ھەسەنجان ئابدۇراخمان: ئەبجەش قوشاقلار

ئۇتغۇر · ۋاقتى: 2015-6-30 14:14:56


	ئەبجەش قوشاقلار (مەزكۇر قوشاقلار «ئۇيغۇر خەلق قوشاقلىرى» كاتگورېيىسىگە كىرسە ئالەمچە سۆيۈنگەن بولاتتىم.) ھەسەنجان ئابدۇراخمان 1 مەن خەت يازغان قەلەمنىڭ، قارا سىياھى قالمىدى. خەت يازساممۇ يار ئۈچۈن، قوللىرىم ھېچ تالمىدى. * * * * * چاپىنىمنىڭ ئوڭ پېشى، قىزىل رەختتە ياماقلىق. تۇنجى سۆيگەن شۇ يارىم، ئۆز ئۆيىدە قاماقلىق. * * * * * بۇغداي، قۇناق بولمىغاچ، كەپتەر باقتىم تېرىقتا. ئوغلۇم ياۋاش بولمىغاچ، كېلىن كۆردۈم قىرىقتا. * * * * * ئاخشام ئۆلگەن ئاق قوينىڭ، تېرىسىنى سويۇپ قويدۇم. ئۆيىگە ماڭغان يارىمنىڭ، مەڭزىگە سۆيۈپ قويدۇم. * * * * * سۇ بولمىسا كۆلچەكتە، بېلىق سەكرەپ ئوينامدۇ؟ پۇل بولمىسا چۆنتەكتە، يارىم مېنى ئويلامدۇ؟ * * * * * گۈل ئۆستۈرگەن تەشتەكنى قارىماي، چېقىپ قويدۇم. يارىم مېنى تاشلىسا، باشقا يار تېپىپ قويدۇم. * * * * * ھويلامدىكى تېرەككە، قاغا قونسا لىڭشىيدۇ. ئوت تۇتاشسا يۈرەككە، ئېغىر مۇڭلۇق غىڭشىيدۇ. * * * * * خاماندىكى ساماننى، بەش ئارىدا سورىدىم. ئىشچان، چېچەن شۇ يارنى، قاش بويىغا توۋلىدىم. * * * * * مەن ئولتۇرغان ئورۇندۇق، توختىماستىن غىچىرلار. شۇ يارىمغا ئانىسى، گەپ ئۆگىتىپ پىچىرلار. * * * * * مەن يىلاندىن قورقىمەن، يىلان ئادەم چاقىدۇ. ئەمما ياردىن قورقمايمەن، يار ناز بىلەن باقىدۇ. * * * * * 2 ئاخشام ياغقان يامغۇردا، ئەنجۈلىرىم ھۆل بولدى. ئويمان بولغاچ قاش بويى، سۇ يىغىلىپ كۆل بولدى. * * * * * قاينام بولغاچ كۈندۈزى، خامان ئالدۇق كېچىچە. بەك ھارغاچقا، بۇغداي-چەش ئېتىزدىدۇر تېخىچە. * * * * * بۇ كەمدىكى ئېتىزلار، قاتار-قاتار ياڭاقلىق. ئۇلىغاچقا ھەر يىلى، ئاچا-ئاچا تاياقلىق. * * * * * گۈلچاي تېرىپ بىر يازدا، ئون كوي بولدى كېلوسى. ئىششەك پۇلغا تەرگۈزۈپ، باشقا چىقتى «دېلو»سى. * * * * * قۇناق شېخى بەك ئېگىز، ئەمما بولدى بىر باشلىق. شۇنداق بولغاچ بۇ يىلى، بەك ئاز بولدى نان-ئاشلىق. * * * * * 3 تاۋۇز ئېلىپ بىر مەپە، ساتالمىدىم كەچكىچە. جاپا تارتتىم ساق بىر كۈن، ئىز پۇلىغا يەتكۈچە. * * * * * تاشلاپ قويۇپ تاۋۇزنى، قوغۇن ساتتىم، ئاز ئالدى. ئىز پۇلىغا چىقىشماي، زىيان چىققىلى تاس قالدى. * * * * * ئويلاپ قالدىم شاپتۇلنى، خەق ئالارمۇ، ئالماسمۇ؟ رامىزان بولغاچ بۇ ئايلار، ئېشىپ قالارمۇ، قالماسمۇ؟ * * * * * قاراقاشنىڭ بازارىدا، ساتتىم سەۋزە، بەرەڭگە. بۇنىڭدىنمۇ زىيان چىقسا، قانداق چىداي ئەلەمگە. * * * * * سېتىپ بېقىپ ھەر نەرسە، پىشىپ قالدىم سودىغا. بىكار قېلىپ بەزىدە، سودا قىلدىم زورىغا. * * * * * 2014-يىل 7-ئاينىڭ 14-كۈنى بۇ يازمىنى ئاخىرىدا Erchin تەھرىرلىگەن. ۋاقتى 2015-6-30 22:20

قاراتېكىن · ۋاقتى: 2015-7-1 00:45:40


	قوشاق ئۆز ئالدىغا مۇستەقىل مەنا ئىپادىلەيدىغانلىقى ئۈچۈن،«ئەبجەش»ئاتالمىسى بىلەن ئىزاھلاش ئارتۇقچە. كۆپىلىرىمىز قوشاقنىڭ شەكىل قۇرۇلمىسنىلا دىققەت مەركىزىمىزگە قويۇۋالىمىز-دە،ئاڭسىز ھالدا «قاپىيە قېلىپى»غا كىرىپ قالىمىز. ئىلگىرى سۈرۈلۈۋاتقان ئىددىيە،تىلدىكى مەنىدارلىق،ئاھاڭدارلىققا چۆكەلمەيمىز. بولمىغىنىدا،قوشاققا يۈزە مۇئامىلە تۇتماس ئىدۇق.

shaidayi · ۋاقتى: 2015-7-1 19:56:49


	ئ‍ۆز ئ‍ىجادىيەتلىرىڭىزمۇ يا باشقىلار سۆزلەپ بەرگەننى توپلاپ رەتلىگەنمۇ، مەنبەسىنى بىر ئ‍ەسكەرتىۋەتمەپسىزغۇ؟ بۇنى ئ‍ەبجەش قوشاقلار دېمەي مۇھەببەت قوشاقلىرى دېسەك بولغۇدەك، تىلى ياخشى قوشاقلاركەن!

ئۇتغۇر · ۋاقتى: 2015-7-3 16:29:56


	shaidayi يوللىغان ۋاقتى 2015-7-1 19:56 ئ‍ۆز ئ‍ىجادىيەتلىرىڭىزمۇ يا باشقىلار سۆزلەپ بەرگەنن ... ئەسسالامۇ-ئەلەيكۇم: بۇ ئۆزۈم ئىجاد قىلغان قوشاقلار ئىدى، مەزمۇن بىرلىكى، ئىددىيە ئورتاقلىقى، مەنىدارلىقىغا ئىمكانقەدەر دىققەت قىلغان ئىدىم. ئۇستازلارنىڭ پىكىرىنى قىممەت بىلىمەن، ئايىمىغايسىزلەر!

ئايشەم1 · ۋاقتى: 2015-7-3 17:12:48


	قوشاقنى ياخشى يىزىپسىز،بىراق نېمە ئۈچۈن ئەبجەش قوشاقلار دەيسىز؟

ئۇتغۇر · ۋاقتى: 2015-7-3 17:16:24


	ئايشەم1 يوللىغان ۋاقتى 2015-7-3 17:12 قوشاقنى ياخشى يىزىپسىز،بىراق نېمە ئۈچۈن ئەبجەش قوشاقل ... كۆپ مەزمۇن ئەكس ئەتتۈرۈلگەن قوشاقلار تېزىسى بولغاچقا، ‹‹ئەبجەش قوشاقلار›› دەپ ماۋزۇ قويغانىدىم.