ماھى(ت): يوۋ جىن ـــــ پويىزدىكى ھېكايە

                                              پويىزدىكى ھېكايە


                                                ( ھېكايە )


                                                يوۋ جىن


مەن كەچتە گۇاڭجۇغا بارماقچى بولۇپ، گۇاڭدۇڭ ئۆلكىسىنىڭ جەنجىياڭ شەھىرىدىن پويىزنىڭ يۇمشاق كارىۋاتلىق بېلىتىنى سېتىۋېلىپ يولغا چىقتىم. پويىزگۇاڭجۇغا سەككىز سائەتتە يېتىپ باراتتى. جاھاندا زادىلا تونۇشلۇقى يوق ئادەملەر بىلەن
ھەمسەپەر بولۇشتىن ئارتۇق بىزارلىق ئىش بولمسا كېرەك. شۇنداقتىمۇ باشقا تاللىشىم بولمىغانلىقتىن، بارىغا شۈكۈر قىلماي بولمايتتى.
پويىزنىڭ ئىنتايىن تار ياتىقىغا كىرگەن ۋاقتىمدا،سۇس كۈلرەڭ ئېگىز ياقىلىق پوپايكىسى كۈلرەڭ ئىشتان-چاپىنىغا تولىمۇ ماسلاشقان، قارىغا بويالغان قىسقا چېچى ناھايىتى رەتلىك تارالغان، چاسا رامكىلىق كۆزەينىكى ئۇنىڭ خېلىلا تەربىيە كۆرگەن، مەدەنىي زىيالى ئىكەنلىكىدىن دېرەك بېرىپ تۇرىدىغان 60ياشتىن ھالقىغان بىر ئايال بار ئىكەن.
پاراڭلىشىش جەريانىدا، بۇ ئايالنىڭ گۇاڭجۇدىكى مەلۇم بىر پەننى خاراكتېرلىك ژورنالنىڭ باش مۇھەررىرى ئىكەنلىكىنى، نەچچە كۈن ئاۋال جەن جىياڭغا ماقالە ئالغىلى بېرىپ، ئىشنى پۈتتۈرۈپ، ئۆيىگە قايتىش سەپىرىدە ئىكەنلىكىنى بىلدىم. قىزىقىشىمىز ئوخشاش بولغانلىقتىن، ئوي-پىكىرىمىزمۇ بىر يەردىن چىقىپ، ناھايىتى ياخشى پاراڭلىشىۋاتاتتۇق، بۇ ۋاقىتتا پويىز ئىستانسىسىنىڭ مىكرافۇنىدىن:«يولۇچىلار دىققەت، يۇمشاق كارىۋاتلىق پويىز بېلىتىدىن يەنە نەچچە تال بار، سېتىۋالغۇسى بارلار تىزدىن سېتىۋېلىڭلار»دېگەن ئۇقتۇرۇش ئاڭلاندى. ئايال ماڭا قاراپ:
-بۇ ياتاققا ھېچكىم كىرمىسىكەن، تىپتىنىچ سەپەر قىلساق دەيمەن،-دېدى. بۇنى ئاڭلاپ، كۈلۈپ كەتتىم، چۈنكى مەنمۇ دەل مۇشۇنداق خىيال قىلىۋاتاتتىم. ئەمما ئارىدىن 10مىنۇتمۇ ئۆتمەي، ئارزۇيىمىز كۆپۈككە ئايلاندى.
بىر ئوتتۇرا ياشلىق ئايال يوغان چامادانىنى سۆرىگىنىچە ، پالاق-پۇلۇق ئاۋاز چىقىرىپ، ياتاققا كىرىپ كەلدى.
ئۇنىڭ بويى ئېگىز بولۇپ، بىر يۈرۈش تىۋىتلىق گۈللۈك كاتەكچە كىيىم كىيىۋالغانىدى. كىشىنىڭ دىققىتىنى ئۆزىگە تارتىدىغىنى بولسا، ئۇنىڭ قىزغۇچ سېرىق رەڭلىك يىپ پايپىقى بولۇپ، ئۇنىڭ ئىككى پۇتىنى ھەرىكەت قىلىۋاتقاندەك كۆرۈنىدىغان ئىككى تال قىزىل تۇرۇپقا ئوخشىتىپ قويغانىدى. ئۇ ياتاققا كىرىپلا يۇقىرى ئاۋازدا:
-ھەي، گۇاڭجۇغا قايتىشىڭلارمۇ؟-دەپ بىز بىلەن دوستانە سالاملاشتى. پىشقەدەم مۇھەررىر بېشىنى سەل-پەل لىڭشىتىپ قويدى. كۆزى بۇ ئايالنىڭ پۇتىدىكى قىزغۇچ سېرىق رەڭلىك يىپ پايپىقىغا چۈشكەندە، چىرايىدىكى ئاۋالقى كىچىككىنە تەبەسسۇممۇ پۈتۈنلەي غايىپ بولدى،ھەم  ۋاگۇننىڭ ئەسلىدىكى قىزغىن كەيپىياتى تىزلا مۈشكۈل ئەھۋالغا چۈشۈپ قالدى.
ئوتتۇرا ياشلىق ئايال يوغان چامادىنىنى مىڭبىر مۇشەققەتتە جايلاشتۇرۇپ بولۇپ، ئارقىدىن كارىۋاتتا ئولتۇردى. قولىدىكى سۇلياۋ خالتىنى ئېچىپ، ئىچىدىكى خىلمۇ-خىل ئۇششاق-چۈششەك يىمەكلىكلەرنى چىقىرىپ، تار ئۈستەلگە قويدى ۋە كۈلۈمسىرەپ:
-قېنى، تۈزۈت قىلماي ئېغىز تېگىڭلار،-دېدى. بىردەمدىلا تاتلىق، چۈچۈمەل، تۇزلۇق، ،ئاچچىق تەملەرنىڭ ھەممىسى بىر-بىرىگە ئارىلىشىپ، پۈتكۈل ۋاگۇننى قاپلىدى. پىشقەدەم مۇھەررىر چىرايىنى پۈرۈشتۈرۈپ، يۈزىنى تېزلا باشقا ياققا بۇرىۋالدى. ئوتتۇرا ياشلىق ئايال ھېچقانداق ئىنكاس قايتۇرمىغانلىقىمىزنى كۆرۈپ، كارى بولماي، ئۆزى بىر سىقىم گازىرنى ئېلىپ، ئادەمنى بىزار ھەم پاراكەندە قىلىدىغان يېقىمسىز ئاۋاز چىقىرىپ چېقىشقا باشلىدى. بىر تەرەپتىن گازىر چاققاچ، يەنە بىر تەرەپتىن گازىر شۈپىكىنى يەرگىلا تاشلىدى. بىردەمدىن كېيىنلا ھەممە يەرنى گازىر شۈپۈكى بىر ئالدى. بۇنى كۆرۈپ پىشقەدەم مۇھەررىرنىڭ چىرايى تېخىمۇ پۈرۈلدى.
پويىز قوزغىلىپ ئۇزاق ئۆتمەي، بېلەت تەكشۈرگۈچى كىرىپ كەلدى. بەلگىلىمىگە ئاساسەن ، ھەر بىر يولۇچى كىملىكىنى چىقىرىپ تەكشۈرتۈشى كېرەك ئىدى. مەن خەلقئارالىق پاسپورتۇمنى، پىشقەدەم مۇھەررىر كىملىكىنى چىقىرىپ تەكشۈرتتى. ئەمما ھېلىقى ئوتتۇرا ياشلىق ئايال ئۆزىدىن چوڭ سومكىسىنى بىر ھازاغىچە قايتا-قايتا ئاختۇرۇپمۇ كىملىكىنى تاپالمىدى. بېلەت تەكشۈرگۈچى ئۇنىڭغا كىملىك نومۇرىنى بولسىمۇ دەپ بېرىشنى ئېيتىۋېدى،ئۇ دۇدۇقلاپ دەپ بېرەلمەي:
-ئېسىمدە قالماپتۇ،-دېدى. مېجەزى ئوڭلۇق بېلەت تەكشۈرگۈچى بەك چىڭ تۇرۇۋالماي، چىقىپ كەتتى.
پىشقەدەم مۇھەررىر ئىككىمىز بىر-بىرىمىزگە قاراپ، كۆز بېقىشىۋالدۇق. بۇ «كېلىپ چىقىشى ئېنىق بولمىغان»ئايال ئىككىمىزنىڭ قەلبىدە بىر ئىز قالدۇرۇپ قويغانىدى. ئۈستى-ئۈستىلەپ يۈز بېرىپ تۇرىدىغان پويىزدىكى ئوغرىلىق ۋە بۇلاڭچىلىق دېلولىرى ئېسىمگە كېلىپ، ھەم سومكامدىكى نەچچە مىڭ ئامېرىكا دوللىرىنى ئويلاپ زادىلا خاتىرجەم ئولتۇرالماي قالدىم.
تەخمىنەن بىر چاي قاينىمى ۋاقىت ئۆتۈپ، پىشقەدەم مۇھەررىر تاقەت قىلىپ بولالماي، ئورنىدىن تۇرۇپ، ناھايىتى تېزلا چىقىپ كەتتى. ھېلىمۇ ياخشى تەكشۈرگۈچى تېخى بەك يىراقلاپ كەتمەپتىكەن. پىشقەدەم مۇھەررىر بىلەت تەكشۈرگۈچىگە:
-ياتىقىمنى ئالماشتۇرۇپ بېرىڭ. ھېلىقى كىچىكىپ كەلگەن ئايالنىڭ كىملىكى يوق ئىكەن، قانداق سالاھىيىتى بارلىقى تېخى ئېنىق ئەمەس. ھازىر جەمىيەت بەكلا بۇزۇلۇپ كەتتى. مېنىڭ بۇنداق تەۋەككۈل قىلغۇم يوق،-دەپ ئېتىراز بىلدۈردى. تەكشۈرگۈچى:
-باشقا ياتاقلار توشۇپ كەتتى. ئالماشتۇرۇش ئىمكانىيىتى يوق. پويىز بېلىتىى سېتىۋالغاندا ھەممەيلەن كىملىك ئىشلىتىپ سېتىۋالىدۇ، ئۇ ئېھتىمال ئائىلىسىدىكىلەرنىڭ كىملىكىنى ئىشلىتىپ بېلەت سېتىۋالغان بولۇشى مۇمكىن. ھېچقانداق مەسىلە چىقمايدۇ. بىرەر ئىش چىقىپ قالسا، ئىز قوغلاپ تەكشۈرگىلى بولىدۇ، خاتىرجەم بولۇڭ،-دېدى.
-ئىش چىقىپ بولغاندا ، ئىز قوغلاپ تەكشۈرسە، بەكلا كىچىكىپ كەتكەن بولمامدۇ،-دېدى پىشقەدەم مۇھەررىر ئاچچىقى بىلەن.
-ھېچقانداق چاتاق چىقمايدۇ، خاتىرجەم بولۇڭ،-دېدى تەكشۈرگۈچى سالماقلىق بىلەن.
بۇ ۋاقىتتا ئەتراپ ئىنتايىن جىمجىت بولۇپ، پىشقەدەم مۇھەررىر بىلەن تەكشۈرگۈچىنىڭ قىلىشىۋاتقان سۆزلىرى ياتىقىمىزغا ئىنتايىن ئېنىق ئاڭلىنىپ تۇراتتى. مەن سەل ئوڭايسىزلىنىپ، ھېلىقى ئايالغا قارىدىم. ئۇ سىرتتىكى گەپلەرنىڭ ئۆزى بىلەن قىلچە ئالاقىسى يوقتەك، ھېچ ئىش بولمىغاندەك ئولتۇراتتى.
يېرىم كېچە بولغاندا، پىشقەدەم مۇھەررىرنىڭ زىققا كېسىلى تۇيۇقسىز قوزغىلىپ قېلىپ، ھاسىراپ، نەپەس ئالالماي، بەكلا قىينالدى. ھېلىقى ئايال گەپمۇ قىلماستىن سومكىسىدىن تۇمان پۈركۈگۈچنى چىقىرىپ، پىشقەدەم مۇھەررىرنىڭ ئاغزىنى ئېچىپ پۈركۈدى. ئاندىن دورا مېيىنى سۈرتتى. چايدېنىدىن ئىسسىق چاي قۇيۇپ ئىچكۈزدى. خېلى ئۇزاق ھەپىلەشكەندىن كېيىن، ئاخىرى پىشقەدەم مۇھەررىر ئېسىگە كەلدى. ئۇ يەنە پىشقەدەم مۇھەررىرنىڭ يوتقىنىنى كۆڭۈل قويۇپ يېپىپ قويۇپ، ئاندىن ئۆزىنىڭ كارىۋېتىغا چىقىپ ياتتى.
ئۈستۈنكى كارىۋاتتا يېتىپ تۇرۇپ، بۇنىڭ ھەممىسىنى ئۆز كۆزۈم بىلەن كۆرۈپ، ھەم تەسىرلەندىم ھەم ئويغا چۆمدۈم. ھەي، كۆپ ۋاقىتلاردا «ئادەمنىڭ سىياقىغا قاراپلا باھا بېرىش»كە ھەقىقەتەن بولمايدىكەن جۇمۇ.
ئەتىگەندە بىرەيلەن ياتاق ئىشىكىنى چېكىپ، گۇاڭجۇغا يېتىپ بېرىشقا يەنە يېرىم سائەت بارلىقىنى، چۈشۈشكە تەييارلىق قىلىشىمىزنى ئۇقتۇردى.
پىشقەدەم مۇھەررىر ئىششىپ كەتكەن كۆزلىرىنى ئۇۋىلىۋېتىپ ئورنىدىن تۇرغاندا، ھېلىقى ئايال دەرھال:
-تۈنۈگۈن كەچتىكى خەۋەردىن شىمالىي قىسىمدىكى سوغاق ئېقىمنىڭ بۈگۈن جەنۇبقا سۈرۈلۈپ، تېمپىراتۇرىنىڭ كۆرۈنەرلىك تۆۋەنلەپ، تەخمىنەن 7-8سىلسىيە گرادۇسقا چۈشۈپ قالىدىغانلىقىنى ئاڭلىدىم. سىزنىڭ زىققا كېسىلىڭىز بار ئىكەن، سىرتقا چىققاندا پەلتويۇمنى كىيىۋېلىڭ. ئۆيۈمدىكىلەر ماشىنا بىلەن ئالغىلى كەلمەكچى. سىزنىمۇ ئۆيىڭىزگە ئاپىرىپ قويىمىز،-دېدى.
پىشقەدەم مۇھەررىرنىڭ يۈزى پوكاندەك قىزىرىپ كېتىپ:
-تۈنۈگۈن كەچتە سىزنى خاتا چۈشىنىپ قاپتىمەن، ئەپۇ قىلىڭ،-دېدى. ھېلىقى ئايال كۈلۈمسىرەپ تۇرۇپ:
-ھېچقىسى يوق، مەن ئەزەلدىن باشقىلارنىڭ ماڭا قانداق قارايدىغانلىقىغا پەرۋا قىلىپ كەتمەيمەن، چۈنكى ئۆزۈمنىڭ قانداق ئادەملىكىم ئۆزۈمگە ئايان،-دېدى.
بۇ ۋاقىتتا كۆزۈم ئىختىيارسىز نەملەشتى. بۇنىڭ ھاياتىمدىكى ماڭا ئۆتۈلگەن ئەڭ ياخشى بىر سائەتلىك دەرس ئىكەنلىكىنى ھېس قىلدىم.

    ( «ئوقۇرمەنلەر»ژۇرنىلىنىڭ 2014-يىللىق 23-سانىدىن گۈلباھار مۇھەممەد ماھى تەرجىمىسى )
  
بۇ يازمىنى ئاخىرىدا   ARKZAT تەھرىرلىگەن. ۋاقتى  2015-11-18 08:37  

لەيلىۋەش ئادەملەر  دىگەن قانداق ئادەملەردۇ؟

تەسىرلىك ھېكايە ئىكەن.ياخشى تەرجىمە قىپسىز.مەن مۇشۇنداق قىسقا ھىكايىلەرگە بەك ئامراق.ھىكايىدىكى تەسۋىرمۇ ئادەمنى قىزىقتۇرىدىكەن.

ئادەمنىڭ تۇرقىغا قاراپلا باھا بىرىش مودا بولغان ئۇشبۇ  كۈنلەردە ،ئ‍ادەمگە ئاگاھلاندۇرۇش بىرىدىغان ياخشى ئ‍ەسەركەن ، تەرجىمە بەك سىپتا چىقىپتۇ

دەسلەپتە بىر قانچە ئۇستازنىڭ ياردىمى بىلەن ئاشۇنداق ئالغان، كېيىن قايتا ئويلىنىپ ئۆزگەرتكەنىدىم،ئۆزگەرتىلگەن نۇسخىسى يوللانماي ئەسلىدىكى نۇسخىسى  يوللىنىپ كېتىپ قاپتۇ،ئۆزرىلىكمەن

ئوقۇپ خۇش بولدۇم، تەرجىمە ياخشى چىقىپتۇ.مۇبارەك بولسۇن!

       گۈلباھار، سىزنىڭ تەرجىمە سەھەسىدە ئۇتۇق قازىنىشىڭىزنى ئۈمىد قىلىمەن. ئاخىرقى پەللىگە ئاز قاپسىز، ئالغا ...!!!

ياقتۇرغىنىڭىزدىن سۆيۈندۈم ئايدانىش

سىزگە ئۇتۇق يار بولسۇن گۈلباھار «ئادرېسى يېزىلمىغان خەت» دېگەن تەرجىمىڭىزمۇ بەك ياخشى چىقىپتىكەن.

مۇشۇ يولدا زېرىكمەي تىرىشىڭ. بۇ يازمىنى ئاخىرىدا   ئەلتۇغ تەھرىرلىگەن. ۋاقتى  2015-11-19 20:30  

قىممەتلىك ۋاقتىنى چىقىرىپ ماڭا ئىلھام ۋە مەدەت بەرگەن بارلىق دوستلارغا رەھمەت بۇ يازمىنى ئاخىرىدا   گ.م.ماھى تەھرىرلىگەن. ۋاقتى  2015-11-19 20:37