ياقۇپجان قۇربان: غەزەللەر [ئۇلانما كۆچۈرۈش]

غەزەللەر
ياقۇپجان قۇربان

(1)

نۇرانە تاڭ بۇلاقى چايقىلىپ كۈلسە زىناقىڭدىن،
قەلب بوستاننى سۆيگۈ باغاشلار ئاي سىياقىڭدىن.

شامال شەپەڭنى بەرسە يەر تېگىدىن ياكى ئاسماندىن،
ئۆتۈشكە ئىنتىزارمەن جان بىرىپ ھىجران- سىناقىڭدىن.

غېرىپلىق تۈنلىرى سۆيگۈڭ ئوتىدا كۈلگە ئايلاندى،
چېچەكلەر قۇمدا يۇلتۇزدەك باھارىم، ئىشتىياقىڭدىن.

ۋىسال شامى بېھىشنىڭ ئاسمىندا ئايغا ئايلانسا ،
سۆيۈلدى يەر-جاھان جىسمىم ئارا ئېرىپ قۇچاغىڭدىن.

بوسۇغاڭغا تۇتاش يولدا قاناتلىق يولچىمەن مەڭگۈ ،
قۇياشتەك چوغلىنار جىسمىم سېھىرلىك كۆز قاراقىڭدىن.
(2)
كۈندە تاقەتسىزلىنىپ، يوللاردا كۆپ ئاۋارىمەن،
تاقىتىم ئوكيانىدا لەيلەپ-چۆكۈپ، ئاۋارىمەن.

كىرپىگىمگە تۈندە شەبنەملەر مالامەت ئەيلىسە،
سىردىشىپ يامغۇر بىلەن ياشلار تۆكۈپ،ئاۋارىمەن.

گاھى چاقماق رىغبىتىدىن سەن تامان ئالغاندا يول،
بارغىچە مەھەلەڭگە ئەغياردىن مۆكۈپ،ئاۋارىمەن.

سەن كىلىپ سۇ ئۇسسىغان چىم-چىم بۇلاققا باغلىنىپ،
تار كوچاڭدىن بىقارار ھەر يان ئۆتۈپ، ئاۋارىمەن.

شوخ شامال ھىدلاپ ئىپارىڭنى دەرىزەڭ چەككىچە،
ئايلىنىپ يۇلتۇزغا ئۆگزەڭدە كۆيۈپ ،ئاۋارىمەن.

سايرىدىم قۇشلار تىلىدا كۈي قېتىپ ئىسمىڭ بىلەن ،
ئايۋىنىڭ نەققاشلىرىدا چۈش كۆرۈپ، ئاۋارىمەن.

ئايالىنار زۇلفىڭدا تۈن،قارچۇقلىرىڭدا ھەم قۇياش،
بىر دىدارغا كۈن ساناپ بارماق پۈكۈپ،ئاۋارىمەن.
(3)

مۇھەببەت رەھنىمالىق ئىزدىدى،چەكتى رىيازەتنى
رىيازەت تاقىتىگە پۈتتى كىم، مۇنچە شىجائەتنى،

مۇھەببەتتىن قارا تۈنلەر قاراڭغۇ بولمىدى زىنھار،
مۇھەببەتلىك يۈرەك زىنداندىمۇ كۆردى ھىدايەتنى.

مۇھببەت دە-تالاشسىز بىر مىراسى بولدى قەۋمىمنىڭ،
مۇھەببەتتىن ئۆگەندى نەپسىكەشلەر چىن دىيانەتنى.

مۇھەببەت ئېتىقاتتا ئايرىدى مەرد بىرلە نامەردنى ،
مۇھەببەت يازدى شۇنداق قان بىلەن ئۆلمەس ھېكايەتنى.

مۇھەببەت ئاپىرىدە ئەيلىگەن جان نېمىتى بىر كۈن،
مۇھەببەت ۋەسلىدە ئىمان بىلەن قۇچقاي قىيامەتنى.
(4)
ئەقىدەم گۈلشىنى قالدى پاناھسىز،كەلمىدىڭ بۇ كەچ،
ئارامسىز تۈننى سۆيگۈمگە يېپىنچا ئەيلىدىڭ بۇ كەچ.

شامالدا ئەركىسىز شاخلار ئۇچۇپ ھەريانغا تاشلانسا،
قىلىپ ياپراقنى سەگۈنچەك، مىنى ئەللەيلىدىڭ بۇ كەچ.

تۇلۇنئاي قارىچۇغىڭدا ئوت يېقىپ يۇلتۇزغا ئاۋارە،
قۇياشنىڭ تاڭدىكى تەشنالىقىنى بىلمىدىڭ بۇ كەچ.

ئېقىن ئەتسە تېمىپ كىرپىكلىرىمدىن ناتىۋان شەبنەم،
سەمەرقەنت ئالمىسىدەك قارىچۇغىمدا لەيلىدىڭ بۇ كەچ.

پەلەك چەرخىڭدە ھىجراندىن يېرىلغان تاشقا ئىمكان يوق،
ۋاپا بوستانىدا نازۇك چىمەننى چەيلىدىڭ بۇ كەچ.

بۇ يازمىنى ئاخىرىدا   ھەقيار تەھرىرلىگەن. ۋاقتى  2015-3-18 23:16  

ھەقيار ئەپەندىنىڭ قۇتلۇق قەلىمىگە مۇبارەك! بەك قاملىشىپتۇ! لىرىكىلار ئۈزۈلمىگەي، ئىنشائاللاھ!

غەزەللەر ھەقىقەتەن ياخشى يېزىلىپتۇ...

  ھەقيار  ئەپەندى، قۇتلۇق بولسۇن،  غەزەللىرىڭىز ياخشى چىقىپتۇ، بولۇپمۇ «بۇ كەچ»نىڭ قىممىتى خېلى بار...ئامەت يار بولسۇن...بىراق « قەلب، بېرىپ، غېرىبلىق، چېچەكلەر، مەھەللەڭگە، كېلىپ، مەرد،  ئېتىقاد، نامەرد، مېنى، قارچۇقۇم...» دېگەن سۆزلەر توغرا يېزىلغان بولسا، قانداق ياخشى بولغان بولاتتى-ھە؟  غەزەل يېزىش-ئەۋزەل ئىش...تېمىلار تېخىمۇ يېڭىلىنىشقا يۈزلەنسە...ئاقساقاللىق قىلىپ قويغىنىمنى كەچۈرۈڭ. مەنمۇ بىر ئۆگەنگۈچىدۇرمەن...

قېرىنداشلارنىڭ دوستانە تەكلىۋىگە كۆپ رەخمەت، جەزمەن تىرىشچانلىق كۆرسىتمەن....

غەزەللەر ياخشى چىقىپتۇ. قۇتلۇق بولسۇن ھەقيار!

‹‹مېھىر بىلەن دۇنيا گۈزەل››دەپ نىدا قالغان ئىدى پەرىدە ئىسمائىل .
دۇنيانىڭ گۈزەللىكى مېھىر رىشتىسىنى تۇتاشتۇرىدىغان قەلبلەردە.....لىرىكا

ھەقيار ئەپەندىنىڭ قەلىمىگە مۇبارەك بولغاي.

قەلىمىڭىزگە قۇت  تىلەيمەن.

ok

ھوزۇرلاندىم ، ياخشى يېزىلغان غەزەلكەن.