پەرىدە ئىسمايىل مېھرى :ھايات

   
                 ھايات


         پەرىدە ئىسمايىل مېھرى


گاھى ئاپتاپ، گاھ شىۋىرغان ،گاھىدا شۇ قار ...ھايات،
ئۆلمىدىم ئۇندىن بەتەر بولدۇم ئۆلۈمگە زار ،ھايات،

كۈتمىشىم مەقبۇل ئەمەس ھەقدادىغا يەتمەي تېخى،
كۈلكە بىر  بولسا بەدەل تايلاپ بېشىمدا ھار، ھايات.

ئال سوراق ئەرزىم ئۈچۈن مەيلى سالار بولساڭ كاچات،
ئاچچىقى ھەم تاتلىقى بارغۇ  ئۆمۈرگە يار، ھايات.

يالت قىلىپ ئۆتسە ئۈمۈد باغرىمنى چەن قىلدىم ئاڭا،
چارىسى پۈتمەي تېخى كەلمەس ئىشىغا كار ،ھايات.

يۈرگىنىم يۈزدۇر خىيال دەرياسىدا لەكمىڭ ئېقىپ،
ئاغرىما ۋايساشلىرىم  دەردىمدە شۇنداق جار، ھايات.

تاشلىنىپ تىك ھاڭغا چۇل-چۇل سۇنمىقىم ئالەمدە بىر،
يوق يەنە جاندىن كېچىش! كەچسەم ماڭا ئۇ ئار، ھايات.

ئوڭ قولۇمدا زۇلپىقار چاقناپ جاسارەتتىن ئاتام،
قېپقىزىل  قانغا خىتاپ  يازغان ئاناممۇ بار، ھايات.

قانچە قىسمەتتە مېنى ئۆلتۈر، تىرىك كۆيدۈر ...قېنى!
سەن قىلالامسەن مېنىڭ روھىمنى بىر رەت  خار ،ھايات.


سەكرىدىم قايناملىرىڭ قاينار قازاندەك  بىرەھىم ،
مېھرى  تەيياردۇر ياساپ چاپقۇنلىرىڭغا  دار ،ھايات.


2015يىلى 5-ئۆكتەبىر،ئاتۇش بۇ يازمىنى ئاخىرىدا   ARKZAT تەھرىرلىگەن. ۋاقتى  2015-10-5 11:27  

گاھىدا شۇ قار ...ھايات
قازاندەك  بىرەھىم ،

ھايات كارتىنىسى ئوبدان سۈرەتلەنگەن غەزەل بوپتۇ. نۇسرەت سىزگە يار بولسۇن!

ئۆلۈم ۋە ھايات

                      مەخەت ئابدۇرېھىم

ئۆلۈرمىز ئاقىبەت بىر كۈن بۇنىڭدىن بىز قاچالمايمىز،
ئېشىپ كەتسەكمۇ لوقماندىن ئاڭا چارە تاپالمايمىز.

ئۆلۈم ۋەھىمە، ئۆلۈم جاللات،ئۇنىڭدىن قايغۇرار ھەممە،
خېرىدار ئىزدىسەك بەلكىم ئۇنى نېسى ساتالمايمىز.

ھايات قىممەت ،ھايات تاتلىق بىراق ئۇنىڭ چىكى باردۇر،
كېتىپ قالسا ئەگەر قولدىن، بىرىپ ئالتۇن ئالالمايمىز.

ئەگەر مەرگەن دېسەك تەننى، ئۆمۈر مىلتىق، ۋاقىت ئوقتۇر.
ئۇلارسىز يوق جاھاندا بىز ، ئۇلارسىز     ئوۋ      قىلالمايمىز .


جاھانغا شۇ سىياق كەلدۇق بۇنىڭغا ھەممىمىز قايىل،
ھايات قەدىرىنى بىلسەكلا تېخى مەڭگۈ ياشالايمىز.

قېنى كىم ياشىدى مەڭگۈ ؟ دىگەن سۇئال سورالسا گەر،
ئېچىپ تارىخنى ۋاراقلاپ دەلىل-ئىسپات تاپالايمىز.

بوۋام مەھمۇد، فارابىدەك ئىجادكارلار مىسال بىزگە،
بۈيۈك ئىلھام بولۇر بەرھەق ، شۇڭا مەغرۇر ياشالايمىز.

ياشايلى ئەي ئېزىز دوستلار، ئىجاد-ئەمگەكنى يار ئەيلەپ،
ئۇنىڭ بىلەن گۆھەر قازساق شۇچاغ ئۆلمەس بولالايمىز.         

نېمىشقىكىن، ئاياللار ئىچىدە غەزەل يازىدىغانلار كۆپ ئەمەسكەن،  ئەمما بۇ شىئېر راۋۇرۇس يېزىلىپتۇ.