غوجىمۇھەممەد: ئىككى پارچە مۇھەببەت شېئىرى

غوجىمۇھەممەد · ۋاقتى: 2015-3-9 03:09:32


	مەجنۇن ئايال كىيىمىنى سالغۇچە خىيال مېنى يالىڭاچ قىلار. ھايات كىيىمىنى سالغۇچە ئۆلۈم مېنى يالىڭاچ قىلار. يالىڭاچلىق جەندەمنى كېيىپ يار كوچىسىدا يۈرەرمەن. بىلەرمەن قۇياشنىڭ ئەمالىقىنى بىلەرمەن مۇھەببەتنىڭ رەسۋالىقىنى مىڭ يىللىق دەشتى- چۆلدىن كېلىپ يار ئىشىكىدە ئۆلەرمەن. خۇدا مېنى ماڭا بەرمەس ئىشق مېنى ماڭا ھەيدەر، مۇساپىرمەن جاھانغا، ئاخىر ئۆز قۇچىقىمدا ئۆلەرمەن. يۇلتۇزلارغا قارىدىم ئۇزاق يۇلتۇزلارغا قارىدىم ئۇزاق، كۆزلىرىمگە يىقىلدى مىڭ كۆز. ئايغا باقتىم، لەپىلدەپ پىراق لەۋلىرىمگە دىۋەيلىدى سۆز. دەرەخ جىمجىت يېنىمدىن ئۆتەر ياپراق ئۈنسىز يېشىنى سېپەر. سېغىنىشقا تولغان بۇلۇڭلار ئاي نۇرىغا چىلىشىپ كېتەر. مېنىڭ كۆڭلۈم ئاھ، مېنىڭ كۆڭلۈم ئاسماندىنمۇ يىراققا كېتەر... ئاھ، ئۆلۈمدىن تولدۇر بىر ئاپقۇر قارا چاچلىق گۈزىلىم مېنىڭ، ماكان تۇتسۇن تېنىڭدە سېنىڭ پايانى يوق ئەجىلىم مېنىڭ... ئاھ، قوغلىۋەت مېنى ئاھ، مەندە سەرسان يۈرگەن ۋەتىنىم مېنىڭ، چۈشۈمدىكى قوينۇڭدا سېنىڭ ئىرىپ كەتسۇن بەدىنىم مېنىڭ... قانچە دەھشەت قۇچاقلىشىشلار، كۆيۈپ كەتسۇن ئورمانلار، چۆللەر. قانچە دەھشەت سۆيۈشۈشلەر، قۇرۇپ كەتسۇن دەريالار، كۆللەر. قانچە ئاپئاق يالىڭاچ تۈنلەر قاپقاراڭغۇ ئۇندا كۆڭۈللەر. قانچە جىمجىت ئاھ، قانچە جىمجىت مۇھەببەتنى چاقىرغان ئۈنلەر... مۇھەببەتنىڭ جىمجىتلىقىدا جاراڭلىسۇن غەزىلىم مېنىڭ! يۇلتۇزلارغا قارىدىم ئۇزاق، كۆزلىرىمگە يىقىلدى مىڭ كۆز. مۇھەببەتنى شىۋىرلىما دەپ لەۋلىرىمگە دىۋەيلىدى سۆز! بۇ يازمىنى ئاخىرىدا غوجىمۇھەممەد تەھرىرلىگەن. ۋاقتى 2015-3-9 03:55

فونتان · ۋاقتى: 2015-3-9 10:32:41


	ياخشى بەك ياخشى يېزىپسىز؟؟؟؟؟؟

نەرگىس · ۋاقتى: 2015-3-9 10:48:21


	بىلەرمەن قۇياشنىڭ ئەمالىقىنى بىلەرمەن مۇھەببەتنىڭ رەسۋالىقىنى بۇ مىسرالار مېنى توختىتىپ قويۇپ شېئىرنىڭ كېيىنكى مىسرالىرىغا ئۆتەلمەي قالدىم، شېئىرنى تەكرار باشتىن كېلىپ ئوقۇشقا مەجبۇر قىلدى. ئاشۇ بىلىش بىزنى ئاخىرقى نەپەسلىرىمىزگىچە مۇھەببەت بىلەن ياشاشقا ئىتتىرىدۇ، ئاشۇ بىلىش بىزنى يەنە سېھىرلىك تۇيغۇلىرىغا ئەسىر قىلىپ مۇھەببەت باغرىغا ئىتتىرىدۇ، ئاشۇ بىلىش بىزنى ئۆزىمىزگە تونۇتىدۇ،

ئۆمەر · ۋاقتى: 2015-3-9 12:05:10


	قەلىمىڭىز تېخىمۇ قۇت تاپقاي دوستۇم!

كەشپى · ۋاقتى: 2015-3-9 12:37:39


	ئېسىل مىسرالاردىن سۆيۈندۈم.

كاككۇك000 · ۋاقتى: 2015-3-9 12:47:23


	بىلىمەن مۇھەببەتنىڭ رەسۋالىقىنى ......................

پاتىھ · ۋاقتى: 2015-3-9 12:56:12


	ئالامەت ئىسىل چىقىپتۇ

پاتىھ · ۋاقتى: 2015-3-9 12:57:41


	[بىلىمەن ]................

ABLAJAN.BOWAKI · ۋاقتى: 2015-3-9 13:29:12


	«خۇدا مېنى ماڭا بەرمەس ئىشق مېنى ماڭا ھەيدەر، مۇساپىرمەن جاھانغا، ئاخىر ئۆز قۇچىقىمدا ئۆلەرمەن.» دېگەن كۇبلېت ياخشى چىقىپتۇ، بىراق، دوستۇم، مەيلى قانداقلا بولسۇن، خۇداغا يۈزلىنىپ نارازى بولىدىغان پىكىرلەرنى قىلماڭ...شېئىرلىرىڭىزنىڭ ھەرقانچە چوڭقۇر مەنا قاتلىمى بولسىمۇ...مۇشۇ شېئىرنىڭ بىرىنچى كۇبلېتى ھەققىدىمۇ ئەستايىدىلراق ئويلىنىش كېرەك، دەپ قارايمەن...

تامچە0909 · ۋاقتى: 2015-3-9 15:12:30


	«خۇدا مېنى ماڭا بەرمەس ئىشق مېنى ماڭا ھەيدەر، مۇساپىرمەن جاھانغا، ئاخىر ئۆز قۇچىقىمدا ئۆلەرمەن.» غوجىمۇھەممەدنىڭ يۇقۇرقى كۇبلىتىنى مۇنداق ئوقۇپ باقتىم: مەۋجۇتلىقىمدىكى مەن، قەلبىمدىكى مەن بىلەن بىردەك بولالمىدى، لىكىن دىلىمدىكى ئىشىق شۇنىڭغا زورلايدۇ.شۇ سەۋەپ ۋەتەندە مۇساپىرمەن، قەلبىمدە ئۆلۈمەن...

mahatjan · ۋاقتى: 2015-3-9 15:25:25


	ۋەتەندىكى مۇساپىرلىقتىن زارلاپ قەلبىڭىزدە ئۆلۈمەن دىسڭىز تورا بولمايد.ئۆز ۋەتىنىدىن زارلىغىچە، ئۆز ۋەتىنىڭ تۇپرىقىدا ئۆلگەن ياخشىراق.

ئەلرام · ۋاقتى: 2015-3-9 18:46:45


	مەندىن رەنجىسەڭلار مەيلى... تۆۋەندىكى ئىككى مىسرانى ياقتۇرمۇدۇم، سەۋەپ؛ ھېسيات بىلەن ئەقىلنىڭ مۇناسىۋىتى توغرا بىر تەرەپ قىلىنمىغان (سىز قانداق چۈشەندۈرۈڭ مەن يەنىلا ئۆز پىكىرىمدە قالىمەن)! خۇدا مېنى ماڭا بەرمەس ئىشق مېنى ماڭا ھەيدەر،

ABLAJAN.BOWAKI · ۋاقتى: 2015-3-9 21:22:50


	«خۇدا مېنى ماڭا بەرمەس ئىشق مېنى ماڭا ھەيدەر، مۇساپىرمەن جاھانغا، ئاخىر ئۆز قۇچىقىمدا ئۆلەرمەن.» غوجىمۇھەممەدنىڭ يۇقۇرقى كۇبلىتىنى مۇنداق ئوقۇپ باقتىم: مەۋجۇتلىقىمدىكى مەن، قەلبىمدىكى مەن بىلەن بىردەك بولالمىدى، لىكىن دىلىمدىكى ئىشىق شۇنىڭغا زورلايدۇ.شۇ سەۋەپ ۋەتەندە مۇساپىرمەن، قەلبىمدە ئۆلۈمەن... » مېنىڭ قارىشىمچە، جاھاندا مۇتلەق يەككە بولغان ( يەنە بىرىنى تىلغا ئېلىشقا بولمايدىغان) مەبۇد ھەققىدە باشقىچە گەپ قىلغىلى بولماس...ئۇ مىسرالارنى قانداقلا ئوقۇماڭ، روھىڭىزنى ئۆرتەپ چىققان ئىلاھىي پىغانىڭىزغا مەلھەم بولالمايدۇ...

تۇغلان · ۋاقتى: 2015-3-9 21:46:37


	ئەلرام يوللىغان ۋاقتى 2015-3-9 18:46 مەندىن رەنجىسەڭلار مەيلى... تۆۋەندىكى ئىككى مىسرانى ي ... سالام ئەلرام،غوجىمۇھەممەتنىڭ سىز كۆرسەتكەن ئىككى مىسرانى قايتا -قايتا ئوقۇپ بىقىڭ؟ خۇدا مېنى ماڭا بەرمەس ئىشىق مېنى ماڭا ھەيدەر ناۋادا خۇدا ئىنسانغا ئۆز ئەركىنى بەرگەن بولسا سىزدە ۋە مەندە خۇداغا ھېچقانداق تەلپۇنۇش ۋە ئىشىنىش بولمايتتى ،شائىر ئىشىق مېنى ماڭا ھەيدەر دېگەن مىسرا ئارقىلىق ئۆزىنى خۇداغا يەنە ياراتقۇچىغا ئاتىغاندەك قىلىدۇ.

مىرئەھمەد مامۇت · ۋاقتى: 2015-3-9 21:56:39


	شېئىر بىزگە نۇرغۇن ئىددىيە سۆزلەپ بېرىدۇ . ئۇ شائىرنىڭ ئىددىيسى بولىشىمۇ ، شائىر ياشىغان دەۋىرنىڭ ئىددىيسى بولىشىمۇ ۋە ياكى ئوقۇرمەننىڭ ئىددىيسىمۇ بولىشى مۇمكىن . ئەمما ئوقۇرمەننىڭ شېئىردىن ئىزدەپ تاپىدىغىنى يەنىلا ئوقۇرمەننىڭ شېئىر ئارقىلىق ئىرىشكەن ئۆزىنىڭ ئىددىيەسى . شۇڭا شېئىر ھەققىدە ھەر بىر ئوقۇرمەننىڭ چۈشەنچىسى ئوخشاش بولمايدۇ . ھەممىمىز شائىر ياراتقان ئىددىيەنى تاپالىساق ئىدۇق شېئىر تىخىمۇ گۈزەللىشىپ كەتكەن بولاتتى .

غوجىمۇھەممەد: ئىككى پارچە مۇھەببەت شېئىرى

باھا سۆز

باھا سۆز