ئامىنە ئابدۇۋايىت : يېتىم بولدوق ئىنىم ئىككىمىز [ئۇلانما كۆچۈرۈش]

يېتىم بولدوق ئىنىم ئىككىمىز

(ئاتامنىڭ ۋاپاتىدىن تولىمو قايغۇردۇم ، ئىچىمغا پاتمىغان ئەلەملىرىمنى قەلىمىم بىلەن ئىزھار قىلىشنى لايىق تاپتىم ) .

بېشىمىزغا چۇشتى مۇشكۇل كۇن ،
مارت ئېيىنىڭ ئونىنچى كۇنى .
بەندىچىلىك قىلدى جان ئاتام ،
ئەزان ۋاقتى سەيشەنبە تۈنى .

ئاتا !! دېدوق يىغلىدوق زار -زار ،
يامغۇر بولوپ ئاقتى يېشىمىز .
ئەل ھۆكمى ھەق دېدى جامائەت ،
يېتىم بولدوق ئىنىم ئىككىمىز .

تەتىل قىلىپ كەلسە بەش نەۋرەڭ ،
سەن توغرىلىق نىمىمو دەرمەن .
باشلاپ بېرىپ تۇپراق بېشىغا ،
ياقا يىرتىپ فەرياد چېكەرمەن .

ئاتا - ئاتا - ۋاي جېنىم ئاتا !!!
بەك چىداملىق قەيسەر ئىدىڭغو ؟
ئۆيىمىزدە خىزىردەك تۇرغان ،
نۇرلۇق ماياك ئەختەر ئىدىڭغو ؟

ئاشساڭمو گەر توقسان ئۇچ داۋان ،
قىلچە ۋايساپ قاخشىمىغانتىڭ .
مۇكچەيتسىمو بېلىڭنى تۇرمۇش ،
پەقەت - پەقەت چاندۇرمىغانتىڭ .

ئېگىزيەر @ دە بولغان ئۇرۇشتا ،
پىلموت ئاتتىم دەپ بەرگەن ئىدىڭ .
ئېڭىكىڭدا قالغان تاتۇقنى ،
ئوق ئىزى دەپ كۆركەتكەن ئىدىڭ .

سۆز ئېچىلسا ئون بىر بېتىم @ دىن ،
ۋايىزلاردەك سۆزلەپ كېتەتتىڭ .
‹‹ئازات قىلغان جوڭگونى مەن دەپ ›› ،
پەخىرلىنىپ مەغرۇر كۇلەتتىڭ .

باشلانغاندا مودىھىش كۇنلەر @ ،
كەيدۇرگەنكەن بېشىڭغا موزا @ .
قارىلىنىپ قارا يىپ بولوپ ،
سېلىنغانكەن قولوڭغا كويزا .

ئاي ئون بەشى قاراڭغو بولسا ،
بولغىنىدەك ئون بەشى يورۇق .
ئو كۇنلەر @ مو كەلمەسكە كېتىپ ،
ھايات يولوڭ نۇرلانغان تولوق .

نۇرغۇن ئىشلار ئۆتسىمو باشتىن ،
قەدىرلەيتتىڭ بىلىملىكلەرنى .
مىھمان قىلىپ قويمو سوياتتىڭ ،
ئۇچقېتالساڭ ئىلىملىكلەرنى .

خورلوق بىلىپ ساۋاتسىزلىقنى ،
جۇپ بالاڭنى  قىلدىڭ ساۋاتلىق .
ئىخلاسىڭدىن تۇلپار مىندۇرۇپ ،
پەن كۆكىدە قىلدىڭ قاناتلىق .

ئەجرىڭ بىلەن بولوپ بىجىرىم ،
غەم - غۇسىسىز ياشىغان ئېدوق .
ھالال مېھنەت - ھالال ئەمگەكتىن ،
بەخىتلىك دەپ سانالغان ئىدوق .

مەرت -سېخىلىق بولغاچ قېنىڭدا ،
قۇرۇق كەتمەي ئەپ كەتتىڭ باھار .
دەرتلىك تىنىپ ئاچچىق تولغاندوق ،
قىلغىنىڭدا مەڭگولوق شىكار .

مانا ئەمدى غەمگە چىلىشىپ ،
ئولتىرىمىز كۆزىمىزدا ياش .
تاپالمايدو ئانام تەسەللى ،
تاشلاپ كەتكەچ ئونى يار ، ئاداش ،

بەستىڭ ئىزدەپ تاققا قارىساق ،
تاغ سۇكۇتتە ئەگدى بېشىنى .
مېھرىڭ ئىزدەپ قوياشقا باقساق ،
بۇلۇت كۆيۇپ تۆكتى يېشىنى .

كۆزۇڭ ئىزلەپ يۇلتۇزغا باقساق ،
چىمچاقلاتتى چولپان كۆزىنى .
چېھرىڭ ئىزلەپ ئايغا تەلمۇرسەك ،
ئاي دالدىغا ئالدى ئۆزىنى .

لەۋنى چىشلەپ زىمىنغا باقساق ،
زىمىن مەغرۇر تەۋرىنىپ قويدى .
‹‹قىيامەتلىك ماكان مەندە ›› دەپ ،
سەزگۇمىزنى سەگىتىپ قويدى .

چۇشەندوق بىز بىر ھەقىقەتنى ،
بو دۇنيادىن ھامان كېتىشنى .
سەن تاپقاندەك يېقىنلىرىڭنى ،
مەھشەرگاھدىن تۇققان تېپىشنى .

خاتىرجەم بوپ ئال ئاتا ئارام ،
قەۋرەڭنى بىز يوقلاپ تۇرىمىز .
سەن ئۇگەتكەن ئايەتنى ئوقۇپ ،
دۇئا - تەگبىر يوللاپ تۇرىمىز .


ئېگىزيەر - يېڭىسار ناھيىسىدىكى بىر كەنت .
ئونبىر بېتىم -گومىنداڭ ئارمىيەسى  بىلەن مىللىي ئارمىيە تۇزگەن 11 ماددىلىق كېلىشىم بولوپ ، بو تارىختا 11 ماددىلىق بېتىم دەپ ئاتالغان .
مۇھدىھىش كۇنلەر - مەدىنيەت زور ئىنقىلاۋى.
موزا -جازا قالپىقى .
قارا يىپ  - چەتكە باغلانغان ئۇنسۇر (شو چاغدىكى ئاتالغو ).


2015-3-10 -ئاقتۇ



بۇ يازمىنى ئاخىرىدا   kiwirhemit تەھرىرلىگەن. ۋاقتى  2015-4-15 15:59  

ھۆرمەتلىك ئامىنە خانىم، سىزگە سەۋر تىلەيمەن.
شېئىردىكى ماتەم-مۇسىبەت تۇيغۇسىدىن،  ئائىلىنىڭ تۈۋرىكى بولغان ئاتىغا بولغان سېغىنىش ھېسىياتىدىن ۋۇجۇدۇم لەرزىگە كەلدى...ھاياتلارنىڭ بەختى ئۈچۈن چىداملىق بولمىساق بولمايدىكەن....

سىزگە ۋە ئائىلىڭىزدىكىلەرگە سەۋىر تىلەيمەن،ئاتىڭىزنىڭ ئاخىرەتلىكى ياخشى بولغاي،

ئۇلۇغ ئاللادىن سىزگە سەۋىر تىلەيمەن ئامىنە خانىم. بەردەم بولۇڭ!
مۇسىبەتنامىڭىزدىكى ئاتىڭىزغا بولغان سېغىنىش ئازابى مىنىڭمۇ يۈرۈگۈمنى ئەزدى. ھەم ئاتىڭىزنىڭ ھاياتىنى ئەل ئۈچۈن ئاتىغان ئىسىل ئىنسان ئىكەنلىگىنى چۈشەندىم. مەرھۇمنىڭ ياتقان جايى جەننەتتە بولسۇن. ئۆزىڭىزنى ئاسراڭ! ئائىلىڭىز سىزگە مۇھتاج. بالىلارغا سىز بولمىسىڭىز بولمايدۇ. ئاللا تىنىڭىزنى سالامەت قىلسۇن!

  ئامىنە، سەبرى تىلەيمەن، ئاڭلىماي قاپتىمىز، بېرىپ مۇڭداش بولار ئىدۇق، تەسەللىي بېرەر ئىدۇق...

  ئامىنە، سەبرى تىلەيمەن، ئاڭلىماي قاپتىمىز، بېرىپ مۇڭداش بولار ئىدۇق، تەسەللىي بېرەر ئىدۇق...

ئامىنە ھەدە،  ئاللاھتىن مەرھۇمغا مەغفىرەت ، سىلەرگە سەۋر تىلەشتىن ئۆزگىگە قادىر ئەمەس ئىكەنمىز .  ئاللاھ مەرتىۋىسىنى ئۈستۈن قىلغاي .

               ....ياشاپسىز  ئەسىرگە تەڭ توۋرۈك بولۇپ ،
                    ئوغۇلدەك  قىزلارنىڭ  ئاتىسى  بولۇپ .
                    ياشاپسىز توغراقنىڭ قىسمىتى بىرلە -
                    تارىخنىڭ شاھىدى - كاتتىسى بولۇپ .
                  
                    

ئاۋۇ ئىزاھ بېرىلگەن مەزمۇندا يەڭگىل بولمىغان خاتالىق سادىر قىلىنىپتۇ،«ئون بىر ماددىلىق بېتىم» گومىنداڭ بىلەن ئازاتلىق ئارمىيە تۈزگەن بېتىم بولماستىن،گومىنداڭ بىلەن ئۈچ ۋىلايەت ۋاقىتلىق ھۆكۈمىتى تۈزگەن بېتىم ！…

    ئالەمدە سىز ئۈچۈن يانغان يىگانە دەرمان چىرىقى ئۆچكەندە سىزنىڭ قايسى دەرىجىدە ئازابلىنىپ كەتكىنىڭىزنى قىياس قىلماقمۇ تەس. شۇنداقتىمۇ سىزگە سەۋر تىلەشتىن باشقا ئىلاج يوق. چۈنكى، ئۆلۈم شاھ ۋە گادايغا ئوخشاشلا باراۋەر مەجبۇرىيەت ئىكەن. بەردەم بولغايسىز!

ئامىنە! سىزگە مۇنداق تەسەللى  ئېيتىمەن. سىز --
بىر جەڭچىنىڭ قىزى بولغانلىقىڭىز بىلەن ئاتىڭىزدىن ئىپتىخارلىنىشقا ھەقلىقسىز!

مۇمكىن بولسا،ئاتىڭىزنىڭ سەرگۈزەشتىسىنى پۈتۈنلەپ،بىزگە تەقدىم قىلغان بولسىڭىز.

دادىڭىزنىڭ ياتقان يېرى جەننەتتە بولغاي، ئارتۇقچە قايغۇرۇش ئونىڭ روھىغا ئازاب ئېلىپ كېلىدۇ. سىزگە ۋە ئائىلىڭىزدىكىلەرگە سەۋىر تىلەيمەن!

سىزگە سەۋىر تىلەيمەن،
بۇ دۇنيادىكى ئاتىلار ئامان بولسۇن،ئۇ دۇنيادىكلەر جەننەتتە بولسۇن،
غەيرەتلىك بولغايسىز

ئاپتورغا سەۋر يار بولغاي.مەرھۇمنىڭ ئاخىرەتلىكى خەيرلىك بولغاي.