سەمەندەر:غەلىتە ئادرېس

سەمەندەر · ۋاقتى: 2015-7-2 07:57:05


	غەلىتە ئادرېس 1 سىلەرگە دېسەم، ئۇنى ئۇچرىتىشتىن بۇرۇن دۇنيادا مۇنداق بىر ئادەمنىڭ بارلىقىنى خىيالىمغىمۇ كەلتۈرمىگەن ئىكەنمەن. تاماقتىن يېنىشىم ئىدى.تۇيۇقسىز بورانلىق يامغۇر يېغىپ كەتتى.مەن ياتاقتىن چىققاندا ھاۋا ئوچۇق،يېقىشلىق ئىدى.بۇ يەرنىڭ ھاۋا رايى قىزلارنىڭ كەيپىياتىدەك تېز ئۆزگىرىدىغانلىقىنى بىلسەممۇ،كۈنلۈك كۆتۈرۈپ يۈرۈشنى بىر خىل ئاۋارىچىلىق ھىس قىلاتتىم.مانا،ئۈستى-بېشىم بىردەمدە ھۆل بولۇپ كەتتى.بۇ يامغۇردا ياتاققا قايتىش مۇمكىن بولمايدىغانلىقىغا كۆزۈم ئىلدى.كۈتۈبخانا بۇ يەردىن ئانچە يىراق ئەمەس ئىدى ،شۇ يەردە يامغۇردىن پاناھلىنىپ تۇراي دېگەننى كۆڭلۈمدىن ئۆتكۈزۈپ ،قەدىمىمنى ئېتتىكلەتتىم. بىر توپ ئوقۇغۇچى يامغۇردىن خەۋەرسىز ھالدا كىتاب كۆرۈۋاتاتتى.بۇ كەچ ۋاقتى ئىدى.ھەر خىل ئىمتاھان ماتېرىياللىرىنى ئالدىغا دۆۋلەپ قويۇپ كىتاب كۆرۈۋاتقان ئوقۇغۇچىلارغا قاراپ ھەۋىسىم كەلدى.ئىنىقىنى دېگەندە،مەكتەپكە كېلىپ بۇ كۈتۈبخانىغا تۇنجى كېلىشىم ئىدى.ياتاقتا دەرسلىك كىتابنى ئانچە-مۇنچە ۋاراقلاپ قويغاندىن سىرت ئاساسەن باشقا كىتابلارنى كۆرمەيتتىم.دەرسلىك كىتابتىن باشقا كىتابلارنى كۆرۈش،بولۇپمۇ رومان دېگەندەك كىتابلارنى كۆرۈش ئادەمنى خىيالچان قىلىپ قويىدۇ،سەنئەت تۈرىدىكى كىتابلارنى كۆرۈشنىڭ قىلچە پايدىسى يوق.بۇ دادامنىڭ دائىم ماڭا تەكرارلايدىغان سۆزى ئىدى.يەنە بىر جەھەتتىن، كىتابقا قارىساملا ئۇيقۇم كېلەتتى،شۇڭا بۇ ئۆمرۈمدە بىرەر ئەدەبىي ئەسەرنى تولۇق ئوقۇپ باققان ئەمەسمەن.ئوقۇرمەنلەر ئەسلى تېمىدىن چەتنەپ كەتكەنلىكمنى ئەيىبلەۋاتقان بولسا كېرەك.دائىم گەپتىن قىيىپ كېتىمەن.سۆزلەپ نەگە كەلگەنلىكمنى باشقىلار ئىيىتىپ بەرمىسە سۆزۈمنى تاپالمايمەن.ئەمدى ئەسلى گېپىمىزگە كېلەيلى.شۇنداق،مەن كۈتۈپخانىغا كىرىپ ئولتۇردۇم.سىرتتا يامغۇر قاتتىق يېغىۋاتاتتى.مەن ياتاقداشلىرىمغا كۈنلۈك ئېلىپ كېلىپ بېرىشنى ئىيتىشقا تېلېفۇن ئۇرغان بولساممۇ ،بىرەرسى تېلېفۇنىنى كۆتۈرمىدى. شۇ ئەسنادا كۈتۈبخانا ئوتتۇرىسىغا تىزىپ قويۇلغان بىر قانچە تەشتەك گۈل كۈچلۈك بوراندا چېقىلىپ كەتتى.كۈتۈبخانا قوغدىغۇچىلىرى بىر قانچە ئوقۇغۇچىنى ياردەمگە چاقىرىپ ئىشىكنى تەستە تاقىدى.ئەينەكلىك تامدىن سىرتقا قارىدىم.يامغۇر يانتۇ يېغىۋاتاتتى.يامغۇرنىڭ يانتۇلۇق دەرىجىسىدىن بوراننىڭ خىلى كۈچلۈك ئىكەنلىكىنى ھىس قىلغىلى بولاتتى.نەلەردىندۇر ئاڭلانغان ۋېۋىسكىلارنىڭ تاراڭشىشلىرى،بوراننىڭ بۆرىدەك ھوۋلاشلىرىنى ئىنىق ئاڭلىغىلى بولاتتى.ياتاقداشلىرىمغا يەنە تېلېفۇن قىلدىم.بورانلىق يامغۇر توختايدىغاندەك ئەمەس ئىدى.ئەگەر شۇنداق بولسا،مەكتەپ قوغدىغۇچىلىرى ياردەمگە كەلمىگۈچە ياتاققا قايتقىلى بولمايتتى.ئاران دېگەندە گوۋ دەننىڭ تېلېفۇنى ئۇلاندى.بۇ ئۇنىڭ ئىسمى ئەمەس،ياتاقتىكىلەر ئۇنى شۇنداق ئاتايتتۇق.ئۇنىڭ بىلەن بىر ئورتاقلىقىمىز بار،ئۇ بولسىمۇ ئىككىلىمىز بويتاق.ياتاقتىكى باشقىلارنىڭ مۇھەببىتى بار ئىدى.ھەپتە ئاخىرى قارىسىنى كۆرسەتمىگەن كۈنلەردە گوۋدەن بىلەن ئىككىمىز ياتاقتا يالغۇز قېلىپ تور ئويۇنى ئوينايتتۇق ياكى كارۋاتتىن قوپماي ئۇخلايتتۇق.بەزى چاغلاردا ساۋاقداشلىرىمىزغا ياردەملىشكەندىن سىرت،ئاساسەن ياتاقتا بولاتتۇق.باشقىلارغا ياردىمىمىز كېرەك بولسا ھېچبىر تەكەللۇبسىزلا ياتاققا ئۈسسۈپ كىرىپ بىزنى ئېلىپ چىقىپ كېتەتتى.ئۇ تېلېفۇننى ئالدى. ـ ۋەي،دۇ گې،نەدە ؟ -مەن كۈتۈبخانىدا ،يامغۇر بەك يىغىۋاتىدۇ،تېز بولۇپ كۈنلۈك ئېلىپ كېلىپ مېنى قۇتقۇزىۋال! -باشقىلارنىڭ ھەممىسى قىزلارغا كۈنلۈك سۇنۇپ بەرگىلى چىقىپ كېتىشتى،ياتاقتا سۇنۇق كۈنلۈكتىن باشقا كۈنلۈك قالماپتۇ -قوشنا ياتاقلاردىن بولسىمۇ ئارىيەت ئېلىپ تېز بول،توڭلاپ كەتتىم. ئۇ قوشنا ياتاقلارغا قاراپ باقاي ،دەپ تېلېفۇننى ئۈزىۋەتتى.ئوغۇللار بۇنداق پۇرسەتنى قولدىن بەرمەيدىغانلىقىنى بىلسەممۇ،بۈگۈن سەل ئالاھىدىرەك ئىدى.چۈنكى مەن بۇ يەرگە كېلىپ تەيغېڭ بورىنىدىن سىرىت بۇنداق ھاۋا رايىغا تۇنجى قېتىم يولۇقۇشۇم ئىدى.ئۇ تېلېفۇن قايتۇرمىدى،بەلكىم تاپالمىغاندۇ ياكى ئويۇنغا بەنىد بولۇپ ئېسىدىن كۆتۈرلۈپ كەتكەندۇ.سەل خۇمارىم تۇتۇپ ھاجەتخانا ئىزدىدىم.ھاجەتخانىغا كىرىپ تاماكىنى شوراپ خىلى ھۇزۇرلىنىپ قالدىم،كەيپىياتىممۇ كۆتۈرلۈپ قالدى.ناخشا ئىيقۇم كەلدى.بىراق يۇتۇقسىزلا بۇيەرنىڭ ناخشا ئىيتىشقا تازا ماس كەلمەيدىغانلىقىنى ھىس قىلىپ بۇ ئويۇمنى دەرھاللا ئاياغلاشتۇردۇم.پار ئۈستىدە ئولتۇردۇم.ياتاققا ئالدىرىشىم زادى نېمىدىن؟ بۇنىڭغا ئۆزۈممۇ ھەيران ئىدىم.ياتاققا قايتساممۇ قىلىدىغان تۈزۈك ئىشىم يوق ئىدى.ئېغىزىم قۇرۇپ تۇراتتى.قول يۈيىدىغان جۈمەككە ئېغىزىمنى ئاپىرىپ سۇ ئىچتىم. ھاجەتخانىدىن چىقىپ كۈتۈبخانىنىڭ ئىككىنچى قەۋىتىگە چىقىدىغان پەشتاقتا ئولتۇردۇم.بۇ يەردە ئولتۇرۇش تازا قاملاشمايتتى.ئۈستىگە چىقىپ بىرەر ئورۇن تېپىپ ئولتۇرۇشنى ئويلاپ ئورنۇمدىن تۇردۇم.ئىككىنچى قەۋەتتە بوش ئورۇن يوق ئىدى.ئۈچىنچى قەۋەتكە چىقتىم.يەنىلا بوش ئورۇن يوق ئىدى.تۆتىنچى قەۋەتنىڭ بىر بۇلۇڭدىن ئورۇندىن بىرسى چىقتى.ئەمدى ئولتۇرۇپ تۇرىشىمغا ياندىكى ئورۇندا ئولتۇرغان قىز كىتابتىن بېشىنى كۆتۈرۈپ ماڭا مۇنداقلا بىر قاراپ قويۇپ يەنە كىتابقا قاراپ ئولتۇردى.مەن ئۈستەلگە ئىڭىشىپ قولىدىكى كىتابنىڭ ئىسمىنى ئوقۇماقچى بولىۋېدىم،ئۇ ماڭا كىتاب مۇقاۋىسىنى كۆرسىتىپ قويۇپ يەنە كىتابقا قاراپ ئولتۇردى. ئۇنىڭ كىتاب ئوقۇشىغا قاراپ ئولتۇرىشىمدىن بىزار بولدىمۇ ياكى باشقا سەۋەبمۇ بوغچىسىدىن بىر كىتابنى چىقىرىپ ماڭا ئۇزاتتى.مېنىڭ ھاڭۋىقىپلا تۇرغىنىمنى كۆرۈپ كىتابنى بوغچىىسىغا سېلىۋەتمەكچى بولغاندا قولىدىن كىتابنى ئالدىم.ئۇنىڭ ماڭا ئۇزاتقىنى «ئاننا –كارىننا »دېگەن كىتاب ئىدى.بۇ كىتابنىڭ نامىنى تۇنجى ئاڭلىشىم ،بۇندىن بۇرۇن دۇنيادا مۇشۇنداق بىر كىتابنىڭ بارلىقىنى،كىتابتا نېمىلەرنى سۆزلەيدىغانلىقىنى بىلمەيتتىم.باشقىلارنىڭ نەچچە يۈز بەتلىك رومانلارنى قانداق ئوقۇپ بولىدىغانلىقىغا ھەيران قالدىم.بۇ كىتاب كۆمەچتەك قىلىنلىقتا ئىدى.بوۋام بىر كۆمەچنى بېلىگە قىستۇرۋالسا يەتتە كۈن ئوۋ ئوۋلايتتىكەنتۇق.قارىغاندا،كۆمەچتەك بىر كىتابنى ئوقۇغان ئادەم بوش ئادەم بولمىسا كېرەك.كىتاب ئارىسىدىكى قىستۇرما رەسىملەرگە قاراپ بىردەم ئولتۇرۇپ،كىتابنى ئۇ تەرەپكە ئىتتىردىم.ئۇ بېشىنى كىتابتىن كۆتۈرۈپ ماڭا قاراپ قويدى.مەن ئورنۇمدىن تۇرۇپ ئۈستۈنكى قەۋەتكە ماڭدىم.ئۈستۈنكى قەۋەتنى كۆرۈپ باققۇم كەلگەن ئىدى.ئالىي مەكتەپكە كېلىپ كۈتۈبخانىنىڭ قانداق ئىكەنلىكىنى كۆرۈپ باقمىغان ئىدىم.ئۈستۈنكى قەۋەت خىلى ئازادە ئىدى.ھەر بىر قەۋەتتىكى كىتاب ئامبارلىرىغا قاراپ ھەيرانلىقىم تېخىمۇ ئاشتى.شۇنچە جىق كىتابلارنى زادى كىملەر ئوقۇيدىغاندۇ؟ كۈتۈبخانا خادىملىرى قانچىلىك ئوقۇپ بولغاندۇ؟ ئەگەر بىر ئادەم بۇ كۈتۈبخانىدىكى كىتابلارنى ئوقۇپ تۈگەتسە قانداق بولۇپ كېتەر؟ ئويلايمەنكى،بىرىنچىدىن، ئۇنىڭ ۋاقتى يېتىشمەيدۇ،ئىككىنچىدىن، نېرۋىسى كاردىن چىقىشى مۇمكىن،ئۈچىنچىدىن بۇ زادى مۇمكىن بولمايدىغان ئىش.ھەممىنى ئوقۇپ بولمىغان تەقدىردىمۇ،ئوقۇپ بولالىغىنىچە ئوقۇسا ئۇ چوقۇم يامان ئادەم بولۇپ چىقىدۇ.تامغا «ھەر بىر كىتاب بىر تىلسىمات دۇنياسى!» دەپ يېزىلغان ئىدى.بۇ يەر ماڭا ئېزىتقۇ قەسىردەك تۇيۇلۇپ قورقۇپ كەتتىم.ئۇزاق تۇرۇشقا بولمايدىغانلىقىنى سەزدىم.ئۈستۈنكى قەۋەتلەرگە چىقىشىمنىڭ ھاجىتى قالمىغان ئىدى.كۈتۈبخانىنىڭ قانداق جاي ئىكەنلىكىنى ئازراق بولسىمۇ پەملىگەن ئىدىم.پەشتاقتىن ئېتتىك قەدەملەر بىلەن چۈشۈۋېتىپ بىرىگە قاتتىق ئۇرۇلۇپ كەتتىم.قولىدىكى كىتابلار چېچىلىپ كەتتى.ئۇنىڭ چىرايىغىمۇ قارىماي كىتابلارنى تېرىشكە باشلىدىم.كىتابلارنى ئۇنىڭغا سۇنۇۋېتىپ چىرايىغا خىجىل ئارلاش قارىدىم.بىراق كۆرگىنىم شۇ بولدىكى،ئۇنىڭ چىرايىدىن يېغىۋاتقان نۇردا كۆزلىرىمنى ئاچالمايلا قالدىم.كۆزۈمنى ئېتتىك ئېلىپ قېچىپ كەچۈرۈم سورىدىم.ئۇنىڭ ئاۋازى قۇلاق تۈۋىمدە بۇلاقتەك جىرىڭلىدى.ئۇ كەتتى.مەن تېخىچە ھېلىقى چىراي،ئاۋاز ئىچىدە ئۆزۈمگە قايتىپ كەلمىگەن ئىدىم.بارچە كۈچۈمنى يىغىپ ئۇنىڭغا ئاخىرقى بىر رەت قارىدىم،بىراق ئۇنىڭ ئورنىنى يوقلۇق ئىگەللىگەن ئىدى.يۈرىكىم قەپەستىن چىقىپ كېتىدىغاندەك سوقاتتى.كەينىدىن يۈگرىدىم.پەشتاقتىن بىر نەچچە قېتىم چىقىپ چۈشتۈم،ئەمما ئۇنى تاپالمىدىم.ئۇنىڭ چېچىلىپ كەتكەن كىتابىنى تېرىۋېتىپ بىر كىتابقا مۇنداقلا قارىغىنىم ئېسىمدە ئىدى،بىراق ئەسلىيەلمەيۋاتاتتىم.ئەڭ ئۈستۈنكى قەۋەتلىرىگىچە چىقتىم،ئۇ كۆرۈنمىدى.بەك مەيۈسلىنىم كەتمىدىم.نېمىلا دېمىگەن بىلەن بىر مەكتەپتە بولغان ئىكەن يەنە ئۇچرىتىمەن دەپ ئويلىدىم.ماڭا جىن چاپلاشقان ئىدى.ئۇياق-بۇياققا چېپىپ يۈرۈپ ئۇسساپ كەتكەن ئىدىم.ھاجەتخانىغا كىرىپ جۈمەكتىن سۇ ئىچتىم،يۈزۈمنى يۇدۇم.بىراق ئىچىمدىكى ھارارەت مېنى تەرلىتىپ تۇراتتى.ئىچىمدە ئەزەلدىن كۆرۈلۈپ باقمىغان بىر ئوت گۆرۈلدەپ كۆيۈۋاتاتتى.پەشتاقتا ئولتۇردۇم.كۈتۈبخانىنىڭ ئىككى ئىشىكى بارلىقى ئېسىمگە كېلىشى بىلەن بېشىم زىڭىلداپ ئاغرىپ كەتتى.بۈگۈن ئۇنى قايتا كۆرەلمەيدىغانلىقىمغا ئىشەندىم.خۇمارىم تۇتتى.ھاجەتخانىغا كىرىپ تاماكا چەكتىم.ئىككى تال تاماكىنى ئارقا-ئارقىدىن چېكىپ كەيپىياتىم تېخىمۇ ناچارلىشىپ كەتتى.چۈشكۈنلۈك ئوۋلاۋاتقان پۇتلىرىمنى يۆتكەپ بىرىنچى قەۋەتكە چۈشتۈم.يامغۇر پەسەيگە ئىدى.بايا ئىشىك تۈۋىدە يامغۇردىن پاناھلىنىپ تۇرغان ئوقۇغۇچىلارمۇ كۆرۈنمەيتتى.تىترەك ئولىشىۋاتقان تېنىمنى سۆرەپ ياتاق تەرەپكە ماڭدىم.يول بويىدىكى دەرەخلەردىن نەمخۇش بىر ھىد كېلىۋاتاتتى.يامغۇر سۇلىرى يولنىڭ پاكار يەرلىرىنى بويلاپ ئاقاتتى.تۇنجى رەت ساراڭلىق قىلىپ باققۇم كەلدى.ئايىغىمنى سېلىۋېتىپ يالىڭياغ ماڭدىم.تاپىنىم خىلى راھەت ھىس قىلدى.ياتاق بىناسى ئالدىغا يېقىلغان چىراقنىڭ ئوڭ سولىدا قىز-ئوغۇللار قوللىرىنى تۇتۇشۇپ تۇرىشاتتى.بەزىلىرى يالىڭياغ پۇتۇمغا قاراپ قويدى.مەن بۇلارغا پەرۋا قىلمايتتىم.ياتاققا كىرىپ كارۋاتقا چىقىپ ياتتىم.گوۋدەن تېخىچە ئويۇن ئويناۋاتاتتى.باشقىلار تېلېفۇنغا قاراپ ئولتۇراتتى.گوۋدەن بىر مەيدان ئويۇننى ئاخىرلاشتۇرۇپ مېنى چاقىردى. -ئوينىمامدۇق؟ -ھىرىپ قالدىم -ھىم ئامالنىڭ بارىچە بايامقى كۆرۈنۈشلەرنى ئەسلەۋاتاتتىم.ئۆمرۈمدە قىزلارغا ئازراقمۇ قىزىقىش قوزغىلىپ باقمىغان ئىدى.بۈگۈن بىرسىگە ئاشىق بولغانلىقىمنى تەن ئېلىۋاتاتتىم.ئۇ ھەقىقەتەن گۈزەل ئىدى.خۇددى ئۇزۇن يىللاردىن بىرى ئىزدەپ يۈرگەن بىراق ئۇچرىشالمىغان بىرىدەك يېقىملىق ئىدى.ئۇ ئۆزىنى نامايەن قىلدى.بىراق مەن ئۇنىڭ يۈزلىرىدىن تۆكۈلۈىۋاتقان نۇرغا بەرداشلىق بېرەلمىدىم.بۇ بىغەم ھاياتىمنىڭ ئاياغلاشقانلىقدىن دېرەك بېرەتتى.ئىلگىرى بېشىمنى ياستۇققا قويار-قويمايلا ئۇيقۇغا كېتەتتىم.بۈگۈن ئۇيقۇسىزلىقنىڭ ئازابىنى تېتىپ باقىدىغاندەك قىلاتتىم.ھەر خىل ئاماللار بىلەن ئۆزۈمنى ئۇيقۇغا زورلاپ باققان بولساممۇ،شۇ نۇرلۇق چىراينىڭ ئالدىدا شۇ قەدەر ئامالسىز قالدىم.ئىسمى نېمىدۇ؟مۇشۇ سۇئال بېشىمدىن كەتمەيتتى.ھېچ بولىمغاندا بىرەر يىپ ئۇچىنى بىلسەم ئۇنى تېپىشىم ئاسانغا چۈشەتتى.سۇئال سۇئاللارنى تۇغاتتى.ئۇنى قايتا ئۇچراتسام نېمە دەيمەن؟ ئۇ ھەقتە ھېچنېمە بىلمەيتتىم.پەرەزلىرىم مېنى قورقىتىۋەتتى.تۈگۈلۈپ يېتىپ بىر يەرلىرىمنىڭ ئاغرىۋتقانلىقىنى ھىس قىلدىم.كارۋاتتىن چۈشۈپ ئارقا-ئارقىدىن تاماكا چەكتىم.يەنە كارۋاتقا چىقىپ تورۇسقا قاراپ ياتتىم. ئۇنى ئىزدەش بىلەن خىلى كۈنلەر ئۆتۈپ كەتتى.مەكتەپ ئىچىدە ئايلىنىمەن،كۈتۈبخانىغا چىقىمەن، يول بويىدىكى ئورۇندۇقتا ئولتۇرۇپ يولدىن ئۆتكەنلەر ئىچىدىن ئۇنى ئىزدەيمەن.بىر كۈنى ھېلىقى كىتابنىڭ ئىسمى ئېسىمگە كەلدى.كۈتۈبخانىغا كىرىپ شۇ كىتابنى ئىزدىدىم.ئۇ كىتابنى كۆرۈش جەرياندا بىرەر يىپ ئۇچىنى قالدۇرمىغان دېگىلى بولمايتتى.ئۇ كىتابنى بايىلا بىرى ئارىيەت ئالغان ئىدى.كۈتۈبخانا خادىملىرىدىن بۇ كىتابنى ئىلگىرى ئارىيەت ئالغانلارنىڭ تېزىملىكىنى چىقىرىپ بىرەلەيدىغان-بېرەلمەيدىغانلىقىنى سوردىم.ئۇلار چىرايلىقچە رەت قىلدى.بىراق ئۇلاردىن بىر ئۇچۇرغا ئىرىشتىم،ئۇ بولسىمۇ -كۈتۈبخانىدا بۇ كىتابنىڭ شۇ نەشىردىكىدىن بىرتاللا بار ئىدى،بۇنداق بولغاندا ئۇ كۆرگەن كىتابنى تاپالايتتىم.بىراق بىرەر ئاي ئەتراپىدا كۈتۈشىمگە توغرا كېلەتتى.مەن كۈتۈبخانا خادىملىرىغا ئالاقە نومىرىمنى قالدۇرۇپ قويدۇم،كىتاب قايتۇرۇلغاندا ئۇلار ماڭا خەۋەر قىلىدىغان بولدى. كېيىنكى بىرەر ئايچە ۋاقىت ئوخشاش ئىشنى تەكرارلىدىم. ئۇ خۇددى ئۆزىنى مەندىن يۇشۇرىۋاتقاندەك قارسىنى كۆرسەتمىدى.ئادەم كۆز ئالدىدىكى نەرسىلەردىن باشقىنى قىياس قىلىپ كۆنگىنىدەك مەنمۇ ئۇنى قىياس قىلىشقا باشلىدىم.بىراق ئۇ ھەققىدە جىق نەرسە بىلمىگەنلىكىم ئۈچۈن قىياسىم ئۇزاق داۋاملاشمايتتى.قولىدىكى كىتابلاردىن ئۇنىڭ بىر كىتابخۇمار قىز ئىكەنلىكىنى قىياس قىلدىم.بىراق كىتابنى قانداق ئوقۇيدۇ،كىتاب ئوقۇغاندا قانداق ئولتۇرىدۇ،ياتاققا قايتىپ نېمە ئىشلارنى قىلىدۇ،كۈلگەندىكى ئاۋازى قانداق چىقىدۇ؟بۇلارنى قىياس قىلىپمۇ تاپالمايتتىم.ئۇنىڭ سىرلىق ھالدا كۆز ئالدىمدا نامايەن بولۇشى ھەم سىرلىق ھالدا يوقاپ كېتىشى ئۇنى قايتا ئۇچرىتىش ئىستىكمنى ئۇلغايتىۋاتاتتى. كۈتۈبخانىدىكلەر بىر ئايدىن ئاشقاندا ئۇچۇر قىلدى.ئۇچقاندەك بېرىپ كىتابنى ئارىيەت ئالدىم.ئەمما ئەزەلدىن رومان ئوقۇپ باقمىغاچقا قانداق ئوقۇشنى بىلمەي قالدىم.ياتاقتا ئۈستەلگە قويۇپ قويۇپ مۇقاۋىسىگە قاراپ ئولتۇردۇم.ئۇ كۆرگەن كىتاب دەل مۇشۇ ئىدى.قولۇمغا ئېلىپ سىلاپ قوياتتىم،پۇرايتتىم.قەغەز پۇرىقىدىن باشقا پۇراق ئاساسەن يوق دېيەرلىك ئىدى.كىتاب مۇقاۋىسىدە ھۆسنىخەتچىلەپ يېزىلغان ماۋزۇغا قاردىم.كىتاب ئىسمى ئادەمنى بىر خىل قىزىقتۇراتتى.بۇ كىتابتا نېمىلەر سۆزلىنىدۇ،ئوقۇسام ئاندىن بىلەتتىم.بۇ يەردە نۇرغۇن ئاۋارىچىلىق بار ئىدى.مەسىلەن،ئۇ سىزغان بەلگىلەر بىلەن باشقىلار سىزغان بەلگىنى ئارلاشتۇرۇپ قويۇش،كىتاب ئىچىگە بەك چۆكۈپ كېتىپ بەلگىنى ئۇنتۇپ قېلىش ياكى كىتابقا چۆكەلمەسلىك سەۋەبىدىن بەلگىلەرنىڭ ئەھمىيىتىنى يوقىتىشى،كىتابتىن ئۇنىڭغا ئالاقىدار ئۇچۇرغا ئىرىشەلمەسلىك قاتارلىقلار.قانداق ئوقۇش ھەققىدە ئۇزاق باش قاتۇرۇش كەتتىم.ئوقۇماي سىرنى ئاچقىلى بولمايتتى. باشقىلارنىڭ پاراكەندىچىلىكدىن قۇتۇلۇش ئۈچۈن كىتابنى كېچىدە ئوقۇدۇم.بۇنداق بولغاندا زېھنىمنى مەركەزلەشتۈرەلەيتتىم.كىتابنى ئوقۇش ئىستىكى ۋە غەيرى بىر قورقۇنىچ تەڭ مەۋجۇت ئىدى. بىرىنجى بەتتىن باشلاپ ئەستايىدىل ئوقۇشقا باشلىدىم.ئازراقلا بىخەستىلىك قىلسام ئۇنى مەڭگۈ تاپالمايدىغاندەك تۇيغۇدا پۈتۈن كۈچۈم بىلەن كىرىشتىم.ئاپتۇر ھەققىدىكى تەپسىلاتلاردىن تارتىپ كۆڭۈل قويۇپ ئوقۇدۇم.قىسقىچە مەزمۇنىدىن ئايان بولدىكى،بۇ كىتابتا كۆزنىڭ ھېكايىسى سۆزلىنەتتى.سىلەرگە بۇ ھەقتە گەپ قىلىپ بەلگىلىەردىن ئاتلاپ ئۆتۈپ كەتمەسلىك ئۈچۈن كىتاب ئوقۇشنى داۋاملاشتۇرىمەن.يېنىڭىزدىن سۈركۈلۈپ ئۆتۈپ كەتكەن قانچە ئادەمگە دېققەت قىلىپ باققان ئىدىڭىز،ئۇنىڭ كۆزى قانداق رەڭدە،كۆز ئىپادسى قانداق؟ بۇ قۇرلاردا ئاپتۇر ئادەمنى ئەخمەق قىلىۋاتقاندەك تۇيغۇ بېرەتتى.شۇندىمۇ كىشىلەر بۇنىڭغا بەك ئىنرەن قىلىپ كەتمەيدۇ.ئۆمرىدە قانچىلىك ئادەم بىلەن كۆرۈشكەنلىكىنى شۇ ساھەنىڭ تەتقىقاتچىلىرىدىن باشقا ئادەم دەپ بېرەلمەيدۇ.كۆز كۆرۈشكە،بايقاشقا يارىتىلغان دېگەن گەپنىڭ مەنىسىگە ئەمدى يېتىۋاتسام كېرەك.ئۇنى ئۇچراتماستا ئۇنىڭ مەۋجۇتلىقىنى بىلمەيتتىم.ئۇنى بىر كۆرۈشۈم بىلەن ئاشىق بولدۇم.ئۇ ئېسىمدىن چىقمايدۇ،مەن ئۇنىڭ مەۋجۇتلىقىنى ئۆزۈمدە كۆتۈرۈپ يۈرىمەن.ئويلىغىنىمدەك كىتابقا نۇرغۇن بەلگىلەر سىزىلغان ئىدى.بىراق قايسنىڭ ئۇ قويغان بەلگە،قايسى باشقىلار قويغان بەلگە بۇنى پەرقلەندۈرمەك قىيىن ئىدى.جۈمىلىلەر كىلەڭسىز بولغاننىڭ ئۈستىگە ئادەمنىڭ ئېسىدە تۇرمايتتى.ئالدىنقى بەتتە ئوقۇغانلىرىم غۇۋالىشىپ تۇراتتى.بەزى جۈملىلەر نەچچە بەت ئەتراپىدا سوزۇلغان بولۇپ،بىر جۈملىنىڭ ئاخىرىغا چىقىپ بولغىچە تىنىق يېتىشمەي ئادەم بوغۇلۇپ قالاتتى.ئاپتۇرنىڭ ئالدىنقى بۆلەكتىكى كۆز ھەققىدىكى تەسۋىرنى ئەسلەپ يېزىپ بېرەلەمسىز دېگەندەك قاملاشمىغان سۇئاللىرى ئادەمنىڭ ئىچىنى پۇشۇراتتى.ھازىر راستىنى دېسەم بۇ سۇئالغا جاۋاب بېرەلمەيمەن ھەم سۇئالنىڭ جاۋابىنىڭ قانچىنچى بەتتە ئىكەنلىكىنىمۇ بىلمەيمەن.ئاستىغا سېزىلغان بەلگىلەرنى ناھايىتى ئىنچىلىك بىلەن كۆرۈۋاتقان بولساممۇ ئۇنىڭغا ئالاقىدار ئۇچۇرغا ئىرىشەلمەي، مەيۈسلىنىپ كېتىپ باراتتىم.بۇ كىتابنى ئوقۇۋاتقان ئۈچىنچى كېچە ئىدى.كىتابنى ئوقۇپ بولۇشقا ئازلا قالغان ئىدىم.مۇشۇ چاغقىچە بىر نەرسىنى بايقىيالىمغىنىمغا قاراپ ئۆزۈمنى ئەيىبلەۋاتاتتىم.شۇندىمۇ كىتابنى ئاخىرىغا چىقىرىپ ئوقۇماي تۇرۇپ يەكۈن چىقارغىلى بولمايتتى.كىتابتا تىلغا ئېلىنغان ئاپتۇر ۋە كىتابلارنى بىر-بىرلەپ خاتىرلەپ ماڭدىم.بۇ كىتابنى ئوقۇغان ئوقۇرمەن بۇ كىتابتا تىلغا ئېلىنغان ئاپتۇرنى ۋە كىتابلارنىمۇ ئۇقۇشى مۇمكىن ئىدى.بىر كىتابتىن چىقمىسا يەنە بىر كىتابتىن چىقىشى،ياكى شۇ كىتابلارنى ئىزدەش جەريانىدا يەنە دوقۇرىشىپ قېلىشىمىزمۇ مۇمكىن دەپ ئويلايتتىم.بۇ كىتابتا يەنە چىراي-تۇرقى،كۆزىگە قاراپ بىر ئادەمنى قانداق ئىزدەپ تېپىش ھەققىدە نۇرغۇن بىلىملەرنى سۆزلىگەن ئىدى.كىتابنى ئوقۇپ تۈگۈتۈپ ھەيران قالغىنىم شۇ بولدىكى،ئاپتۇر ئايرىم بۆلەكلەردىن باشقا ئوقۇرمەننى كولدۇرلاتقان ئىدى. ئاخىرقى قىسمىدىكى بىر ئېغىز گېپىنىڭ راستلىقىغا ئىشەندىم.يەنى-ئاخىرلاشماس ھېكايە ئىچىگە كىرىپ قالدىڭىز! دەپ باشقا بىر كىتابنى تەۋسىيە قىلغان ئىدى.ئىش بىر كىتاب بىلەن تۈگىمەيتتى.ئۇ بەلكىم بۇ كىتاب تەۋسىيە قىلغان كىتابنى ئوقۇۋاتىدۇ،ياكى ئۇ كىتاب كۆرسەتكەن باشقا كىتابقا ئۆتۈپ بولغاندۇ.شۇنداق،دەرھال ئۇ كىتابنى تېپىپ ئوقۇش كېرەك ئىدى.بىراق ئەمدى تاڭ سۈزۈلگەن بۇ چاغدا كۈتۈبخانىنى ئاچمايتتى.ئاچقان تەقدىردىمۇ مەن ئەمدى داۋاملاشتۇرۇشقا بەرداشلىق بېرەلمەيتتىم. كارۋاتقا چىقىپ ياتتىم.بىراق ئۇ ئېسىمگە كېلىۋېلىپ ئۇيقۇم كەلمەيۋاتاتتى.قايسى چاغلاردا ئۇخلاپ قالدىم بىلمەيمەن.كىتاب،پەشتاق،كۆز چۈشلىرىمدە ئەگىپ يۈرەتتى.چۈشتىن كېيىن بولغاندا ئويغاندىم.ئويغىنىپ بىر تال تاماكا چەكتىم.ھاۋا ئىسسىق ئىدى.تەرلەپ كەتكەن ئىدىم.سوغۇق سۇدا يۇيۇنىۋالغاندىن كېيىن سەل راھەتلىنىپ قالدىم.ئارقىدىن كۈتۈبخانىغا يۈگۈردۈم.ئۇ كىتابنى تاپتىم.بىراق بۇ كىتابتىن بىر نەچچە تال بارلىقىنى بايقاپ بېشىمدىن ئىس چىقىپ كەتتى.ئۇ ئوقۇغان كىتابنى ئوقۇساممۇ بەلگىنى پەرقلەندۈرەلمەيدىغانلىقىم ئېسىمگە يېتىپ سەل تىنچلاندىم.كىتاب جاھازىسى ئالدىدا تۇرۇپلا ئاخىرقى قىسمىنى ۋاراقلدىم.ئاپتۇر بۇ كىتابىدا كىتاب تەۋسىيە قىلمىغاندەك تۇراتتى،بەلكىم بۇ قېتىم ئاخىرىغا ئەمەس باشقا بىر سەھىپىگە ئورۇنلاشتۇرغاندۇ.كىتابنى ئارىيەت ئېلىپ قايتتىم.ئەمما ئوقۇشقا ئالدىرمىدىم.بېشىم ئاغرىپ تۇراتتى.بۇ ئەھۋالدا كىتاب ئوقۇش تازا ئۈنۈملۈك ئەمەس ئىدى.سىرتقا چىقىپ ئايلانغۇم كەلدى.ھاۋانىڭ ئىسسىق بولۇشىغا قارىماي،كۆل بويدىكى دەرەخ ئاستىدا بىردەم ئولتۇدۇم.قاپىقىم تارتىپ قالدى.ئۇنى كۈتۈبخانىغا كىرگەن بولسا كېرەك دەپ ئويلىدىم.كۈتۈبخانا پەشتاقلىردىن بىر نەچچە قېتىم چىقىپ چۈشتۈم.مەكتەپ ئىچىدىكى كۇرژۇك ئېلانلىرىنى،رەسىم چاپلانغا دوسكىلارنى بىر-بىرلەپ كۆرۈپ چىقتىم.ئۇنىڭ رەسىمىنى ئۇچراتمىدىم.ئىسىم تېزىملىكى چاپلانغا قەغەزدىن ھېچنېمىنى ئۇقالمىدىم.ئادەم ئىزدەش ئېلانى چىقىرشنىڭ ئورنى يوق ئىدى،ھەم بۇ ئۇسۇل بىلەن تېپىشنى خالىمايتتىم.ئۇنىڭ مەۋجۇتلىقىنى بىلدىم،ئەمدى ئۇ يوقاپ كېتەلمەيتتى،ھامان بىر كۈنى ئاشۇ پەلەمپەيدە ئۇنى ئۇچرىتاتتىم. 2 ئايلىنىپ يۈرۈپ يېقىن ئەتراپتا بىر بۇتخانا بارلىقنى بايقىدىم.ئۆزۈم دىنغا ئىشىنمىسەممۇ ،بولىدىغانلىكى ئامالنى سىناپ باقماقچى بولۇپ بۇتخانا تەرەپكە سۈرۈلدۈم.بۇ يەرگە يىگىت-قىزلار،ئوتتۇرا ياشلىقلار،ياشانغانلار كىرىپ-چىقىپ تۇراتتى.ئىبادەت قىلىش ئۈچۈن مەخسۇس راستلانغان ياستۇق شەكىلىك كۆرپە ئۈستىدە ئولتۇرۇپ بۇدسادۋاغا باش ئۇرۇپ،كۆزلىرىنى يۇمۇۋېلىپ ئېغىزلىرىنى مىدىرلىتىپ نېمىلەرنىدۇر تىلىشەتتى.بۇتخانا ئىچىنى قويۇق كۈجە ھىدى قاپلىغان ئىدى.بىر راھىپ ماڭا قۇتا ئىچىدىكى ھەرخىل خەتلەر يېزىلغان تارشىنى تارتقۇزۇپ قۇلىقىمغا پىچىرلىدى.تارشا ئۈستىگە يېزىلغان خەتلەرنى ئاساسەن ئوقۇيالمايتتىم،راھىبنىڭ ماڭا دېگەن گېپىنى چالا-پۇچۇق چۈشەندىم.مەن كۆرپە ئۈستىدە ئولتۇرۇپ تىلەك تىلدىم.ئۇنى تېزراق ئۇچرىتىش ئۈچۈن بۇدسادۋانىڭ يول كۆرسىتىشنى،ياردەم قىلىشىنى ئۈمىد قىلدىم.تىلەك تىلەش ئاخىرلاشقاندىن كېيىن ئېئانە ساندۇقىغا ئەللىك كوي تاشلىدىم.ئاندىن بۇتخانىدىن چىقىدىغان چاغدا ئىلاھىي بېلىققا تەڭگە تاشلىدىم.نېمىشقا قىلىچە ئىككىلەنمەي بۇنداق قىلغانلىقمنى بەلكىم ھاياتىمنىڭ ئاخىرقى مېنۇتلىرىغىچە ئۇنتۇيالمايمەن.يولغا چىقىپ دەريا بويىغا كەلدىم.دەريا بويىدا سۇ ئۈزىۋاتقانلار،قۇلۇلە قېپى تېرىۋاتقانلار،يەنە كۈنلۈك ئاستىدا ئولتۇرۇپ بېلىق تۇتۇۋاتقانلار،سەيلە قىلىۋاتقانلار بار ئىدى.بۇ يەرگە بىر ساۋاقدىشىمغا ھەمراھ بولۇپ كەلگەندىن كېيىن كېلىپ باقمىغان ئىدىم.بۇ خىلى بۇرۇن بولغان ئىش ئىدى.ھازىر دەريا ئەتراپىنى گۈزەللەشتۈرۈپ گۈل –گېياھ،مەن ئىسمىنى بىلمەيدىغان دەرەخلەرنى كۆچۈرگەن ئىدى.تاشلىنىپ قالغان دەريا ئەتراپى رايۇنىغا نۇرغۇن قۇرلۇشلار سېلىنغان ئىدى.دەريا سۈيىنىڭ ئېقىشىغا قاراپ بىردەم تاماشا قىلدىم.ئاندىن دەريانىڭ يۇقىرى قىسمىغا قاراپ ماڭدىم.دەريا بويىدىكى چىغىر يولمۇ ئۆزگىرىپ كەتكەن ئىدى.ئايىغىمنى سېلىۋېتىپ يالىڭياغ ماڭدىم.ھەقىقەتەن راھەت ئىدى.دەريا سۈيى تۆگىنىڭ لوكىىسىدەك يايسىمان ھەرىكەت قىلماي تىنىچ ئاقاتتى.بەلكىم تىنىچ دېيىشىم باشقىلارغا ياقماس.بىراق مەن قەلبىمنىڭ تىنچلىنىشنى،ئۇنى كۆرۈشتىن بۇرۇنقى كۈنلەردىكىدەك تىنچلىنىشىنى ئارزۇ قىلاتتىم.بىراق ئارزۇ دېگەن ئارزۇ،ئۇنىڭغا يەتكىلى بولمايدۇ.شۇنداق،ئۇ ئۆز قەلبىنى تىڭشاۋاتسا كېرەك.ئۇنىڭ بوش شىلدىرلىشى ،كۆپۈكلىنىشىدىن سىرت ئۇنىڭ ھاياتلىقىغا -ئېقىۋاتقانلىقىغا ھېچكىم ئىشەنمىسە كېرەك.بەزىدە مەن ئېقىۋاتقان بولسام كېرەك دەپمۇ ئويلاپ قالاتتىم.شۇدەم ئۇنى تەقدىرگە تەن بەرگەن،غەمكىن بىر ئادەمگە ئوخشاتسام يامىنى بولماس.مەن دەريا بويىدا ئولتۇرۇپ تاش،قۇلە قاپلىرىنى تېرىۋاتاتتىم.تاشلار ھەر خىل شەكىلدە ئىدى.سۇ ئۇلارنى يالاپ شۇنداق شەكىللەرگە كەلتۈرگەن بولۇشى مۇمكىن دەپ ئويلىدىم.بەزىلەر بۇ تاشلارنى مۆجىزە دەپ قارىشى مۇمكىن(ئىلگىرى بىر ساۋاقدىشىم شۇنداق دېگەن ئىدى)،بىراق مەن ئۇنداق قارىمايمەن.قۇلۇلە قاپلىرى ئىچىگە كىرىۋالغان شېغىل-تاشلارنى پاكىزە ئادالاپ قۇلىقىمغا يېقىن ئەكەلدىم.باشقىلار ئېيتقىندەك ئاۋازلارنى ئاڭلىيالمىدىم.بەلكىم قۇلىقىمدىن مەسىلە چىققان بولۇشىمۇ ۋە ياكى ئۇلار خاتا سەزگۈگە ئىشىنىپ قېلىپ يوق بىر نەرسىنى بار قىلىۋالغان بولۇشىمۇ مۇمكىن ئىدى.قايتا قايتا سىناپمۇ دېڭىز شاۋقۇنى،كىرىسلاشلارنى ئاڭلىيالمىدىم.دېڭىز ئاستىدا بىر پەشتاق،پەشتاقتا بىر قىز تۇراتتى.ئېقىۋاتقان سۇدا ئۇنىڭ چىرايىنى ئېنىق ئىلغا قىلالمدىم.ئاندىن ھېلىقى شىرىن ئاۋاز يەنە ئاڭلاندى.سۇغا چىلاپ ئولتۇرغا پۇتۇمنى سۇدىن دەرھال تارتىۋېلىپ كەينىمگە داجىدىم.چېكەمدىن تەر ئېقىۋاتاتتى.بۇ يەردە ئۇزاق تۇرسام بولمايدىغانلىقىنى پەملەپ سۈزگەن قۇلۇلە قېپى،تاشلارنى كۆتۈرۈپ دەريادىن يېراقلىدىم.ياتاققا قايتىپ كەلدىم.كىتاب ئۈستىلىم ئۈستىدە تۇراتتى.قوشنا ياتاقتىن بىر تال يىڭنە تېپىپ چىقتىم-دە،قۇلۇلە قاپلىرىنى تېشىشكە باشلىدىم.قۇلۇلە قاپلىرى قاتتىق ئىدى.يىڭنە قاتتىق ھەم سىلىق قۇلۇلە قېپىدا تىيىپلا تۇراتتى.يېرىمنى تېشىپ بولغىچە قولۇمنىڭ نەچچە يېرىنى تەشتىم.قېپقىزىل قان ئېقىپ چىقتى.قاننى بۇرنۇمغا ئەكىلىپ پۇراپ بېقىپ زادى قانداق پۇراقلىقىنى بىلەلمىدىم.توساتتىن قېنىمنى تېتىپ بېقىش ئىستىكىم قوزغالدى.بۇ ئويۇم بىر خىل يىرگىنىشلىك بولسىمۇ پەقەتلا ئۆزۈمنى باسالماي قېنىمنى شوراشقا باشلىدىم.قان سەل تۇزلۇق بىلىندى.بىر ئاز شورىغاندىن كېيىن قان شورىغۇچىدەك ئۆزۈمنى توختىتالماي قالدىم.قېنىم بارغانسېرى تەملىك بىلىنىپ ،تېخىمۇ ئىچىرقاپ كەتتىم.بۇ بىر شۇملۇقنىڭ بېشارىتىدەك قورقۇنچ باستى.ئېچىملىك بىلەن ئۇسسۇزلۇقۇمنى بېسىشىم،بۇ قىلمىشىمنى دەرھال توختىتىشىم كېرەك ئىدى.ئۇسسۇزلۇق بەكمۇ بەتتام تېتىدى.تېتىدى دېگەندىن كۆرە ئەسلى تەمىنى يوقاتقان دېيىش مۇۋاپىق ئىدى.ئارقا-ئارقىدىن ئىككى تال تاماكا چېكىپ سەل تىنىچلاندىم.قۇلۇلە قېپىنى تېشىپ يېپقا ئۆتكۈزۈپ بولغۇچە قولۇمنىڭ تېرىسىنىڭ تېشىلمىگەن،سۈرۈلمىگەن يېرى قالمىغان ئىدى.شۇندىمۇ ئۆزۈمگە قاراپ كۈلۈمسىرەپ قويدۇم.ئۈستىلمدە بىر پارچە تەشۋىقات ۋەرىقى تۇراتتى.كىم،قاچان قويۇپ قويغىنىنى ئۇقمايتتىم.قولۇمغا ئېلىپ قاراپ باقسام قان تەقدىم قىلىش ھەققىدىكى مەزمۇنلار ئىكەن.بۇ مۇنداق بىر قىزىقارلىق ئىشنى ئېسىمگە سالدى.مەكتىپىمىزدىكى چىرايلىق بىر قىز ھادىسىگە ئۇچراپ جىددىي قان لازىم بولۇپ قالغاندا،مەكتەپتىكى پۈتۈن ئوغۇللار دېگۈدەك بارغانمىش.ئۇزۇن نەچچە سەپ ھاسىل قىلىشىپ،مەن ئاۋۋال تەقدىم قىلاتتىم ،دەپ بىر-بىرىسى بىلەن ئۇرۇشۇپ قالغىلى تاس قالغانمىش.مەن بۇلارنى ياتاقتىكىلەردىن ئاڭلىغان ئىدىم.ئۇ چاغدا گوۋدەن بىلەن ئويۇن ئويناۋاتاتتىم.بالكۇن تەرەپتە ياتىدىغان ياتاقدىشىم يەنە مۇنداقراق بىر گەپنى قىلغانلىقى ئېسىمدە: -ناۋادا ئۇ قىز چىرايلىق بولمىغان بولسا قان تەقدىم قىلىدىغانلار جىق چىقماسلىقى مۇمكىن ئىدى.قۇلىقىمغا شۇنداقلا كىرىپ قالغان ئىدى.تەشۋىقات ۋەرىقىنى ئەخلەت ساندۇقىغا تاشلىۋەتتىم.مۇشۇنداق بىر نېمىلەرنى تارقىتىدىغانلارغىمۇ ئۆچ ئىدىم.توختىماي ئىشىك چېكىپ ئادەمنى ئاۋارە قىلاتتى.ئاندىن چىرايىغا ساختا كۈلكە يۈگۈرتۈپ بىر مۇنچە چۈشەنچە بېرەتتى.كېيىن بۇلاردىن قۇتۇلۇش ئۈچۈن ئىشىككە يوغان قىلىپ«تەشۋىقات ۋەرىقى لازىم ئەمەس،ئاۋارە قىلماڭ!»دەپ يېزىپ قويغىنىمدىلا بۇلارنىڭ ئايىقى ئۈزۈلگەن ئىدى.شۇنداقتىمۇ ئۇلارغا ئىچىم ئاغرىيتتى.ئائىلىسىنىڭ يۈكىنى ئازراق بولسىمۇ يىنىكلىتىش ئۈچۈن باشقىلارنىڭ تىل-دەشنام،سىسىق گەپلىرىگە پەرۋا قىلماي ياتاقمۇ-ياتاق قاترايتتى.مەندەك ئائىلە ئەھۋالى ياخشى بولسا ئىدى،ئۇلار باشقىلارنىڭ چىرايىغا قاراپ كۈن كەچۈرىدىغان بۇ يولنى تاللىمىغان بولار ئىدى.ئۈستەلگە كېلىپ ئولتۇردۇم.ئويۇن ئويناش خوشياقماي تۇراتتى.نېمە قىلىشنى بىلمەي تۇراتتىم.كىتابنى ئوقاي دېدىم-يۇ،بىراق ياتاقتىكىلەر تېخى ئۇخلىمىغاچقا بىرەر كىنو كۆرۈپ بۇلار ئۇخلىغىچە ۋاقىت ئۆتكۈزمەكچى بولدۇم.قايسى كىنونى كۆرۈش بېشىمنى قاتۇردى.تولا ئىككىلىنىدىغان ئادەت ماڭا قەيەردىن يۇقتى بۇنىڭغا ئىنىق جاۋاب بېرەلمەيتتىم.ئاخىرى بىر كىنونى ئاچتىم. بۇ كىنودا نېرىۋا كېسەللىكلىرى دوختۇرخانىسىدىكى ئىشلار سۆزلىنەتتى؛رۇيا، مۇھەببىتى ئاسىيىلىق قىلىشى سەۋەبىدىن نېرۋىسىدىن ئادىشىپ قالغان بىر قىز بولۇپ ،ئۇنىڭ بۇ يەرگە كىرگىنىگە ئۇزۇن بولغان ئىدى.ئۇ ئەتىدىن كەچكىچە تامغا قاراپ ئولتۇرۇپ ،بىر خاتىرىنى چىقىرىپ بىر نېمىلەرنى يازاتتى. باشقا بىمارلاردەك ساراڭلىق قىلىپ غەلۋىمۇ قىلىپ كەتمەيتتى.دوختۇر بەرگەن دورىنى ۋاقتىدا ئېچىپ،ۋاقتىدا ئارام ئالاتتى؛يەنە بىر ئەر بار ئىدى.ئۇ جىنايەت ئۆتكۈزگەن بولسىمۇ ئۇنىڭ جىنايەت ئۆتكۈزگەنلىكىگە ئالاقىدار ئىسپات تولۇق بولمىغاچ ھەم دوختۇرنىڭ تەكشۈرىشى ئارقىلىق نېرۋىسىدا چاتاق بارلىقى ئىسپاتلىنىپ ،سوت ئۇنى داۋالىنىپ ساقايغاندىن كېيىن ئۇنىڭغا تەدبىر قوللانماقچى بولغانلىقىنى جاكارلاپ بۇ يەرگە ئېلىپ كېلىنىپ داۋالىنىۋاتقان ئىدى.ساقچىلار پات-پات كېلىپ ئۇنىڭ ئەھۋالىنى بىلىپ تۇراتتى،بەزىدە ئۇنىڭ بىلەن سۆھبەتلىشىش ئۈچۈن مەخسۇس خادىملار كېلەتتى.بىراق ئۇ باشتىن-ئاخىر بىر گەپنى تەكرارلايتتى:مەن ساراڭ ئەمەس،مەن جىنايەتچى ئەمەس! ئۇنىڭدىن باشقا نۇرغۇن بىمارلار بار ئىدى.كۆزلىرى گۆرنى ئەسلىتىدىغان بىر پىرسۇناژ ئاياللارنىڭ ئېسىدە قالسا كېرەك دەپ ئويلايمەن.ئۇ ئىلگىرى بىر پىسخىكا دوختۇرى ئىكەنلىكى سۆزلىنەتتى.دوختۇر باشقىلارنى داۋالىيالىغان بىلەن ئۆزىنى داۋالىيالماپتۇ دېگەن مۇشۇ-دە،دەپ قويدۇم ئىچىمدە.ئۇ دوختۇرلۇق قىلىۋاتقان مەزگىللەردە بىر ئايال ئۇنىڭغا كېسەل كۆرسەتكىلى كېلىدۇ،كېيىن بىلىشىمىزچە ئۇ ئايال دەل بۇ دوختۇرنىڭ ئاشنىسى بولۇپ،ئۇزۇن يىللار ئىلگىرى دوختۇر ئۇ ئايالنى ئويۇنچۇق قىلىپ تاشلىۋەتكەن،ئاخىرى بۇلارنىڭ بىر تار كۆۋرۈك ئۈستىدە دوقۇرۇشۇپ قالغانلىقىنى كۆرمەمدىغان دەۋەتتىم.ئۇ ئايالمۇ پىسخىك دوختۇر ئىدى.دوختۇر ئۇ ئايالنى داۋالاش جەريانىدا ئاتالمىش بىمار ئايالنىڭ قىلتىقىغا دەسسەپ ئۆزى ئۇنىڭ بىمارىغا ئايلىنىدۇ،ئاخىرىدا بولسا ئۇ ئايال جىنكەشلىك ئۇسۇلى بىلەن ئۇ ئەرنى نېرۋىسىدىن ئاداشتۇرۇپ، ئۇ ئەر دوختۇرخانىغا كىرىپ قالىدۇ. دوختۇرخانىغا كىرگەندىن كېيىنمۇ ،ئۇ خىزمەت قولايلىقىدىن پايدىلىنىپ ئويناپ تاشلىۋەتكەن(ھەتتا بەزىلىرى ئۆزىنى ئۆلتۈۋالغان)لارنىڭ ئەرۋاھلىرى توختىماي پاراكەندە قىلىپ ،ئۇنىڭ كېسىلىنىڭ ساقىيىشىدا پەقەتلا ئۆزگىرىش بولمايدۇ.ياتاقنىڭ چىرىقى ئۆچتى.ياتاقداشلىرىم چىراقنى ئۆچۈرۈپ ئۇخلاش ئۈچۈن تەييارلىق قىلاۋاتتى.ئۈستەل چىرىقىمنى يېقىپ ئۈستەلدىكى كىتابنى كۆردۈم.ئەمدى كىنونى ئۆچۈرۈپ كىتاب كۆرۈشۈم كېرەك ئىدى.قۇلۇلە قېپىدىن توقۇلغان بېلەيزۈكنى قولۇمغا سېلىۋالدىم.قولۇمنى ھەر مىدىرلاتسام ئۇلار ئۆز-ئارا تېگىشىپ شاراقلايتتى.بۇ ئاۋاز ياتاقداشلىرىمنى بىئارام قىلىشتىن ئەنسىرەپ ئۇنى قولۇمدىن چىقىرۋېتىپ ئۈستەلگە قويدۇم.ئۇنىڭغا قاراپ قولۇمدىكى قاپارتمىلارنى سىلىدىم.قولۇمدا قان دېغى تۇراتتى.كۆڭلۈم قان ئىچىشنى تارتىپ تۇراتتى.سۇخانىغا چىقىپ قولۇمنى چايقاپ قان داغلىرىنى يۇيۇۋەتتىم.ئارقىدىن ھېلىقى بېلەيزۈكنىڭ ماڭا قاننى ئەسلەتمەسلىكى ئۈچۈن تارتمىغا سېلىۋەتتىم.كىتابنى ئالدىمغا تارتىپ ۋاراقلاشقا باشلىدىم. ئاپتۇر بۇ كىتابقا مۇندەرىجە تۇرغۇزمىغان ئىدى.پەقەت كىرىش سۆز ئورنىدا ئازراق گەپ قىلغان ئىدى.قارىغاندا بۇ ئاپتۇرنىڭ ئۆزگىچە ئۇسلۇبى بولسا كېرەك ئويلىدىم.بىرىنچى بەتتە ئىككى جۈملە ئاستىغا قېرىنداش قەلەم بىلەن سىزىق سىزىلغان ئىدى.بىرىنجى جۈملە ئاستىدىكى سىزىق ناھايىتى تېز سىزىلغان بولسا كېرەك،ئىز ئۇنچە قىنىق چىقمىغان ئىدى.ئىككى جۈملە ئاستىدىكى سىزىق خىلى قىنىقلا سىزىلغان،يەنى كېلىپ سىزىقنىڭ ئىزى ئىككىنچى بەتكىمۇ ئۆتۈپ كەتكەن ئىدى.دېمەك بۇ جۈملە ئۇ ئوقۇرمەننىڭ كۆڭلىدىكىنى تېپىۋالغان ۋە ياكى ئۇنىڭ بىرەر سىرىنى ئاشكارلىۋەتكەن دېيىشكە بولاتتى.ئۇنداق بولىمغاندا بۇ سىزىقنىڭ بۇ قەدەر قىنىق سىزىلىشىنى چۈشەندۈرگىلى بولمايتتى.قانداقلا بولمىسۇن ئىككىنچى جۈملىنى ئوقۇرمەنلەرگە ئوقۇپ بەرگۈم كەلدى.«ھايات بىر چاقچاق،ئۇ ھەققىدە باشقىلارغا سۆزلەپ ئاۋارە بولما،ئۇنىڭدىن ئۆچ ئېلىشنى ئويلىما،ئۇنىڭ جاۋابىنى تاپىمەن دەپ جان-جەھلىڭ بىلەن ئۆزۈڭنى ئۆلۈمگە تۇتۇپ بېرىدىغان ئىشنى تېخىمۇ قىلما،كەلگۈسى ۋە ئۆتمۈشتىن يېنىپ چىق،ئەگەر سەن ئەدەبىي ئەسەر بولساڭ،ژانىرىڭنى بىچارىلىك دېمەكتىن باشقا ئامالىم يوق...»كىتابنىڭ بېشىدىلا بۇنداق چۈشكۈن گەپلەرنى قىلىشى كۆڭلۈمگە تازا ياقمىدى.ئەگەر ئۇ جۈملىلەرنى ئوقۇپ ئۆزىگە چۈشكۈنلۈك يۇقتۇرىۋالسا قانداق قىلغۇلۇق ؟ توساتتىن كاللامدا ئەكىس ئەتكىنى شۇ بولدىكى،ئۇ نېمىشقا بۇنداق كىتابلارنى ئوقۇيدۇ ؟ بۇ ئويۇم بەكمۇ بىمەنە ئىدى.چۈنكى بۇ كىتابنى ئاپتۇر ئالدىنقى كىتابىدا تەۋسىيە قىلان ئىدى.ئۇ بۇ كىتابنى ئوقۇغان بولۇشىمۇ،ئوقۇماي تاشلاپ قويغان بولۇشىمۇ مۇمكىن ئىدى.ئالدىمدا نۇرغۇن ئېھتىماللىقلار چېچىلىپ ياتاتتى.ئەگەر ئۇ بۇ كىتابنى ئوقۇمىغان بولسا مېنىڭ بۇ كىتابنى داۋاملىق ئوقۇشۇمنىڭ مەنىسى قالمايتتى؛بۇنى ئىنقلىيالمايتتىم،شۇڭا ئۆزۈمنى ئۇنىڭ بۇ كىتابنى كۆرگەنلىكىگە ئىشندۈرۈشۈم كېرەك ئىدى.قەدىرلىك ئوقۇرمەنلەر،بۇ ئىشتا مېنى ئەيىپلىمەڭلار ،گەرچە بۇ بەكمۇ كۈلكىلىك ئىش بولسىمۇ ،مەن چوقۇم بۇنىڭغا ئىشەنمەسلىككە ئامالسىز قالدىم.شۇنداق،ئۇ بۇ كىتابنى ئوقۇدى.سىلەر سۆزۈمنى ئاڭلاۋاتقان بولساڭلار ،ماڭا مەدەت بېرىش يۈزىسىدىن بولسىمۇ سۆزۈمنى قايتا تەكرارلاپ قويساڭلار سىلەردىن بەكمۇ خۇرسەن بولغان بولاتتىم.بايا چۆرىۋېتىشكە تاسلا قالغان كىتابنى يەنە ئالدىمغا قويۇپ ۋاراقلاشقا باشلىدىم.بىر قانچە بەت ئوقۇغاندىن كېيىن مەلۇم بولدىكى،بۇ ئاپتۇرنىڭ سىنىقى ئىدى.«ھۆرمەتلىك ئوقۇرمەن،سۆزۈمگە قۇلاق سېلىڭ !ئەگەردە مەن داڭلىق يازغۇچى بولماي،ناھايىتى قىزىقارلىق كىتاب يازسام سىز ئوقۇمسىز؟ بۇنىسى ناتايىن،بۇ ۋاقىتتا سىز مېنىڭ ئىسمىمنىڭ نېمىلىكىنىمۇ بىلەلمەيسىز،مېنى تونۇيدىغانلاردىن باشقىلارغا بۇ كىتابىمنى ئوقۇش نىسىپ بولمايدۇ.باشقا تىللارغا تەرجىمە قىلىنىپ كەڭ ئوقۇرمەنلەر بىلەن ئۇچرىشىش پۇرسىتى تېخىمۇ يوق دېيەرلىك.مەن ئوقۇرمەنلەرنىڭ ھېكايەمدىن ئوقۇپ زىرىكىپ قېلىشىدىن ياكى ئۇنى ئازراق ئوقۇپ تاشلىۋېتىشىدىن بەك ئەنسىرەپ كەتمەيمەن.چۈنكى مەن ھېكاينى ئوبدان سۆزلەيمەن.خۇددى ھەر بىر ئوقۇرمەن ئۈچۈن مەخسۇس تەييارلانغان ئوقۇشلۇقتەك ھەممە ئادەمگە يارايدۇ.مەن بۇ كىتابىمنىڭ بېشىدىلا بىر ئويۇن ئويناپ ئوقۇرمەننى سىناپ باقماقچى بولدۇم.يەنى-كىتابنىڭ بېشىنى ئەڭ چۈشكۈن پاراڭلار بىلەن بېزەپ ئوقۇرمەننى ئازدۇردۇم.بىلىمەن،بەزىلەر بەرداشلىق بېرەلمەي تاشلاپ قويۇشتى،بۇلاردىن ئاغرىنمايمەن.رەڭدار مەزمۇنلار كېيىنكى سەھىپىلەرگە ئورۇنلاشتۇرۇلغان،ۋاقتىڭلارنى كۆپ ئېلىپ قويۇپ قۇرۇق گەپ ساتقىنىمدىن كەچۈرۈم سورايمەن.يېڭى بىر دۇنياغا كەگىنىڭىلارنى قارشى ئالىمەن.بۇ يەردىكى سەپىرىڭلار كۆڭۈللۈك بولغاي!»ئۇ بۇ كىتابىنى كۈندىلىك خاتىرە شەكىلدە يازغان ئىدى.ئوقۇۋېتىپ ھەيران قالغىنىم شۇ بولدىكى،باشقا بىر تىلدىكى يازغۇچى مەن يېزىشقىمۇ ئۈلگۈرمىگەن كۈندىلىك خاتىرەمنى كۆچۈرۈپ ماڭا دەپ بېرىۋاتاتتى.ئورنۇمدىن سەكرەپ تۇرۇپ كەتتىم.ئورۇندۇقنىڭ پۇتى غىچىرلاپ كەتتى.بۇ ئىنىقلا چېكىدىن ئاشقانلىققۇ! ئىچىمدە يازغۇچىنى تىللايتتىم.قانداقلا بولمىسۇن ئۆپكەمنى بېسىۋېلىپ ئولتۇرۇپ ئوقۇشۇم كېرەك ئىدى. سازايى بولۇپتىمەندە ،دەپ ئويلىدىم.چۈنكى سۆزلىنىۋاتقىنى ئىنىقلا مېنىڭ ھېكايەم ئىدى. 2-ئاينىڭ 27-كۈنى، مەن ئۇنى ئۇچراتتىم.بۇ كۈن نوھنىڭ كېمىسى يولغا چىققان كۈن ھەم كەپتەر زەيتۇن شېخىنى چىشلەپ قايتىپ كەلگەندىن كېيىن نوھ كېمىدىكلەرنى باشلاپ قۇرۇقلۇققا دەسسىگەن كۈن.مەن نېمىشقا يا ئىلگىرى ئەمەس يا كېيىن ئەمەس بۇ كۈندە ئۇنى ئۇچرىتىمەن ؟بۇنىڭدا چوقۇم بىر سېھىر بار.يا باشقا بىرى قەستەن مۇشۇنداق ئورۇنلاشتۇرىۋاتامدۇ ؟ مەن بۇلارغا ئالدىرىماي جاۋاب تېپىشىم كېرەك. ئۇنىڭ كۆزى ئاسماندەك كۆك ئىدى.بەلكىم دېڭىزدەك كۆك بولۇشىمۇ،ھەتتا دۇنيادا بۇ كۆك رەڭنى ئىپادىلەش ئۈچۈن سۆز تېپىلماسلىقىمۇ مۇمكىن.قانداقلا بولمىسۇن ئۇنىڭ كۆزى ئاسماندەك كۆك ئىدى دەپ تۇراي.مەن بېشىمنى كۆتۈرۈپلا كۆك ئاسماننى كۆرەلەيمەن.بەزى چاغلاردا ھاياتتىن زارلىنىپ ئاسمانغا قارىغان چاغلىرىممۇ بولغان،بىراق ئاسمان مېنى ئۇنىڭدەك مەھلىيا قىلالمايدۇ.ئۇنىڭ چېچى بۈدۈرە ئىدى.خۇددى شوخ دولقۇنلاردەك دولقۇنلاپلا تۇراتتى.پۈتۈن ئۇزايىنىڭ كۆك رەڭ بىلەن تولغىنىغا قاراپ ئۇنىڭ كۆك رەڭگە ئامراقلىقىنى پەرەز قىلغان ئىدىم.ئۇ ماڭا قاراپ مېنى كۆرمىدى.مەن ئۇنى ئېتتىك كېتىۋاتقان ئاممىۋىي ئاپتۇبۇسنىڭ ئەينەكىدىن كۆرۈپ قالغان ئىدىم.ئاشۇ كۈنگىچە مەندە ئايال جىنىسقا نىسبەتەن ھېچقانداق ھىسيات قوزغىلىپ باقىمىغان ئىدى.بۇ سەھىپىلەرنى ئوقۇۋاتقاندا، ئوقۇرمەنلەر بىر سۇئالنى سورىشى ئىنىق.سەن كىتابنىڭ بېشى قىسمدا ،بىر قىزنى كۈتۈبخانىنىڭ پەشتىقىدا ئۇچرىتىپ،شۇ قىزغا ئاشىق بولدۇم دەۋاتاتتىڭ،بۇ يەردە دەۋاتقىنىڭ كىم ئەمدى،بۇ ھېلىقى بىلەن نېمە مۇناسىۋىتى بار؟ ئوقۇرمەنلەر مېنى كەچۈرۋەتكەي،ۋاقتىنچە مەن بۇنى سىلەرگە دېمەي تۇرۇشنى لايىق تاپتىم.بىر ھازا تۇرۇپ قالغاندىن كېيىن تاكسىي توسۇپ ئۇ قىزنىڭ ئارقىسىدىن باردىم.شوپۇر تېزلا ئۇ ئاممىۋېي ئاپتۇبۇسقا يېتىشىۋېلىپ ئۇنىڭ كەينىدىن ماڭدى.ئۇ قىزنى يوقىتىپ قويماسلىق ئۈچۈن ھەر بىر بېكەتكە كەلگەندە دېققەت بىلەن ئولتۇردۇم.توپتوغرا ئون تۆت بېكەت ماڭدۇق.ئاخىرى ئۇ قىز ئاپتۇبۇستىن چۈشۈپ يولنىڭ قارشى تەرىپىگە ئۆتۈپ نورمال قەدەم بىلەن ماڭدى.ئۇنىڭ مېڭىشىنى نېمىگە ئوخشىتىشقا ئامالسىزمەن.يولنىڭ قارشى تەرىپىگە ئۆتۈپ ئۇنىڭغا ئەگەشتىم.ئۇنىڭ نەگە بارىدىغانلىقىنى بىلمىگەچكە خىلى ئارىلىق تاشلاپ ماڭدىم.ئۇ كەيىنگە قاراپ مېنى كۆرمىدى.ئون مېنۇت ئەتراپىدا ماڭغاندىن كېيىن بىر قورۇغا كىرىپ كەتتى.قورۇنىڭ ئىشىكىگە كېلىپ ئۇنى مارىدىم.ئۇ سول تەرەپتىكى پەشتاقتىن چىقىپ بىر ئۆيگە كىرىپ كەتتى.ئارقىدىن چىراقلىرى ياندى.مەن تىۋىش چىقارماي ئىككىنچى قەۋەتكە چىقىپ ئۆينىڭ يېنىغا كەلدىم.ئۆينىڭ كارىدورغا قاراپ تۇرىدىغان بىر دېرىزىسى بار ئىدى.مەن دېرىزىنىڭ تېگە كېلىپ ئۇنى مارىدىم.ئۇ بايامقى كېيىملىرىنى سالدى.ئاندىن ئۆي ئىچىدە كېيىدىغان كېيىمى بولسا كېرەك،تەنتەربىيە كېيىمنى كېيىپ ،سىرتتىكى ئاشخانىغا چىقىپ چاي چەينىكى گاز ئوچاق ئۈستىگە قويۇپ،يەنە ئىچىدىكى ئۆيگە كىرىپ كەتتى.ئىچىدىكى ئۆينىڭ دېرىزىسى مەن يۆلىنىپ تۇرغان ئاشخانىنىڭ دېرىزىسىگە ئۇدۇل قويۇلغاچقا ئۇنىڭ ئۆي ئىچىدىكى ھەرىكەتلىرىنى بىمالال كۆرگىلى بولاتتى.ئۇ كومپىيۇتېر ئالدىغا كېلىپ ئولتۇردى.ناخشا قويدى.شۇ ناخشىنىڭ رېتىمى ھازىرغىچە ئېسىمدە بار.ناخشا بەك تۆۋەن ئاۋازدا قويۇلغاچقا ھەم ئارىمىزنى ئىككى تام ئايرىپ تۇرغاچقا ناخشىنىڭ مەزمۇنىدىن خەۋەرسىز ئىدىم.كېيىن باشقىلاردىن سوراپ يۈرۈپ شۇ ناخشىنى ئاڭلىغانمۇ بولدۇم.ئۇ كومپىيۇتېرغا قاراپ ئولتۇراتتى.بارماقلىرى كونۇپكا تاختىسى ئۈستىدە سەكرەيتتى.بەزىدە بارماقلىرى تېزلىشىپ كەتسە،بەزىدە توساتتىن توختاپ قالاتتى،يەنە بەزىدە تورۇسقا قارايتتى.تېلېفۇنى تۇيۇقسىز سايراپ قالدى.ئۇنىڭ يېقىملىق ئاۋازى بىلنەر-بىلىنمەس ئاڭلاندى: -نەگە كېلىپ بولدۇڭ ؟ ھەئە،مەن ئۆيدە،ھە كىرىشىڭدە ئازراق ئۇششاق-چۈششەك ئالغاچ كىر،ھە ماقۇل. ئۇ تېلفۇننى ئۈزۈپ ئاشخانىغا چىقىپ چاي دەملىدى.گاز ئوچاق مەن تۇرغان تامنىڭ ئۇدۇلىدا بولسا كېرەك.تامدىن ئۇنىڭ ناخشا غىڭشىغان ئاۋازى چىقتى.ئۇ تامنىڭ ئىچىدە مەن تامنىڭ سىرتىدا،مەن ئۇنى كۆرۈۋاتىمەن،بىراق ئۇ مېنى كۆرمەيدۇ.ئۇنىڭ تۇرىدىغان يېرىنى بىلىۋالغىنىمنىڭ ئۆزى چوڭ ئىش ئىدى.بايامقى تېلېفۇن پاراڭلىشىشتىن بىرسىنىڭ كېلىشى مەلۇم ئىدى.ئۇ دېرىزدىن سىرتقا قارىغاندا ئۇنىڭ چىرايىنى يەنە بىر رەت كۆرىۋالدىم-دە،تىۋىش چىقارماي قورۇدىن يېنىپ چىقتىم.ئۇدۇل ئۆيگە قايتىپ كەتكۈم يوق ئىدى.شۇڭا ئۆيگە يېقىن يەردىكى بىر قەھۋەخانىغا كىرىپ ئولتۇدۇم.ئەسلى پېۋا ئىچسەممۇ بولاتتى.بىراق بۇ يېقىندا دادامنىڭ سالامەتلىكى تازا ياخشى بولمىغاچقا ئۇنى يەنە ئاچچىقلىنىپ يېتىپ قالمىسۇن دېگەن نىيەتتە قەھۋە ئىچتىم.كىشىلەر ھازىرغا تاقابىل تۇرالمىغاندا كەلگۈسى ياكى ئۆتمۈشتىكى ئىشلار بىلەن كۆڭلىگە تەسكىن بېرىشكە ئادەتلەنگىنىدەك مەنمۇ ھىلى كەلگۈسى ھىلى ئۆتمۈش ھەققىدە خىيال سۈرۈشكە باشلىدىم.خىيالدا مۇمكىن بولمايدىغان ئىشلار مۇمكىنچىلككە ئايلىناتتى.شۇڭا كەلگۈسىنى جىقراق ئويلايتتىم.بۇنداق بولغاندا ھازىرقى كەيپىياتىمنى تۈزىۋېلىشقا پايدىسى تېگەتتى.ئۇنىڭ بىلەن مۇھەببەتلەشكىنىمنى،توي قىلغىنمىنى،بالىلىق بولغىنىمنى ئويلاپ كېتىپتىمەن.بۈگۈن ھەقىقەتەن بىر ئۆزگىچە بىر كۈن بولدى.چۈنكى مەن بىر قىزنى ئۇچراتتىم-دە،ئاشىق بولدۇم.بۇنىڭدىن ئىلگىرى قىزلار بىلەن ئۇچرىىشقا خوشۇم يوق ئىدى.ھەتتا مەكتەپتىكى چېغىمدا قىزلار بىلەن بىر پارتىدا ئولتۇرۇشنى رەت قىلاتتىم.(ئەلۋەتتە،نۇرغۇن ئوغۇللار قىزلار بىلەن ئولتۇرۇشنى ياخشى كۆرەتتى)قىزلارنىڭ ماڭا يازغان سالام خەتلىرىنى كۆرمەسكە سالاتتىم ياكى كۆز ئالدىدا رەھىمسىزلارچە يىرتىپ تاشلايتتىم.ساۋاقداشلىرىم مېنىڭ بۇ غەلىتىلىكىمدىن ھەيران ئىدى.تاكى ئۇ قىزنى ئۇچراتقىچە ھېچقانداق قىزغا كۆڭۈل ئىزھار قىلىپ باقمىدىم.بۈگۈن ئۇ قىز ھاياتىمدا زاھىر بولدى.مەن ئۇزۇندىن بىرى كۈتۈۋاتقان ،بىراق ئۇچراتمىغان بىر قىز ھاياتىمغا كىرىپ كەلدى.ھازىر بېشىمنى ئەڭ قاتۇرىۋاتقىنى خىيالدىن ئۆزۈمنى توختۇتۇپ كۆڭلۈمنى ئۇنىڭغا قانداق ئۇسۇلدا ئىزھار قىلىش ئىدى.مەن بۇ جەھەتتە ھېچنېمە بىلمەيتتىم.مېنى قارا قوساق ساۋاتسىزغا ئوخشاتسا مەن تامامەن قوشۇلىمەن.نۇرغۇن ئىشلارنى بىراقلا ئويلىۋالغاچقىمۇ كاللام تورمۇزلىنىپ قالغان ئىدى.ئۆيگە قايتىپ كارۋاتتا ئىككى قولۇمنى مەھبۇستەك بېشىمغا قويۇپ يېتىپ ئويلانسام تېخىمۇ ياخشى پىلانلار ئېسىمگە كەلتۈرەلەيدىغاندەك تۇيغۇغا كېلىپ قالدىم.ئۆيگە قايتىپ چىققىنىمدا، ئۆيدىكىلەر قانداقتۇر بىر ئىش ئۈستىدە كەسكىن مۇنازىرىلىشىۋاتاتتى.ھەدەم تاماق يېگەن-يېمىگەنلىكىمنى سورىدى.بېشىمنى لىڭشىتىپ قويۇپ ھۇجرامغا كىرىپ كەتتىم.كارۋات ئۈستىگە خاتىرە كومپىيۇتېرنى تارتىپ كېلىپ تۇنجى قېتىم ھاياتىمدىن خاتىرە يازدىم. ئاپتۇرنىڭ ھېكايلىرىمنى قانداق يوللار بىلەن قولغا چۈشۈرگەنىكىگە قىزىقىپ قېلىۋاتاتتىم.دېمىسىمۇ شۇنداق ئىشلارنىڭ بولۇپ ئۆتكىنى غۇۋا يادىمدا ئىدى.جاسۇسمىدۇ دەپ ئويلاپ قالدىم.قانداقلا بولمسۇن ئاپتۇرنىڭ ھېكايىلىرىمگە كۆڭۈل بۆلگىنىگە رەھمەت ئىيتتىم.بەشىنچى ئايدىكى كۈندىلىك خاتىرىدە ئۇنىڭ پال ئاچقۇزغانلىقىنى سۆزلەنگەن ئىدى.بۇ كىتابنىڭ ئاخىرقى بەتلىرىدىن ئايان ئىدىكى،بۇ كىتاب ئۇلارنىڭ ئۈچ يىلغا سوزۇلغان مۇھەببەت تارىخىغا بېغىشلانغان ئىدى.ئاپتۇر بۇ قېتىمقى تەۋسىيە قىلىدىغان كىتابىنى پالچى خوتۇننىڭ سۆزلىرى ئارقىلىق بىزگە يەتكۈزگەن ئىدى.مەن بۇ كىتابنى ئىككى كېچىدە ئوقۇپ تۈگەتكەن ئىدىم.كۆزلىرىم تېلىپ تۇراتتى.تېلېفۇنۇمنى ئېلىپ كۈتۈبخانا خادىملىرىغا ئۇچۇر يوللىۋەتتىم.ئۇلار ئىشقا چۈشكەندە، ماڭا لازېملىق كىتابنىڭ كۈتۈبخانىدا بار-يوقلىقىنى سۈرۈشتۈرەلەيتتىم. ھاياتىمنىڭ ئاخىرقى مېنۇتلىرىدا ئۇنى پەشتاقتا ئۇچراتقانلىقمنى ئەسلىمەي قالمايمەن.دائىم ئۇنى ئويلايمەن،شۇڭا ئۇ ھەر زامان مەۋجۇت ئىدى. داۋامى بار بۇ يازمىنى ئاخىرىدا سەمەندەر تەھرىرلىگەن. ۋاقتى 2015-7-2 08:15

نەي · ۋاقتى: 2015-7-3 22:47:13


	كەينىگە ئىنتىزارمىز

نەي · ۋاقتى: 2015-7-3 22:47:18


	كەينىگە ئىنتىزارمىز

uygurya · ۋاقتى: 2015-7-4 13:17:00


	نەسرى شېئىرلىرىڭىزنىمۇ يوللاپ قويۇڭ ،سەمەندەر ...

waris · ۋاقتى: 2015-7-4 13:27:38

ئەسكەرتىش: يوللىغۇچى چەكلەنگەن. مەزمۇننى كۆرەلمەيسىز .

شېرىن1 · ۋاقتى: 2015-8-14 17:40:04


	ئاخىرى بارما ؟

waris waris توردا يوق جۇغلانما 561	ۋاقتى: 2015-7-4 13:27:38 \| ھەممە قەۋەتنى كۆرۈش ئەسكەرتىش: يوللىغۇچى چەكلەنگەن. مەزمۇننى كۆرەلمەيسىز .
waris waris توردا يوق جۇغلانما 561
	ئىنكاس ئېسىل ناچار جابدۇق پاش قىلىش