ئا.جۇدۇن: نورۇزنامە

                                       نورۇزنامە
   
                                      ئا . جۇدۇن

                      كەلدى مانا ، ئەگىز  بىلەن  يىلنىڭ  بېشى ،
                     پاقلان يىللىق يىگىت-قىزنىڭ مۆچەل يېشى .

                     دانالارنىڭ  دۇردانىسى  قۇتتۇر  بىزگە ،
                     بولساق ئەگەر ھېكىمەتلەر چىن سىردىشى .

                     ئۇپۇق  تامان  كۆرۈنگەن شۇ  ئۇز  ھاياتتا ،
                     بار ئەلۋەتتە،  ھەر  كىشىنىڭ  نىسىۋېسى .

                    تەبىئەتنىڭ  مول نېمىتى  يېتەر  بىزگە ،
                    بىھۇدىدۇر،  ئۆزگىلەرنىڭ  قىزغېنىشى .

                   كېلىڭ دوستلار، باغباغلىشىپ باش باھاردا-
                   تەڭ ئىچەيلى شېرىن-شەربەت نورۇز ئېشى !

                                              قاراماي بۇ يازمىنى ئاخىرىدا   Erchin تەھرىرلىگەن. ۋاقتى  2015-3-17 20:19  

نورۇزنامە
ئېزىز تۇرسۇن
توڭلار ئېرىپ زېمىندا ئەتىيازغا باش كەلدى،
بىدە كۆكى جىلمىيىپ قاچىلاردا ئاش كەلدى.

بارچە جانلىق ئويغۇنۇپ جودۇندىكى ئۇيقۇدىن،
بۇ ھاياتقا قوشۇپ جان چىر-چىر چىرىلداش كەلدى.

چېچەك ئاچتى مىۋىلەر دىماغلارنى مەست قىلىپ،
تەكچىدىكى ئۈزۈمگە ھاياجاندا ياش كەلدى.

قۇشلار كەلدى جەنۇپتىن قاتارلىشىپ سەپ تۈزۈپ،
قار ئورنىغا ئاسماندىن سىم-سىم سىمىلداش كەلدى.

دېھقان ئاتام ئالدىراش ئۇرۇق سالدى يېرىگە،
يەر كۆڭلىنى تىڭشىسا گۆپ-گۆپ گۇپۇلداش كەلدى.

پوتلا بولغان تاللاردىن بوت-بوت ياساپ بالىلار،
ئېتىز-قىردا سەكرىشىپ قوۋناقلىق-قايناش كەلدى.

چاچ ئۆرۈشۈپ تاللاردىن،ئوسما تىرىپ باغلاردىن،
يۈرەكلەرگە ئوت سېلىپ ھىلال-قەلەم قاش كەلدى.

سۆيگۈ ئۇلاپ سۆيگۈگە،ئارمان پۈكۈپ كۆڭلىگە،
ئۆي-ئۆيلەرگە توي تارتىپ مانا بىر توپ ياش كەلدى.

كۈن بىلەن تۈن تەڭلىشىپ، بەيگىلەردە ياندىشىپ،
قوشاق قېتىپ نورۇزغا قەۋمى- قېرىنداش كەلدى.

ھۇدنى قوغلاپ ساماغا،جۇدنى قوغلاپ تالاغا،
بارچىمىزنى قىلىپ جەم بۇ يىل نورۇز شاش كەلدى.

نورۇز بىزنىڭ ئاتا مىراس بايرىمىمىز،
يىلدا بىررەت خوشال-خورام ئوينايدىغان.
يىلنىڭ بېشى، ئىشنىڭ بېشى، بولار پۇرسەت،
ئىستىقپالىم ئۈستىدە بىر ئويلايدىغان.

بەك ياخشى يېزىلىپتۇ  ئۇستازىم..

نەۋرۇزلۇق كۈيلەر دىلغا ھۇزۇر بەردى. شېئىرنىڭ تىلى ئاددى بولغىنى بىلەن نەۋرۇزنىڭ بارلىق خاسيەتلىرى مىسرالىرىدا مۇجەسسەم بولۇپ، كۈڭۈللەرگە باھار شامىلىدەك ھۇزۇر بېرىدىكەن. سۆيۈندۈم. تەكرار ئوقۇپ چىقتىم.

شېئىر ئاستىغا يېزىلغان ئىنكاستىكى شېئىرلارمۇ ياخشى يېزىلغان ئىكەن. نەۋرۇز قوشاقلىرى ئۈزۈلمىسۇن. بۇ يازمىنى ئاخىرىدا   ئاينۇرى تەھرىرلىگەن. ۋاقتى  2015-3-17 21:21  

   ئېزىزجاننى ياقتۇرۇپ، تۇشمۇ -تۇشتىن ئاقتۇرۇپ ،
    جۇۋىسىنى تاشلىغان مۆڭگۈزلۇك ئاداش كەلدى .
   

مۇنبەردىكى  قېرىنداشلىرىمنىڭ  نەۋرۇزلۇق نەزمىلىرىنى بەك ياقتۇردۇم،نەۋرۇز خاسىيەتلىك بايرامدۇر،نەۋرۇز لۇق نەزمە-قوشاقلار ئۈزۈلمىسۇن.

نورۇزمۇ كەلدى.نورۇز ئېشىنى زەپ سېغىندىم.

  كېلىڭ دوستلار، باغباغلىشىپ باش باھاردا-
                   تەڭ ئىچەيلى شېرىن-شەربەت نورۇز ئېشى !

دىگەندەك.

نەۋرۇز خاسىيەتلىك بايرامدۇر،شۇڭا نەۋرۇز لۇق پائالىيەتلەرنى مەنىلىك ئۆتكۈزەيلى.

يىڭىچە ئىلھام، يىڭىچە زوقلارغا مۇبارەك بولسۇن！

نۇرۇزلۇق غەزەللىرىڭىز قىسقا ۋە تولىمۇ تېتىملىق چىقىپتۇ ! ئابدۇۋايت ئەپەندى .

ناھايتى ئىسىل ئاخىرلىشىپتۇ بۇ نۇرۇزنامە .

ئۇستازغا ساقلىق ، قەلىمىگە بەرىكەت يار بولغاي .

مۇبارەك بولسۇن .

ئا. جۇدۇن ئاكا، ئېزىز ئاكا، سىلەرگە نەۋرۇزلۇق سالام، خالىساڭلار شىئېرىڭلارنى تور بېتىمىزگە قۇياي دەپ ئويلىغان، گاچچىدە بىر رۇخسەت بېرىۋەتسەڭلار
http://uyghur.people.com.cn/

قىسقا ئەمما مەزمۇنلۇق يېزىلغان بۇ نورۇزنامىدىن قەلبىم نورۇز شادلىقىغا تولدى .

نۇرۇزنامىلەر-نۇرۇز بۇلاق بېشىدا نۇرۇزنامە ئوقۇشقان بۈيۈك سېمالارنى ئەسلەتتى، رەھمەت!