تاشيولچى: ساختىپەزلىك

                            ساختىپەزلىك

                 ئەكبەر ئابدۇرېشىت تاشيولچى

ئۆتۈپ كەتتى «دەم ئېلىش» تۇلۇق ئالماي بىر نەپەس،
ئىشقا  كەلدىم  سالپىيىپ  خوشياقماستىن  دۈشەنبە.
جان بېقىشنىڭ غېمى بار، پۇل تېپىشقا بار ھەۋەس،
يەنە  كەلدىم  ئامالسىز،  ئىلاجىسىز  سەيشەنبە.
زىرىكىشلىك «ۋاقىت» بار، ئىشتىن چۈشمەك تېخى تەس،
ئۈگۈنۈشكە تەشكىللەر باشلىق ئىشچان، چارشەنبە.
ھەر پاتاڭغا  ئارتىلغان  ۋەزىپىلەر  كۆپ  پەۋەس،
تۈگۈتەلمەي  ئۆتىدۇ  ئالدۇراڭغۇ  پەيشەنبە.
كۆنۈپ قالدى تەنقىدكە قۇلاق قېلىن، بەز ئەمەس،
خەۋەر بىرىپ «ئارام»دىن ئۆتەر جۈمە بىردەمدە.
چىلاشقىچە ئىچىمەن، كەچ بولمايلا مەس ئەلەس،
ئارام ئېلىش شەرەپلىك!.. شۇنچە تاتلىق بۇ شەنبە.
چۈش بولغۇچە قوپماستىن چۈش كۆرىمەن ئىگىز-پەس،
ئۆتۈپ كىتەر بەكمۇ  تىز ئۆمرى قىسقا يەكشەنبە.
مەنا تاپماي كۈن كىتەر، خام خىياللار كىتەلمەس،
بارنى خەجلەپ تۈگەتتىم يىغالماستىن تۆت تەڭگە.
قاچان يۇقتى ھۇرۇنلۇق؟ ئەقلىم بۇنى بىلەلمەس،
يوقلاپ كەلدى تۇيدۇرماي ساختىپەزلىك ھەمدەمگە.
نەسىھەتكە مەيلىم يوق،گەپ قىلماڭلا بولدى بەس!
ياشاپ  باقاي  ھاياتنى  ماسلاشتۇرۇپ  قەدەمگە.

قۇشاقماس خىزمەتچىلەر بىر ئوقسا بولغۇدەك!

بۇ شىئېردا ھۇرۇنلۇق،راھەتپەرەسلىك ناھايتى ئۇستىلىق بىلەن يۇرتۇپ بېرىلىپتۇ. ھەي ، قاچان تۈگەر بىزلەردىكى ئاشۇ ئىللەتلەر؟!.....

6- مىسرادىكى «ئۈگۈنۈشكە تەشكىللەر باشلىق ئىشچان، چارشەنبە» دېگەن مىسرادىكى «باشلىق ئىشچان»نى «ئىشچان باشلىق»دەپ ئورنىنى ئالماشتۇرساق سىزچە قانداق؟ بۇ ئىككى سۆزنىڭ ئورنى ئالماشتۇرۇلسا دارتىملاش كەيپىياتى شەكىللىنىدىكەن.
ياقتۇرۇپ ئوقۇدۇم ئاكا.

بولدىكەن؟؟

ساتىر خاراكتىرىگە ئىگە بۇ شېئىر مۇۋاپپىقىيەتلىك چىقىپتۇ. قەلەملىرىگە بەرىكەت يار بولسۇن!

شېئىردىن تولىمۇ سۆيۈندۈم،

ئەكبەرجان مۇۋھپپىقىيەتلىك چىققان بۇ شېئىرىڭىزسدىن سۆيۈندىم، مۇبارەك بولسۇن!

قايتا ئوقۇپ باقسام پىكرىڭىز ئورۇنلۇق تۇرىدۇ.
خېلى يىللار بۇرۇن ئەتراپىمدىكى خىزمەتچىلەردىن ھەپتە ئىچىدىكى كۈنلەرگە « خوشياقماس دۈشەنبە، ئىلاجىسىز سەيشەنبە، ئىشچان چاشەنبە، ئالدىراڭغۇ پەيشەنبە، خەۋەرچى ئازنە، شەرەپلىك شەنبە، ئۆمرى قىسقا يەكشەنبە» دەپ ئىسىم قويغانلىغىنى ئاڭلىغان ئىدىم. يېقىندا شۇ گەپلەر ئىسىمگە كىلىپ قېلىپ، بۇنىڭ ساختىپەزلەر تەرىپىدىن قويۇلغان ئىسىم ئىكەنلىگىنى ھىس قىلىپ قالدىم. شۇ سەۋەپتىن بۇ سەۋەنلىك كۆرۈلگەن بولىشى مۇمكىن. ياختۇرۇپ ئوقۇغىنىڭىزغا رەھمەت سىڭلىم!

بۇ يازمىنى مۇۋاپىقىيەتلىك چىقتى دەپ ئويلۇمىدىم ئۆمەرجان.  پەقەت بۇ بىر جۆيلۈپ بېقىشىم ئىدى. شۇنداقتىمۇ رىغبەت بەرگىنىڭىزدىن خۇرسەن بولدۇم.

مېنىڭچە تىلدىكى راۋانلىق، ئارتۇق زورۇقۇشتىن خالىلىق تىلدا پىشىۋاتقىنىڭىزنى دېرەكلەپ تۇرۇپتۇ،. بۇ ساتىرا ماڭا ياقتى، رەھمەت..

   ئاخىرقى 6 مىسرا (پىكىر)نى ئۈستىدىكى 14 مىسراغا پىرىسلىۋەتسىڭىز ئۇ چاغدا بۇ يازمىڭىز ئۇسسىغان يەرگە بارغۇدەك ئېسىل بىر پارچە ئەسەرگە ئايلىنالايدۇ، دەپ قارىدىم!