بەگيار: مۇخلىسلىرىنى مەپتۇن قىلغان مۇشتەرى

bagyar · ۋاقتى: 2015-8-17 23:44:27


	مۇخلىسلىرىنى مەپتۇن قىلغان مۇشتەرى مەشۈر سادىقوۋ(قازاقىستان) ئۈچ يېشىدىن باشلاپ ناخشا ئېيتىشقا باشلىغان مۇشتەرى ئسلاموۋانى ھازىر بىلمەيدىغان ئۇيغۇر يوق بولسا كېرەك. يەنە كېلىپ ئۇ بەزى ناخشىچىلارغا ئوخشاش،«فونوگرامما»بىلەن خەقنى ئالداپ يۈرگەنلەردىن ئەمەس، بەلكى ئىجرا قىلىش ئاسان بولمىغان خەلق ناخشىلىرىنى، مۇقام مۇققەدىمىلىرىنى بابىغا يەتكۈزۈپ ئورۇنلايدىغان ياش تالانت ئىگىسىدۇر. بۇ كۈنلەردە ئۇ دادىسى ۋە ئۇستازى، تونۇلغان سەنئەتكار ئابلەھەت ئىسلاموۋنىڭ ھەرتەرەپلىمە يار-يۆلەك بولۇشى بىلەن يۈزلىگەن تاماشىبىنلارنىڭ سۆيۈملۈك ناخشىچىسىغا ئايلاندى. ئۆتكەن يىلى ئىسلاموۋلار ئائىلىسى ئۈچۈن كۆپلىگەن جاپا-مۇشاقەتلەرگە ھەم خوشا للىق كەيپىياتلارغا تولۇپ-تاشقان يىل بولدى. ياشلىرىمىزنىڭ بىرئاز خەۋىرى بار بولۇشى مۈمكىن،ئەمما چوڭلىرىمىز ئانچە بىلىپ كەتمەيدۇ، بۇنىڭدىن بىر يىل ئىلگىرى، شىنجاڭ ئۇيغۇر ئاپتونوم رايونىدا«يىپەك يولى ساداسى» ناملىق ناخشا مۇسابىقىسىنىڭ دەسلەپكى مەۋسۈمى باشلانغانىدى. ئەنە شۇ ئالاھىدە ئاممىباپلىققا ئايلانغان مۇسابىقىغا ئىشتىراك قىلىپ،ئۆز تالانتىنى سىنىغان ھەم شۇنداقلا ئۇنىڭ دەسلەپكى باسقۇچىدىن ئۇتۇقلۇق ئۆتكەن مۇشتەرى ئىسلاموۋا توغرىسىدا بىز ئۇچۇر يازغان ئىدۇق. يېقىندا ناخشىچى كونكۇرسنىڭ بەشىنچى باسقۇچىغا قەدەر كۆتىرىلىپ، ئالاھىدە پەخرىي گۇۋانامە بىلەن تەقدىرلىنىپ قايتتى. بۇ قېتىم بىز ئۇنىڭ ئەنە شۇ بەش باسقۇچنى قانداق بېسىپ ئۆتكەنلىكىگە تەپسىلىي توختالماقچىمىز. كونكۇرسقا قاتنىشىش تەكلىپى مۇشتەرىگە سەنئەتكار ھەم تىجارەتچى شاتلىق خۇدايقۇلوۋ ئارقىلىق يەتتى.بۇ يىگىتنىڭ ۋە باشقىمۇ ساخاۋەتلىك ئىنسانلارنىڭ ياش ناخشىچىنى قوللاپ-قۇۋەتلىگەنلىكى ھەققىدە سەل كېيىنىرەك توختىلىمىز. شۇنداق قىلىپ،ناخشا-سازنى ئۇبدانلا دوست تۇتقان ئىسلاموۋلار ئائىلىسى كونكۇرسقا تەييارلىق ئىشلىرىنى باشلىۋەتتى.ناخشا ئېيتىش قېنىغا سىڭگەن مۇشتەرى ئەندىشە قىلمىغان بىلەن ئاتا-ئانىسىنى بۇ سەپەرنىڭ مەبلەغ مەسىلىسى قاتتىق ئويلاندۇردى. دەسلەپكى باسقۇچنىڭ خىراجىتىنى«پەرۋاز» ئىجراچىلار بىرلەشمىسى ئەتراپىدا پائالىيەت ئېلىپ بېرىۋاتقان ئىجراچىلار«بىر ياقىدىن باش –بىر يەڭدىن قول چىقىرىپ»ئۇلارنىڭ ئېغىرىنى يېنىك قىلدى. ئۆز نوۋىتىدە ناخشىچىمۇ ئەلنىڭ ئەقىدىسىنى ئاقلاپ،بىرىنچى قەدىمىنى ئوڭۇشلۇق تاشلىدى. ئىككىنچى باسقۇچ.ئۇنىڭغا مۇشتەرى ھازىر تۈركىيەنىڭ بارلىق رادىيو قاناللىر ىدا دېگۈدەك تۇراقلىق قويۇلۇۋاتقان «دۇنىيا»ناملىق ناخشىسى بىلەن مۇسابىقىغا چۈشتى.ئەسلىدە بۇ ناخشىنى ئابلەھەت ئاكا مەخسۇس قىزىغا ئاتاپ يېزىپ، مۇشتەرى ناخشىنى تۆت ياش پەيتىدە ئىجرا قىلغاندا،دادىسى ئۇنىڭغا «قىزىم، كېلەچەكتە بۇ ناخشا سىزنىڭ پاسپورتىڭىز بولىدۇ»دېگەن ئىكەن. ئەمىلىيەتتە ھەقىقەتەنمۇ بۇ ناخشا كۆرۈك يەكۈنىدە قازىلار ۋە تىڭشىغۇچىلار تەرىپىدىن«يىپەك يولى ساداسى» مۇسابىقىسىدا ئىجرا قىلىنغان ئەڭ چوڭقۇر تەسىرات قالدۇرغان ناخشا سۈپىتىدە تەكىتلەندى. ئۈچىنچى باسقۇچ.ئۇنىڭدا مۇشتەرى ئۇستازى ماخمۇت سۇلايماننىڭ ئىجاد ىدىن«بىلمەپتىمەن»ناملىق ناخشىسىنى ئىجرا قىلدى. بۇ باسقۇچنىڭمۇ ئۆزىگە چۇشلۇق تارىخى بار.ئۇيۇشتۇرغۇچىلار بىلەن ۋاقتىدا ئالاقىلىشالماسلىق، يۈز بەرگەن ئاز-تولا كېلىشمەسلىكلەرنى نەزەرگە ئالمىغاندا، مۇشتەرى قىزىمىز بۇ قېتىممۇ مۇۋئاپەقىيەت قازىنىپ،ھەقىقەتەنمۇ سەنئەتكارلار ئەۋلادىدىن ئىكە نلىكىنى تولۇق ئىسپاتلىدى. تۆرتىنچى باسقۇچ.كونكۇرس قائىدىسى بويىچە بۇ باسقۇچتا قاتناشقۇ چىلار جۈپ سۈپىتىدە ئۆز تالانتىنى نامايىش قىلىش كېرەك ئىدى.بۇ جەھەتتىن ئۇلارنىڭ بېشىغا كۈتۈلمىگەن يەنە بىر«مەسىلە» تۇغۇلدى.مۇشتەرى قازاقستاندىن قاتنىشىۋاتقان يالغۇز ئىجراچى بولغاچقا ئۇنىڭ بىلەن ناخشا ئېيتقىدەك قازاقستا نلىق جۈپى يوق ئىدى.ئاخىرى شۇ تەرەپنىڭ يەنى چۆچەكلىك بەختىيار ئىسىملىك يىگىت بىلەن بىرلىكتە سەھنىگە چىقىش قارار قىلىندى ھەم بەختىيار تەۋسىيە قىلغان قازاقچە «سېغىندىم»ناملىق ناخشا تاللىۋېلىندى.ئەمدى ئۇلارنىڭ بۇ باسقۇچقا تەييارلىق قىلىشى ئۈچۈن بارى-يوقى بىر كۈن قالغاچقا،ئۇتۇققا دېگەن ئۈمۈد تامامەن يىراقلاشقاندەك قىلدى.لېكىن كەسپىي سەنئەتكار ئابلەھەت ئىسلاموۋ ناخشا ئېيتىش مەخپىيلىكلىرىنى ياخشى بىلگەچكە،ۋەزىيە تنىڭ كەسكىنلىكىنى نەزەردە تۇتۇپ ئۇلار بىلەن جىددىي مەشىق قىلغاچقا،بەختىيار بىلەن مۇشتەرى ناخشىنى كۈتۈلگەندىن نەچچە ھەسسە چىرايلىق ۋە يۇقۇرى دەرىجىدە ئىجرا قىلىپ، تاماشىبىنلارنىڭ ئالقىشىغا ئېرىشتى. يەنە بىر باسقۇچقا بولسا مۇشتەرى تاللاندى. بەشىنچى باسقۇچ. بۇ باسقۇچتا 350 ئادەمدىن قالغان 16 نەپەر ماھىر كۈچ سىنىشىدىغان بولدى. ئۇلارنىڭ ئىچىدە بىزنىڭ قەھرىما نىمىزمۇ بار ئىدى، ئەلۋەتتە.بۇمۇ چوڭ ئۇتۇق. لېكىن بېقىندۇرىدىغان پەللىگە بىراز بار. ئۇنىڭدا ئىككى ناخشا ئېيتىلىشى شەرت. يىغلاپ-قاخشاپ توپلانغان تەجرىبە ئۆز مىۋىسىنى بەرگەندەك. مۇشتەرى ھېچ ھودۇقماي، پەقەت ئۆزىگىلا خاس زىلۋا ئاۋازى بىلەن ئۆزبېكچە «فەلەك» ناملىق ناخشىنى يۇقۇرى كەسپىي دەرىجىدە ئورۇنلاپ چىقتى.ناخشىنى تىڭشىغان تاماشىبىنلار ئۈچۈن مۇشتەرى ئىسلاموۋا قول يەتمەس يۇلتۇزغا ئايلاندى.تەرەپ-تەرەپتىن قول تامغىسىنى سوراۋاتقان مۇخلىسلار سانى كۆپەيدى. ھەتتا ئۇلارغا ئارام بەرمىگەن ئاخبارات ۋاسىتىلىرى ۋەكىللىرىدىن يىراقىراق يۈرۈشكە توغرا كەلدى. ئۈرۈمچىدەك چوڭ شەھەردە موشۇنداق ئۇتۇق قازىنىش ھەركىمنىڭ قولىدىن كېلىۋەرمىسە كېرەك. بۇنىڭ ھەممىسى جاپالىق ئەمگەك بىلەن ئۇيقىسىز تۈنلەرنىڭ مىۋىسى،ئەلۋەتتە. ئۇزۇن ۋاقىتلىق ئېغىر سىناقنىڭ يەكۈنىنى چىقىرىدىغان،يەنى كۆپچىلىكنى ھەلەيكۈمگە سالىدىغان دەقىقىلەر يېقىنلاشماقتا. ھەممىنىڭ دىققىتى قازىلاردا. ئۇلار بۇ باسقۇچتا مۇشتەرىنى ياكى زاھىر شاھ ئىسىملىك يىگىتنى تاللىۋېلىشى كېرەك. مانا يەكۈنلۈك سۆزمۇ ئېيتىلدى. دادىسىنىڭ: «قىزىم،بۇ دېگەن مۇسابىقە ئۇنىڭدا بىرى تاللانسا، بىرى چوقۇم شاللىنىدۇ. بۇ بولۇپ تۇرىدىغان ئىشلار. مۇبادا يېڭىلىپ قالسىڭىز،زادىلا كۆڭلىڭىزگە ئېلىپ كەتمەڭ»دېگەنلىرى قۇلىقىدا بولسىمۇ،ئېلان قىلغۇ چىنىڭ بىر ئېغىز سۆزىدىن كېيىن ئۇنىڭ كۆزلىرىدىن ياش تامچىلىرى تۆكۈلۈشكە باشلىدى. شۇنداق قىلىپ، ئاخىرقى ھېساپتا زاھىر شاھ مۇسابىقە غالىبى ئاتالدى. دەسلەپتە 2000 غا يېقىن قاتنىشىش نىيىتىنى بىلدۈرگەنلەر ئارىسىدا ئون ئالتە كۈچلۈكنىڭ قاتارىدىن كۆرۈنگەن مۇشتەرى ئۈچۈن بۇ ئاخىرقى باسقۇچ بولدى. ئۇنىڭ مەزكۈر مۇسابىقىنىڭ موشۇ پەللىسىگىچە كۆتۈرۈلگەنلىكى بىلەن تەبرىكلەش مەقسىتىدە سەنئەت پروگراممىسىنىڭ ئاساسچىسى شائىر مۇختەر ھاجىم بۇغرا سەھنىگە كۆتىرىلىپ، ئۆز پەرزەندىنى سەنئەت دۇنىياسىغا باشلىغان ئابلەھەت ئىسلاموۋقا مىننەتدارلىقىنى بىلدۈردى. ھەئە،ياش ناخشىچىغا الاھىدە شەرەپنامە بىلەن خاتىرە سوغىلىرىنى تاپشۇردى.بۇ ئەلۋەتتە،قازاقستانلىق ئۇيغۇرلار ئۈچۈن چوڭ ئۇتۇق. ئەمدى ئىمكانىيەتتىن پايدىلىنىپ، مۇشتەرىنىڭ ئۇشبۇ مۇسابىقىغا قاتنىشىشىغا ياردەم قولىنى سۇنغان«پەرۋاز» ئىجراچىلار بىرلەشمىسىگە، شەخسەن رايىم ھەمرايۋقا،سەھەردىن يۈسۈپوۋقا،ئىختىيار رەجەپوۋقا،مەرەمسا خان، بىبىنۇرغا سەھنە كىيىملىرى بىلەن تەمىنلىگەن زوھرا توختاخۇنوۋا بىلەن نىياز بۈۋى ئەخمەتوۋاغا،ئاساسىي خىراجەتنى ئۆز ھۆددىسىگە ئالغان مىللىي سەنئىتىمىزنىڭ جانكۆيەرى سەنئەتكار ۋە تىجارەتچى شاتلىق خۇدايقۇلوۋقا ئابلەھەت، سۇمبات ۋە مۇشتەرىنىڭ ئېيتار مىننەتدارلىقى چەكسىز. مانا موشۇنداق ئەزىمەتلىرىمىزنىڭ خالىس ياردىمى بىلەن مۇشتەرىدەك ناخشىچىلىرىمىز مۇسا بىقىلارغا قاتنىشىش، شۇنداقلا چوڭ سەھنىلەردە ئۆزىنىڭ ھۈنىرىنى نامايىش قىلىش پۇرسىتىگە ئىگە بولۇۋاتىدۇ. قولىدا بارئاكا-ھەدىلەر مىللىيلىكىمىزگە مۇناسىۋىتى بار ھەرقانداق ئىشقا ئىمكانىيىتىنىڭ يار بېرىشىچە،قول ئۇچىنى سۇنۇپ تۇرسا،ئەلۋەتتە، خەلقىمىز ئارىسىدىن داڭلىق سەنئەتكارلارنىڭ، ئالىملار نىڭ ۋە باشقىمۇ ساھە ئىگىلىرىنىڭ يېتىلىپ چىقىشى شۈبھىسىز. مەيلى،مۇشتەرى ئىسلاموۋا غالىپ چىقمىسىمۇ، سەنئەتكارغا ھەققانىي باھا بەرگۈچى تاماشىبىن. ئۇنىڭ ئىسپاتى ئابلەھەت ئاكا بىلەن مۇشتەرىنى نەق مەيداندا تاماشىبىن ئورۇنلىرىدىن تۇرۇپ،ئۇزاق گۈلدۈرلىگەن چاۋاكلار ئاستىدا يۇقۇرى ھۆرمەت كۆرسىتىپ،زالدىن ئۇزىتىپ قويغانلىقى مۇشتەرىگە بېرىلگەن ئەڭ ئالىي باھا دېسەك،مۇبالىغە بولماس. قازاقىستاندا چىقىدىغان سىلاۋىيان ئۇيغۇر يېزىقىدىكى «ئۇيغۇر ئاۋازى» گېزىتىنىڭ 2015-يىل 13-ئاۋغۇست سانىدىن ئېلىندى.

Erchin · ۋاقتى: 2015-8-18 02:40:31


	بۇ قىز مۇسابىقىدە ناخشىنى ئالامەت ياخشى ئېيتقان ئىدى.

ئوسمانجان زۇنۇن · ۋاقتى: 2015-8-18 11:23:48


	مۇشتەرىگە بولغان قايىللىقىم تېلۋىزوردا ناخشا ئېيىتقاندىلا تىكلەنگەن ئىدى .بۈگۈن ماۋۇ تەپسىلى خەۋەرنىڭ مۇئەللىپى مەشۇر سادىقوۋ غا قايىل بولدۇم.ماقالە شۇنچە ئخىچام ،شۇنچە يېقىشلىق ،شۇن چە تاتلىق ، خۇددى بىر چەينەك ناۋات چاي ئىچكەندەك ھوزۇرلاندىم.ئاخبارات ئۇسلۇبى ۋە ۋە ئاخبارات تىلىمىزدا زور پەرىق باركەن. يوللۇغۇچىنىڭ ئەجرىگە كوپ رەھمەت.

bagyar · ۋاقتى: 2015-8-18 12:38:23


	خۇددى بىزدىكىگە ئوخشاش ئۇلاردىمۇ روسچە تېرمىنلار ئۇچرايدىكەن، ئەمما مەن ماقالىنىڭ ئەسلى ئۇسلۇبىنى، جۈملە تۈزۈش يوللىرىنى ساقلاپ قېلىشقا تىرىشتىم.

زەينۇللا · ۋاقتى: 2015-8-18 12:44:27


	بۇ قىزنى مەن كۆرمەپتىكەنمەن. قايسى سانلاردا بار بولغىيدى؟

ئوسمانجان زۇنۇن · ۋاقتى: 2015-8-18 16:00:30


	bagyar يوللىغان ۋاقتى 2015-8-18 12:38 خۇددى بىزدىكىگە ئوخشاش ئۇلاردىمۇ روسچە تېرمىنلار ئۇ ... سىزمۇ كۆپ ئەجىر قىپسىز. ماقالىدىكى سۆزلەر شۇنداق سىپتا ، شۇنداق يېقىشلىق چىقىپتۇ.

رەيھانگۇل · ۋاقتى: 2015-8-18 19:00:28


	ناخشىسىنى بەكمۇ ياقتۇرغان ئىدىم، بەگياركامغا رەھمەت!

ئابدۇرېھىم زۇنۇ · ۋاقتى: 2015-8-18 19:35:46


	بۇ ئەسەر بەگيارنىڭ ئەجرى بىلەن ئۆز خاسلىقىنى ساقلاپ قاپتۇ. بىر قىسىم كىشىلىرىمىز جۈملە تۈزۈشنى مۇشۇنداق ئەسەرلەرنى ئوقۇش ئارقىلىق ئۆگەنسە بولىدۇ...