قەلبىنۇر : زاكىلانغان ئادەملەر

ئادەم   ئەرىشتىن تامغان ھاياتلىقنىڭ جەۋھىرى ئىدى . ئۇ زىمىن باغرىدا سانسىز ئۇرۇقلارنى قالدۇرغان قەۋىم توپىغا ئايلاندى .ئۇنىڭ روھى ئالىمىدا پەرۋازلانغان بىر تىلسىمات  بولغاشقا ،  مۇققەدەس ئەقىدىنىڭ   ئەگەشكۈچىسى  بولدى . ئەمما ساقتا بىر ئېتقاتنىڭ زەھىرى ، شەيتان قولى بىلەن ھاياتلىق بۇلىقىغا  تامدۇرۇلغان كۈندىن باشلاپ ،  ئىنسان ئېزىپ قىلىپ ئۇنى مەنپەئەت قاچىسىدا سۈمۈرۋالغان  كۈندۈن باشلاپ، ئىنسان روھىنىڭ قاراڭغۇ بىر دۇنياسىدىن يورۇغلۇققا قاراپ ، رەزىللىكلەر شۇڭ تاتىشقا باشلىدى.  شۇڭا ،  ئىنسان  ئەقلى   ھامان چاقماقتەك چېقىلىپ تۇرىدىغان  ھەسەتلەر دەھشىتىدىن قۇتىلالمىدى .

جەميەت  تاكامۇللىشىپ  ئىنسان تەبىقىگە ئايرىلغان كۈندىن باشلاپ ، مەنپەئەت، ھىلە مېكىر زاۋۇدىدا مەخسەت زاكىلىرىنى ئىشلەپچىقىرىدىغان بولدى .بۇ زاكىلار ئىنسانىڭ پۇت قولىنى   ئۆزلۈرىنىڭ  ئارزۇسى  ئۈچۈن ھەركەتلىنىشكە بوش قالدۇرۇلۇپ،  ئاڭ ۋە ئىديەنى زاكىلايدىغان  زاكىلار ئىدى .شۇندۇن ئېتبارەن ئالتۇن - كۈمۈشتە سوقۇلغان ھەشەمەتلىك كىشەنلەر بىلەن يۇمشاق تاۋالاردىن ئىشلەپچىقىرىلغان ئالىي سورتلۇق ماددىي زاكىلار ، تىل زاۋۇدىدا  پىرىسلانغان  شېرىن  ئىبارىلىك زاكىلارمۇ ئوخشاشلا بازارغا سېلىندى.

ئادەملەر بىلىپ بىلمەي  ئۆز قەدرى – قىممىتىنى ھەر-خىل پەتىۋالاردا زاكىلايدىغان بولدى .ئىنسان گۈزەلىكىنىڭ ئەركىن ئېچىلىپ تۇرىدىغان گۈللىرىمۇ ھامان قاشالانغان گۈلزارلىقلاردا قارار  تاپاتتى .تۇرمۇش ئۆزىنىڭ  ھەر بىر   بۇلۇڭ پۇچقاقلىرىغىچە  بىردىن قاپقان قۇراتتى ،  تەن ۋە ئەقىل  بولسا ئۇنىڭ ئىچىدە قىسىلىپ  ياشايتتى .چەكسىز چۈشكۈنلۈك  قوينىدا بىر  قاپ- قارا دەريا ئاقاتتى . ئاشۇ دەريانىڭ قوينىدا ئەجدىھا مۆكۈپ ياتاتتى. شۇندىمۇ ئىنسان تارچۇق يوللاردىن مۈدرۈپ تۇرۇپ بىپايان ساھىللارغا باراتتى ،ئۇنىڭ ئاشقا ئېغىزى بارماي تۇرۇپلا بۇرنى قانايتتى .مانا بۇ ئادەم ھاياتىنىڭ رىياللىق  زەنجىرىدە باغلىنىشى ئىدى  .

دۇنيا يارلمىشىنى دەستەك قىلغان  پەتۋاچىلار دىن ئارقىلىق  ئېتقادنى  زاكىلىدى.  شالغۇت بولغان ئېتقاتنىڭ سەۋەبىدىن،  يۈرەكلەرنىڭ سەمىميىتى ئادەم قەسلەيدىغان ئىديەگە يول ھازىرلىدى .ئىنسان  تەرەقيات  دەۋرىگە يەتكەندە،  ئادەملەر ئادەملارنى زاكىلايدىغان بولدى . سۆيگۈ  ساختىپەزلىك قۇچىغىدا ئولتۇرۇپ تۇرۇپ ، ئۆزىنىڭ ساقتا مەنىسى بىلەن     قەلبلەرنى زاكىلىدى . بەڭۋاش تۇيغۇلار زاكىلانغان روھتىن ئۇچۇپ چىقىپ  دۇنيانى زاكىلاش ئۈچۈن قۇترىدى .ئاپەت ۋىرۇسلىرى، قەلب ۋاكسېنىسىدىن خالىي بولغان ئادەملەر توپىنى زاكىلىدى .شەھۋەت قۇترىغان تەنلەر بولسا  ئاقىبەت  ئۆلۈم تاۋۇتىدا ئىنسان ئۆمرىنى  زاكىلاندى...

ھايات  مەنىسىنىڭ دەستۇرىدا تولىمۇ چىرايلىق بىر ئىبارە بار بولۇپ،  كىشىلەر ئۇنى ئەركىنلىك دەپ ئاتىدى.ئەمما ئەركىنلىك دەپ جار سالغۇچىلارنىڭمۇ  بىردىن  زاكىسى بار بولۇپ،  سىياسىي مۇددالار  ئىچىگە مەخسەتلەر يۆگىلەتتى .ئەقىلسىزلەرنىڭ  بېشىغا قارا بۇلۇتتەك يېيىلغان بۇ  قىمارۋاز غەرەزلەر،  ئادەملەر ئەقىدىسىنى  غەيرى نەرسىلەر  بىلەن كىلۇنلاپ ، يات قەبىلىلەرگە پۇل ئۈچۈن ساتاتتى .بۇ سېتىلغان روھى مەجنۇنلار  ئۆزگىلەرنىڭ غايىسى بىلەن كىملىكىنى زاكىلىدى. قەۋىم ئەخلاقىنىڭ گۈزەل زاكىلىرىدا ئۆز ھېسياتىنى زاكىلىمىغانلار ، چاقماقتەك چېقىلغان مەنىۋىي  ئۆلۈم دەھشىتىدە  قالدى . تېرە- پېرەڭ بولغان بېمەنە  غايىلەر،  ئۆزىنىڭ ۋەتەنسىزلىگى ئۈچۈن ئۆكۈنگەندە ، قان يۇتقان چىلان تۇپراق،  ئۆز قۇچۇغىدا چوڭ بولغان ئادىمىي دەرەخلەرنىڭ قىسمىتى ئۈچۈن مەيۈسلەندى . ئۆز  باغرىنى  تاشلاپ  قاچقان قاچقۇنلار ئۈچۈن نەپرەتلىك تىنىپ تۇرغان  زىمىننىڭ يۈرىكىدىكى دەرتنى، زىمىن ئۆزىلا بىلەتتى ...

ئىنسان ھامان ئەقىل زاكىلىرى بىلەن ئۆز ھەركىتىنى زاكىلاشقا ھەقلىق ئىدى .ئەقىلسىزلىق زاكىلىرىنىڭ بازىرى ئىتتىك بولغاشقا ۋىجدانمۇ تاۋار بولۇپ سېتىلدى . قەلىبلەر مۇنارىنىڭ ھۇلىدىكى كېسەكلەر ئوغۇرلۇنۇپ ، ئۆز قىياپىتىنى يۇقاتقان مەنىۋىي  شەكىلمۇ قىيسىيىپ قالدى ...

بىراق ، زاكىلانغان ئادەملەر يەنىلا يىغلاشنى بىلگەندەك كۈلكىلەرگە ھېرىس ئىدى . چۈنكى تۇرمۇش كۈرمىڭلىغان  ھىيلە – مېكىر زاكىلىرىنى   ئىشلەپچىقىرىشقا قادىر بولسىمۇ  ،ئەمما مۇھەببەتنىڭ تۇغۇمچان روھى،  زاكىلانغان دۇنيانىڭ باغرىدا تۇرۇپمۇ  يەنىلا مۆجۈزىدەك يېرلىپ چىقىپ ، ھاياتلىق مەنىسىنى  ئۈممۈتكە   تولدىرىۋەردى ...
ھاياتلىق ھېكىمىتىدە يەنە   ، دانالىقنى  بوز رەخت  قىلىپ ، چېچەنلىك يىپلىرىدىن  يۆگەك تىكىپ  ، دۇردانىلەر  سۇلىرىغا  چىلىنىپ،ئادىن ئادىمىيلىك  بۆشىكىگە سېلىنىپ،  مەنىۋى ئاڭقاۋلىقنىڭ  پۇت قوللىرىنى زاكىلايدىغان ھېكىمەتلىك زاكىلارمۇ بار ئىدى .  بۇ خىل زاكىلارنىڭ سېھرى كۈچىدىنلا  ئادەملەر   كونا زاكىلارنى يىرتىپ تاشلاپ يېڭى زاكىلار بىلەن ئۆز  ئىديەسىنى  لايىغىدا زاكىلاپ تۇرۇشنى ئۇنتۇمىدى .