كۈيزار: خىلۋەتنامە

خىلۋەتنامە


( چاتما نەسىرلەر)


ئابلەت مۇھەممەد كۈيزار


1

قاشلىرىڭ قىيا،
كۆزلىرىڭ دۇنيا!
دېڭىزدەك چوڭقۇر قاراشلىرىڭغا چۆكمەكتىمەن.
قەلبىمدىكى بارچە دەرتلەرنى كەڭرى بوشلۇققا يېيىۋەتتىم. ئازگالغا ئايلىنىپ قالغىنى سۈكۈت قوراملىرىدا باستۇرۇلغان ئېيتىشقا تېگىشلىك ئېيتىلمىغان سۆزلەر...
پەسىللەر كەچكۈز دەرەخلىرىدەك سارغايغان، ئىشقى بىلەن سۈزۈك بەرگىدىن سۇلغان.
مېھرىڭنى چېچىۋەت جان روزىغارى، كۆزى ئوچۇق سۇلمىسۇن گۈللەر!
ئايدىڭلىرىڭنى يوشۇرما سەرسان كېچىلەر، تەمسىز لەۋلەشكەن خىلۋەتلەر ئاسىي سۆيگۈلىرىدىن پىغان قېيناقلىرىدا جان بەرسۇن!
سېغىنىش ئاشىيانىدا جىمىرلاپ تۇرغان ۋىسال يېلىنجاشلىرىنى شاماللار ئەركىگە قويۇۋەتتى. كۈنلەر گىريان ئۆركەشلىرىدە سۈر توقاي!
كۈتۈش- ئوت كەتكەن تەنھا قېيىق. ئوت ئۆچۈرگۈچى يىراقلاردا.


2015- 12- 12

چىرايلىق باشلىنىش بوپتۇ،قەلەم ھارمىسۇن!

مۇبارەك
بولسۇن ئىنىم  . تىرىشچانلىقىڭزغا  ئاپىرىن.

                   ئاخىرىقى جۈملە  ئۆز مەنىسى بىلەن ئۆز ئورنىنى تاپقان .  شۇنداق، ھەممىمىز ئاشۇ قېيىقتا.

بۇ نەسرىڭىزمۇ بۇرۇنقىلىرىغا ئوخشاش ياخشى چىقىپتۇ،تېخىمۇ بەرىكەتلىك بولغايسىز

ئىجادىيەتلىرىڭ ئۇتۇقلۇق بولسۇن، ئۆزۈڭنى ئاسرا.

قەلىمىڭىز ھېرىپ قالمىغاي!!!!

كۈتۈش- ئوت كەتكەن تەنھا قېيىق. ئوت ئۆچۈرگۈچى يىراقلاردا.
نەسىر مۇشۇ بىر جۈملە سۆز بىلەن ئۆز ئىپادىسىنى تېپىپتۇ.

خىلۋەتنامە (2)



قۇمدەك خىياللارغا غەرقمەن!
سۇلغان كۈنلەر رېزىق نېسىۋىلىرى ئ‍ۈچۈن تېپىرلىماقتا. بىغۇبار قۇياشنىڭ مېھرى بارچىلەر ئ‍ۈچۈن ئ‍ورتاق! ئ‍ايدىڭنىڭ پىنھان باغرى بارچىلەر ئ‍ۈچۈن كاتتا ئ‍ىلتىپات!
دەريانىڭ بەرقىدە ھاياتنىڭ گۈللىرى پۇرەكلىگەن. يوللار ئ‍ېتەكلىرىدە ئ‍ۈمىد كولدۇرملىرى جاراڭلايدۇ. ھەسرەت كۈچكە ئ‍ايلانماقتا. بەردەملىك تاغلىرىدا ئ‍ارمان بولبۇللىرى سايرايدۇ.
يىراق مەنزىل دەشتى ھېچنىمە ئ‍ەمەس! ۋاپا بىلەن سۆيۈلگەن دەملەر قەلبىڭنى چوغلاندۇرىدۇ. ئ‍ەقىدە بىلەن كەزگەن چۆللەر باغۇ- ئ‍ېرەم، خۇش ھىد لاۋۇلداپ تۇرغان گۈلزارىستانغا ئ‍ايلىنىدۇ. ئ‍ۈمىد لەۋ ياققان دەقىقىلەر گۈزەل پەسىللەرنى ئ‍ۇزۇن مۇساپىلەرگە يار قىلىدۇ!
تىرىك جان ئ‍ۈچۈن ھەربىر تېنىق نەۋباھار!
ھەربىر قەدەم بۈيۈك چوققا!
ھەربىر ئ‍وي يارقىن مەنالار بىلەن ھاياتنى بېزەپ، قەدىرلەشتىن بىشارەت!!
خىلۋەتلەردە گۈلخان بار!


2015- 12- 19

خىلۋەتنامە ( 3 )


قۇياش نۇرانە پارلىغان كۈنلەر ئ‍ۈمىدلىك جىمىرلىماقتا.
سېغىنىش چېچەكلىرى پۇرەكلىگەن يېگانە باغلاردا كاككۈك ناۋالىرى يۈرەكلەرگە چوغ تاشلايدۇ. نىگاھىڭ چوڭقۇرلۇقىدا مەھلىيا بولغان دەقىقىلەر گۈزەل پەسىللەرنى ۋىلىقلاپ كۈلدۈرگەن. قەلبىڭ بەتلىرى ئ‍وتلۇق قەسىدىلەر بىلەن پۈتكەن. كۆزۈڭ كەڭلىكى بىقارار كۈتۈشلەردە قىيادەك تىكىلەنگەن. يۈرىكىم ئ‍اراچلىرىنى مېھرىڭ بىلەن تولدۇر، غەم گۇگۇملىرى سۈبھىگە ئ‍ەقىدىسى بىلەن يۈكۈنسۇن!
ئ‍ىشىق جاڭگىلىدا سەرسان كېزىۋاتقان ئ‍اشىقلار غەيۇر، جۇدالىق دەشتىدە دەريادەك پىغان چىكىۋاتقان يۈرەكتە ئ‍ۆكۈنۈش يوق. مەمنۇنلۇققا چۈمكەلگەن بېغىشلىنىشلاردا يىمىرلمەس شىرىن ئ‍ىستەك جىرلايدۇ.
ئ‍اتەش دولقۇنلاردا ھايات شادىيانىسى بىمالال!
گۈلگۈن سەھەرلەردە كۈنلەرنىڭ بەرىكىتى مىڭ پارە بەخىت!!
خىلۋەتتىكى ھېكايىلەر كۈندۈز قىياقلىرىدەك پىچىرلىماقتا...!


2015-12-21

خىلۋەتنامە ( 4 )



سەن ئ‍امراق ئ‍المىلار مەي باغلاپ پېشتى. باغلىرىم سېنىڭ ئ‍اياغ تىۋىشىڭغا ئ‍ىنتىزار. قىزغىن گۈللەر سېنىڭ پۇراشلىرىڭغا خۇشتار.
ئ‍ۇزۇنغا سوزۇلغان يوللارنىڭ پايانىنى بويلاپ ھەممىمىز ئ‍ىلگىرلىمەكتىمىز. قەدەملەردە جاسارەت. يۈرەكتە ئ‍وتلۇق ئ‍ارمان! مەمنۇنىيەت بىلەن سىلجىشلاردا ئ‍ۆكۈنۈش يوق. شىۋېرغان چىلبۆرىدەك ھۇۋلىغان جۇدۇندا قورقۇنىچ يوق. دەرخلەردە قارشى ئ‍ېلىش ساداسى، كۆزلەردە مەنزىل تاماسى يالقۇنجىماقتا.
پەسىل قۇشلىرى چۇرۇقلىغان كۆك قەرىدە پەرۋاز كۈيى دىللارغا زوق بەخىش ئ‍ەتمەكتە.
خىلۋەتلەردە ئ‍وت بار، لاۋاسى زېمىننى چوغلاندۇرغان.
سىم- سىم قەترىلەردە سۈزۈك تىلەك بار، ھايات بەتلىرى نۇرانە مەنالار بىلەن يۈرەكلەرنى ئ‍ۈمىدكە تولدۇرغان.
قىيالارغا يامىشىۋاتقان قاناتلاردا چوققا مەۋجۇت ئ‍ەمەس! قاقاس ئ‍ېدىرلاردا چىغىر مۈشكۈلاتلىرى ئ‍ىرادىلەرنى سۇندۇرالماس.
يالىڭاچلىنىۋاتقان مەجنۇنتاللاردا ئ‍ىشىق بار! پىراقى پۈتكۈل تەبىئەتنى ئ‍ازاب گۈلخانلىرىغا قەھرى بىلەن تاشلىغان.
قىزىل گۈلنىڭ تىكەنلىرىدە ھەقىقەت، قانىغان يۈرەكلەردە شىرىن ئەستىلىك!!
ئ‍ايدىڭ كېچىلەر مۇھەببەتتەك تولغان خىياللىرى بىلەن خىلۋەتلەرنى چالغىتماقتا...   


2015- 12- 23

بىر -بىرىدىن لىرىك چىققان نەسىرلىرىڭىزنى سۈيۈنۈپ تۇرۇپ ئوقۇدۇم كۈيزار .

مېنى قوللاپ، يىتەكلەۋاتقان بارچە ئەزىزلەرگە كۆپ رەھمەت!