تىرىك: قاردا قۇشقاچ تۇتۇش

                                                              قاردا  قۇشقاچ تۇتۇش

                                                                  ( مىكرو ھېكايە )

                                                               تۇرسۇن تۇرەك تىرىك

    ئۇدا بىر نەچچە كۈن ياغقان قېلىن قار ھەممە يەرنى ئاپئاق تۈسكە كىرگۈزۋەتكەن    ئىدى. ماي يولىغا چۈشكەن قېلىن قارلار سوغۇقتا قېتىپ مۇزغا ئايلىنىپ،يوللار تېيىلغاق بولۇپ كەتكەچكە،قاتناش تارماقلىرى كىرا ماشىنلىرنىڭ يولۇچى تۇشۇشنى ۋاقتىنچە چەكلەپ قويدى.بىراق قۇمباغ يېزىسىدىكى تاكسىچى  ئا   xxقاتناش تارماقلىرىدا گېپى ئۆتىدىغان يۈلەنچۈگى بولغاچقا ، يېزىدىن ناھيە مەركىزىگىچە ئۈچ يۈەن ئالىدىغان يولغا ئون يۈەندىن كىرا ھەققى ئېلىپ بىخارامان مېڭىۋەردى.
     باشقا كىرا ماشىنلىرى بولمىغاچقا ،ئىشى بار يولۇچىلار پۇلنىڭ مېھرىدىن كەچتى.   تاكسىچى ئا   xx ئۈچ كۈنلۈك كىرا پۇلىنى سانىۋىدى 2000 كويدىن ئېشىپ كەتتى.ئۇنىڭ ئاغزى قۇلىقىغا يىتىپ قارغا مىڭ رەھمەت دىۋەتتى ھەم قارنىڭ ئۇزاقراق يېغىشىنى تىلىدى،لېكىن قار توختاپ ئۇنىڭ كۆڭلى ناھايىتى يېرىم بولدى،ئۇ بىر كىچىدىلا  ھەممە يەرنىڭ ئاپئاق قار بىلەن كۈمۈلۈپ كېتىشىنى تىلەيتتى،ئۇنىڭ تەلىيىگە بىر ھەپتىدىن كىيىن يەنە قېلىن قار ياغدى.قاتناش تارماقلىرى يەنە قاتناشنى  چەكلىدى.لېكىن بۇ <<ئامەت>>تىن گۈلقەقەلىرى ئېچىلىپ كەتكەن ئا xxيەنە بىخارامان مېڭىۋەردى.باشقا ماشىنلار سۈكۈتتە تۇرىۋەردى.بۈگۈن ئا   xx ئەتتىگەندىلا ناھيىگە جىددى بارىدىغان ئىككى يولۇچىنى 40 يۈەنگە كىرا قىلىپ ،تېيىلغاق يولدا  قۇيۇندەك يۈرۈپ كەتتى.تاكسى ئاچال كەنتىدىن ئۆتكەندە،يان تەرەپتىن ئىگىسىگە بويسۇنمىغان بىر ئىشەك ھارۋىسى ئىتتىك چىقىپ كەلدى ، ئا  xx رولنى بۇراپ تاكسىنى ھارۋىدىن قاچۇرغانىدى،بىراق مۇزدا ماشىننىڭ تورمۇزى شوپۇرغا بويسۇنماي،   ماشىننىڭ ئارقا تەرىپى ھەر تەرەپكە پىرقىراپ ئويلىمىغان يەردىن ئورمان بەلبىغىغا كىرىپ كېتىپ تىرەككە كاللا قويۇپ توختاپ قالدى.ماشىنىدىكى يولۇچىلار ئامان قالغان بولسىمۇ تاكسىچى ئا  xxنىڭ بېشى زەخمىلىنىپ ھۇشىدىن كەتتى.تىز   يۆتكەش،جىددى قۇتقۇزۇش ئارقىلىق ئا   xx ناھيەلىك دوختۇرخانىدا ھۇشىغا كەلدى.ئۇ ئەتراپىدا تۇرغانلارغا ئەلەڭ -سەلەڭ قارىغىنىچە دېدى.
-يەنە قار يېغىۋاتامدۇ؟
-ياق، قار توختىدى.
ئۇ يەنە ھۇشىدىن كەتتى.


بۇ يازمىنى ئاخىرىدا   ARKZAT تەھرىرلىگەن. ۋاقتى  2015-12-19 10:29  

  ئەسسالامۇ ئەلەيكۇم،  تىرىك ئەپەندى: يېڭى ئەسەرلىرىگە  مۇبارەك بولسۇن. مىكرو ھېكايە يېزىشقا خېلى دىتلىرى بار ئىكەن.   مەتبۇئاتلاردا  ئىلگىرىمۇ پات-پات مىكرو ھېكايىلىرىنى ئۇچرىتىپ تۇراتتىم. ھېكايە يېزىش ئاپتوردىن خېلى  يۇقىرى بەدىئىي ماھارەت تەلەپ قىلىدۇ. بۇلۇپمۇ،  ئۇنىڭدا ۋەقەلىكنى قانداق ئورۇنلاشتۇرۇش، يېشىمىنى قانداق بېرىش-ئەڭ ئاچقۇچلۇق مەسىلە. قارىماققا، ھېكايىدىكى ۋەقەلىك تۇرمۇش ئەمەلىيىتىمىزدىن بىر ئاز يىراقلىشىپ كەتكەن  تۇيغۇ بەرگىنى بىلەن، ئەمما پېرسوناژنىڭ خاراكتېرى نۇقتىسىدىن ئالغاندا، يەنىلا تۇرمۇش مەنتىقىسىگە ئۇيغۇن.

بۇ ھېكايە ھەققىدە  گەپ قىلماي تۇرالمىدىم، بىزدە ئۆلۈم ھازىسىغا كېتىۋېتىپ، ھازا  پەيدا قىلغانلار،  گۈزەل مەنزىلگە كېتىۋېتىپ، شوپۇرلارنىڭ شەخسىيىتى تۈپەيلىدىن  ئاخىرەتكە سەپەر قىلغانلار  ئاز ئەمەس.   بۇ شوپۇرلار يېڭى زاماندىكى   زامانىۋىي قاراقچىلاردۇر،   ئۇلار بىزنىڭ ئەتراپىمىزدا پىرقىراپ يۈرۈيدۇ.   ئاگاھ بولايلى.

بۈگۈن كەچتە  غالىبىيەت كەچلىك بازىرىنىڭ  مەلۇم ئاۋات كوچىسىدا   35ياشلاردىكى بىر ئايالنىڭ ( كېيىم -كېچەكلىرى رەتلىك،  رۇخسارى  چىرايلىق كەلگەن بىر ئايالنىڭ ) يولدىن ئۆتىۋاتقان  ماشىنىلارنىڭ ئالدىنى توسۇپ،  « بالامنى قايتۇرۇپ بېرىش» دەپ جار سېلىپ، تاش، چالمىلارنى ئېتىپ، ماشىنا چاقلىرىغا تېپىپ   ۋارقىراپ يۈرگەنلىكىنى كۆدۈم.   .نىھايەت.   «ماشىنىنى شۇنچە تىز ھەيدىگەن، ماشىنا كىراسى ھىسابىغا ئۆز غېمىنى غەملىگەن ئاشۇ ئادەملەرنىڭ  بۈگۈنكى كۈندكى زامانىۋىي قاسساپلاردىن نېمە پەرقى »دېگۈم كەلدى.  راستىنى ئېيتقاندا ئۇلارنىڭ شۇ قاسساپلاردىن نېمە پەرقى؟  

ئۇزۇن بوپتىكەن بىرەر تېتىملىق ھېكايە ئوقىمىغىنى... رەھمەت،قەلەملىرى تالمىسۇن!

ھېكايىدا ئىپادىلەنگەن مەزمۇن بەك ئېچىنىشلىق ئىكەن.

--يەنە قار يېغىۋاتامدۇ؟
-ياق، قار توختىدى.
ئۇ يەنە ھۇشىدىن كەتتى.
   - ياخشى يېشىم. مەن  بۇ مۇنبەرگە كىرىپ ئاپتورنىڭ قىسقا ھېكايىلىرىنى ئوقۇپ،ئىنتايىن خۇشال بولدۇم.مەنمۇ قىسقا ،مىكرو ھېكايە ھەۋەسمىنى.
    ھېكاينىڭ تىلى پىششىق،تېما بىلەن شۇنىڭغا مۇناسىپ ھەجىم،يەنى قۇرۇلما،ئەقلى يەكۈن خاراكتىرلىك يېشىم ھېكايىنى ھېكايە قىلىدىغان ھۈنەرلەر.قانداق يېزىشنى ئەمەس،قانداق ئاخىرلاشتۇرۇشنى بىلىش ھېكايىچىلىقتىكى قىيىن ھۈنەر.ھەم ھممىلا «يازارمەن»نىڭ قولىدىن كىلىۋەرمەيدۇ.بۇ چىنگىز ئايىتماتوۋنىڭ مۇھىم ماھارەتلىرىنىڭ بىرى. ئاپتورغا تېخىمۇ ئۇتۇق تىلەيمەن.