بوۋاقى: ئېسەنكىرەش

ئېسەنكىرەش
زۇۋانىمغا تىقىلدى بىر جۇت،
مۇزلاپ كەتتى روھىم تەنسىراپ.
قۇرتلارغا مەھبۇس بولغان قۇت،
ئەرۋاھىمدىن كېلەر جان سوراپ.

ئۇنتۇپ قالغان ھىجران ئۆتمۈشى،
ۋۇجۇدۇمنى چۆمكىدىڭ غەمدە.
بۇزۇلغىنى كىملەرنىڭ چۈشى،
سېغىنماستىن ئۇلۇغ ئىگەمگە؟

تۇتۇلغىنى كىملەرنىڭ ئۈنى،
تۆكۈلگىنى كىملەرنىڭ قېنى؟
ئاھ، ئۆچكىنى قايسى كۆز گۈنى،
تۇمانلاشقان كىملەرنىڭ جېنى؟...


سىقىۋالدى ياقامدىن زاۋال،
بۇرنۇمدىن قان ئالدى ئاچچىق تۈن.
ئۆزلۈك ئەبەد قىلىنماس قامال،
ھەتتا قېرىپ كەتسىمۇ بۈگۈن!

چوقۇلانغان دان كىمگە مەنسۇپ،
چوقچىلانغان كۆيۈك كۆسەي چوغ؟
يىغلاپ سالدىم مىڭ ئۆكسۈپ-ئۆكسۈپ،
ھايات، ياشام دېگۈزگەچكە دوغ...

كىرىۋالدى كۆزۈمگە ھەسرەت،
تىقىۋالدى شادلىقىمنى كۈز.
دۇنيا ماڭا،      
                        مەن ئاڭا غەلەت،
كېلەلمىگەچ پەقەت يۈزمۇ-يۈز.

ئۈمىد ئۈزمەك شەيتاننىڭ ئىشى،
ئىرادىگە ھامىلدار ئارمان.
كىملەر ئەركەك ھەم كىملەر چىشى،
ئايرار بىر تاڭ روھ ئالغان خارمان!...
بۇ يازمىنى ئاخىرىدا   ABLAJAN.BOWAKI تەھرىرلىگەن. ۋاقتى  2016-1-19 11:08  

تېتىملىق مىسرالىرىڭىزنى ياقتۇردۇم، لىكىن، مۇنۇ كۇبلىتتىكى

چوقۇلانغان دان كىمگە مەنسۇپ،
چوقچىلانغان كۆيۈك كۆسەي چوغ؟
يىغلاپ سالدىم مىڭ ئۆكسۈپ-ئۆكسۈپ،
ھايات، ياشام دېگۈزگەچكە دوغ...


دوغ سۆزنى قاپىيە قوغلىشىپ يېزىپ قالغاندەك ھېس قىلىپ قالدىم.
بەلكىم مەن چۈشىنەلمىگەندىمەن، كەچۈرۈڭ.

قەلىمىڭىزگە قۇت تىلەيمەن.

شېئىر ياخشى يېزىلىپتۇ،ئىجادىيەت ئ‍ىشلىرىڭىزغا يەنىمۇ بەرىكەت تىلەيمەن!

ئۆزلۈك ئەبەد قىلىنماس قامال،
ھەتتا قېرىپ كەتسىمۇ بۈگۈن!
ئۆزلۈك ئىرسىيەت ئۇ بىر كامال،
باشقىلار بىلمەيدىغان تۈگۈن.

ئۈمىد ئۈزمەك شەيتاننىڭ ئىشى،
ئىرادىگە ھامىلدار ئارمان.
دۇنيانىڭ بار ياز ۋە قىشى،
سىزدە بار باھاردەك دەرمان.