مۇسا ئەھەد تىركەش: بېسىلغان يوللار [ئۇلانما كۆچۈرۈش]

مۇسا ئەھەد تىركەش:  بېسىلغان يوللار

                         (ئايالىم  K. Hغا )


ئىككى كەم
ئوتتۇز يىلمۇ بولۇپ  قالدى،
ئىككى كەم ئوتتۇز يىل،
بىر ھارۋىنى سۆرىگىلى
ھارۋىغا تەڭ قوشۇلغان ئاتتەك.
قانچە چاتقاللىق،
ئىز چۈشمىگەن داۋانلار،
تۇماندەك لەيلەپ
ئارقىدا قالدى.
قالدى ئارقىدا
ئوتتۇز يىل ئاۋالقى
ئۇ قارام ھىسلار
مېنىڭ بەڭباشلىقىم
ساددىلىقىم
سېنىڭ كەسكىن، چېچەنلىكىڭ،
ئاق كۆڭۈل، كەڭ قورساقلىقىڭ،
مىجەزى ئوخشىماس
ئىككى ئادەم
بىر تەنگە ئايلاندى.
خۇي-پەيلىمىز
ھەتتا ئىللەتلىرىمىز
ئاستا-ئاستا ئۆزلەشتى.
ئايرىلىپ تۇردۇق كۆپ يىللار،
مەن بورىتالادا
سەن ئۈرۈمچىدە
يامالىق تېغىدا ماكان تۇتتۇق،
مۇشەققەت تاغلىرى يەلكىمىزدە.
خوۋلىقىدىن
جاپارىمنى تارتتىڭ جىق.
كېسەلچان بولدۇڭ،
ئۈچ قېتىم ئوپىراتسىيە ئۈستىلىدە.
بەردەم ھاياتىڭ چۈشكە ئايلاندى.
دات دىمىدىڭ
ئىشەنچ ھامان ھەمرايىڭ بولدى،
ھەر قاچان مەغرۇر
كۈلۈپ ياشىدىڭ
بۇ كۈلكىلەر
كۈلكىسىز كۈنلىرىمگە جان قوشتى.
كېچە – كېچىلەپ
يازغان مۇھەببەت لىرىكىلىرىم
خىيالىمدىكى ئالىكىملەرگە ئاتالدى.
ساڭا بىر رەت شېئىر يازمىدىم
يازالمىدىم قانچە قىلىپمۇ
قولاشمىدى راۋان تىللىرىم.
قەدىناسلار
ئۈنسىز سۆيۈشىدۇ.
بۇ سۆيگۈ
ئۈگىتىدۇ ھەممىنى.
ئۇلار ماڭغان
داۋراڭسىز ھايات
سۆيگۈ قىلىپ يازار ئۇلارنى.
ئويلىسام ئۇيىلىمەن
قامغاقتەك لەيلەپ يۈرگەن ھاياتىم.
ساڭا تۈۋرۈك بولالمىدىم،
بولالمىدى باش-پاناھ.
بورانلاردا سۇنغان قاناتىم.
سەن ئارزۇ ئەتكەن يەرلەرگە
بىللە بارالمىدۇق
مەن
دوستلار بىلەن سەيلىدە بولسام،
سەن ئىشتا بولدۇڭ.
مەن ئۇخلاۋاتقاندا
سەن يولدا بولدۇڭ.
ئاپتۇبۇس كالۇنىدا،
بىلەتچى، تەڭشۈرگۈچى بوپ،
ئۆتۈپ كەتتى نەچچە ئون يىل ھاياتىڭ.
بىلمەيمەن
ئۇخلاپ باققىنىڭنى قېنىپ بىر قېتىم.
كۆپ قەرىزدار بولدۇم ساڭا،
بۇ قەرزلەر
قەرزلەر بولۇپ تۇرىۋەردى.
ئەمما بىرلا خۇشلۇقۇم
ساڭا زىنھار ئازار بەرمىدىم.
ئازارلىق تۇرمۇش،
يات بولدى بىزگە.
ئىككى كەم ئوتتۇز  يىلدا
باردۇر يۇلتۇز كەينىگە مۆككەن
ئەملەنمىگەن جاراھىتىمىز،
ئىيۇلدىكى ھارارىتىمىز.
باردۇر يەنە ئۇلۇغ – تىنىقلار
تۈن نىسبىدىكى
ئاددى ھۇجرىدا
ھىچكىمگە تىنمىغان نادامىتىمىز.
مانا ئەمدى
ئەللىك داۋاندىن ساڭگىلاپ
چۈشۈۋاتقان ھارغىن كارۋاندەك
ھاياتنىڭ نامەلۇم
مەنزىلىگە كېتىۋاتىمىز.
ئۈمىد بېغىشلاپ،
ئاي-يىللارغا.
كۈڭۈلگە زەررە خۇرسەنلىك يەتسە
ئايەم بىلىپ ئاشۇ دەملەرنى،
ئاياپ
بىر-بىرىمىزنى
مېھمانلاردەك ئۆتىۋاتىمىز.
2014-يىل4-ئاينىڭ 25-كۈنى
13899986235

مۇھەببەتلىك قەلبنىڭ يارقىن جۇلاسى مەڭگۈ ئۆچمىگەي!

     مۇھەببىتىڭلارغا ئىزچىللىق نىسىپ بولسۇن بۇرادەر. كۆيۈمچانلىق سىڭىپ كەتكەن مىجەزىڭ بۇ شېئىرىڭنىڭ ئېلان قىلىنىشى بىلەن تېخىمۇ يارقىنلاشسۇن!

تۇرمۇش قايناملىرى چىن لىرىك بىلەن بىزەلگەن مۇھاببەتلىك بۇ تىنىقلار شۇ ئائىلىنىڭ ھاياتقا بولغان ئۈمۈد-ئارزۇلىرىنى ھەقىقەتەن يورتۇپ بەرگەن...تەشەككۈر،تۇچ قەلەم يالتىراپ تۇرغاي!

شائىرنىڭ بۇ شېئىرى شۇنداق مۇۋاپىقىيەتلىك چىقىپتۇ.شېئىرنىڭ چۈشۈركىسىگە بىرىلگەن :
مانا ئەمدى
ئەللىك داۋاندىن ساڭگىلاپ
چۈشۈۋاتقان ھارغىن كارۋاندەك
ھاياتنىڭ نامەلۇم
مەنزىلىگە كېتىۋاتىمىز.
ئۈمىد بېغىشلاپ،
ئاي-يىللارغا.
كۈڭۈلگە زەررە خۇرسەنلىك يەتسە
ئايەم بىلىپ ئاشۇ دەملەرنى،
ئاياپ
بىر-بىرىمىزنى
مېھمانلاردەك ئۆتىۋاتىمىز.
دىگەن مىسرالار كىشىنى چوڭقۇر ئويغا سالىدۇ...دوستۇمنىڭ  تىنىگە سالامەتلىك ئائىلىسىگە بەخت،قەلىمىگە تېخىمۇ كۆپ نۇسرەت تىلەيمەن...

مەن سەل ئاددى ھەم ئوچۇق بايانلارنى شېئىرنىڭ ئەسلىگە نۇقسان يەتكۈزگەندەك ھېس قىلدىم...مەسىلەن سەن ئۇرۇمچىدە ،مەن بورتالادا،سەن ئۈچ قېتىم ئوپىراتسىيە بولدۇڭ دىگەندەك  مىسرالاردا ... بۇ يازمىنى ئاخىرىدا   qaraxan تەھرىرلىگەن. ۋاقتى  2015-3-18 12:24  

...بۇ مۇنداقچە ئېيىتقاندا ئىپىك شېئىرىلاردا ئىسىملار ئەينەن ئېلىنىدىغانلىقىنىڭ يارقىن چېقىنلىرى بولسا كېرەك...؟!

مۇسا ئەھەت بۇرادەر بۇ شېئىرىڭدىن سېنىڭ ئائىلەڭنى ۋە يەنە نۇرغۇن-نەرسىلەرنى بىلىۋالدىم. مۇھەببەتلىك ئائىلەڭلارغا كۆز تەگمىسۇن!

       بۇ شېئىردىكى گۈزەللىك خۇددى «خېمىردەك يۇمشاپ» بىر ئائىلە كىشىلىرىنىڭ ساپ مۇھەببىتى ئۆز جۇلاسىنى تېپىپتۇ ...

ئ‍وتتۇز ئ‍ىككى  يىل
بولدۇق  قۇش  ئ‍ۈلاق
سۆرەپتىمىز تۇرمۇش ھارۋىسى
قالمىدى  سەندە قىزلىق جۇلا
قالمىدى مەندا  يىگىتلىك سولەت
مىنىڭ  شاشلىغىم  سىڭدى شۇنچە
سەندىكى ئ‍ەپۇچان  خۇش پىئ‍للىققا.
خۇشاللىقنى  تاراتتىڭ  يىيىپ
غەم  قايغۇنى سۇگۇدۇڭ  ھاندۇگلاپ
سەندگ  بار  خىسلەت
مەندە  بار  كۆيۇش
بۇ يازمىنى ئاخىرىدا   گۇلپەرى تەھرىرلىگەن. ۋاقتى  2015-3-20 20:40  

بىر-بىرىڭلارغا مەڭگۈ مېھمان بولۇپ ئۆتۈڭلار قەدىردانلار!كۆز تەگمىسۇن!