قاراتېكىن: ئۇنتۇشنى ئۇنتۇلۇش

ئۇنتۇشنى ئۇنتۇلۇش

نامانجان تۇرسۇن قاراتېكىن

تىزىلدىڭ ئەسكە مەرۋايىت بولۇپ،ئۇنتۇشنى ئۇنتۇلدۇم،
ۋاقىتنىڭ چوڭقۇرىدا ئولتۇرۇپ ئۇنتۇشنى ئۇنتۇلدۇم.

خىيالنىڭ تاملىرىدىن ئارتىلىپ كىردىم خىيالىڭغا،
سۈكۈت ئاۋازىدا سۆھبەت قۇرۇپ،ئۇنتۇشنى ئۇنتۇلدۇم.

جۇدالىقنىڭ ناۋاسىدىن تىتىلدى بەلكى تاش ياپراق،
قىزىلگۈللەر ئېچىلدى ئاھ ئۇرۇپ،ئۇنتۇشنى ئۇنتۇلدۇم.

كۆڭۈل ئاخشىمىدىن چىقتىم،چىغىر يولغا ئېلىپ كىردى-
كامان كىرپىكلىرىڭ تال-تال يورۇپ،ئۇنتۇشنى ئۇنتۇلدۇم.

سېغىنچى يەتتى پەرۋازنىڭ،شاماللار تىنىقى ئوتلۇق،
قاناتلاندىم ئۆزۈمدىن دەس تۇرۇپ،ئۇنتۇشنى ئۇنتۇلدۇم.

كۆڭۈل بوستانىڭىزدىن تۆكۈلگەن چىرايلىق غەزىلىڭىز مۇبارەك بولسۇن! ياخشى چىقىپتۇ.

نامانجان، غەزەلنىڭ مۇۋەپپەقىيىتىنى تىل مۇناسىۋەتلىرى ۋە مەجازىي ۋاستىلەردىكى يېڭىلىق، شەكىلدىكى گۈزەللىك، شۇنداقلا ئىپادىلەشتىكى ئۆزگىچىلىكتە دەپ قارىدىم. غەزەل ئىجادىيىتىڭىزگە مۇۋەپپەقىيەت تىلەش بىلەن كىچىككىنە بىر تەكلىپىم بار، شۇنى دەپ قوياي: غەزەلگە ماۋزۇ قىلىنغان«ئۇنتۇشنى ئۇنتۇلۇش» دېگەن بىرىكمىگە قارايدىغان بولساق، ئۇنىڭدىكى«ئۇنتۇلۇش» مەجھۇل پېئىلدۇر. ۋاھالەنكى، غەزەلنىڭ رادىفى سۈپىتىدە قوللىنىلغان «ئۇنتۇشنى ئۇنتۇلدۇم» دىكى «ئۇنتۇلۇش» قا بىرىنچى شەخس بىرلىك قوشۇمچىسى ئۇلانغان. مەلۇمكى، پېئىلنىڭ مەجھۇل دەرىجىسىنى شەخس قوشۇمچىسى بىلەن تۈرلەش مۇۋاپىق ئەمەس. دېمەكچىمەنكى، «ئۇنتۇشنى ئۇنتۇلۇش» تىكى «ئۇنتۇلۇش» نى «ئۇنتۇش» دەپ ئالغان بولساق، شەخس قوشۇمچىسىنى ئۇلاش تامامەن مۇمكىن ئىدى. بۇ يازمىنى ئاخىرىدا   alahidin تەھرىرلىگەن. ۋاقتى  2015-6-26 18:21  

ئالاھىدىن ئاكامنىڭ ئىنكاستىكى پەزىلىتىدىن سۆيۈندۈم.

   مەنمۇ ئالاھىدىن مۇئەللىم تىلغا ئالغان «ئۇنتۇلۇپ قالدىم» دېگەن سۆزنىڭ ئىشلىتىلىشى توغرۇلۇق بىر نەچچەيلەن بىلەن تالاشقان.
   مىسال:
   - ئۆيدە مۇھىم بىر نەرسەمنى ئۇنتۇلۇپ قاپتىمەن.
   - ئالدىراشچىلىقتا ساڭا تېلېفون قىلىشنى ئۇنتۇلۇپتىمەن.
   ...

رەھمەت ئالاھىدىنكا.پوستۇمدىن مېنى تونۇيدىغانلارغا ھېچ ئىشنى قېتىغا ئالمايدىغان ئۆزۈمچىل كۆرۈنىمەن. ئەمما،سەھۋەنلىكىمنى تۇتۇۋالالايدىغان ئادەمنىڭ ئالدىدا گۇيا مەن بىر قوي.
ئورۇنلۇق پىكرىڭىزنى قېتىمغا ئالدىم.

غەزىلىڭىز تولىمۇ يېقىشلىق چىقىپتۇ، قەلىمىڭىزگە بەرىكەت تىلەيمەەن .

مۇبارەك بولسۇن!

غەزەللىرىڭىزدىن  بەھىرلەندۇرگىنىڭىزگە رەخمەت ،يەنىمۇ  نادىر  ئ‍ەسەرلىرىڭىزنى  كۆرسەك دەيمەن

مۇبارەك بولسۇن!

ئۇنتۇشنى ئۇنتۇش، ئۇنتۇشنى ئۇنتىدىم دېگەندەك ئالسا مۇۋاپىقتۇر. «ئۆيدە نەرسەمنى ئۇنتۇلۇپ قاپتىمەن» دېگەن جۈملىدە «ئۈنتۇلۇپ» دېگەن سۆز ھەرگىز چۈشمەيدۇ. چۈنكى بۇ سۆز ئۈچىنجى شەخسكە تارتىپ كېتىدۇ. بۇ چاغدا ئۇقۇممۇ خاتا، جۈملىمۇ خاتا بولۇپ كېتىدۇ. بۇ جۈملىنى بىرىنجى شەخسكە تارتىش ئۈچۈن «ئۆيدە نەرسەمنى ئۇنتۇپ قاپتىمەن» دېگەن تۈزۈك. قىزىق يىرى، «ئۇنتۇپ قاپتىمەن» دېگەن سۆزنى «ئۇنتۇلۇپ قاپتىمەن» دەپ ئېلىپ، ئۇقۇمنى خاتالاشتۇرۇۋەتكەن جۈملىلەر پەرھات تۇرسۇننىڭ «ئۆلۈۋېلىش سەنئىتى» دېگەن رومانىدا كۆپ ئۇچرايدۇ.

كۆڭۈل بوستانىڭىزدىن تۆكۈلگەن چىرايلىق غەزىلىڭىز مۇبارەك بولسۇن! ياخشى چىقىپتۇ