ئۇيغۇرىيە: سەنسىز

سەنسىز

گۈلبانۇم ئابابەكرى

رەھىمسىز ھەم سۆيۈملۈك پانىي جەڭگاھلىرىدا ،ياراتقۇچىنىڭ ئۇلۇغ سەنئەتكار قوللىرىدا نەپىس لاھىلەنگەن،بۈيۈك رەڭلەرگە چۆمكەلگەن ئاجايىپ سېھىرلىك مۇھەببەت گۈلى ئىدىم. ماڭا قىيا باققىنىڭدا،قوللىرىڭنى ھەر ئۇزاتقىنىڭدا پۈتكۈل جاھان گۈللىرىنىڭ رەشىك ھېدلىرى يوپۇرۇلۇپ كەلسىمۇ مۇشەققەت دەۋرانلىرىغا  كۈلىۋاتقان، تەڭرىگە ھەمدۇ -سانا ئېيتىۋاتقان،دەقىقە ئارام ئالماي خەندان قىلىۋاتقان ۋاپا گۈللىرىمگە يەتمەيتتى.
مېنىڭ كۆرگەنلىرىمنىڭ،ئاڭلىغانلىرىمنىڭ ھەممىسىدە سەن بار ئىدىڭ.
سېنىڭ كۆرگەنلىرىڭنىڭ ھەم ئاڭلىغانلىرىڭنىڭ ھەممىسىدە مەن بار ئىدىم.
كىچىككىنە يەر توزانلىرىدىن ئالەم چېكىگىچە،مەغرىپتىن -مەشرىققىچە...
ئاقۇش تىرناقلىرىم، چاچلىرىمنىڭ ئۇچىغا قەدەر سەن بار ئىدىڭ.

سەنسىز خار ،زەبۇن گۈللىرىمگە مەدھىيە ئوقۇيمەن.
ئەڭ گۈزەل شېئىر، مۇڭلۇق لىرىكا بولۇپ ئىجات ۋاراقلىرىمغا تۆكۈلىمەن!

ئېچىلسا مەيلى يوقلۇق ئۆڭكۈرلىرى .بىز ئەزەلدىنلا يوقلۇقتىن كېلىپ يوقلۇققا قايتقۇچى...
ئۆڭكۈرگە كىرىپ كەتتىم.بىرتال چېچىم يەنە ساڭا پاناھ تارتىپ ئۆڭكۈر سىرتىدا قالغان.
بىر تال چاچ...قۇدرىتىنى سەل چاغلىما ! ئۇ  كۈلۈپ تۇرۇپ ساڭا گىرە سالىدۇ.ساڭا كۆرسەتمەي تۇرۇپ يەنە  پانىي ياشلىرىنى سۈرتىدۇ.
قىش،ياز، باھار...ھەممىسى ئۆتۈپ كېتىدۇ .يەنە قايتىلىنىدۇ.
سەنسىز بۇ ھايات ئىككى بوغۇملۇق توپانىستان !
بۇ ھىكمەتنى پەقەت ئاشۇ بىر تال چاچلا بىلىدۇ . گەرچە، ئۇنۇڭ تىرىك جېنى بولسىمۇ ئاشۇ مۇھەببىتى بىلەن رەڭدار تۆت پەسىلگە ئەبەت دەپىن قىلىنىدۇ.دۇنيا ئەنە ئاشۇنداق زىتلىق بىلەن تولغان. لەرزان ئۇچۇۋاتقان خازان ياپراقلىرىدا، لەپىلدەپ چۈشۈۋاتقان ئاپپاق قارلار،تارسىلداپ چۈشۈۋاتقان  سۈزۈك باھار يامغۇرلىرىدا ،كاككۇك خەندانلىرىدا ...تالاي،تالاي سەنسىزلىكنىڭ دەردى ، مۇھەببەت لەرزىللىرى بار  ئەمەسمۇ؟
سەنسىز خار ،زەبۇن گۈللىرىمگە مەدھىيە ئوقۇيمەن.
ئەڭ گۈزەل شېئىر، مۇڭلۇق لىرىكا بولۇپ ئىجات ۋاراقلىرىمغا تۆكۈلىمەن!

2015- يىلى.قورغاس



بۇ يازمىنى ئاخىرىدا   Erchin تەھرىرلىگەن. ۋاقتى  2015-11-29 21:51  

كىچىككىنە يەر توزانلىرىدىن ئالەم چېكىگىچە،مەغرىپتىن -مەشرىققىچە...
ئاقۇش تىرناقلىرىم، چاچلىرىمنىڭ ئۇچىغا قەدەر سەن بار ئىدىڭ

يارايسىز  !

ئۇيغۇرىيە سىڭلىمنىڭ نەسىرلىرىدە ھىسسىيات بۇلدۇقلايدۇ ... ئايرىم جۈملىلىرى شېئىردەك ، نەسىرمۇ ماھىيەتتىن ئېيتقاندا شېئىردۇر ، سىزگە نۇرانە پەللە تىلەيمەن ...

ئاخىرقى ئابزاسلاردىن  تەسىرلەندىم.

ھاياجان ئىلكىدە «سەنسىز »لىككە چۆكۈپ كەتتىم،   

ئېچىلسا مەيلى يوقلۇق ئۆڭكۈرلىرى .بىز ئەزەلدىنلا يوقلۇقتىن كېلىپ يوقلۇققا قايتقۇچى...
ئۆڭكۈرگە كىرىپ كەتتىم.بىرتال چېچىم يەنە ساڭا پاناھ تارتىپ ئۆڭكۈر سىرتىدا قالغان.
بىر تال چاچ...قۇدرىتىنى سەل چاغلىما ! ئۇ  كۈلۈپ تۇرۇپ ساڭا گىرە سالىدۇ.ساڭا كۆرسەتمەي تۇرۇپ يەنە  پانىي ياشلىرىنى سۈرتىدۇ.


بۇ مىسرالار ئۈستىدە ئويلىنىپ قالدىم .
ئىنسان تېنى ماكاننىڭ ئىمكانيىتى بىلەن ئۆزگىچە شەكىلدە ماددىلىشىپ تۇرىدۇ . ئەمما ئىنسان ئۆلىمى ئۇنى يېڭى بىر ماددا شەكلىگە ئايلاندۇرىدۇ .
قەلب ئىككى دۇنياغا تەۋە . روھ دەل قەلبدىن ئۇچۇپ چىقىدۇ .
ئۆڭكۈرگە كىرىپ كەتتىم.بىرتال چېچىم يەنە ساڭا پاناھ تارتىپ ئۆڭكۈر سىرتىدا قالغان...
مانا بۇ قۇرلاردا  يۇقارقى ھاياتلىق ھېكمىتى چىرايلىق چاخناپتۇ ...
ئىنسان تۇيغۇسىدىن - روھى ھادىسىلەرنى ئىپادلەشتە يەنە بىر بالداق ئىلگىرلەش بار .
سىزنىڭ نەسىرچىلىك ىئجاديىتىڭىزنىڭ يۇقىرى پەللىگە يېتىشى ئۈچۈن ياخشى ئىمكانىيەت تىلەيمەن !

         راست، ھېسسىيات بۇلاقلىرى بۇلدۇقلاپتۇ. «نەسر» ئەنە شۇنداق ھېس-ھاياجاننىڭ مەھسۇلى. سىزگە قۇت ياغقاي، سىڭلىم !

بۇ قىز ئاخىرى بىر نىمە تىپىۋاپتۇ.

      ‹‹ سىم - سىم ئىشىكنى ئاچ ››..........

سىم -سىم ئىشىك قانداق ئىشىكتۇر؟

     لايىھە، نەپس، رەشك، ھىد، دەپن، ئۇچىۋاتقان، چۈشىۋاتقان، مەدىھىيە ،،، دەپ يېزىلسا بولاتتى.

رەھمەت .سىزگە يېتىشىش ئۈچۈن يەنە نۇرغۇنلىغان داۋانلارنى بېسىشقا توغرا كېلىدۇ. ئامان بولۇڭ !

كۆرسەتمىڭىزگە تەشەككۈر .قايتا كىرىپ تۈزىتەلمىدىم . خاتىرەمگە يېزىۋالدىم. ئەسلى نۇسخىسىنى چوقۇم تۈزىتىمەن.

دۇنيا ئەنە ئاشۇنداق زىتلىق بىلەن تولغان. لەرزان ئۇچۇۋاتقان خازان ياپراقلىرىدا، لەپىلدەپ چۈشۈۋاتقان ئاپپاق قارلار،تارسىلداپ چۈشۈۋاتقان  سۈزۈك باھار يامغۇرلىرىدا ،كاككۇك خەندانلىرىدا ...تالاي،تالاي سەنسىزلىكنىڭ دەردى ، مۇھەببەت لەرزىللىرى بار  ئەمەسمۇ؟

ياقتۇردۇم...

ئۇستاز،      «ئۇچۇۋاتقان، چۈشۈۋاتقان، مەدھىيە»   دەپ يېزىش توغرىدۇ؟