ئۇيغۇرىيە: كىچە ئۇزاپ كەتتى شىمالغا...

كىچە ئۇزاپ كەتتى شىمالغا...
گۈلبانۇم ئابابەكرى

ئايرۇپلان ئۇچتى...
سۇ ئۈستىدە قالدى ھىلال ئاي ،
قالدى توغراق دەرىخىم...
كېچە ئۇزاپ كەتتى شىمالغا،
ئايرىلىشقا چىدىيالماي،
يۈرەك لوپنۇرغا.
كىملەر مېنى ئۇزاتتى،
كىملەر ماڭا قول پۇلاڭلاتتى؟
«داشى »نى يەنە بىر كۆرسەم،
«خىزىرىم موماي»نى يەنە بىر سۆيسەم،
«قىزىل گۈل»دە يەنە بىر دەھشەت كۆيسەم...
تۇمان خىلۋەتلىرىدە،
بۇلۇت گىرۋەكلىرىدە قالدى ئارمان،
چېكىپ تۇيغۇلاردىن گۈزەل مارجان.
«لوپنور ئانام توقاچلىرى»دىن بىرنى ئالدىم،
ئۇۋاقلىرى چۈشۈپ كەتمىسۇن دەپ ،
ئاۋايلاپ بىرنى چىشلىدىم،
توقاچ يىغلاۋاتامدۇر ،
ياكى مەنمۇ؟...

بىلىندۈرمەي قارىۋالدىم چىراققا،
جاھان تولغانمىكىن پىراققا؟
ئاھ...
كېچە ئۇزاپ كەتتى شىمالغا...

2015-يىل 22- ئاۋغۇست .كەچ.



بۇ يازمىنى ئاخىرىدا   bagyar تەھرىرلىگەن. ۋاقتى  2015-8-24 22:15  

« بىلىندۈرمەي قارىۋالدىم چىراققا،
جاھان تولغانمىكىن پىراققا؟
ئاھ...
كېچە ئۇزاپ كەتتى شىمالغا...»
بۇ بۆلەكتىكى تۇيغۇنىڭ ساداسى ئوقۇرمەنگە كۈچ ئاتا قىلىدىكەن. ئومومەن بۇ شېئىر شائىرەنىڭ قەلب قاتلاملىرىدىكى ئەزگۈ تىلەكلەرنى ئېچىپ بېرىشنىڭ ئەڭ يارقىن ۋاسىتىسىغا ئايلانغان. شائىرەگە ئۇتۇقلار يار بولسۇن، ئىجادىيىتى يەنىمۇ گۈللەپ ياشنىسۇن!

بۇ يازمىنى ئاخىرىدا   ABLAJAN.BOWAKI تەھرىرلىگەن. ۋاقتى  2015-8-24 22:43  

بالا ئەسلى لوپنوردا ئىكەندە شۇ كۈنلەردە. «قىزىل گۈل» خېلى كۆيدۈرگەن ئوخشىمامدۇ سىزنى؟

سۆيۈنۈش ئىچىدە ئوقۇپ چىقتىم ، ئىجادىيەتلىرىڭىزگە مۇۋەپپەقىيەت تىلەيمەن ...

كىچە -كېچە
ئايرۇپلان-ئايرۇپىلان
ئاخىرقى مىسرالارغا يەنە بىر قاراپ بېقىشىڭىزنى ئۈمىد قىلىمەن.

ئەدىپنىڭ يىراق ئانا يۇرتلارنى كەزگەندىكى چىن تۇيغۇسىغا يەنىمۇ چىرايلىق دەملەرنى تىلەيمەن ... داۋاملىق ئالغا سىڭلىم ...

بۇلۇت گىرۋەكلىرىدە قالدى ئارمان،
چېكىپ تۇيغۇلاردىن گۈزەل مارجان.
«لوپنور ئانام توقاچلىرى»دىن بىرنى ئالدىم،
ئۇۋاقلىرى چۈشۈپ كەتمىسۇن دەپ ،
ئاۋايلاپ بىرنى چىشلىدىم،
توقاچ يىغلاۋاتامدۇر ،
ياكى مەنمۇ؟...

لىرىكىنىڭ ھاياتىي كۈچى ئۇنىڭدىكى بۇلدۇقلاپ تۇرغان ئازاب بۇلىقىدا!
.........................
توقاچ يىغلاۋاتامدۇر ،
ياكى مەنمۇ؟...

بۇ ئاددى شېئىرىمنى كۆرۈپ چىققان دوسلارغا رەھمەت .
ئەسما دىگەنلىرىڭىز ئورۇنلۇق. ئەسلى ئاخىرقى مىسرانى مۇنداق ئالسام بولاتتى .

جاھان تولغانمىكىن پىراققا؟
كېچە ئۇزاپ كەتتى شىمالغا...
مۇشۇنداق ئاخىرلاشتۇرۇش كېرەك ئىدى دەپ ئويلايمەن. بىرلا قېتىم يېزىپ مۇنبەرگە يوللىغان . ئۆزگەرتىشنى خالىمايدىغان جاھىل مىجەزىمنى ئازراق ئىسلاھ قىلسام بولغىدەك. پىكىر بەرگىنىڭىزگە تەشەككۇر.

چىن ھىسيات بىلەن يېزىلغان شېئىرلار گۈزەل بولىدۇ، دەپ قارايمەن . تېخىمۇ گۈزەل شېئىرلارنى كۈتىمىز سىزدىن ئۇيغۇرىيە .

2

سەھەر شاماللىرىدا،
چېنىقىش كۈيلىرىنىڭ چىرقىراق ئاھاڭلىرىدا،
ئادەم ئىزلەپ،
كېتىپ بارىمەن سەرسان،
ياشلىرىم سەلدەڭ ئاققان...
يېتىپتۇ بىر قىزچاق،
پوسمىسىنى ياستۇق قىلىپ.
ياغاچ ئورۇندۇقتا.
تاشلىغىنىم بەش كوي پۇل،
ئىككى تال ئالما،
مەنمۇ مۇساپىر،
مەنمۇ ئادەم ئىزلىگۈچى،
بۇ سوغۇق باغچىدا...

3

ئېسىلار بوينۇڭغا ئانىسىز بالاڭ،
ھىدلايدۇ سېنى قۇچاقلاپ ھارماي.
چاراقلاپ يانسىمۇ يۇلتۇز باغرىدا،
قوياش يوق يىغلار تولۇن ئاي.

ياشىغىن، شۇ كېچەڭ ئىچسىمۇ زەھەر،
ياشىغىن، يەر تېگىدە قالسىمۇ سەھەر.

4

رىزۋانگۈل
قار ئۈستىدە ئېچىلغان گۈل...
كۆزلىرىدە قېتىپ قالغان ئون سەككىز مىڭ ئالەم،
گەر كۆيۈپ كەتسىمۇ ئارمانلىرى كۈل...

يەنە بىر غۇنچە،
يەنە بىر يۇلتۇز چاقنىدى كۆكتە.
پولىك قىزى...
ساھىبجامال ئابدۇللا،
شۇ ئۆچمەس دەقىقىنىڭ ھايات شاھىدى!
كۆزلىرىدىن تامچىلاپ چۈشتى گۈل ۋەتەن،
ئوقتا تېشىلىپ ياتسا تالاي تەن...

......
ئالما چېچىكى قاردەك تۆكۈلۈپ،
گۈل باھاردەك ئېچىلدى تاڭ.
سەھەر مەڭزىدە ئىككى تامچە ياش،
دەرەخلەردە قالدى ناخشاڭ.

سوقۇلۇپ كەتتىم،
تۇل ئانامنىڭ قىزىل گۈلىگە.
قول ياغلىغىم نەم بولدى شۇئان.
قەبرىلەردە قىزغۇچ ئاي نۇرى،
دىلدا ئۆركەش ياسايدۇ ئارمان.

5

ئولتۇرىمەن دەريا بويىدا،
ئۆركەشلەپ ئېقىپ،
كېسەل كويىدا.

ئىچتىم ئۇچۇملاپ دەريا سۈيىنى،
زىكرى ئارىلاش،
ياش ئارىلاش.

كەلدى بىر ئايال،
سالۋارىغان چاچلىرى،
يالاڭ ئاياغ...

ئىزدەپ يۈرەك پارىسىنى،
كۆزلىرىدىن تۆكۈلەر ھىجران.
باستى دەريا سۈيىنى تۇمان.

قۇم ئۈستىنى يورۇتقاندا ئاي،
تۇتۇۋالدىم كۆكرەكنى،
ئاغرىقىغا چىدىماي...

6

سىز ئەمەس دەپ تانالمايسىز،
ئۆتمۈشنىڭ كۆپ چىكىت ئۈندەشلىرىدىن.
مەندىن يۇشۇرۇپ مۆكتۈرەلمەيسىز،
بىر گۆدەك نىگاھىنىڭ ئۈنلەشلىرىدىن.

ئىككى تەن، ئىككى دۇنيا،
ئەنجۈر دەرىخىدەك چېچەكسىز دۇنيا...