قەشقەردە 7-قېتىملىق «سۆي كىتاب سۆھبىتى» ئۆتكۈزۈلدى

        ئىختىيارىي مۇخبىرىمىز تاھىرجان ئاتاۋۇللا خەۋىرى، فوتوسى
    2015-يىلى 12-ئاينىڭ 19-كۈنى چۈشتىن كېيىن قەشقەر ئۇنۋېرسىتىتى يېنىغا جايلاشقان «كۆۋرۈك تىل تەربىيەلەش مەركىزى» كۆتۈپخانىسىدا «قەشقەر ۋىلايىتىنىڭ 7-قېتىملىق سۆي كىتاب سۆھبىتى بويىچە «كۆۋرۈك تىل تەربىيەلەش مەركىزىدىكى  پائالىيىتى» ئۆتكۈزۈلدى. ئەدىبلەر، سەنئەتكارلار، مەرىپەتپەرۋەر تىجارەتچىلەر،كارخانىچىلار ۋەكىللىرى ۋە ھەر ساھە زاتلىرى بولۇپ 120دىن ئارتۇق ئادەم قاتناشتى.
    پائالىيەت قەشقەر «سۆي كىتاب» جەمىئىيتنىڭ باش كاتىپى ئابلەت جۈمە تۇپراقنىڭ رىياسەتچىلىكىدە ئېلىپ بېرىلدى. ئابلەت جۈمە ئەپەندىنىڭ كىتاب ئوقۇشنىڭ خاسىيتى توغرىدىكى پاساھەتلىك سۆزلىرى سورۇن ئەھلىنىڭ قەلبىنى لەرزىگە سالدى. ئاندىن ئامىنىگۇل نۇرۇللا، ئاينۇر ئوسمان خانىم، مەرىپەتپەرۋەر كارخانىچى مۇختەر ئەمەت، ئابدۇكېرىم ھامۇق ھاجى قاتارلىقلار ئالدىنقى قېتىملىق پائالىيەتتە تارقىتىلغان «ئۈنۈمدار كىشلەرنىڭ يەتتە ئادىتى» ناملىق كىتابتىن ئالغان تەسىراتىنى ئوقۇدى. ئاندىن ئوسمان مۇھەممىدى قارا قۇتلۇق «ئابدۇرېھىم ئۆتكۈر ئەپەندىنىڭ قەشقەردىكى ئىككى تامچە يېشى» ناملىق ماقالىسىنى ئوقۇپ سورۇن ئەھلىنىڭ قەلبىنى لەرزىگە سالدى. ئاندىن ئاتاقلىق يازغۇچى ئابلا ئەھمىدى مەدىكار سۆزگە تەكلىپ قىلىندى. «سۆي كىتاب» سۆھبىتى جەمئىيىتىنىڭ رەئىسى ئابدۇكېرىم ھامۇق ھاجى ئۆزىنىڭ 80ياشقا كىرگەندىكى يازغان تۇنجى شىئىرىنى ئوقۇپ ئۆتتى. ئارقىندىنلا پائالىيەتنىڭ ئىككىنجى قىسمى بولغان «كۆۋرۈك تىل تەربىيەلەش كۆتۈپخانىسىنى قۇرۇش »مۇراسىمى ئۆتكۈزدى. مۇراسىمدا ئابدۇرېھىم قادىر ئەپەندى«كۆۋرۈك تىل تەربىيەلەش كۆتۈپخانىسى» توغرىسىدا چۈشەنچە بەردى. ئاندىن «سۆي كىتاب» جەمئىيىتىنىڭ رەئىسى ئابدۇرېھىم ھامۇق ھاجىم كۆتۈپخانا قۇرغۇچىسى ئېزىزجان ئەخمەتكە نام ئاتاق ئابىدىسى تەقدىم قىلدى. ئاندىن ئېزىزجان ئەخمەت ئۆزىنىڭ كۈتۈپخانا قۇرۇش جەھەتتىكى مەقسىدى، بۇندىن كېيىنكى پىلانلىرى ھەمدە جەمئىيەتتىكى ئوقۇرمەنلەرگە ھەقسىز ئېچىۋېتىلىدىغانلىقلىرىنى سۆزلەپ ئۆتتى. «سۆي كىتاب» جەمئىيىتى ئەزالىرى بۇ كۈتۈپخانىغا 2000پارچىدىن ئارتۇق كىتابنى ھەقسىز سوۋغا قىلدى  ھەم جەمئىيەت بۇ كۇتۇپخانىغا 6000يۈئەنلىك كىتاب ئېلىپ بېردىغانلىقنى، بۇندىن كېيىن  داۋاملىق تۈردە بۇ كۈتۈپخانىنىڭ كىتاب سانىنىڭ  10مىڭ خىلدىن ئاشقۇچە داۋاملىق ياردەم قىلدىغانلىقنى بىلدۈردى.
     پائالىيەت  ئاخىردا، جۇڭگو ئارزۇسى مېھرى شەپقەت فوندىنىڭ يېتەكچىسى ھاجى ھەبىبە تۇيغۇن ئاپاي سۆز قىلدى. بۇ ساخاۋەتچى مېھرىبان ئاپاينىڭ ھەر بىر جۈملە سۆزى سورۇن ئەھلىنىڭ يۈرىكىنى تىترەتتى. ئۇ يېقىنقى مەزگىلدە قەشقەردە بەش يەردە كۆتۈپخانا ئېچىشقا بىر مىليون ياردەم بېرىدىغانلقىنى بىلدۈردى. بۇ چاغدا ھەممەيلەن ئورنىدىن تۇرۇپ ئۇنىڭغا بولغان ھۆرمىتىنى بىلدۈردى.
   
   بۇ قېتىمقى پائالىيەتكە مۇناسىۋەتلىك بىر قىسىم كۆرۈنۈشلەردىن تاللانمىلار

























بۇ يازمىنى ئاخىرىدا   ARKZAT تەھرىرلىگەن. ۋاقتى  2015-12-20 11:29  

بۇ تولىمۇ ئەھمىيەتلىك پائالىيەت بوپتۇ!!!

كىتاب:- دۇنيادىكى ئەڭ چوڭ بايلىق خەزىنىسى.كىتاب ئۇ مەڭگۈ يۇقالماس ئەڭگۈشتەر. كىتاب ئۇ تارىخنىڭ ئىزناسى،شاھىدى،كىتاب ئۇ مەدەنىيەتنىڭ ئەڭ يارقىن جۇلاسى. كىتاب گەرچە قۇرۇق قەغەز بولسىمۇ،ئۇنىڭغا غايەت زور بايلىق ۋە بىلىم يۇشۇرۇنغان. ئابدۈشكۈر مۇھەممەتئىمىن ئەپەندى: كىتاب قىممەتلىك يۈكنى ئەجداتتىن ئەۋلاتقا يەتكۈزۈدىغان كېمە دەپ تۇلىمۇ توغرا ئېيتىقان.

     پاز : «ۋاقتىڭنىڭ بارىدا شاھانە كىتابلارنى ئوقۇۋال» دېسە، گوركى : «ھەر بىر كىتاب مەن ئۈچۈن بىر شوتا، مەن ئاشۇ شوتىلار ئارقىلىق يۇقىرى ئۆرلىدىم» دەيدۇ. دېمەك كىتاب ئىنساننى بەخت-سائادەتكە ئېرىشتۈرىدۇ.
      بۇ كىتاب ئوقۇش پائالىيىتىدىن خاسىيەتلىك ئېقىننىڭ ئايىغى ئۈزۈلۈپ قالمىغاي!

ئەڭ ئاستىدىكى سۆرەتتىكى ئاق چاچلىق ھەدىمىز كىم بولغىيدى؟ ئەجەبمۇ مېھرى ئىسسق ئايال ئىكەن.

كىتابسىز ئۆي زىمىستان كېچە.بۇ تولىمۇ ئەھمىيەتلىك پائالىيەت بوپتۇ.

‹كىتاپ ئادەمگە مەڭگۈ خىيانەت قىلمايدىغان ياخشى دوستۇر›!!   ناھايىتى ياخشى پائالىيەت بوپتۇ !!!!

جۇڭگو ئارزۇسى مېھرى شەپقەت فوندىنىڭ يېتەكچىسى ھاجى ھەبىبە تۇيغۇن ئاپاي

بۇنداق خەيرىلىك ئىشلار ئالتۇن ئۈزۈككە ياقۈت كۆز ياراشقاندەك ،قەشقەرگە يارىشىدۈ دېسە !
ئەزىزلەرنىڭ تېنى ئامان بولغاي!

شۇڭا چىرايىدا مېھرى-شەپقەتنىڭ نۇرى ئاپتابتەك پارلاپ كۆزۈمگە ئىسسق كۆرۈنگەن ئىكەندە. ھاياتى ئەھمىيەتلىك ئىشلارغا سەرىپ بولۇۋاتقان بۇ ئانىغا ھۆرمەت ئىپتىخارىم بىلەن سالام!

قەشقەر شەھرىدە ئۆتكۈزىلىۋاتقان مۇشۇنىڭدەك ئەھمىيەتلىك پائالىيەتلەر ئادەمنى ھەقىقەتەن سۆيۈندۇرىدۇ، يوللىغۇچىغا رەھمەت.