گۈلخان(ئىزگۈگە): دادامنىڭ بۇغدايلىقى ۋە ئاكامنىڭ قاشتېشى

دادامنىڭ بۇغدايلىقى ۋە ئاكامنىڭ قاشتېشى

گۈلنىسا ئىمىن گۈلخان

1

سەپەر ئېيى
پىشىپ قالدى دادامنىڭ بۇغدىيى ،
تۆكۈلۈپ كەتتى ئۆرۈكى ،
ئۇلارغا قاراپ
ئوغۇرلۇقچە ئۆتۈۋاتقان ۋاقىتقا قاراپ،
سىقىلماقتا يەتتەيلەننىڭ يۈرىكى.
چىچەكلەپ كەتكەن يۇلغۇنلار ،
دادامدەك ئىگىلدى.
دادامنى كۆرەلمىگەن يۇلغۇنلارنىڭ  بېشى سېلىندى.
خۇددى دادامنىڭ ئۇلارنى كۆرگسى كەلگەندەك،
ئۇلارمۇ دادامنى سېغىندى.
پىشانىسىدىكى پارقىراق تەرلەر
ئاپتاپ،شامال.تۇپراق تەرىپىدىن
پات-پات ئەسكە ئېلىندى.
نەچچە ئاخشاملار ئۆتۈپ كەتتى،
ئېرىقتىكى سۇنىڭ يادىغا دادام يەتتى.
ئەمما بىر چاغدىكى گۈس-گۈس قەدەملەر،
نىمىشقىدۇر ۋاقىت بىلەن يىراقلاپ كەتتى.
كىچىككىنە  ئىككى ئەتلىمە گۆشنى
يىتىملىق يۆگىكى بىلەن قوشۇپ تەلپىكىگە سالغان
يەتتە بالىنىڭ دادىسىغا
ھاردۇق يەتتى.

2

دادامنىڭ ئۈجمىللىرى پىشتى
قۇچقاچلار ،سۇپسۇپىياڭلار يەپ تويدى.
ئۆرۈكلىرى پىشتى،
قۇچقاچلار ،چاشقانلار يەپ  تويدى.
بۇغدايلىرى پىشتى،
ئاپتاپ يەپ تويدى.
دادامنىڭ ئۆمرى پىشتى ،
بىز يەتتە قۇچقاچ يەپ تويمىدۇق.

3

دادام بۇغدايلارنى سورايدۇ،
ئوغاقلىرىنى بىلەيدۇ،
ئايدىڭدا ئېتىزلىققا چىقىدۇ،
چۈچۈپ ئەسلىگە كەلگىنىدە بولسا،
ئۆزىنىڭ تۇرالىمىغىنىدىن
بۇغدايلىرىنىڭ بېشىنى سىلىيالمىغىندىن،
ئۈجمىلەرنى ئېغىتالمىغىندىن ،
ئۆرۈكلەرنى ئاپتاپقا كۆرسىتەلمىگىنىدىن ،
ئۈنسىز ھالدا ئىزتىراپ چېكىدۇ.
كۆڭلى نەملىشىدۇ.
دادامنىڭ بۇغدايلىقى بولسا
ئارمان بىلەن ئۇنى سېغىنىدۇ.
ئۇ تىككەن ياڭاقلار بوي تارتىپ كەتتى،
تاللار تارىغىلى يەتتى،
نەشپپۈتلەر كەڭلرى باغ ئەتتى،
يۇلغۇنلار قۇشامغا يارىدى،
توغراقلار يولغا قارىدى،
ئەمما دادامنىڭ بويى يەتمىدى.
قەدىمى يەتمىدى،
لېكىن ئۇلارنى خىيالىدىن تەرك ئەتمىدى.

4
دادامنىڭ بۇغدايلىرى پىشتى
بىز ئورىدۇق ئۇنى،
ئەمما دادامنىڭ ھاردۇقى چىقمىدى.
ئورغاقنى سېغىنغان قوللىرى
باشلىرىمىزنى سىلايدۇ.
ياڭراق ئۈنلەرنى سېغىنغان ئاۋازى
يىغلامسىرايدۇ.
ھېچنىمە دىمەيدۇ-دە
ئۆزىنى سۈكۈتكە،بىزنى ئازاپقا چىلايدۇ.
دادامنىڭ بۇغدايلىرى پىشتى،
دادامنى سېغىنىپ.
يەنە نەچچە يىل پىشقىلى  قىلغايسەن  نىسىپ.
دادام ئورالمىسىمۇ بېلىنى ئىگىپ،
بۇغدايدەك ھالال كۆڭلى قالمىغاي چىگىلىپ.


5


ئاكامنىڭ قاشتېشى
دەريانىڭ قېنىدا ياتىدۇ جىمجىت.
ياراتقۇچى "ئال ،قولۇم " دەپ بىرىۋېتىدىغان تەلەينى ساقلاپ.
قاشتېشى
يۇرۇڭقاشنىڭ بەدىنىدۇر،
تاشلارغا ئۇرۇلۇپ ئۇۋۇلۇپ كەتكەن،
تۈگىمەيدۇ
خوتەنلىكلەرنىڭ رىسقى ئۈزۈلمىگەندەك.
قانداقتۇر بىر ھالاللىق بۇ يەردىن كۆتۈرۈلمىگەندەك.
ئاكام كۆيۈشكەن ،قاپارغان قوللىرى بىلەن
ئۈمىدنى كولايدۇ.
جېنىنى كولايدۇ.
ئۆيىدە قالغان نەچچە قىزىنىڭ
يولىغا قارىغان ئىنتىزارلىقىنى كولايدۇ.
ئالقىنىدىكى تاشلار
خىجىللىق ئىلكىدە  يەر ئاستىدىن قارايدۇ.
شۇ خىجىللىقىدا ئۇ ئايدىن بۇ ئايغا ئولاشمايدۇ.
تەلەي ئۇنىڭغا قاراي دىگەندە،
پۇت –قوللىرى قولاشمايدۇ.
بۇ تاشلار شۇ پېتى يوغىنىمايدۇ،
ئاكام نەم قۇملاردا يۈكۈنۈپ ئولتۇرۇپ
ئالقانلىرىنى ئاچىدۇ.
كۈن قاتتىقلىقتىن يۇمشىغاندەك،
ئاكامنىڭ رىسقىغا پۈتۈلگەن تاش،
نى- نى كۈنلەردە قەدرى ئۆتۈلگەن تاش،
يوغىنىسا بولاتتى،
سۈزۈلسە بولاتتى،
ئاكامنىڭ قەدىمى تاشتەك قاتتىقلىقتىن ئۆزۈلسە بولاتتى.
يۇرۇڭقاش
ئاكامغا بولما باغرى تاش.
ئوڭ كۆزۈڭدە قارا ئۇنىڭغا،
قۇملىرىڭغا سىڭمىسۇن،
سۇلىرىڭغا قوشۇلمىسۇن،
ئەركەك مۇھتاجلىقىتىن تۆككەن ياش.

6

ئاكام دادامنىڭ بۇغدايلىرىنى پىشىسىكەن دەيدۇ،
كۆزلىرىگە  ياش ئېلىپ تورۇپ،
دادام ئاكامنىڭ  قاشتاشلىرىنى  يۇغنىسىكەن دەيدۇ
باغرى ئىزىلىپ
ئۇۋۇلۇپ تورۇپ.

2014.6.16

ئ‍ىككىنجى قېتىملىق «ئ‍ىزگۈ تور ئ‍ەدەبىياتى» مۇكاپاتلىق سەھىپىسىگە تەۋسىيە قىلىنغان ئ‍ەسەر

ما شېئىردىن تەسىرلەندىم. گۈلخاننىڭ مەن كۆرگەن ئەڭ ياخشى شېئىرىدىن بىرسىكەن. بىر بېلەت تاشلىدىم سىزگە

شېئىر ھەقىقەتەن ياخشى چىقىپتۇ گۈلخان، مۇبارەك بولسۇن.

يوللانغان نۇرغۇن يوللانمىلار ئىچىدىن مۇشۇ يوللانما ماڭا يارىدى.شۇنۇڭغا قارىغاندا مەنمۇ شئىېر ئوقۇسام بولغۇدەك.

بۇ مەن ئوقۇغان تۇنجى شېئىرىڭىز، شۇنداقتىمۇ شۇنداق ياخشى چىقىپتۇ. قەلىمىڭىزگە بەرىكەت تىلەيمەن!!

دادىڭىزنىڭ بۇغدايلىرىنىڭ تىزراق پىششىنى تىلەيمەن...

تۇيغۇدىكى چىنلىق،ئىپادىلەشتىكى ئەركىنلىك،تىلدىكى يۇمرانلىق ماڭا بەك يارىدى. ئۆزىدىن ھالقىش سىزگە يار بولسۇن!

ھەقىقەتەن تەسەۋۇرىڭىز  كۈچلۈك  ئىكەن. نۇرغۇن  شېئىرلىرىڭىزنى ئوقۇدۇم  بۇلارنىڭ ئىچىدە «خوتەندە توپا ياغدى» نىڭ كەينىدىكى ئىككىنچى شېئىرىڭىزغا مۇبارەك.

مۇبارەك بولسۇن، مەنمۇ سىزگە بىر بىلەت تاشلىدىم.   ھەقىقەتەن ياخشى يېزىلغان شېئىر بوپتۇ. بىر شائىر ئۆمرىدە ئۆزىگە يارىغۇدەك بىر قانچە شېئىر يازالىسا بولدى. تورداشلارنىڭ ھەم باھالىغۇچىلارنىڭ ئەستايىدىل پىكىر بېرىشىنى ئۈمىد قىلىمەن.بۇ مۇكاپاتقا تەۋسىيە قىلىنغان  شېئىرى ئەسەرلەر ئىچىدە ئۆمەر موھەممەتئىمىن ئاكىنىڭ داستانى، مەسئۇد ئەيسانىڭ «چاق» ئى، گولنىساخاننىڭ بۇ شېئىرى ، ئابلەت ئەخمەتنىڭ ئارۇز ۋەزىنىلىك بىر تۈركۈم شېئىرلىرىنىڭ ھەقىقەتەن ۋەزنى بار. بۇ يازمىنى ئاخىرىدا   روزى2 تەھرىرلىگەن. ۋاقتى  2015-4-21 11:01  

مۇبارەك بولسۇن ئادىشىم،
بۇ شېئىرلىرىڭدىن دىلىم لەرزىگە كەلدى. شۇ قەدەر سەمىمىي ساپ تۇيغۇلاردا  داداڭنىڭ. ئاكاڭنىڭ، يەتتە قېرىنداشنىڭ يۈرىكى ئىپادىلەنگەن بىر شېئىر بوپتۇ. قوشماقلىرىنى تەلپىكىدە ئانىسىنىڭ يوقلىقىنى بىلىنندۈرمەي چوڭ قىلغان  شۇ سۆيۈملۈك داداڭنىڭ ئۆمرى ئۇزۇن بولسۇن!!
مەنمۇ سېنىڭ مۇكاپاتقا ئېرىشىشىڭنى چىن يۈرىكىمدىن ئۈمىد قىلىپ ھەم شېئىرىڭغا بولغان قايىللىقىم يۈزىدىن بىر بېلەت تاشلىدىم. بۇنىڭدىن كېيىنكى ئىجادىيەتلىرىڭ تېخىمۇ بەركەتلىك بولغۇسى !

دادامنىڭ ئۈجمىللىرى پىشتى
قۇچقاچلار ،سۇپسۇپىياڭلار يەپ تويدى.
ئۆرۈكلىرى پىشتى،
قۇچقاچلار ،چاشقانلار يەپ  تويدى.
بۇغدايلىرى پىشتى،
ئاپتاپ يەپ تويدى.
دادامنىڭ ئۆمرى پىشتى ،
بىز يەتتە قۇچقاچ يەپ تويمىدۇق.

.........................

دادام...
مۇنەۋۋەر

نىمە دەي،نىمىمۇ يازاي
قەلبىم ھەسرەتتە
قەلىمىم نادامەتتە.
سېغىنىشلىق بىر ئۇدار
چاڭقاپ كەتكەن بىر خىيال
ساقىپ كەتكەن بىر سۈرەت
دادام كۆز يۇمغان دەقىقە
ئېچىنىشلىق مەنزىرە...

2015-4-21

ئۇشبۇ قۇرلارنى ئوقىۋېتىپ رەھمەتلىك دادامنى ئەسلەپ قالدىم.

ئەڭ گۈزەل تىلەكلىرىم سىزگە يار بولسۇن گۈلخانىم
شېئىرنى ئوقۇپ بەكلا كۆڭلۈم بۇزۇلدى
بەلكىم -شېئىر يۈرىكىمگە تەگكەندۇ..

بىر پارچە شېئىر دائىم نۇرغۇن ئەسلىمىلەرنى ئۆزىگە ئورىۋالغان بولىدۇ، ئەمما ئۇ يېزىلىپ بولغاندىن كېيىن بىر ياكى بىر نەچچە سۆزنىڭ يەنىلا تولۇق خاتىرلەنمىگەنلىكىنى شائىرغا دەپ قويىدۇ.
  بىراق، شائىر بۇ شېئىردىن چىقىپ كەتكەندىن كېيىن، ئۇ سۆزنى يەنە ئىستەيدۇ. بۇ ئىستەش يەنە بىر شېئىرنى يازغىلى سالىدۇ. نىھايەت، ئەسلىدىكى شېئىر داۋاملىشىدىغان يەنە بىر تۇيغۇ قىستاپ كەلگەندە ئۇ قاتلاملارغا بۆلىنىدۇ. بۇ قاتلامدىن بىر پۈتۈنلۈك روياپقا چىققاندىلا، بىز شېئىرنىڭ ماۋزۇسىغا قايتىپ كېلىمىز. گۈلنىسانىڭ شېئىرلىرى يېقىندى بېرى باشقىچە جۇلالاندى، ماۋزۇ ۋە تېماتىكىسىمۇ خاسلاشتى. يۇقارقى شېئىردىكى «بۇغداي» ۋە «قاشتېشى'دىن ئىبارەت كونا ئىماگلار «دادا- ئەجداد، ئاكا- ئەۋلاد، بايان قىلغۇچى- قېرىنداش»لىقنى بىر پۈتۈن ھالەتتە سۆزلەۋاتقاندا، ئۇ يېڭىچە قەدەم بىلەن  سىمۋولغا يۈرۈش قىلىشنى ناھايىتى  مۇۋاپىقىيەتلىك ئەمەلگە ئاشۇرغان.
  گۈلخان! داۋاملىق ئىلگىرلەڭ.
بۇ يازمىنى ئاخىرىدا   ق.ئوسمان غازى تەھرىرلىگەن. ۋاقتى  2015-4-21 13:02  

ماۋۇ پىكىر بىر قەدەر ياخشى بېرىلىپتۇ، دەرۋەقە گۈلخاننىڭ بۇ شېئىرىدىكى ئىماگلار باياندىكى سىمۋولدىن ھالقىپ، تاكى مەدەنىيەتتىكى سىمۋوللارغىچە كېڭىيىپ بېرىپتۇ، سىمۋول ئېڭىنىڭ ئويغىنىشى شېئىرنى تېخىمۇ جۇلالاندۇرۇپتۇ. (مەنمۇ بىر بىلەت تاشلىدىم)

قەلىمىڭىزگە بەرىكەت تىلەيمەن!!