شاڭخەي يازغۇچىلىرىنىڭ شىنجاڭ سەپىرى

    شاڭخەي يازغۇچىلار جەمئىيىتى پارتىگۇرۇپىسىنىڭ مۇئاۋىن شۇجىسى، باش كاتىپى ما ۋېنيۈن ئۆمەك باشلىقلىغىدىكى «شاڭخەي يازغۇچىلىرىنىڭ شىنجاڭ سەپىرى» 2015-يىلى 9-ئاينىڭ 6-كۈنىدىن 15-كۈنىگىچە ئۈرۈمچى، غۇلجا، ئالتاي، تۇرپان قاتارلىق جايلاردا ئون كۈن داۋاملىشىپ، بارلىق كۈنتەرتىپلىرىنى ئۇتۇقلۇق تاماملاپ ئاخىرلاشتى.
    بۇ قېتىم ئېلىپ بېرىلغان «شاڭخەي يازغۇچىلىرىنىڭ شىنجاڭ سەپىرى» ــ شىنجاڭ يازغۇچىلار جەمئىيىتى بىلەن شاڭخەي يازغۇچىلار جەمئىيىتى تۆت يىلدىن بۇيان داۋاملاشتۇرۇپ كېلىۋاتقان «ئۆزئارا ھەمكارلىق مۇناسىۋېتى» نى چۆرىدىگەن ھالدا ئەدەبىى ئالماشتۇرۇش، ئېكىسكۇرسىيە، زىيارەت، شاڭخەيدە ئىجادىيەت كۇرسىغا قاتناشقان شىنجاڭلىق كۇرسانتلارنىڭ ئىجادىيەت ئەھۋالىنى ئىز قوغلاپ تەكشۈرۈش قاتارلىق مەزمۇنلارنى ئۆز ئىچىگە ئالغان بولۇپ،ئۇلار شاڭخەيدىكى كۆزگە كۆرۈنگەن ئوتتۇرا ياش، ياش يازغۇچىلار ۋە شاڭخەي يازغۇچىلار جەمئىيىتىنىڭ مۇناسىۋەتلىك ئورگانلىرىدىكى خادىملاردىن بولۇپ 14 كىشىدىن تەركىپ تاپتى.
    ئۆزئارا ھەمكارلىق مۇناسىۋېتى ئورناتقان يېقىنقى تۆت يىلدىن بۇيان، شاڭخەي يازغۇچىلار جەمئىيىتى پۈتۈن خىراجەتنى ئۆزلىرى چىقىرىپ ، جەمى 56 نەپەر شىنجاڭدىكى ھەر مىللەت يازغۇچىلىرىنىڭ شاڭخەيگە بېرىپ تەربىيەلىنىشىگە شارائىت يارىتىپ بەردى. «شاڭخەي ئەدەبىياتى»، «شاڭخەي شائىرلىرى» ژۇرناللىرى مەخسۇس سان ئاجىرتىپ شىنجاڭ يازغۇچىلىرىنىڭ ئەسەرلىرىنى ئېلان قىلىپ پۈتۈن مەملىكەتكە تونۇشتۇردى. شاڭخەيدە تەربىيەلەنگەن ئوقۇغۇچىلارنىڭ ئەسەرلىرىدىن «مۇھەببەت يېنىڭىزدا»،«بايىن ئامىننىڭ باھارى» ناملىق ئىككى كىتاپنى تۈزۈپ نەشر قىلدۇردى. غەيرەت ئاسىم، لى جۈەن قاتارلىق ئىككى شىنجاڭلىق يازغۇچىمىزنىڭ ئەسەرلىرى ھەققىدە مەملىكەت خاراكتىرلىك ئىلمىي مۇھاكىمە يىغىنلىرىنى ئۇيۇشتۇرۇپ بەردى. 2015-يىلى يەنە «شىنجاڭ شىئېرىيىتى مەملىكەت سەپىرى»نىڭ شاڭخەيدىكى دىكلاماتسىيە پائالىيىتىنىڭ ئۇيۇشتۇرلىشىغا ماددى ۋە مەنىۋى جەھەتتىن ئالاھىدە زور دەرىجىدە قولايلىقلارنى يارىتىپ بەردى. بۇلارنىڭ ھەممىسى شىنجاڭ كۆپ مىللەتلىك ئەدەبىياتىنىڭ تەرەققىياتىغا ئاكتىپ ھەم تۈرتكىلىك روللارنى ئوينىدى.
    بۇ قېتىم شاڭخەي يازغۇچىلار جەمئىيىتى پارتىگۇرۇپىسىنىڭ مۇئاۋىن شۇجىسى، باش كاتىپى ما ۋېنيۈن ئۆمەك باشلىقلىغىدىكى «شاڭخەي يازغۇچىلىرىنىڭ شىنجاڭ سەپىرى»نىڭ شىنجاڭدە ئېكىسكۇرسىيە ۋە زىيارەت پائالىيىتىنى تەشكىللىشى، شاڭخەي يازغۇچىلار جەمئىيىتىنىڭ «ئۆزئارا ھەمكارلىق مۇناسىۋېتى» تېخىمۇ چوڭقۇر ئىلگىرى سۈرىدىغانلىقىنى، كېڭەيتىدىغانلىقىنى ئىپادىلىدى. ئۆزئارا سۆھبەت ۋە ئالماشتۇرۇشلار جەريانلىرىدا ھەر ئىككى تەرەپ ئۆزلىرىنىڭ بۇ جەھەتتىكى كۈچلۈك ئارزۇلىرىنى بىلدۈردى.

پائالىيەتتىن كۆرۈنىشلەر:

سايرام بويىدا

ئوڭدىن: ما ۋېنيۇەن، گې خوڭبىڭ

غۇلجا باياندايدىكى «ۋاڭ مېڭ قىرائەتخانىسى» دا

غۇلجا شەھىرى قازانچى مەھەللىسىدىكى ئۇيغۇر ھويلىسىدا

ئالاتاۋ ئېغىزىدا

قارامايدىكى تۇنجى نېفىت قۇدۇقى خاتىرە ئورنىدا

قاراماي «مايبۇلاق» سېلىم بوۋا ھەيكىلى ئالدىدا

ئالتاي بۇرجىن ناھىيەسىدىكى قازاق مىللىتى قول ھۈنەر، سەنئەت مەركىزىدە

قاناس كۆلى پىرىستانىدا

قۇربان تۇڭغۇت چۆللۈكىنىڭ چېتى

تۇرپان كارىز موزىيىدا

تۇرپان بۇيلۇقتا

ئالتاي شەھىرى شارىپقان باغچىسىدا

    «شاڭخەي يازغۇچىلىرىنىڭ شىنجاڭ سەپىرى»گە قاتناشقان قىسمەن يازغۇچىلار ھەققىدە ئۇچۇر:

   گې خوڭبىڭ ــ 1968-يىلى تۇغۇلغان. يازغۇچى، ئەدەبىي تەنقىدچى، ئەدەبىيات پەنلىرى دوكتورى. شاڭخەي ئۇنۋېرسىتىتىنىڭ پىراففىسورى، ئەنگىلىيە كامبرىج ئۇنۋېرسىتىتىنىڭ زىيارەتچى مۇتەخەسىسى، جۇڭگو بۈگۈنكى دەۋىر ئەدەبىياتى تەتقىقات جەمئىيىتىنىڭ دائىمى ھەيئىتى. شىنجاڭ يازغۇچىلىرى شاڭخەي سىنىپىنىڭ ئوقۇتۇش، ئىجادىيەت تۈرىنىڭ مەسئۇلى.
ئۇنىڭ ھازىرغىچە «ئالەم بوشلۇقىنىڭ بۇرچى»، «مېنىڭ N شەكىللىك تۇرمۇشۇم»، «قۇم كارۋات» قاتارلىق رومانلىرى ۋە «ئەدەبىيات تارىخى ئىلىمى»، «ئەدەبىيات تارىخى فورماتسىيە ئىلىمى»، «بىمەنىلىكنىڭ چىنلىقى»، «توسالغۇ ۋە ئېتىراپ قىلىش» قاتارلىق ئىلمىي تەتقىقات كىتاپلىرى نەشر قىلىنغان.

چېن شاۋيىڭ ــ 1956-يىلى تۇغۇلغان. شاڭخەي يازغۇچىلار جەمئىيىتى كەسپى يازغۇچىلار ئىشخانىسىنىڭ مۇدىرى، قوشۇمچە ئىجادىيەت-ئالاقە ئىشخانىسىنىڭ مۇئاۋىن مۇدىرى. ئاساسلىق ئەسەرلىرىدىن: «مېھىرلىك تەپسىلات»، «قىزىل ئايال»، «شەھەردىكى قەھىرمان» قاتارلىق رومانلىرى، «توپ ئېلىپ بۆسۈپ ئۆتۈش» قاتارلىق ئەدەبى ئاخپارات ئەسەرلىرى بار.

مۇشۇنداق ئۆگىنىش-ئالماشتۇرۇشلار ئارقىلىق ئىلگىرى سۈرۈلۈۋاتقان ھەمكارلىقتىن ئىرىشىۋاتقانلىرىمىز ئاز ئەمەس. شىنجاڭ يازغۇچىلىرىمۇ شاڭخەي-بېيجىڭلاردا تەربىيەلىنىپ كۆپ ئىلگىرلەش ھاسىل قىلىۋاتىدۇ. بېرىش-كېلىشلەر ئۈزۈلۈپ قالمىغاي.

جۇ لىن ــ 1949-يىلى تۇغۇلغان. شاڭخەي يازغۇچىلار جەمئىيىتىنىڭ كەسپى يازغۇچىسى. ئۇ 1979-يىلى نەشر قىلىنغان «تۇرمۇش يولى» ناملىق رومانى بىلەن بۈگۈنكى دەۋىر خەنزۇ ئەدەبىياتىدا «زىيالى ياش»لار تېمىسىدىكى ئەسەرلەرنىڭ بارلىققا كېلىشىگە باشلامچى بولغان ھەم جۇڭگو ئەدەبىياتىدىكى ئورنىنى تىكلىگەن. مۇھىم ئەسەرلىرىدىن:  «پېرخۇن ئايال»، «يىغلاۋاتقان لەنساڭجاڭ دەرياسى»، «كېچىنىڭ مەرۋايىتى»، «روھنىڭ كۆلەڭگىسى بار»، «ئازادى دەرىخى»، «بۈگۈن ئۆيدىن چىقىپ، تۈنۈگۈن كەچتە قايتىپ كېلىش» قاتارلىق رومانلىرى بار.

زو زو (ساۋ يانەن) ـــ شاڭخەي يازغۇچىلار جەمئىيىتى «ھوسۇل» ژۇرنىلىنىڭ مۇھەررىرى، 70-يىللىردىن كېيىن تۇغۇلغان يازغۇچى. ئاساسلىق ئەسەرلىرىدىن: «ياخشى كۆرۈشنى قايتۇرغىلى بولمايدۇ»، «قايتا تۇغۇلۇش»، «ئۆينىڭ ئىچى، تەشنالىقنىڭ سىرتى» قاتارلىق رومانلىرى نەشر قىلىنغان.

ياڭ شيۇلى ـــ شائىرە، شاڭخەي يازغۇچىلار جەمئىيىتى ئىجادىيەت-ئالاقە بۆلۈمى شىئېرىيەت مەخسۇس گۇرۇپىسىنىڭ مۇئاۋىن باشلىقى. «چۈش قوينىدىكى كېلىن»، «ئۈژمە سۆيگۈسى»، «شەھەر كەھرىۋادەك گۈللۈككە ئوخشايدۇ»، «بوشلۇقنى ئورىغان ھەسەن-ھۈسەن»،«يۈرىكى سوقماقتا قارلىق تاغنىڭ» قاتارلىق شىئېرلار توپلاملىرى نەشر قىلىنغان.

شۈ دالوڭ ــ «شاڭخەي ئەدەبىياتى» ژۇرنىلىنىڭ مۇھەررىرى، يازغۇچى. شىنجاڭ يازغۇچىلىرى شاڭخەي سىنىپىنىڭ يېتەكچىسى. «تېڭگېرنىڭ كامالىتى»، «دالا»، «سۇ كۈتۈپ تۇرغان ساھىل» قاتارلىق رومانلىرى نەشر قىلىنغان.

جاڭ دىڭخاۋ ـــ «شاڭخەي مەدەنىيىتى» ژۇرنىلىنىڭ مۇئاۋىن باش مۇھەررىرى. 70-يىللاردىن كېيىن تۇغۇلغان ئەدەبىي تەنقىدچى، شائىر. جۇڭگو ھازىرقى زامان ئەدەبىيات سارىيىنىڭ تەكلىپ تەتقىقاتچىسى. ئاساسلىق ئەسەرلىرىدىن: «مېڭزى ئەسەرلىرىنى تاللاپ ئوقۇش»، «ئۆتكەن دەۋىرلەردىكى شىئېر ۋە ئادەم»، «تەنقىدنىڭ تەييارلىقى» قاتارلىق ئىلمى تەتقىقات، نەزەرىيەۋى كىتاپلىرى بار.

ۋاڭ روشۈ ـــ «بۇلۇت» ئەدەبىيات تورىنىڭ باش مۇھەررىر ياردەمچىسى، شاڭخەي تور يازغۇچىلىرى جەمئىيىتىنىڭ مۇئاۋىن باش كاتىپى. 80-يىللاردىن كېيىن تۇغۇلغان ياش يازغۇچى.  ھازىرغىچە نەشر قىلىنغان رومانلىرىدىن «ئات ئوغرىسى»، «قۇيرۇق»، «چەكلەنگەن سۈرئەت يىگىرمە كېلومېتىر»، «بەدەننى ئۇچۇرۇش»، «بىز تەپتارتماي قايتىپ كەلدۇق» قاتارلىقلار بار.

ليۇ چېنفېڭ ـــ تور يازغۇچىسى. خەنزۇچە «قىزىل يەڭ» ئەدەبىيات تورىدا ئېلان قىلىنغان «تومۇزدىكى سۈزۈك ئاسمان» ناملىق رومانى بىلەن بىراقلا نامى چىقىپ، ئارقىدىنلا بۇ رومان نەشر قىلىنىپ تارقىتىلغان. ئەسەرلىرىنىڭ توردىكى چېكىلىش قېتىم سانى مىليون قېتىملىق ئۆتكەلنى بۆسۈپ ئۆتكەن. ھازىرغىچە «تومۇزدىكى سۈزۈك ئاسمان»، «ئىللىق قىش كېچىسىدىكى مەيىن دولقۇن»، «بىر كۈنلۈك ئەرنىڭ باھاسى چۈشۈرۈلمەيدۇ» قاتارلىق رومانلىرى نەشر قىلىنغان.

بەك ئەھمىيەتلىك پائالىيەت بوپتۇ. تۇرپان يازغۇچىلىرىنى تەربىيلەش كۇرسىنى ئەتراپلىق تەشكىللەپ كۆپ جاپا چەككەن ئەيبۇ ئاكام، بىزنى ئۇزىتىپلا يەنە بۇ كاتتا مىھمانلارنىڭ خىزمىتىدە بوپتۇ. ھارمىغايسىز.