ئۆتۈپ كېتىپ بوپتۇ.ئېسىت!سەن ئۈچۈن ئوغۇل بالىلىق بۇرچۇمنى ئادا قىلالمىساممۇ ساڭا قۇللۇق بەجا كەلتۈرۈپ، يېنىڭدا بىر غۇلام كەبى خىزمىتىڭنى قىلىپ ئۆتكەم بولسام بولماسمىدى؟!كاشكى بوسۇغاڭدىكى تۇپراق بولۇپ ،ھەر قېتىم بوسۇغا ئاتلىغىنىڭدا ئاياغلىرىڭغا قونۇپ ۋە ئۇنى سۆيۈپ مۇبارەكلەپ ‹‹مانا شۇنىڭ ئۆزى چوڭ پادىشالىق›› دەپ بىلگەن بولسامچۇ؟!ھېدلىرىڭغا قېنىپ،ئېتەكلىرىڭنى كۆزۈمگە سۈرتۈپ،،كۆيۈملۈك ئىسسىق باغرىڭغا بېشىمنى بىردەم بولسىمۇ قويۇۋېلىپ ئانىلىق مېھرىنىڭ لەززىتىنى قايتا بىر ھىس قىلىۋالسامچۇ؟!مانا ئەمدى ئەجەل تەقدىر ئۇنىڭغا يول بەرمەيۋاتىدۇ.ئەگەر سېنىڭ رازىلىقىڭ،مەن بىچارىنىڭ كۆڭلىگە تەسكىن بەرمىسە مېنىڭدەك ناتىۋاننىڭ ھالىغا ۋاي! مەن گەرچە سېنىڭ ئەمىر پەمانىڭنى تۇتالمىغان بولساممۇ لېكىن سەن مېنىڭ ئۈمىدلىرىمنى قوبۇل قىلغايسەن.بۇ خېتىم قولۇڭغا تەگكەندە جىسمىڭ پارا-پار بولغۇدەك پىراق ئوتىدا ئۆرتۈنۈشىڭ مۈمكىن.

بىراق سەن جاھان ئەھلى ئىچىدىكى بىر ئەقىللىق ئانا!شۇنداقلا خەلقىم ئالدىدا مېنىڭ ۋەسىيىتىمنى ئادا قىلىدىغان بىردىن بىر كىشى.شۇڭا تەقدىر ماڭا ھەرقانداق قىسمەتنى يازسا ،ئۇنىڭغا سەنمۇ رازى بولغىن!كۆڭۈل رىشتىڭنى مەندىن ئۈزۈپ تەڭرىگە سېغىنغىن.ئاپئاق چاچلىرىڭنى سارغايغان يۈزلىرىڭگە چۇۋۇپ مەن ئۈچۈن پەرياد چەكمىگىن.ئوغۇل ماتىمىنى تۇتقان باشقا ئانىلاردەك مۇلايىم چېھرىڭنى تاتىلاپ يارا قىلمىغىن.ئەگەر سەۋر قىلىشقا تاقىتىڭ قۇۋۋىتىڭ يەتمىسە بىر چوڭ مەرىكە تۈزگىن.كۆپلىگەن لەززەتلىك تائاملارنى تەييارلا،ئاندىن جامائەتكە:‹‹بۇ دۇنيادا ھىچقانداق ئۇرۇق- تۇققان،يېقىن- يورۇقلىرى ئۆلمگەن كىشى بولسا كېلىپ بۇ تائاملارنى يېسۇن!››دېگىن.ئەەەر ئەشۇ تائامغا قول ئۇزىتىدىغان ئادەمدىن بىرەرسى چىقىپ قالسا سەنمۇ مېنىڭ ماتىمىمنى تۇتۇپ يەتكىچە ئازاپ چەككىن.ئەگەر ئۇ تائاملارغا ھىچكىم قول ئۇزاتمىسا ۋە ئۇنى يېمىسە ،ببۇنىڭدىن جاھاندا يېقىنلىرى ئۆلۈپ تۇپراققا كىرمىگەن بىرمۇ كىشىنىڭ يوقلۇقى مەلۇم بولىدۇ.بۇنىڭدىن ئۆزۈڭگە تەسەللى تاپقىن!مېنىڭ ماتىمىم دەردىدىن قۇتۇلۇپ پۈتكۈل ئالەم ئەھلى بىلەن ھەمدەرد بولغىن.سەن ھەرقانچە بەختىيار خانىش بولساڭمۇ ،ئوخشاشلا تەڭرىنىڭ بەندىسىسەن! شۇڭا ئۆزۈڭنى بارچە خالايىق بىلەن باراۋەر بىلگەيسەن!مەن ياخشى بولاي،خاھى يامان بولاي بەرىبىر بۇ دۇنيا بىلەن خوشلاشتىم.جېنىم ئانا! ...كۆيۈمچان ئانا!...ھممىگە يېتۈك ئانا! تائەت ئىبادەت بىلەن بولغان مۇبارەك ۋاقىتلىرىڭدا غېرىپ ئوغلۇڭنى ياد ئەتكىن، دۇئالىرىڭ بىلەن  روھىمنى شاد قىلغىن!

ھەزرىتى ئىسكەندەر سۆزلەپ ھالىدىن كەتتى.ئۇ تىترەپ تۇغان قوللىرى بىلەن خەتنى ئاران تەستە قاتلاپ ئوراپ ھەمراھلىرىغا بەردى:
-كېچە -كۈندۈز ئات چاپتۇرۇپ، توختىماي يول يۈرۈپ بۇ مەكتۇپنى ئانامغا يەتكۈزۈڭلار،سىلەرمۇ مېنىڭ ئەتراپىمدا ئىزتىراپقا چۈشمەڭلار،ھازا ماتىمىمنى تۇتىمىز دەپ ئۆزۈڭلارنى ئازاپقا سالماڭلار!جەسىدىمنى تاۋۇتقا سېلىپ،كۈن تۈن دېمەي تېز مېڭىپ جىسمىمنى ئىسكەندەرىيەگە ئېلىپ بېرىڭلار.تىرىك ۋاقتىمدا ئۇ يەر ماڭا ۋەتەن بولغان ئېدى.ئۆلۈكۈمگىمۇ يەنە شۇ يەر دەپنگاھ بولسۇن! مېنى تاۋۇتقا سالغان ۋاقتىڭلاردا چوقۇم بىر قولۇمنى تاۋۇتنىڭ سىرتىغا چىقىرىپ قويۇڭلار.كىشىلەر ئۇنىڭغا ھەيرەت كۆزلىرى،ياق ئىبرەت كۆزلىرى بىلەن قاراشسۇن! مەن گەرچە بۇ قوللىرىمغا پۈتكۈل جاھان مەملىكىتىنى ھەم بارلىق دېڭىز ۋە قۇرۇقلۇقلارنىڭ بايلىقلىرىنى كىرگۈزگەن بولساممۇ لېكىن ئەجەلنىڭ قوللىرى ئۆلۈم سەپىرىنىڭ ناغرىسىنى چالغاندا ،بۇ قوللىرىم خۇددى چىنار شېخىغا ئوخشاش قۇپقۇرۇق ھالدا كەتتىم.ھىچنەرسىنى بىللە ئېلىپ كېتەلمىدىم.شۇڭا ئالەم ئەھلى مېنىڭ قولۇمنى كۆرۈپ  ئىبرەت ئالسۇن! بۇ ئالەمنىڭ بايلىقلىرىغا ئارتۇقچە ھېرىسمەن بولمىسۇن!

پادىشاھ ئىسكەندەر بارلىق ۋەسىيەتلىرىنى تاماملاپ ئاخىر كۆز يۇمدى.پۈتۈن دۇنياغا سايە سالالىغان شاھانە دەرەخنىڭ بېشى ئېگىلدى.ھەممىدىن بۈيۈك،ھەممىدىن قىممەتلىك تاج يەرگە چۈشتى.تەخت يۈز پارە بولدى.ئاجەل شاماللىرى ھېكمەت رىسالىلىرىنىڭ ۋاراقلىرىنى يىرتىپ ئۇچۇرۇپ  ئېلىپ كەتتى.يەرلەر تەۋرەپ دەريا دېڭىزلار ھەسرەتلىك چايقالدى.بىرنەچە مۆتىبەر خەلققە شاھنىڭ ۋەسىيەتلىرىنى سۆزلەپ سبرى قىلىش توغرىسىدا ئاجىز خىتاب قىلدى.ئۇلار ئىسكەندەرنى ۋەسىىيىتىدە ئېيتىلغىنى  بويىچە تاۋۇتقا سالدى –دە ئاندىن مەپىگە ئورۇنلاشتۇرۇپ مەنزىلىگە قاراپ راۋان بولدى.
ئىسكەندەرنىڭ خېتى ئوغلىنىڭ يولىغا قاراپ،‹‹قاچان كېلەرسەن ئوغلۇم؟!›› دەپ كېچە- كۈندۈز زار-زار يىغلاپ تۇرغان  بىچارە  ئانىنىڭ قولىغا يەتكىنىدە ئانا قاتتىق قايغۇ- ھەسرەت تۈپەيلىدىن بەئەينى مۇردىغىلا ئوخشاپ قالدى.ئېغىر ماتەم  دەستىدىن ئۆز كۆكسىنى ئۆزى يارغۇدەك ھالغا يەتتى.ئۇنىڭ ئاھۇ پىغانلىرى كۆككە ئۆرلەپ جاھننى ئۆرتىدى.شۇنداق چاغلاردا ئوغلىنىڭ ۋەسىيەت سۆزلىرى ئېسىگە كېلىپ پىغان زەھىرىنى ئىچىگە يۇتاتتى-يۇ يەنىلا ئۆزىنى تۇتۇۋالالماي ئۆزىنى كاچاتلاپ تۆگىدەك بوزلايتتى.شۇ ئارىدا يىراقتىن تاۋۇت كۆتۈرگەنلەر كۆرۈندى.كىشىلەر ئىسكەندەرنىڭ تاۋۇتىنى يەلكىلىرىگە قويۇپ ھەر بىر قەدەم يوللىرىغا جانلىىنى پىدا قىلىپ كۆزلىرىدىن يامغۇر كەبى ياشلىرىنى تۆكۈشكەن ھالدا كەلمەكتە ئېدى.بېلىنى ئاق پوتا بىلەن باغلىغان،ھاسا تايانغان ئانا ئۇلار تەرەپكە نالە-زار قىلغان ھالدا ئىلەڭ-سەلەڭ دەسسەپ كەلمەكتە ئېدى.ئۇ تاۋۇت يېنىغا يەتكەندىن كېيىن ئوغلىنىڭ چىقىرىپ قويۇلغان قولىنى تۇتۇپ يۈزلىرىگە يېقىپ ئالقانلىرىغا سۆيۈپ بارماقلرىنى سىلاپ سەلدەك كېلىۋاتقان ياشلىرىنى توختىتىۋالالماي قالدى:

-ئەي ئەزىز مېھمىنىم،خۇش كەلدىڭ،كەلگەن قەدىمىڭگە مۇبارەك بولسۇن.مەن قېرى كېنىزەكنىڭ جېنى يولۇڭدا پىدا بولسۇن! بۇ ئالەم سارىيى ساڭا لايىق ئەمەس ئېدى،شۇڭا بىزنى غۇربەتتە قويۇپ كېتىپ قالدىڭمۇ؟بۇ دۇنيادىن ئىبارەت قارا تۇپراق  سەندەك پاك نۇرغا قانداقمۇ ماكان بولالىسۇن؟! ماڭا بۇ پەلەكتىن شۇ قەدەر زۇلۇم يەتتىكى سېنىڭدىن بۇرۇن ئۇ ئالەمگە سەپەر قىلىپ ساڭا جەننەت ئىچىدە ئورۇن ھازىرلاشقا مۇيەسسەر بولالىغان بولسام نېمىدىگەن ياخشى بولغان بولار ئىدى-ھە؟! مانا قارا، بۇ دۇنيانىڭ سېنىڭدەك نۇرلۇق قۇياشى غايىپ بولۇپ، مېنىڭدەك قاراڭغۇ زۇلمىتى قېپ قالدى، ئانا ئيىغلاپ تۇرۇپ ئىسكەندەرنىڭ قوللىرىنى باغرىغا باستى،-قېنىم قوزام،ئىسكەندەر، بۇ قوللىرىڭ قۇپ- قۇرۇق تۇرۇدىغۇ؟قېنى مۇشۇ قوللىرىڭ بىلەن يىغقان مال –دۇنيالىرىڭ؟ نەدە قالدى غەزىنە ئاشىيانلىرىڭ؟ ئۇ ۋاپاسىزلار سېنى يالغۇز يولغا سېلىپ قويۇپ ئۆزى قېلىپ قالدىمۇ؟ يوقسۇللارنىڭ بېشىنى سىلىغان بۇ ساخاۋەتلىك قوللۇرۇڭ ئەمدى سوۋۇپ كېتىپتۇغۇ؟ ئەمدى مەن يىغلىماي كىم يىغلىسۇن؟نالە پەريادلىرىمنى پەلەككە يەتكۈزسەم تاۋۇتۇڭ ئالدىدا جان بېرىپ زەئىپ جىسمىمنى تېنىڭ ئۈستىگە تاشلىسام،پەلەك زۇلمىدىن خالىي بولۇپ سەن بىلەن بىرگە كەتكەن بولسامچۇ كاشكى...

ئانا ئەلەڭلەپ ماڭغىنىچە ئىككى قولىنى كۆككە سوزۇپ قاتتىق ۋارقىرىدى:
ئاھ ىۇدا تېنىم قۇتىسىدىكى پاك گۆھىرىم قېنى؟! سۇ ۋە قۇرۇقلۇقنىڭ شاھىنشاھى ئىسكەندەرىم قېنى؟!
پەلەك جاۋاپ بەرمىدى.تاۋۇتتىنمۇ سادا چىقمىدى.مەپە ئاستا-ئاستا  قوزغالدى...ئەمما تاۋۇت سىرتىغا چىقىپ تۇرغان  قۇپ- قۇرۇق قول ئىبرەت كۆزىدە قارىغۇچىلارغا مىڭ كىتاپلىق ئىبرەتنامە ئېدى.
ئىسكەندەرنىڭ ئۆلۈمى ئۇزۇتۇلۇپ بولۇنغاندىن كيىن ئانا ئوردىغا قايتماي كېچە كۈندۈز ئوغلىنىڭ قەبرىىسىنى ماكان تۇتۇپ شۇ يەردە ياشىدى.ھۆكۈمالارنىڭ قەدەملىرىنى بەرىكەتلىك بىلىپ ئۇلارغا چەكسىز ئىززەت ئىكراملار قىلدى.بىر كۈنى ئەپلاتۇن،سوقرات،ئارستۇ قاتارلىق داڭلىق ھۆكۈمالاردىن يەتتە نەپىرى قەبرىستانلىققا بېرىپ ئانىغا تەسەللى خاتىرە سۆزلىرىنى قىلدى.

-ئەي ئانا،قازاغا رىزا بولۇڭ،بۇندىن كېيىن بۇنداق كۆپ ياش تۆكۈپ يىغلاپ مەرھۇم شاھىمىزنىڭ روھىنى بىسەرەمجان قىلماڭ.ئاتا-ئانا بولغۇچى قازاغا رىزا بولماي كۆپ نالە -زارلار قىلسا ئاللاھ ئىگەم قەبزى روھ بولغۇچىنى :‹‹جان مەن ساڭا ۋاقىتلىق ئامانەت بەرگەن نەرسە ئېدى،ئامانەت دېگەن ھامان ئۆز ئورنىغا قايتىدۇ.شۇنداق تۇرسا بۇ بەندە قازاغا رىزا بولماي يەنە نىمانچە ئاھۇ -پىغانلار چېكىپ ماڭا قەھىر قىلىدۇ؟ سەن ئۇنىڭ بىرەر مۇھىم نەرسىسىنى ئېلىپ كەتكەنمىدىڭ؟ ھاياتلىقىڭدا ھالىدىن ياخشى خەۋەر ئېلىپ پەرزەنتلىك بۇرچۇڭنى ياخشى ئادا قىلمىغانمىدىڭ؟!›› دەپ سوئال- سوراققا تارتىپ ئازاپقا دۇچار  قىلارمىش،- دەپ كۆپلىگەن تەسەللى سۆزلىرىنى ئېيتىپ ئوردىغا قايتۇرۇپ كەتتى.

ھۆرمەتلىك ئوقۇرمەن،شۇنىڭ بىلەن مەن نەسرىلەشتۈرۈۋاتقان ‹‹شاھنامە››نىڭ سەككىزىنچى بۆلۈمى ئىسكەندەر زۇلقەرنەيىن ھەققىدىكى قىسسەلەر ئاخرلاشتى.ئەمد ى بۇندىن كېيىن داۋاملىق بۇ ئەسەرنىڭ داۋامى بولغان ‹‹شاھنامە ››توققۇزىنچى بۆلۈم <<پادىشاھ ئەردەشىر ۋە گۈلنار ھەققىدە قىسسە>> ھوزۇرۇڭلاردابولىدۇ.
سەمىمى ئەسكەرتىش،مەن ‹‹شاھنامە››نى نەسرىلەشتۈرۈش خىزمىتى بىلەن شۇغۇللىنىۋاتقىلى ھازىر 14ئاي ۋاقىت بولدى.شۇندىن بېرى خىزمەتتىن سىرتقى ۋاقىتلىرىمنى،يازلىق قىشىلىق تەتىللىرىم،دەم ئېلىش كۈنلىرىمنى قۇرباب قىلىپ بۇ مۈشكۈل ھەم شەرەپلىك ئىشنى قىلىپ كەلدىم.ئاللاھ خالىسا بۇ يىل ئونىنچى ئايدىن بۇرۇن ئەسەرنىڭ داۋامىنى يېزىپ تۈگۈتۈپ
نەشىر قىلىشنى خالايىدىغان نەشرىيات ئورۇنلىرى بىلەن ئالاقىلىشىمەن ۋە تۈزىتىش تەھرىرلەش ئىشلىرىنى قىلىمەن.
يېزقچىلىق ئىشلىرىنىڭ نەقەدەر قىيىن ۋە جاپالىق ئىكەنلكىنى قىلىپ باققانلار بىلىدۇ. شۇڭا باشقىلار بۇ يازمىلىرىمنى باشقا توربەتلەرگە خالىغانچە يۆتكىمىسە.شۇنداقلا مېنىڭ رۇخسىتىمسىز ھەرقانداق مەتبۇئاتلاردا باشقا كىشلەرنىڭ نامى بىلەن ئېلان قىلىۋالمىسا دېگەن ئۈمىدتىمەن.كىمىكى بۇ ئاگاھلاندۇرۇشۇمغا قۇلاق سالماي ئەكسىچە ھەركەتلەر بىلەن شۇغۇللىنىدىكەن ئەسەر ھوقۇقى قانۇنىدىكى مۇناسىۋەتلىك بەلگىلىمىلەر بويىچە دەۋاغا تارتىلىپ  ئۆزىنى سوتتا كۆرىدۇ.
مەن بىلەن ئالاقىلىشىدىغانلار ئۈچۈن ئالاقە مەنزىلى:
تېلىفۇن:15001554443
چچ:1456156626 بۇ يازمىنى ئاخىرىدا   qabiljan2004 تەھرىرلىگەن. ۋاقتى  2012-8-2 20:49  

كىچىك ۋاقتىمدا دادامنىڭ قۇچىقىدا ئولتۇرۇپ ئاڭلىغان ھىكايىلەر ئېسىمگە كېلىپ قالدى. نەقەدەر گۈزەل چاغلار ئېدى -ھە!. داۋاملاشتۇرسىڭىز، ئاخىرىنى كۆرۈشكە تەشنارمەن، قولىڭىزغا دەرىت كەلمىسۇن.