بۇغدا ئابدۇللا: ئانا

خىسلەت · ۋاقتى: 2015-5-10 11:16:21


	ئانا بۇغدا ئابدۇللا توقسانغا ئۇلاشتى، كۆزى خىرەلەشتى، تونۇمايدۇ گاھىدا سېنى، سېنى چاقىرماقچى بولۇپ، چاقىرىدۇ باشقا بىرىنى. باشقا بىرىنى چاقىرغاندەك. توقسان ياز، توقسان كۈز، توقسان قىش، توقسان ئەتىياز ، ئۆتۈپ كەتتى ماڭلىيىڭغا ئىز سېلىپ، ئۆتۈپ كەتتى سۇدەك. ئەمدى، تېتىكلىكى يوق بۇرۇنقىدەك. كۆرپىدە ياتار، ئىشىككە قارار. سەن كەلمىسەڭ بىر كۈن كۆڭلى يېرىم بولار، كۆزىگە ياش ئالار، كىچىك بالىدەك. ھەي! جاھاننى ياشاپ تۈگىتىپ قويدى، ئەمدى مېھماندەك! كۆڭۈل نازۇك نەرسە، كۆتۈرەلمەس گەپنى سۇ مىسقال تۆمۈرنى كۆتۈرەلمىگەندەك. شۇڭا تاشلىما ئۇنى، ئۇنۇتما ئۇنى. يوقلا! تاتلىق بىلەن! ئاچچىق-چۈچۈك بىلەن، ھالداش، مۇڭداش، ئوغلى بولمىسا ئوغلى بول! قىزى بولمىسا قىزى بول! يۇيۇپ قوي! چاچلىرىنى تاراپ قوي دۈمبىسىنى سىلاپ قوي. پۇتىنى تۇتۇپ قوي، شۇنداق قىلساڭمۇ بىر كېچە بەرگەن سۇتى ھەققىنى تۆلىيەلمەيسەن، بولۇپ پايپېتەك! ئۇ بولمىسا سەن قېنى؟! مەن قېنى؟! توققۇز ئاي توققۇز كۈن توققۇز سائەت توققۇز دەقىقە كۆتۈرگەن بىزنى قورسىقىدا، ئاش ئېتىپ، نان يېقىپ، كىر يۇيۇپ.... يول يۈرۈپ، جاھان لەرزىگە كەلگەن تولغىقىدا.... چاقماق چاققاندەك،بوران گۈكىرىگەندەك. ئارزۇسى ئىدۇق، بۈگۈنى، ئەتىسى ئىدۇق. بىز! ئۇنىڭ قايتا تۇغۇلىشى ئىدۇق. ئوغۇل بولۇپ، قىز بولۇپ، بىز! ئۇنىڭغا ئوخشىدۇق: كۆزىمىز ئوخشار، قېشىمىز ئوخشار، بۇرنىمىز ئوخشار، ئاغزىمىز ئوخشار، گۈل گۈلگە ئوخشىغاندەك. كۆز نۇرىمىز، قارا چېچىمىز، قېنىمىز ئۇنىڭ ئىدى،ئۇنىڭ.... خۇددى سۇنىڭ بېشى بولغىنىدەك. ئىنسان ھەي ئەقىللىق بولار، ھەم نادان. كۆيەر بالىسىغا كۆيمەس ئانىسىغا، ئانا كۆيەر بالىسىغا: سېنى ئاسماندا ئۇچسا دەيدۇ، دېڭىزغا شۇڭغىسا دەيدۇ. تۆھپەڭنى كۆرۈشنى تىلەيدۇ شەيخ جاينىمازدا تىلىگەندەك. تاپسا بىر تال كەمپۇت، بىر تال ئالما، گېلىدىن ئۆتمەس، يالغۇز يىگىسى كەلمەس سېنى يەۋالسۇن دەيدۇ، سېنى ئورۇقلاپ قالمىسۇن دەيدۇ، كەپپتەر باچكىسىنى ئاسرىغاندەك. توقسانغا ئۇلاشتى، قۇلىقى ئېغىرلاشتى، چىشى چۈشكەن، بېلى ئىگىلگەن، بېشى ئاغرىيدۇ پۇتى سىقىرايدۇ... لېكىن، تۇرغۇسى كېلەر، يۈرگىسى كېلەر، ھاسىسىنى تاشلىغۇسى كېلەر، يۈرگىسى كېلەر ياش-قىزلاردەك. يەر ئايلىنار، ۋاقىت ئۇچار. بۇگىننىڭ بوسۇغىسىدا ئەتە ساقلاپ تۇرار، شۇنداق قېرىيدۇ بارچە: ئادەممۇ، دەرەخمۇ، قۇشلارمۇ.... ( مەنبە:8-يىللىقلار ئۈچۈن 1-قىسىم تىل-ئەدەبىيات دەرىسلىكى ) بۇ يازمىنى ئاخىرىدا ARKZAT تەھرىرلىگەن. ۋاقتى 2015-5-10 11:24

لۇغەت · ۋاقتى: 2015-5-10 12:19:01


	بارلىق پەرشتە سۈپەت ئانىلىرىمىزنىڭ بايرىمىغا مۇبارەك بولسۇن! ئۆمۈرلىرى ئۇزۇن،دۆلىتى زىيادە بولسۇن! يوللىغۇچىغا رەھمەت.

shaidayi · ۋاقتى: 2015-5-10 13:10:59


	بۈگۈنكى ئانىلار بايرىمى كۈنىگە ئاتاپ يوللىغان تېمىڭىزدىن تولىمۇ خورسەن بولدۇم. بۇغدا ئابدۇللا مۇئەللىمنىڭ «ئانا» ناملىق بۇ شېئىرىنى بۇنىڭدىن ئون نەچچە يىل بۇرۇن تولۇقسىز ئوتتۇرا مەكتەپنىڭ تىل ئەدەبىيات دەرسلىكىدە ئوقۇغان ئىدىۇق. شۇ ۋاقىتتا تىل ئەدەبىيات ئوقۇتقۇچىمىز بۇ شېئىرنى ھېسياتلىق دېكلىماتسىە قىلىپ بەرگەندە ئوقۇغۇچىلارنىڭ بەزىلىرى كۈلۈشسە بەزىلىرىمىز ئۆكسۈش ئىچىدە يىغلاپ تۇرۇپ ئاڭلىغان ئىدىۇق. شۇ چاغدىكى ئىشلار ھېلىمۇ ئېسىمدە: مەرھۇم ئانامنىڭ يۇرۇق دۇنيا بىلەن ۋىدالاشقىنىغا ئانچە ئۇزۇن بولمىغان كۈنلەر، مۇشۇ «ئانا» ناملىق شېئىر بار تېكسىت ئۆتۈلگەندە ئۆزۈم دەرسخانىدا، خىيالىم يىراق قەبرىستاندا.... زېمىستاندىكى قار چېچەكلىرىدەك تۈكۈلۈپ چىققان ئىدىم. مانا ئارىدىن ھەش پەش دېگۈچە ئون نەچچە باھار ئۈتۈپ كەتتى... مەندە قالغىنى جۇدالىقنىڭ ئۆچمەيدىغان ئەسلىمىسى... بۇ شېئىرنى ئوقۇپ يەنە مۇڭسىرىغان ئازابلارنى سۆيگەن كەچمىش باغرىغا ئۇچۇپ كەتتىم.... بۇغدا ئابدۇللا مۇئەللىمنىڭ ھەم تېما يوللىغۇچىنڭ ئەجرىگە رەھمەتلەر بولسۇن! بۇ يازمىنى ئاخىرىدا shaidayi تەھرىرلىگەن. ۋاقتى 2015-5-11 01:17

تاشيولچى · ۋاقتى: 2015-5-10 16:07:21


	ئەجرىڭىزگە تەشەككۈر!.... . بۈگۈنكىدەك ئانىلار بايرىمى كۈنى بۇ شېئىرنى يوللاپ، ھەممىمىزنىڭ ئانىمىزنى يادىمىزغا سالدىڭىز. ئۇ ئالەمگە كەتكەن ئانىلارنىڭ جايى جەننەتتە بولسۇن! بۇ ئالەمدىكى ئانىلارنىڭ تىنى سالامەت، ئۆمرى ئۇزۇن، كۆڭلى شاد بولسۇن!

رۇمەيسا · ۋاقتى: 2015-5-10 21:46:09


	shaidayi يوللىغان ۋاقتى 2015-5-10 13:10 بۈگۈنكى ئولۇغ ئانىلار بايرىمى كۈنىگە ئاتاپ يوللىغان ... بۈگۈن ئالدىراشچىلىقتا ئانىلار بايرىمى ئىكەنلىكىنىمۇ ئۇنتۇپ قاپتىمەن، ئەسكەرتكىنىڭىزگە تەشەككۈر... شېئىرنى يوللىغىچىغىمۇ رەھمەت...

qongkurqak · ۋاقتى: 2015-5-11 00:32:41


	بوغدا مۇئەللىم ۋە بارلىق ئانىلارغا سالامەتلىك، خاتىرجەملىك، ئۇزۇن ئۆمۈر تىلەيمەن. جاپاكەش ئانىلار، بايرىمىڭلارغا مۇبارەك بولسۇن.

ئا.ئاتەش · ۋاقتى: 2015-5-11 00:46:12


	بۇگۇن ئالدىراشچىلىقتا ئانىلار بايرىمى ئىكەنلىكىنىمۇ ئۇنتۇپ قاپتىمەن ... بۇ سوزلىرىنى ئوقۇپ نىمە ئۇچۇندۇر غۇژژدە ئاچچىقىم كەلدى سىلىگە ! ئانىلىرىنىڭ بۇ ئۇلۇغ بايرام كۇنىنى ئۇنتۇپ قالغانلىقلىرى ئۇچۇن كەچۇرۇم سورسىلا ، بولامدۇ ؟ ...

جارۇپ3 · ۋاقتى: 2015-5-11 01:07:31


	بەك ئ‍ېسىل شېئر جۇمۇ،ئەركىن شېئىرنىڭ ئ‍ۈلگىسى

خىسلەت · ۋاقتى: 2015-5-11 01:19:48


	بىر چاغلاردا مەن بۇ شېىرنى تولۇق يادلىۋالغان ئىدىم !ھازىر ئۇنتۇپ كېتىپتىمەن !ئۇ چاغلاردا ئاپام تېخى ھايات ئىدى.....بۈگۈن شېىرنى كۆچۈرىۋېتىپ شائىرنىڭ قەلبىنى تېخىمۇ چۈشەنگەندەك بولدۇم!

بىرسى · ۋاقتى: 2015-5-11 02:05:32


	ئانىلارنىڭ سۆيگۈسى- سۆيگۈلەرنىڭ تەڭرىسى.

لېرىكا · ۋاقتى: 2015-5-11 10:20:54


	ھاياتنىڭ تىنىقلىرى ،ھەر بىر مىسراغا سىڭگەن ،ھەر بىر قۇرنىڭ نىدالىرىدا ئەكس ئەتكەن .

ablipiz idiris · ۋاقتى: 2015-5-12 20:53:41


	مەكتەپتىكى چاغلاردا ئىپتىخارلىق ئىچىدە ئوقۇيتتۇق.

شەۋكەت ئىبراھىم · ۋاقتى: 2015-5-12 23:21:01


	بۇ شېئىر ئۇستازنىڭ ۋەكىللىك شېئىرلىرىدىن بىرى بولۇپ ، ئۇنىڭدا ئۇيغۇر ئانىلارنىڭ يارقىن ئوبرازى چاقناپ تۇرىدۇ . ھەم ئۇيغۇر گۇپۇلدەپ تۇرىدۇ . مەن بۇ شېئىرنى قانچە قېتىملاپ ئوقۇغىنىمنى بىلمەيمەن ، ئىشقىلىپ بۇ شېئىرنى ئۇچراتساملا ئوقۇپ قويىمەن . ھەم ئۇستازغا تېخىمۇ ئۇزۇن ئۆمۇر تىلەيمەن . بۇ ھەقىقى كىملىككە ئىگە شېئىردۇر . ئۇنىڭدا ھازىر ، ئۆتمۇش ۋە كەلگۈۇسى بار . ياخشى ئېسىل شېئىردا بۇ ئۈچ ئامىل تولۇق بولىدۇ . بىز مانا مۇشۇنداق شېئىرلارنى كۆپ ئوقۇيلى ، ياش شائىرلار بۇنىڭدىن ئۆرنەك ئالايلى ... ئۇستاز ئامان بولۇڭ ...