قەلەمخان ياسىن: قايسىمىزنى بەك ياخشى كۆرىسىز

شېرىن1 · ۋاقتى: 2015-5-5 14:40:08


	قايسىمىزنى بەك ياخشى كۆرىسىز قەلەمخان ياسىن ــ ئاپىڭىز بىلەن ئىككىمىزدىن قايسىمىزنى بەكرەك ياخشى كۆرىسىز ؟ــ توي قىلغان كۈننىڭ ئەتىسى ئېرىمدىن مۇشۇنداق سورىغان ئېدىم . گەرچە بۇ بىر كونا تېما بولسىمۇ ، ئۇنىڭ كۆڭلىدە ئاپىسى ئىككىمىزدىن قايسىمىزنىڭ بەكرەك موھىم ئورۇندا تۇردىغانلىقىمنى باشقا كېلىنچەكلەرگە ئوخشاشلا بىلىپ باققۇم كەلگەن ئېدى . ئېرىم كۆزۈمگە بىر دەم تىكىلىپ قاراپ تۇرۇۋەتكەندىن كېيىن : ــ ئەگەر ئاپامنى سىز ياخشى كۆرسىڭىز ، مەن سىزنى ياخشى كۆرىمەن ،ــ دېدى . ــ ئەگەر ئۇنداق بولماي قالسىچۇ ؟ ــ ئۇنداق بولماي قالسا مەن پەقەت ئاپامنىلا ياخشى كۆرۈپ ئۆتېۋېرىمەن .ــ ئۇنىڭ ھالىتى ناھايتى سالماق ئېدى ، مەن پەرەز قىلغاندەك ئاچچىقلاپمۇ كەتمىدى ياكى تاتلىق گەپلەر بىلەن كۆڭلۈمنى ياساپمۇ قويمىدى . قېيىنئانام ئارتۇق گەپ –سۆزى يوق ، ئېسىل سۈپەت ئايال ئېدى . ئەتكەن تامىقىم ئوخشىماي قالسىمۇ ،« پاھ ، پاھ ، قولىڭىز تەملىك ئىكەن قىزىم ، كېيىنكى قېتىم تاماق ئەتكەندە تۇزنى بۇنىڭدىن سەل ئاز سالسىڭىز تېخىمۇ يىيىشلىك بولىدۇ »دېگەندەك گەپلەر بىلەن مېنى ھەم خۇشال قىلىپ ھەم خاتالىقىمنى كۆرسىتىپ بېرەتتى . شۇنداق بولغاچقىمىكىن قېيىنئانامنى تىزلا ياقتۇرۇپ قالدىم . لېكىن ئادەتتە كۆڭلۈمنى ئايايدىغان ، ماڭا كۆيۈنىدىغان ئېرىم ئاپىسىنىڭ ئالدىدا باشقىچىلا بىر ئادەم بولۇپ قالاتتى . ئانچە چىراي ئېچىپ كەتمىگىنى ئاز كەلگەندەك ، مېنى ئەيىبلەپمۇ قوياتتى . ــ خوتۇن ئالسام سېنىڭ ئالدىڭدا تىللاپ بېرىمەن دەپ ۋەدە بەرگەنما ئاپىڭىزغا ،ــ دەيتتىم ھوجىرىغا كىرگەندە ئۇنىڭغا ئاچچىقلاپ . ــ ياقەي ... ــ ئەمسە ئۇ ئۆيدە بىر خىل ، بۇ ئۆيدە بىر خىل بولۇپ ئۆزگىرىۋالسىز نېمىشقا ؟ــ بۇنداق چاغدا خالىغانچە بىشەملىك قىلساممۇ ئۇ كۈلۈپ تۇرۇۋالاتتى ،ــ ئەمدى ئەيىبلەڭە ھە ، قانداق گېپىڭىز بولسا ئادەم يوق چاغدا دەڭ ، ئادەم بار يەردە يۈزۈمنى چۈشۈرمەي ... ــ ھەي ...تۈزۈك گەپ قىلسىڭىزچۇ ، مەن قاچان باشقىلارنىڭ ئالدىدا يۈزۈڭىزىنى چۈشۈردۇم ؟ ئەتكەن تامىقىڭىز ئوخشىماپتۇ دېدىم شۇ . ــ ئەجەپ ئاپامدەك ئېتەلمەپسەن دەپ كېتىپسىزا !؟ بۇنداق تالاش –تارتىش دائىم بولۇپ تۇراتتى . ئۇنىڭ شۇ قىلىقلىرىنى ئويلىساملا ھازىرلا ئۇنىڭدىن ئاجىرىشىپ ئاپامنىڭ ئۆيىگە كەتكۈم كەلسىمۇ ، قېيىنئانامنىڭ مېھىربانلىقى ، ئېرىمنىڭ باشقا ياخشى تەرەپلىرى كۆز ئالدىمغا كېلىپ يەنىلا پەيلىمدىن ياناتتىم . يىللار ئۆتۈپ مەنمۇ ئوغۇللۇق بولدۇم . ئوغلۇمنى « ۋاي كۈلدى ، ئايىقى چىقتى ، مەكتەپكە كىردى »دەپ يۈرۈپ تولۇق ئوتتۇرىنى پۈتكۈزگىننى سەزمەيلا قالدىم .ئۇ گەرچە ئالى مەكتەپكە مېڭىش ئالدىدا تۇرغان چوپ -چوڭلا يىگىت بولۇپ قالغان بولسىمۇ ، مېنىڭ نەزىرىمدە يەنىلا كىچىك ئېدى . ئۇنى پۈتۈن مېھرىم بىلەن پۇرايتتىم ، ئەركىلتەتتىم . ئۇ كۆز ئالدىمدا تۇرسىمۇ ئۇنىڭغا قاراپ –قاراپ تويمايتتىم . ئۇنىڭ تاماق يېيىشلىرىدىن تارتىپ ھەر –بىر ئىش –ھەركەت ، گەپ-سۆزلىرى مەن ئۈچۈن شۇنچىلىك سۆيۈملۈك ، شۇنچىلىك يېقىشلىق ئېدى . ئۇنى ئالى مەكتەپكە ئۇزىتىپ قويۇپ ئۇزاق ئۆتمەيلا ،ئۇنىڭ دەردىدە گېلىمدىن تاماق ئۆتمەي ئاغىرىپ قالدىم . ــ بۇنداق قىلما ،ــ دەپ تەسەللى بەردى ئېرىم ،ــ بالىغا چىدىماق ھەقىقەتەن تەس ، لېكىن چىدىمىدىم دېسەك ئوقۇتمىساق بولىدۇ شۇ .ئوقۇماي كۆز ئالدىمىزدا تۇرسۇنمۇ يا ؟ ــ ياق ...ياق . بىر تال ئوغىلىمىزنى ئوقۇتمىساق قانداق بولىدۇ . ئۇ ئوقۇسۇن ، قەيەرلەرگە بېرىپ ، قانچە ئۇزۇن ئوقۇشنى خالىسا شۇنچىلىك ئوقۇسۇن . ــ ئەمسە ئۆزەڭنى بۇنداق تاشلىۋەتمە ، سېنىڭ ئاغىرىپ قالغانلىقىڭنى ئاڭلىسا بالا خاتىرجەم ئوقۇيالمايدۇ . ئىچىمدىكى ئوت پەسەيمىگەن بولسىمۇ ، بالامنىڭ خاتىرجەم ئوقۇشى ئۈچۈن دەردىمنى ئىچىمگە يۇتۇپ ئۆزەمنى رۇسلىدىم . نەچچە يىل نەچچە ئەسىردەك بىلىنىپ ، چېكە چاچلىرىم كۆرۈنەرلىك ئاقارغاندا بالام ئالى مەكتەپنى پۈتكۈزۈپ خىزمەتكە چىقتى ۋە ئۇزۇن ئۆتمەيلا تويىغا قوپتۇق . بولغۇسى كېلىنىم زىلۋا ، قاش-كىرپىكلىرى تۆكۈلۈپ تۇرىدىغان چىرايلىق قىز ئېدى . ئوغلۇم ئۇنى ئۆيىمىزگە باشلاپ كەلگەندە ئۇ تارتىنغان ھالدا تاماقلارغا قول ئۇزىتالماي ئولتۇراتتى . ــ ئېلىڭە قىزىم ،ــ تاماققا تەكلىپ قىلدىم قىزغا ئامراقلىقىم كېلىپ . ــ تارتىنماي ئېلىڭە ، ــ ئوغىلۇم شۇنداق دېگىنىچە قىزنىڭ تەخسىسىگە قورۇمىلاردىن ئېلىپ ، پىيالىسىگە چاي جىقلاپ قويدى . ئۇنىڭ بۇ ئىشى ماڭا نورمال كۆرۈنگەن بولسىمۇ ، ئوغلۇمنىڭ ئۇنىڭغا زىيادە يېقىنچىلىق قىلىپ كېتىشىدىن سەل نارازى بولۇپ قالدىم . ئۇلار تويى بولغان دەسلەپكى يىلى بىز بىلەن بىللە تۇرىدىغان ، ئۆزلىرىنى بىرەر قۇر ئوڭشىۋالغاندىن كېيىن ئايرىم ئۆي ئېلىپ ئولتۇرىدىغان بولۇپ كېلىشتۇق . دادىسىنىڭ بۇ قارارىدىن مەن ئالەمچە خۇشال بولدۇم . چۇنكى يېقىنقى نەچچە يىللاردىن بۇيان ئوغلۇمنىڭ ئالدىراشچىلىقى سەۋەبلىك ئۇنىڭ بىلەن قېنىپ كۆرۈشەلمەيدىغان بولۇپ قالغاچقا ، كۆڭلۈم بەكمۇ يېرىم ئېدى . مانا ئەمدى ياخشى بولدى ، ھەر كۈنى ئىشتىن چۈشۈپ قايتىپ كەلسە بىر ئائىلە كىشلىرى بىللە ئولتۇرۇپ تاماق يىسەك ،خۇددى قېيىنئانام ماڭا كۆيۈنگەندەك مەنمۇ كېلىنىمگە كۆيۈنسەم ، مەن قېيىنئانامغا ئەركىلىگەندەك ئۇ ماڭا ئەركىلسە ، ئۇلارنىڭ بالىسىنى بېقىپ ، ئۇلار ئىشتىن كەلگىچە تامىقىنى ئېتىپ تۇرسام ... بىراق ، ئىش ئويلىغىنىمدەك بولمىدى . كېلىنىمگە ھەر قانچە كۆيۈنسەممۇ ، ئۇ ماڭا يېقىنلاشمىدى . پەقەت « ماقۇل ئاپا ، رەھمەت ئاپا ، خوش ئاپا » دېيىش بىلەنلا چەكلىنەتتى ، ئۇغۇ مەيلى ، ئادەمنىڭ مىجەز –خاراكتىرى ئوخشاش بولمىغانكىن ئۇمۇ ئالدىرماي كۆنۈپ قالار . لېكىن كىچىكىدىن باشلاپ ماڭا يامىشىپ ، ماڭا ئەركىلەپ ، كۆڭلىدىكى گېپىنى مەن بىلەن سىردىشىدىغان ئوغلۇمنىڭ توي قىلىۋېلىپلا ئايالى تەرەپكە ئۆتۈپ ، مەن بىلەن ياتلىشىپ كېتىشى ماڭا پەقەتلا ياقمىدى .شۇنداقتىمۇ ئوغلىنى كېلىنىدىن قىزغىنىپ قالىدىغان قېيىنئانا ئاتىلىپ قالماسلىق ئۈچۈن ھەممىنى ئىچىمگە يۇتۇپ چاندۇرماي ئۆتىۋەردىم . ــ ئاپا ،ــ دېدى بىر كۈنى ئوغلۇم ،ــ نېگارەنىڭ مىجەزى يوقكەن ، تاماق ئېتىشكە ياردەملىشەلمەيدىكەن . ئوغلۇمنى ئەلچىلىككە قويماي كېلىنىم ئۆزى دېسىمۇ بولاتتىغۇ دەپ ئويلىغان بولساممۇ ،كۈلۈمسىرەپ سورىدىم : ــ قەيىرى ئاغىرىيدىكەن ؟ ــ زوكام تېگىپتۇ ، قىزىپ كېتىۋاتىدۇ . كېلىنىمگە شوۋگۈرۈچ ئېتىپ ئەكىرگەندە ئوغلۇم ئىككىسى ھوجىرسىدا كۈلۈشۈپ ، چاقچاقلىشىپ ئولتۇراتتى . ــ بۇنى قىزىقىدا ئىچىۋېلىڭ ،ــ دېدىم كۆيۈمچانلىق بىلەن چىنىنى سۇنۇپ ،ــ كېسلىڭىزگە شىپا قىلىدۇ . ــ ۋاي-ۋۇي ، نېمانچە سۇيۇق ئەتتىڭ بۇ شوۋگۈرۈچنى ،ــ دېدى ئوغلۇم قاپىقىنى تۈرۈپ ،ــ تېخى توخۇ گۆشىدە ئېتىپسەن ، نىگارەنىڭ توخۇ گۆشى بىلەن خوشى يوقلۇقىنى بىلمەمسەن، ــ توخۇ گۆشى زۇكامغا پايدا قىلىدۇ ،ــ دېدىم بوغۇزۇمغا بىر نەرسە كەپلەشكەندەك بولۇپ ،ــ يەنە كېلىپ سۇيۇق –سەلەڭ تاماق يىسە ئاسان ھەزىم بولىدۇ ، قىزىتمىنى چۈشۈرۈشكىمۇ پايدىسى بار . ــ بۇ يا قېرى ئايال بولمىسا ھەزىم قىلالمايدىغان ،ــ ئوغلۇم شۇنداق دېگىنىچە ئايالىغا قارىدى ،ــ ئىچكۈڭىز كەلمىسە ئىچمەڭ ، ــ چىقىپ تاماق يە ، سەن ئامراققۇ توخۇ گۆشىگە ،ــ دېدىم كېلىنىمنى كىچىك بالىدەك پەپىلەپ ئولتۇرغان ئوغلۇمغا ،ــ داداڭ بىلەن بىللە ئولتۇرۇپ يىگىن . ــ نىگارە يىمىسە مېنىڭمۇ يىگۈم كەلمەيدىكەن ئاپا . تىتىرگەن قوللىرىم بىلەن كېلىنىم يېرىمنىمۇ ئىچىپ تۈگەتمىگەن شۆۋگۈرۈچنى ئېلىپ قايتىپ چىقتىم . ــ پاھ ، نېمىدىگەن مېزىلىك ،ــ تاماق ئۆستىلىگە كېلىپ ئولتۇرغان ئېرىم ئالدىغا قويغان شوۋگۈرۈچنى ئىچىۋېتىپ دېدى ،ــ قەيەردىن تاپتىڭ بۇ توخۇ گۆشىنى ؟ ــ دېھقان بازىرىغا بېرىپ ئەكەلدىم . ــ سەن توخۇ گۆشىى يىمەيتتىڭغۇ . دېھقان بازىرىغا بېرىشىنمۇ خالىمايتتىڭ . ــ كېلىن ئاغىرىپ قاپتىكەن ، پايدا قىلسۇن دەپ ... ــ تېتىپ باقە ، بەك ئوخشاپتۇ . ــ ئىچمەيمەن . ــ ئەمسە نېمە يەيسەن ، بولمىسا سىرتقا تاماققا ئېلىپ چىقايمۇ ؟ باياتىن بېرى چاناقلىرىمدا لىغىرلاپ قالغان ياشلىرىم ، مەڭزىمنى بويلاپ چۈشتى . ــ نېمە بولدۇڭ ، كېلىن خاپا قىلدىما ؟ ــ ياق . ــ ئەمسە ... ــ بولدى قىلسىڭىزچۇ ، ھەممىسى ئۇششاق ئىشلار . ئۆزەم ھەل قىلىپ كېتەلەيمەن . دېگىنىمنىڭ ئەكسىچە بۇنداق ئىشلارنى ئۆزەم ھەل قىلىپ كېتەلمىدىم . ئوتىدا كۆيۈپ ، سۈيىدە ئېقىپ ، باغرىمدا تۇرسىمۇ قانماي چوڭ قىلغان ئوغلۇم بارغانچە مەندىن يىراقلاپ كېتىۋاتاتتى . شۇ كۈنلەردە رەھمەتلىك قېيىنئانامنى تولا ئەسلەيدىغان بولۇپ قالدىم ، ئۇنىڭدىن تاماق ئېتىشنى ، ئۆي ئىشلىرىنى قىلىشنى ، كەڭ قورساقلىقنى ۋە يەنە ئۇنىڭ كۆپ ئارتۇقچىلىقىلىرىنى ئۆگەنگەن بولساممۇ ، بالا تەربىيلەشنى ئۆگەنمىگەن ئىكەنمەن . بالامنى ئۆزى خالىغان كەسىپتە ۋايىغا يەتكىچە ئوقۇتتۇم ، كەسىپتە ئۇتۇق قازىنىپ يۈز ئابرۇي تېپىشىغا يۆلەك بولدۇم ، ئانىلىق مېھىر –مۇھەببەتتىن ، ئائىلىنىڭ ئىللىقلىقىدىن يەتكۈچە بەھىرمان قىلدىم ،كۆزى توق ، كۆڭلى توق ئادەم بولسۇن ئۈچۈن بارلىقىمنى ئۇنىڭغا بېغىشلاپ بەردىم دېگىنىم بىلەن ئۇنىڭغا كىشىلەر ئارسىدىكى مۇناسىۋەتكە توغرا مۇئاملە قىلىشنى ، ئادىمىلىكنى ئۆگەتمىگەن ئىكەنمەن . توغىرىسىنى ئېيتقاندا بالامنى ئالىم قىلىشتا مۇۋاپىقيەت قازانغان بىلەن ئادەم قىلىشتا مەغلۇپ بولغان ئىكەنمەن . شۇنداق ئويلاۋېتىپ « بۇلار تېخى ياش تۇرسا »دېگەن خىيال بىلەن بايىقى ئويلىرىمنى ئىنكار قىلدىم . «ياشلىق» دېگەن سۆز ئېسىمگە كېلىشى بىلەن يېڭى توي قىلغان چاغدا ئېرىمدىن سورىغان « ئاپىڭىز بىلەن ئىككىمىزدىن قايسىمىزنى بەكرەك ياخشى كۆرىسىز »دېگەن ئەخمەقلەرچە سۇئالىم ۋە ئېرىمنىڭ جاۋابى ئېسىمگە كەلدى . شۇ چاغدا ئېرىمگە بىر ھەپتىگىچە باتنىغان ، ھەتتا قېيىنئانامغا يەر تېگىدىن ئالىيىپ قارىغان ئېدىم . مانا ئەمدى ئېرىمنىڭ بەرگەن جاۋابىنىڭ ناھايتى توغرا بولغانلىقىنى ۋە « ئاپىڭىزنىڭ ئالدىدا مېنى ئەيىبلىدىڭىز » دەپ ئورۇنسىز رەنجىگەنلىكىمنى ھېس قىلدىم . ئەگەر شۇ چاغدا ئېرىم ماڭا شۇنداق قىلمىغان بولسا قېيىنئانامنىڭ چىن كۆڭلىدىن بەرگەن مېھىرىگە ، كۆيۈنۈشلىرىگە ئۆز قىزىدىنمۇ ئارتۇق ئېرىشەلەرمىدىم ؟ گەرچە ئېرىمنىڭ قىلغانلىرىنى قېيىنئانا بىلەن كېلىن مۇناسۋېتىنى تەڭشەيدىغان ئەڭ توغرا ئۇسۇل دەپ كەتكىلى بولمىسىمۇ ، قېيىنئانام ئىككىمىزنىڭ ئارىسىدا ئۈنۈم بەرگەن ئېدى . كۆزلىرىمدىن يىپى ئۈزۈلگەن مارجاندەك تۆكۈلىۋاتقان كۆز ياشلىرىمنى سۈرتۈۋېتىپ ئورنۇمدىن تۇردۇم . بولدى ،بالىلاردىن ئاغىرنىپ نېمە قىلاي ، ئۇلار تېخى ياش ،ئۇلارغا مېھرىمنى ئايىماي بەرسەم ، نەچچە ئايدا بولمىسا ، نەچچە يىلدا ، ھېچ بولمىسا بالىلىق بولۇپ ، بالىسى تۇرمۇش قۇرغاندا ئاندىن ئاتا –ئانا مېھىرنىڭ قانداق بولدىغانلىقىنى چۈشىنىپ قالار . مەنبەسى: «شىنجاڭ ئاياللىرى» ژرنىلىنىڭ 2015-يىللىق 2-سانى بۇ يازمىنى ئاخىرىدا Erchin تەھرىرلىگەن. ۋاقتى 2015-5-6 10:12

Erchin · ۋاقتى: 2015-5-5 16:25:16


	ژانېرى؟ نەچچىنچى يىللىقتىكى سان؟

ئاينۇرى · ۋاقتى: 2015-5-5 20:38:37


	سالام قەلەمخان. بۇ ئەسەرنى مەن ياقتۇرۇپ ئوقۇدۇم، سىزگە تېخىمۇ زور ئۇتۇقلارنى تىلەيمەن.

ablipiz idiris · ۋاقتى: 2015-5-5 21:06:33


	بۇ ھىكايە تۇرمۇشقا يېقىن، ئەتىراپىمىزدا ھازىرمۇ يۈز بېرىۋاتقان ئىشلارغا تەدبىقلانغان ئاساستا، چىنلىقى يۇقۇرى، تىلى جانلىق يېزىلىپتۇ. ھىكايىنى ئوقۇۋېتىپ ئۇزاق ئويلىنىپ قالدىم. ئاتا-ئانا بولمىغۇچە مەڭگۈ ئاتا-ئانىنىڭ قەدرىگە يەتمەيدىكەن ئىنسان دىگەن. ئوغلىڭىزنىڭ كېلىنىڭىز ئالدىدا قىلغان ئىشلىرىنى ئوقۇۋېتىپ، خۇددى مەن شۇنداق قىلىۋاتقاندەك تۇيغۇدا بولۇپ خىجىل بولۇپ كەتتىم. ئانا بولغۇچىغا ھېسداشلىقىم قوزغالدى. قەلىمىڭىز دات باسمىسۇن قەلەمخان!

شېرىن1 · ۋاقتى: 2015-5-5 21:09:25


	Erchin يوللىغان ۋاقتى 2015-5-5 16:25 ژانېرى؟ نەچچىنچى يىللىقتىكى سان؟ 2015-يىل دېگەن سۆزنى ئۇنتۇپتىمەن .

شېرىن1 · ۋاقتى: 2015-5-5 21:13:47


	ablipiz idiris يوللىغان ۋاقتى 2015-5-5 21:06 بۇ ھىكايە تۇرمۇشقا يېقىن، ئەتىراپىمىزدا ھازىرمۇ يۈز ب ... ئاينۇرى بىلەن ئابلىپىز توردىشمنىڭ ئەسىرىمنى ياقتۇرغىنىدىن كۆپ خۇرسەن بولدۇم . ئەمىليەتتە مەنمۇ بىر كېلىن ، نەچچە يىللاردىن بۇيان مودىدىن قالمىغان « ئاپىڭىز بىلەن ئايالىڭىز سۇغا چۈشۈپ كەتسە ئاۋال قايسىنى قۇتقۇزىسىز » دېگەن سۇئالغا جاۋاب بېرىش مەقسىدىدە بۇ ھېكايىنى يازغان .

ablipiz idiris · ۋاقتى: 2015-5-5 21:25:19


	شېرىن1 يوللىغان ۋاقتى 2015-5-5 21:13 ئاينۇرى بىلەن ئابلىپىز توردىشمنىڭ ئەسىرىمنى ياقتۇرغ ... جاۋابىنى يېزىۋېتىپسىزدە ئۇنداقتا. سىزمۇ ئەسىرىڭىزدىكىدەك ئوغلىڭىزنىڭ ھىكايىدە تەسۋىرلەنگەندەك ھالەتنى شەكىللەندۈرشىنىڭ ئالدىنى ئېلىش ئۈچۈن، ياخشى كېلىن بولۇپ، قېينىئانىڭىزنىڭ خىزمىتىنى ياخشى قىلغايسىز! بۇ يازمىنى ئاخىرىدا ablipiz idiris تەھرىرلىگەن. ۋاقتى 2015-5-5 21:25

رەيھانگۇل · ۋاقتى: 2015-5-6 12:26:47


	ياخشى يىزىپسىز، ياقتۇردۇم. تۇرمۇشقا يىقىن، تىلى راۋان، چۇشىنىشلىك يىزلپتۇ.

aydanix · ۋاقتى: 2015-5-6 18:01:44


	ئىسمىڭىز قەلەمخانما؟ بەك چىرايلىقكەن. ھىكايىڭىزنى ياقتۇردۇم. لىكىن شۇنداق ئانىسىنى ھۆرمەتلەيدىغان ،ئايالىنى قەدىرلەيدىغان بىر دادىنىڭ تەربىيەلىگەن بالىسى ئادەمنى بەك ئۈمۈتسىزلەندۈرىدىكەن دىسە.. ئوغۇل بالا دادىنى دورايدۇ دەيدىكەن.

چىراغ · ۋاقتى: 2015-5-7 11:13:01


	ھېكايە ھەقىقەتەن بەك ياخشى يېزىلىپتۇ. مېنىڭمۇ ئىچىم ئاچچىق بولۇپ، ئوغۇلغىمۇ، ياكى كىلىنگىمۇ ئىشقىلىپ كىملەرگىدۇر غەزىپىم قوزغالدى.ئايالى بىلەن ئانام ئوتتۇرىسىدىكى ئىشنى ھەل قىلالماي ئۆي ئايرىپ چىقىپ كىتىمىز دەپ جىدەل تىرىغان ئاكام دىگەن لەقۋا بىلەن تازا ئۇرۇشتۇم مۇشۇ ھېكايىنىڭ تەسىرىدىن.

شېرىن1 · ۋاقتى: 2015-5-11 14:50:44


	aydanix يوللىغان ۋاقتى 2015-5-6 18:01 ئىسمىڭىز قەلەمخانما؟ بەك چىرايلىقكەن. ھىكايىڭىزنى ... ئوغۇل بالا دادىسىنى دورايدۇ دېگەن گەپنىڭمۇ ئاساسى بار . بىراق ، بەزى ئائىللەردە ئانىنىڭ ئوغۇلىغا زىيادە كۆيۈنۈپ كېتىشى سەۋەبىدىن بالا دادىنى دوراپ بولالمايمۇ قالىدۇ ئەمەسمۇ .

شېرىن1 · ۋاقتى: 2015-5-11 14:52:49


	چىراغ يوللىغان ۋاقتى 2015-5-7 11:13 ھېكايە ھەقىقەتەن بەك ياخشى يېزىلىپتۇ. مېنىڭمۇ ئىچىم ئا ... ھېكايەمنىڭ سىزگە تەسىر قىلغىنىدىن خۇرسەن بولدۇم ، ئەمما ئاكىڭىز بىلەن ئۇرۇشقا سېلىپ قويغىنىغا سەل ئەپسۇسلاندىم . ئەسىرىمنىى ياقتۇرۇپ ئوقۇغان بارلىق ئەزىزلەرگە رەھمەت !

پاكزات · ۋاقتى: 2015-7-11 18:29:34


	ئۇزۇن بوپتىكەن تورنى ئاچمىغىلى، باشلىقنىڭ خانىمى بىلەن مۇنۇ ھېكايىنى ئوقۇپ خىياللىرىم نەلەرگىدۇر ئۇچۇپ كېتىپ باراتتى، ئانامغا بەزىدە قىلىپ قويغان گەپلىرىمدىن خىجىل بولدۇممۇ ياكى كەلگۈسىدىكى ئۆزۈمنىڭ باشلىق بولغاندىن كېيىنكى تۇرمۇشىنى تەسەۋۋۇر قىلدىممۇ ئۇنى بىلمەيمەن. بارغانسىرى ياخشى يازىدىغان بولۇپ كېتىۋاتىسىز، بولسا توختىتىپ قويماڭ. مەن تۇرمۇش ۋە خىزمەتنىڭ قات-قات بېسىملىرى ئاستىدا قېلىپ يېزىپ بولالمايۋاتىمەن، بىر پارتىلىسام، توختىتىپ قويماي يازسام بولاتتى.

گ.م.ماھى · ۋاقتى: 2015-7-11 20:12:01


	ژورنالدا ئوقىغاندىمۇ بەك ياقتۇرغانىدىم بۇ ھېكايىڭىزنى،يەنە بىر قېتىم ھوزۇرلىنىپ ئوقۇدۇم، قەلىمىڭىزگە بەرىكەت تىلەيمەن

ئابدۇرېھىم زۇنۇ · ۋاقتى: 2015-7-11 20:20:49


	گ.م.ماھى يوللىغان ۋاقتى 2015-7-11 20:12 ژورنالدا ئوقىغاندىمۇ بەك ياقتۇرغانىدىم بۇ ھېكايىڭىزن ... قايسى مەتبۇئاتتا چىققان بۇ ھېكايە؟

قەلەمخان ياسىن: قايسىمىزنى بەك ياخشى كۆرىسىز

باھا سۆز

باھا سۆز

باھا سۆز

باھا سۆز