«ئىزگۈ تور ئەدەبىياتى»مۇكاپاتىغا تەۋسىيە قىلىنغان ئەسەر
مۇھەببەتنامە
(لىرىك داستان)
موھەممەدرۇزى ئابدۇقادىر
يۇلتۇزۇڭ بولاي پېشانەڭدىكى،
زىناقلىرىڭدىن كۈيلەر تۆكۈلسۇن.
كۆلكىلىرىڭدىن ياشارسۇن باغلار
سۆيۈشۈڭلىرىڭدىن جانلار تېپىلسۇن.
قازناقلىرىمغا يوشۇرۇپ ئالاي،
چىچەكلىرىڭگە دالا كۆمۈلسۇن.
پىيالىلەرگە لىقلىغىن سۆيگۈ
چۈشلىرىم مەستخۇش ئاڭا سىرىلسۇن.
كىيىكلىرىڭنىڭ بولاي يايلىقى،
پۇراقلىرىڭدىن ئاسمان كۈيلىسۇن.
قايتاي ئۆمۈرنىڭ سۇلالىسىگە
كىرپىكىڭ جاندا چوغدەك سۇيلىسۇن.
ئاسمانلىرىڭنى بەرگىن بىر قېتىم،
خىياللىرىمنىڭ كۆزى ئېچىلسۇن.
كوچىلىرىڭنىڭ تۇتۇپ رەشىكى
ھىجران تاشلىرى ھەر يان چېچىلسۇن.
دەريالىرىڭنىڭ دولقۇنلىرىغا،
تاھىرنىڭ يېشى ئۈنسىز قېتىلسۇن.
بارماقلىرىڭدا ئويناي بىر نەپەس
چاقچاقلىرىڭدىن غەملەر يېيىلسۇن.
مېۋىلىرىڭدىن بەرگىن بىر ئېتەك،
ياپراقلىرىڭدىن ئۈنلەر سۆيۈنسۇن.
قارماقلىرىڭنى تاشلىغىن بىر پەس
بىلىقلىرىڭغا يەملەر سېلىنسۇن.
چىغىرلىرىڭدا ئۈنلىسۇن دەمدەر،
باغرى كۈيۈكلەر نۇردا سۆيۈلسۇن.
تۇلپارلىرىڭنىڭ كىشنەشلىرىدىن
تاغلار سىلكىنىپ كېچە تىتىلسۇن.
سوراقلىرىڭ بار ئېزىشلىرىمدا،
كېمە ساھىلدا پالاق چېتىلسۇن.
قۇقاسلىرىمغا قۇنىقىڭنى سال
باغرى تەرلىنىپ كۈندە ئېتىلسۇن.
ئېيتقۇم كەلمەيدۇ ئازاپلىرىمنى،
ئازغان خىيالىڭ مەندە يىشىلسۇن.
تۇتقىن قولۇمنى روجەكلىرىڭدىن
يۈتكەن ئۈزۈكۈڭ سەھەر تېپىلسۇن.
ئاتقا مىنەيلى كېچىلەر بويلاپ،
كەزگەن شەھەرلەر ساڭا ئىلىنسۇن.
كەپتەرلىرىڭنىڭ تاراي پېيىنى
قاناتلىرىڭنىڭ كىرى ئېلىنسۇن.
ياتقا بەرمەيمەن تەبەسسۇمىڭنى،
ياتقان قىيالار چوققا بىلىنسۇن.
ئالتۇن بۇيۇڭغا ئايلانسۇن كۈنلەر
رەقىبلىرىڭنىڭ باغرى تىلىنسۇن.
ھارۋا قوشمىغىن ھەسرەتلىرىڭدىن،
سەھەر ھاۋاسى تەنگە يىقىلسۇن.
بىر ئۆڭكۈر باردۇر تۈزلەڭ يېنىدا
سۆيگۈ ئانارى پىشىپ يېرىلسۇن.
قېنى قىزارغان شەپەق كۆينىكىڭ،
كىيگىن قىزغىنىپ تاڭلار يىقىلسۇن.
تېرەكلىرىڭنىڭ سالاملىرىدىن
يۈتكەن سېغىنىش ئاستا تېپىلسۇن.
قايتايلى خۇشال كۈلبەڭ تۈرىگە،
بۇلۇتلىرىڭنىڭ چېھرى ئېچىلسۇن.
ئاپتاپلىرىڭنى سۇنغىن بىر دەقىق
روھىم قۇياشى ئاڭا قېتىلسۇن.
زاغلار ئۈنلىگەن ئورمانلاردىن چىق،
پىراقلىرىڭنىڭ يىپى كېسىلسۇن.
لەڭلەر ئۇرايلى ئوكيانلىرىڭدا
ھىجرانلىرىڭغا كۆۋرۈك سېلىنسۇن.
سۇنغىن ئالماڭنى چىشلەي پېتىنىپ،
دەريالىرىڭنىڭ سېلى ئىتىلسۇن.
كەلسۇن باھارىڭ ئېتىزلىرىڭغا
دېھقىنىڭ بۇلاي تونلار يېپىلسۇن.
خومرىلىرىمدا شاراپلىرىم كۆپ،
ئىچەيلى بىللە يۈرەك قېنىشسۇن.
قۇزىلىرىڭنى ئايرىپ قۇي سۆيۈپ
سەرسان قويلىرىم بىر دەم تېپىشسۇن.
ساداقلىرىڭدىن ئوقلار ئۈزمىگىن،
سۆزلەر كەيىپتە شېئىر چېچىشسۇن.
شائىرلىرىڭغا بەرگىن ھۆجراڭنى
داستانلار پۈتۈپ كۆڭلى قېنىشسۇن.
ئازابلىرىڭنىڭ بولاي تامچىسى،
مۇقاملىرىڭدىن چۆللەر چېتىشسۇن.
سۇمبۇل –لالىلەر ئۈنسۇن ئىزىڭدىن
رەقىبلەر قاندا ھەر يان ئېزىشسۇن.
كاسەلىرىڭنىڭ بولاي گىرۋىكى،
نازۇك لەۋلىرىڭ ئاستا تىگىشسۇن.
تۇمۇرلىرىڭدا قانغا ئايلىنىپ
باغرىم ئورمىنى ساما سېلىشسۇن.
ئاچقىن كۆزۈڭنى چۈشتىكى رەنا،
كۆچەتلىرىڭگە سۇلار ئېقىشسۇن.
ئېيتقان سۆزۈمدىن يانمايمەن ھەرگىز
جاھان سۆيگۈگە ھەيران قېلىشسۇن.
كەپتەرلىرىڭنىڭ سولمىسۇن ئېتى،
بىكەتلىرىڭدە چاقماق چېقىلسۇن.
سارايلىرىڭدا تۈزەيلى مەشرەپ
سۇلغان دىلىمغا ئوتلار يېقىلسۇن.
ئاق ئالماڭنى ئال قولغا پۈكلىنىپ،
ئېتەكلىرىڭگە كۈنلەر سىرىلسۇن.
بولغىن بىر دانە ئاسمىنىمدىكى
ھەممە مىھىرلەر سەندىن تېپىلسىۇن.
سەۋرەڭ يېيىلىپ كەلدى ئالدىمغا
يانتاقلىرىڭنىڭ سىرى ئېچىلسۇن.
چىلانلىرىڭغا ئاساي قوڭغۇراق
مەپىللىرىڭگە قۇشلار تىزىلسۇن.
ئازمىلىرىڭدا قايناق سادالار،
بارماقلىرىڭدا داپلار چىكىلسۇن.
مالايلىرىڭنىڭ ئېتەكلىرىدىن
زىيالار ئۆرلەپ ھەر يان چېچىلسۇن.
ئېزىز بويۇڭدا ئاسمانلار باردۇر،
سۇنغان ئاۋازلار ئەمدى يېيىلسۇن.
ۋادىللىرىڭدا يېگانە بىر باغ
تاياقلىرىڭدىن مۇڭلار ئىزىلسۇن.
سالاي ئىچىڭگە ئالەمچە ئوتنى،
پۈۋلەپ كېچىچە ھىجران يىتىلسۇن.
باغلاي ئېتىمنى موما تۈۋىگە
بۇرۇنقى يۈتكەن چۈشلەر تېپىلسۇن.
سۆزۈڭ سىڭمىگەن شېئىردا مەن يوق،
ئۇجماغلىرىڭدىن تاڭلار سىرىلسۇن.
ئاچ-زارلا كەلسۇن ئۆيۈم ئالدىغا
تەڭنىدە لىقلاپ مېھىر بېرىلسۇن.
قۇيۇپ بەرگۈم يوق ئەمدى پېشىڭنى،
كەچسەم سېنىڭدىن ئوقلار ئېتىلسۇن.
توپا رەڭگىدە ئاقاردى كۈنلەر
ئاڭا رەسىمىڭ كۈندە سىزىلسۇن.
باغرى تاشلارغا بىر چاڭگال شېغىل،
ئىشىكلىرىڭگە قۇلۇپ سېلىنسۇن.
كەتسەم يۈز ئۆرۈپ نىھايەت سەندىن
جېنىم بازاردا مەيلى سېتىلسۇن.
چۆچەكلىرىڭنىڭ يارغىن قېتىنى،
ئازغان پۇتلىرىم ئاڭا سېپىلسۇن.
كۆرمەي تەلۋىلەر قالسۇن يىراقتا.
دەرۋازىلىرىڭ كۈندە يېپىلسۇن.
بەرگۈم كەلمەيدۇ قاتقان خىيالنى،
ئەتىرگۈلۈڭگە سۇلار سىپىلسۇن.
بارماقلىرىڭغا قوندۇر قەلەمنى
ئاشىقلىرىڭغا ئىنئام بېرىلسۇن.
بولغىن شاھ-سۇلتان تۇراي يېنىڭدا،
ئاياغلىرىڭغا زەرلەر چېچىلسۇن.
پاتاي سۆيگۈڭنىڭ سەلتەنىتىگە
تەبرىكلەپ ئۇندا گۈللەر سۇنۇلسۇن.
ئەسكەن لېۋىڭنىڭ پىراقلىرىدىن،
ماڭا بىر دانە كېمە تېپىلسۇن.
كېتەيلى بىللە يىراق يەرلەرگە
كۆرمىسۇن ھېچكىم كىتاب يېپىلسۇن.
سامان يولىدا تارىتىپ ئاقلىق،
ئاقاي قېنىڭدا لەھەڭ يىقىلسۇن.
سوغۇق نەزەر سال ، بەتخۇي دىللارغا
دىلى پاكلارغا ئوردىن بېرىلسۇن.
يامغۇر پەسلىدە تۇرغىن ئېيتىلىپ،
ئۇچقان قۇشلارنىڭ ئىچى سىرىلسۇن.
تاھىر ساندۇقتىن چىقسۇن تىرىلىپ
سەيياھ نىگاھى قۇياش بىلىنسۇن.
بۇلبۇل كېپەنسىز قالمىسۇن ئەسلا،
بارچە ئامانەت ساڭا يېزىلسۇن.
ئىشقى سۇيۇقلار قالسۇن پىيادە
روھى ساقلارغا مەپە قېتىلسۇن.
ساما قوينىدا قاينىسۇن گۈلباغ،
كۆزۈڭگە نۇردىن خەتلەر يېزىلسۇن.
چالاي نېيىمنى بېرىپ يېنىڭغا
تەبرىكلەپ چىغىر سەپكە تىزىلسۇن.
تۈشەكلىرىڭدە سۆيۈشلەر سەپراس،
يولدىن ئازغاننىڭ جېنى قىيىلسۇن.
مۇھەببەت ئۈچۈن ئۆلەيلى بىللە
ئىككىمىزگە بىر گۆرلا قېزىلسۇن.
مارجىنىڭ قالدى قولۇمدا تەۋرەپ
يامان خىيالنىڭ يىپى كېسىلسۇن.
ئاقچىللىرىمنى قويدۇم ئالدىڭغا
سۆزلەر دەسمايەم دۇكان ئېچىلسۇن.
مەشرەپ ئىشەنسۇن ئۆپۈشلىرىمگە
گۈلنىڭ بۇلبۇلغا قېنى قېتىلسۇن.
يانتاقلىرىڭغا ئوتلار قۇيايلى
ئازابلىرىڭنىڭ ئىسمى جىجىلسۇن.
بەردىم بىر قەترە يۇتۇۋال مەيلى،
ئاياقلىرىڭغا ھېسلار چېچىلسۇن.
قوياي ھېجىرغا كۆڭۈل رىشتىمنى
سۇراقلىرىڭنىڭ دېمى كېسىلسۇن.
تاۋارلىرىڭنى يايغىن شەپەققە،
قېنىم پۇرۇقلاپ ئۈنسىز چېچىلسۇن،
شىۋاقلىرىڭدا كەچمىشلىرىم بار
سىرىم ئىشىكى مەڭگۈ يېپىلسۇن.
ئاسمان سۆزىنى ئېيتمايدۇ نىچۇن،
باغرى يۇمشاقلار مەندە بېقىلسۇن.
ئېزىلگەن كۆڭلۈم بارسا يېنىڭغا
سىلا بېشىنى سەپكە قېتىلسۇن.
ئازماي ئىزىمدىن، يانماي سۆزۈمدىن،
ئالاي ئەمرىمگە نىكاھ ئوقۇلسۇن.
ناننى چىشلىگىن تۈزلىرىم گۇۋاھ
تەڭرىتاغ ، تارىم، قولى سۇنۇلسۇن.
ئاشىق ئايدىڭى ئاچقاندا قۇچاق،
قىزارغان دەردلەر ئاستا ئۇۋالسۇن.
تۇتاي جاھاننى سۇلاپ قۇتىغا
پاكىز ساقلىغىن سۆيگۈ قويۇلسۇن.
قاپاقلىرىمنى ئالاي مۈرەمگە،
بىلىمدە پوتا، روھىم پۇتالسۇن.
ئوسماڭنى قويغىن كۈندە تارتىنىپ
بەرگىدە شەبنەم قوياش ئاتالسۇن.
ياغلىقلىرىڭغا چەككىن چىمەنلەر،
ئاسمانۇ –زېمىن سەندىن كۈنلىسۇن.
تايچاقلىرىڭنى ھەيدە ئېقىنغا
پىلەكلىرىڭنى سوغۇق سۆيمىسۇن.
شامال كۆيدۈرگەن تۇپراقلىرىم بول،
تەكلىماكانغا ئوغۇز ئويىسۇن.
باھار چېچىڭنىڭ يۇلتۇزى بولسۇن
يازنىڭ يامغۇرى سېنى تۇنىسۇن.
ئاللىچە راۋاب بولسۇن قولۇمدا،
داپ-دۇتار ئۈنلەپ كۈيگە تۇتۇلسۇن.
مۇقام شورىدىن ئاتلىسۇن كۈلۈپ
تولۇنئاي يۈزى سەندىن تېپىلسۇن.
قامچام سېپىدە ئىسمىڭ يالتىرار،
تۇپراق خېتىنى قۇشلار ئوقۇسۇن.
قايتاي ئىشقنىڭ دەرۋازىسىغا
دىلبىرىم ساڭا ئوردا سېلىنسۇن.
ئاياراي نەدە، قالدى كەشلىرىڭ،
ياستۇق جۈپلىشىپ، روجەك يېپىلسۇن.
جىگدىلىكلەردە قالغان رومىلىڭ
چۆچەكلەردىكى قىزدا تېپىلسۇن.
ئاسمان يېپىنچا، تۇپراق سېلىنچا،
بىر غېرىچ يەرگە تەخت قويۇلسۇن.
يۇلتۇز كۆزىنى يۇمسۇن بىر دەمگە
ئىشق كەۋسىرى تۈنگە قويۇلسۇن.
چالاي مەشرەپنىڭ ساپايسىنى،
شوللىرىدىن غەزەل تىترىسۇن.
قاراقاشلىقتىن سوراي بىر قوغۇن
ئىككى تەڭگەمنىڭ نەرخى سۆزلىسۇن.
زامان-زامانە كەلسۇن تىرىلىپ،
نوھنىڭ كېمىسى كۆككە ئۆرلىسۇن.
قول بولۇپ ئۆتەي تۈشەكلىرىڭدە
چانسام ئەزىزىم زېمىن چانىسۇن.
گۇلاب سېپىلگەن قولياغلىق تۇتاي،
تەشتەكلىرىڭدە گۈللەر ئاينىسۇن.
ئاسايلى قازان تاش ئوچاقلارغا
كۈنلەر كۈلۈشۈپ خۇشال قاينىسۇن.
بۇلاقلىرىڭدىن ئالايلى زەمزەم
تۇپراقلىرىڭدا بۇغداي گۈللىسۇن.
تومۇزدا بىللە تىپەيلى خامان
ئىتەكلىرىڭدە شامال سۇيلىسۇن.
توغراقلىرىڭغا بېرەيلى مىڭ ياش،
مىس قوڭغۇراقلار چۆلنى كۆيلىسۇن.
كىرورەن، مىران تورسۇن ئورنىدىن
تەكلىماكاننىڭ كۆڭلى يايرىسۇن.
تۇپراقتىن ئالاي پەقەت بىر سىقىم،
يىلتىزلىرىڭنى سۇغدىن قوغدىسۇن.
سادىر، نۇزۇگۇم تۇرسۇن يېنىڭدا
كۈلكىلىرىمدىن روھىم پارلىسۇن.
قاشالىرىڭنى چىتلا ئېرىنمەي،
خىياللىرىڭغا شامال كۆنمىسۇن.
بىر ماھىدۇرسەن تۇرغان تەلمۈرۈپ
رىشتىڭ مېنىڭدىن كۆڭۈل ئۈزمىسۇن.
«ئىزگۈ تور ئەدەبىياتى»مۇكاپاتىغا تەۋسىيە قىلىنغان ئەسەر
بۇ يازمىنى ئاخىرىدا Erchin تەھرىرلىگەن. ۋاقتى 2016-1-7 10:49
|
ۋاقتى: 2016-1-7 10:39:05
ئىگىسى
