پولات: مەن قاچانمۇ دادا بولارمەن(ھىكايە)

polat · ۋاقتى: 2015-12-28 15:37:00


	مەن قاچانمۇ دادا بولارمەن... (ھىكايە) پولات ۋىلاخۇن ئىلى بۇرنىنىڭ ماڭقىسىنى توختىماي تارتىپ،بېشىنى كۆتەرمەي تاپشۇرۇق يېزىۋاتقان سۈبھى ئېقىپ چىققان ماڭقىسىنى بۇ قېتىم يېڭىگىلا ئەتتى. ـــ قولياغلىقىڭ قېنى؟ ـــ ۋايتاڭەي... ـــ دىدى سۈبھى ھېچ ئىش بولمىغاندەك. ـــ قارا يېڭەڭگە،پاسكىنا قىلىۋەتتىڭ.ساۋاقداشلىرىڭ كۆر سە زاڭلىق قىلمامدۇ... ـــ ئەنسىرەمنى بالىلار‹‹ماڭقا››دەپ زاڭلىق قىلىدۇ.ــ دى دى سۈنھى مەكتەپتىكى ئىشلار ئېسىگە كېلىپ،ئۆزىچە كۈلۈپ، ـــ ئۇ قىزنىڭ بۇرنىدىكى ماڭقىسى ئېقىپ ئاغزىغا كىرىپ كېتەي دەيدۇ.ـــ دىدى ئۇ قولى بىلەن كۆرسىتىپ. ـــ بولدى،ئادەمنىڭ‹‹ئۆھى››سىنى كەلتۈرمەي،ئۆزەڭنى بىل.قانداق،تاپشۇرۇقىڭنى يېزىپ بولدۇڭمۇ؟ ـــ ياق.ئەجەپ زېرىكتىم بۇ تاپشۇرۇقتىن... ـــ ئوقۇغۇچى دېگەنمۇ زېرىكەمدۇ،تاپشۇرۇق ئىشلىمىسەڭ دەرسلەردە ناچار بولۇپ قالىسەن،كېيىن يۇقۇرى مەكتەپلەردە ئوقۇيالماي دېخان بولىسەن. ـــ دىدى دادىسى ئۇنىڭغا تەنبىھ بېرىپ.سۈبھى دادىسىنىڭ ئۆز يېنىدا خاتىرجەم ھالدا سۇنايلىنىپ يېتىپ تىلۋۇزۇر كۆرۋاتقانلىقىغا قاراپ: ـــ دادا،سەن نېمىشقا تاپشۇرۇق ئىشلىمەيسەن؟ـــ دەپ سورىدى. ـــ مەن ساڭا ئوخشاش ئوقۇغۇچى بولمىسام. ـــ دەپ قىسقىلا جاۋاپ بەردى دادىسى كۆزىنى تىلۋۇزۇردىن ئۈزمەي. ـــ نېمىشقا ئوقۇغۇچى ئەمەس؟... ـــ دىدى سۈبھى بۇر- نىنى تارتىپ،قېرىندىشىنى جوزىغا سۈركەپ ئويناپ. ـــ مەن دېگەن ھازىر چوڭ ئادەم.سېنىڭ داداڭ. ـــ دادا بولسا تاپشۇرۇق ئىشلىمەمدا؟... ـــ ھەئە. ـــ دىدى دادىسى پەرۋاسىزلىق بىلەن. ـــ ئەمىسە مەن قاچانمۇ دادا بولارمەن... ـــ نېمە!؟ـــ بۇ گەپنى ئاڭلىغان دادا يېنىچە ياتقان يې- رىدىن بۇرۇلۇپ بالىسىغا قارىدى.ئۇ بالىسىنىڭ بۇ گېپىگە يە كۈلۈشىنى،يە ئاچچىقلىنىشىنى بىلەلمەيۋاتاتتى.دادا بالىسىنى بۇ گەپنى نېمە ئۈچۈن دېگەنلىكىنى بېلىپ بېقىش مەقسىتىدە كوچىلاپ سوراشقا باشلىدى. ـــ ھازىر نېمە دېدىڭ؟ئاڭلىماي قاپتىمەن. ـــ سورىدى دا- دا قەستەن بالىسىدىن. ـــ مەنمۇ قاچان ساڭا ئوخشاش دادا بولارمەن. ـــ دەپ جاۋاپ بەردى سۈبھى ھېچ ئىش بولمىغاندەك بۇرنىنى تارتىپ. ـــ سەن تېخى كىچىك تۇرساڭ. ـــ كىچىك بولسام نېمە بوپتۇ.مانا ھازىر مەن چوڭ بولۇپ كەتتىمغۇ. ـــ بالا ئورنىدىن دەس تۇرۇپ،ئۆزىنىڭ چوڭ بالا بولغانلىقىنى بويى ئارقىلىق كۆرسىتىپ قويدى. ـــ سەن دادا بولۇشنى نېمىشقا ئويلاپ قالدىڭ؟... ـــ مەن دادا بولسام ساڭا ئوخشاش تاپشۇرۇق ئىشلىمەي دىيەنشى كۆرۈپ ياتاتتىم-دە. ــــ دىدى سۈبھى دادىسىغا قاراپ .ئۇنىڭ كۆزىدىن بالىلىقنىڭ تولىمۇ سەبىي،ئوماق نۇرلىرى چاقناپ تۇراتتى.دادىسى نېمە دېيەرىنى بىلەلمەي قالدى.بالىسىنىڭ ئالدىدا تۇرۇپلا ئۆزىنى تولىمۇ گۇناھكاردەك خىجىللىق ھىس قىلىپ قالدى ـــ زېرىككەن بولساڭ بىردەم ئارام ئال،دادا بولۇشقا ئال- دىرما بالام... ـــ دادا ئوغلىنى باغرىغا چىڭ باستى. بۇ يازمىنى ئاخىرىدا Erchin تەھرىرلىگەن. ۋاقتى 2015-12-29 17:41

polat · ۋاقتى: 2015-12-28 15:41:44


	بالىلىرىمىزنىڭ تاپشۇرۇق يۈكىنى يەڭگىللىتىپ،ئۇلارغا كۆپرەك ئۆزىگە قېنىۋىلىش پۇرسىتى بېرەيلى.

شېرىن1 · ۋاقتى: 2015-12-29 11:54:05


	سۇبھى دېسە قىز بالا ئوخشايدۇ دەپتىمەن . مېنىڭچە بالىنىڭ سۆزىدىن دادىسى خىجىللىق ھېس قىلدى دېگەننى باشقىچەرەك قىلىپ ئۆزگەرتكىلى بولماسمۇ ؟

داڭگال · ۋاقتى: 2015-12-29 11:55:50


	بۇ بىر يۇمۇردەك قېلامدۇ-نىمە؟

ئايشەم1 · ۋاقتى: 2015-12-29 19:54:02


	.ئۇنىڭ كۆزىدىن بالىلىقنىڭ تولىمۇ سەبىي،ئوماق نۇرلىرى چاقناپ تۇراتتى.دادىسى نېمە دېيەرىنى بىلەلمەي قالدى.بالىسىنىڭ ئالدىدا تۇرۇپلا ئۆزىنى تولىمۇ گۇناھكاردەك خىجىللىق ھىس قىلىپ قالدى ـــ زېرىككەن بولساڭ بىردەم ئارام ئال،دادا بولۇشقا ئال- دىرما بالام... ـــ دادا ئوغلىنى باغرىغا چىڭ باستى. قىسقا تىلى ئۇچۇق ياخشى يېزىلىپ، بالا ھەقىقەتەن تاپشۇرۇقتىن زىرىكىپتۇ، چۈنكى بالىدا بېسىم باركەن بۇ يازمىنى ئاخىرىدا ئايشەم1 تەھرىرلىگەن. ۋاقتى 2015-12-29 19:58

ئەركمان · ۋاقتى: 2015-12-30 13:58:58


	ھېكايە، پوۋېست، رومان دېگەننىڭ تىلىنى قاتتىق تاۋلاش لازىم! «بۇرنىنىڭ ماڭقىسى» بىسمىللاھسىدىلا چۇۋۇلۇپ كېتىپتۇ، يەنە كۆزنىڭ، ئېغىزنىڭمۇ ماڭقىسى بولامدا؟ بۇ يازمىنى ئاخىرىدا ئەركمان تەھرىرلىگەن. ۋاقتى 2015-12-30 13:59

ئىپپار · ۋاقتى: 2015-12-30 14:38:49


	ئالدىرمىسىڭىز ئەتىلا دادا بولىسىز ئۇكام .

uygurya · ۋاقتى: 2015-12-30 19:14:01


	ھېكايىنى ئوقۇۋىتىپ ئەلى قۇرباننىڭ بىر سۆزى ئىسىمگە كېلىپ قالدى. «تىزگىنەكنى تۇتۇپ تۇرۇپ كۆزىمىز تىلىۋىزوردا بالىلارغا تاپشۇرۇقنى ياخشى ئىشلە دىمەيلى. بىر كىتاپنى تەتۇر تۇتىۋالساڭمۇ كىتاپ كۆرگەن سىياقتا ئولتۇرۋال»

polat · ۋاقتى: 2015-12-31 13:18:57


	ئەركمەن ئەپەندىمنىڭ بەرگەن تەلىمىگە رەھمەت.باشقا تورداشلارنىڭ كۆڭۈل بۆلگۈنىگىمۇ كۆپ رەھمەت.

polat · ۋاقتى: 2015-12-31 13:19:15


	ئەركمان ئەپەندىمنىڭ بەرگەن تەلىمىگە رەھمەت.ئەسلىدە«ماڭقىسى»دەپلا ئالساممۇ بولاتتىكەن. باشقا تورداش دوستلارنىڭ كۆڭۈل بەرگىنىگە رەھمەت ئېيتىمەن.تىلنى تاۋلاشقا دىققەت قىلىمەن.