ئۇيغۇرىيە: چۆكىمەن ھەم كۆيىمەن

چۆكىمەن ھەم كۆيىمەن

نەسرلەر


گۈلبانۇم ئابابەكرى

1

سېنى چاقىردىم ...
يەتتە ئوكيان يىراقلىقتىكى بىر يەردىن.
تاشتىن ئوت چىقاردىم،قولۇمدا قۇپ-قۇرۇق تاش قەدەھلەر.
كەينىمگە قارالمىدىم،سانسىز سۇئال، ئۈندەش بەلگىلەر...

ئەي ۋاقىت چەمبىرەكلىرى،  سەندىن ھالقىيالمىدۇق.
بىزنىمۇ ئېلىپ كەتسەڭچۇ؟

فىرانسىيە ئېفېرىل چوققىللىرىغا،توكيو مەھەللىرىگە،
گوللاندىيە دېڭىزلىرىغا...
شىكىسپىر، رۇمى يۈرگەن جايلارغا...
كۈتۈش، زارىقىش گۈللىرىمنى  چۆرىۋەتتىم.
ئەي كائىنات قارا  بوراندەك بىرمۇ -بىر ۋاراقلاپ
قات-قېتىڭغا چۆكىمەن بۈگۈن.
ئەي ماگما قايناملىرى،ساڭا كۆمۈلۈپ سەن بىلەن تەڭ
كۆيىمەن بۈگۈن...
بۈگۈن ئەنە ئاشۇنداق كۈن !!
2
بىر تامچە سۇ ئىدىم. مەندە نە  كېلىمات بولسۇن؟
قۇياشسىز قارا سايىدا ئېچىلغان بىر تال گۈل ئىدىم.
مەندە نە چىمەن خەندانلىرى بولسۇن؟
ئەي قەلبىم ئىستىرىلكىسى سېنى ھامان ئاسارەتسىز رېتىم
دولقۇنلىرىغا ئېلىپ چىقىمەن !
قوشىۋەتتىم...
ھەممىنى قوشىۋەتتىم.
كۆڭۈل ۋاقىتلىرىمنى دۇنيا ۋاقىتلىرىغا،
ئۆزۈمنى ساڭا...
3

ئاياللىق سەرسانلىقىدا كېتىپ بارىمەن.
بىلگەندىكى بىلمەسلىك،سۆيۈشتىكى سۆيۈلمەسلىك،،ئۆلۈشتىكى ئۆلمەسلىك...
مەئىشەت قىرغاقلىرىدىن رىيازەت دېڭىزلىرىغا غەرق بولىۋاتىمەن.
رىيازەت نەدە؟
سەن سۆيگەن نەرسىلەردە...
قوشىۋەتتىم...
ھەممىنى قوشىۋەتتىم .
كۆڭۈل ۋاقىتلىرىمنى دۇنيا ۋاقىتلىرىغا،
ئۆزۈمنى ساڭا!                                          
                           

2016-يىل .  يانۋار

بۇ يازمىنى ئاخىرىدا   Erchin تەھرىرلىگەن. ۋاقتى  2016-1-2 00:58  

ياخشى يىزىپسىز ، ئەسەرلىرىڭىز ئۇزۇلمىسۇن .

ﺋﻪﻱ ﻛﺎﺋﯩﻨﺎﺕ ﻗﺎﺭﺍ  ﺑﻮﺭﺍﻧﺪﻩﻙ ﺑﯩﺮﻣﯘ -ﺑﯩﺮ ﯞﺍﺭﺍﻗﻼﭖ
ﻗﺎﺕ-ﻗﯧﺘﯩﯖﻐﺎ ﭼﯚﻛﯩﻤﻪﻥ ﺑﯜﮔﯜﻥ.

بۇ جۈملە ماڭا ئىنتايىن تەسىر قىلدى .

مەندىكى ئىككى ئايال

چىكىندىم ،شەكىل ۋارۋارلىرىدىن چىكىندىم.
ئاياللىق دەشتلىرىمدە ئوبراز رەققاسلىرىدەك ئۇسۇلغا چۈشۈپ
كەتتىم.ماڭا دەخلى قىلماڭلار ئەي دەشت بورانلىرى...
سىلەر بىر تال چېچىمنى دەل مۇشۇ يەرلەردە ئېلىپ قاچقان !
ئاشۇ دولقۇنمسىمان بىر تال چاچ بىلەن يەنە بىر ئاياللىق
كۆرۈنمەس دەشت بوشلۇقلىرىدا قالغان.
مەندىكى ئىككى ئايال ،ئىككى ئىديە...
ھايات ئوربىتسىدا چاچلىرىنى چىشلەپ تۇرۇپ بىر-بىرىگە
قىلىچ ئۇرغان .
يېڭىلىق قىرغاقلىرىغا  زامان سۇئاللىرىنى تاشلاپ قويغان...

فەنا ناخشىللىرى


ئالدىرىمىغىن، مېنى مۇشۇ يەردە بىردەم ساقلا ! بىر ئىسىل
ناخشا ئاڭلىدىم.
مەن بۈگۈن قايتا تۇغۇلىمەن...
مېنى تەرىقەت بىلەن گۈل چەككەن مەرىپەت كۆرپىللىرىگە
يۆگەڭلار!
ھەق مۇقاملىرى بىلەن ھەقىقەت ھوجرىللىرىغا ياتقۇزۇڭلار!
فەنا ناخشىللىرى بىلەن مەۋجۇدىيەت ئەينەكلىرىدىن ئۆز
ئەكسىمنى كۆرىمەن.
ھايات مەنالىرىنى بىلگىنىمدە باقىلىققا يول ئالىمەن...

شېئىر ۋە مەن

توختاڭلار ...
بۇ يەردە ھايات مۇشەققەتلىرىنىڭ  ئاڭلانماس ھەقىقەتلىرى
بار ئىكەن.خۇددى خەتەرلىك مىناغا يولۇقۇپ قالغاندەك
جىممىدە تۇرۇپ قالدىم.بۇ قورۇققىنىم ئەمەس .
ئېھتىيات مىزانلىرى مېنى شۇنداق قىلىپ قويغان ئىدى...
مېنىڭ شائىرلىقىم ئەسلى گۈللەرنىڭ ئاڭلانماس خەندانلىرىدا
ئىدى ئەمەسمۇ؟
ماتىماتىكا رەقەملىرى،خىمىيە تەڭلىمىللىرى كۈلۈپ كەتتى.
مەۋجۇتلۇق پەلسەپىسى، يوقلۇق نەزەريەلىرى مېنى چىڭ
قۇچاقلىدى.
شۇ كۈنى مەن ئۇپۇق كەينىدىكى لالىرەڭ بۇلۇتلارغا
ئايلىنىپ كەتتىم.
ئاتمۇسفىرا ھەر سىققىنىدا مېنى ئانا زىمىنغا  لالىرەڭ شېئىر
بولۇپ تۆكىلىمەن.
سىقىش، سىقىلىش -سېنى قوبۇل قىلىمەن!

نەسرلىرىڭىزنى ئوقۇۋاتقان ھەر بىر دەقىقىلىرىمدە قەلب تۇيغۇلىرىمنى تەسۋىرلەپ بەرگۈسىز بىر

ھاياجان  ئورىۋالىدۇ،نەقەدەر گۈزەل ،نەقەدەرچوڭقۇر مەنالارغا باي جۈلىلەر بۇ ئۇيغۇريە؟

قەلەم تۇلپارىڭىز ھارماي يۇقۇرى پەللىلەرگە چاپسۇن،ئەزىز تېنىڭىز سالامەت بولسۇن

گۈلۈم!!!

گۈلبانۇم نەسىرلىرىڭىزنى بەكلا ياقتۇردۇم. «تۇرپان» ژورنىلىدىكى «مەجنۇن دەرىخى» ناملىق شېىرىڭىزنىمۇ  كۆچۈرۋالدىم.   ئىجادىيەتلىرىڭىزگە يېڭى پەللە تىلەيمەن. بۇ يازمىنى ئاخىرىدا   DILQIN تەھرىرلىگەن. ۋاقتى  2016-1-2 20:06  

گۈزەللىك مۇشۇ يەردە

موزدۇز  نەچچە كۈن ۋاقىت سەرپ قىلىپ تىككەن بىر جۈپ چىرايلىق ئاياقنى ئىككى قوللاپ ماڭا سۇنغىنىدا رازىمەن  كۆزلىرىم نۇقسانسىز ئاياقتىن ھالقىپ ئۇنۇڭ يىرىك قارىداپ كەتكەن  قوپال قوللىرىغا تىكىلدى.بۇ خۇددى يۈز يىل ئىلگىرىكى ئىسىلزادە خېنىملارنىڭ لەرزان قەدەملەر بىلەن بەزمىخانىلارغا كىرىپ كەتكىنىدە سېرتتا ئۇلارنى شۈمشىيىپ ساقلاۋاتقان نامرات رېشىكچىلارنى ئەسلىتىدۇ.گۈزەللىك بىلەن گۈزەللىك ياراتقۇچىللىرى،ئىنسان بىلەن تەڭرى،تەڭرى بىلەن ئىنسان ئوتتۇرسىدا مەڭدەپ گۈزەللىك پەردىللىرىنى قايرىپ ئاچقىنىمدا ئىختىيارسىز تەڭرىگە ھەمدۇ-سانا ئوقۇدۇم.                        
شۇنداق گۈزەللىكلەر باركى،قاراڭغۇلۇق ئىچىدىن  يۇرۇقلۇقنى   بايقىغاندەك ئۇلار بايقاشقا مۇھتاج!                              
                                                        

ئاخىرقى چىكىت


قېنى ساپ ۋاقىتلىرىم؟
خاس قوللىرىمدا سېنتىزلەپ سۈزۈپ ئالالمىدىم.
قېنى راستچىل ،سەمىمىي سۆزلۈكلەر ؟
ھەممە دوسلۇق پەردىسىنى يېپىۋەتتى.
ئۆزۈمنىڭ گېپى بىلەن ئۆزۈمنى ھاڭغا ئىتتىرۋەتتى.
ھەي ئەپكا ۋاقىت،ئەپكا پاراڭلار...
قەبرەم چىكىتلىرى باغانسىرى يېقىنلاپ كەلمەكتە.
غەپلەت توپانلىرىدىن، چەمبەر قورشاۋلىرىدىن قاچتىم.
چىكىت، ئەي ھەسرەتلىك چىكىت...
سانسىز سۇئال ،ئۈندەش بەلگىللىرىم بىلەن ھارغىن روھىمنى ھاپاشلاپ، چىلىق -چىلىق قان ئىچىدە ئالدىڭغا  
بارىمەن.                                                   
ساڭا ئەل بولماسلىققا نىمە ھەددىم؟؟
سۈزۈك ئېقىن سۇلار بويىدا ياتىمەن...
مېنى ھېچكىم ،ھېچ ئىنسان تۇنۇمايدۇ.يوقلاپمۇ كەلمەيدۇ.
ئېقىن سۇلاردىن  پانىلىقنىڭ دەۋران شاۋقۇنلىرىنى ئاڭلاپ
ئەسىر-ئەسىرلەپ ئەنە ئاشۇنداق ياتىمەن.

ئەسسالامۇئەلەيكۇم! گۈلبانۇم‹ئىككى ئايال›دىن روھىڭىزدىكى زىدىيەتلىشىشنى كۆردۈم، بۇ زىدىيەتلىشش سىزنى تېخىمۇ چوڭقۇر تەپەككۇرغا باشلايدۇ، ئاخىرى سىز بۇ ئىككى ئايال ئوتتۇرىسىدا ھەقىقىي ئۆزىڭىزگە ئايلىنىسىز...نەسىرلىرىڭىزدىن گۈلبانۇمنىڭ ئاۋازىنى ئاڭلاۋاتىمەن، بۇ ئاۋازلار ئاخىرى سىزنى يېراق-يىراقلارغا ئۇزىتىدۇ...
پەلسەپە كىتابلىرىنى كۆرىۋاتقىنىڭىز نەسىرلىرىڭىزدىن بىلىنىپ تۇرىدۇ، لېكىن بەزى جايلاردا پەلسەپىۋى ئاتالغۇ، سۆزلەر مەجبۇرىي كىرىپ قالمىسۇن...ئۇ تەبىئىي رەۋىشتە تۇيغۇلىرىڭىزدىن ئىپادىلىنىپ چىقسۇن...

بۇلاق سۈيىدەك سۈزۈك تەپەككۇر ئالىمىڭىزگە ھەممىمىز  ھەۋەس قىلىمىز....

« قۇياشسىز قارا سايىدا ئېچىلغان بىر تال گۈل ئىدىم.
مەندە نە چىمەن خەندانلىرى بولسۇن؟ »

مۇشۇنداقلا يازسىڭىز سىزدىمۇ بولىدۇ ، ئۇ خەندانلار. نەسرى شېئىرلار توختاپ قالمىسۇن.

file:///C:/Users/Administrator/Desktop بۇ يازمىنى ئاخىرىدا   ئارزۇ@ تەھرىرلىگەن. ۋاقتى  2016-1-3 21:11