ئابدۇنىياز ئىمىن: يازغۇچىلار تورى ۋە ئىنكاس قەھەتچىلىكى [ئۇلانما كۆچۈرۈش]

         يازغۇچىلار تورى ۋە ئىنكاس قەھەتچىلىكى
                      ئابدۇنىياز ئىمىن

يېقىندىن بۇيان بىر تور بەتكە قانچىلىك سەۋىيلىك ئادەملەرنىڭ يىغىلغانلىقىغا، تور بېكەتنىڭ سۈپىتىگە ئۇنىڭدىكى تېمىلارغا چۈشكەن ئىنكاسلارغا قاراپ باھا بېرىدىغان بولۇپ قالدىم. يازغۇچىلار تورىغا تىزىملىتىپ كىرگىلى ئالاھەزەل ئىككى ئاي بولۇپ قاپتۇ، بۇ يەرگە كىرىپ ئەسەرلىرىمنى يوللاشتىكى مەقسىدىم ھەرگىزمۇ نام چىقىرىپ ئاتالمىش«مەشھۇر» دېگەن قالپاقنى كىيىش ئەمەس، بەلكى تور بېكەتتىكى ئىلغار پىكىرلىك، ئەدەبىياتنى چىن دىلىدىن سۆيىدىغان ئىلىم ئاشنالىرى بىلەن تونۇشۇش، ئۇلار بىلەن ئەدەبىياتىمىز ھەققىدە پاراڭلىشىپ، ئەدەبىياتىمىزنىڭ تەرەققىياتى ئۈچۈن ئازدۇر –كۆپتۇر كۈچ چىقىرىش، شۇ ئارقىلىق كۈنلىرىمنى تېخىمۇ مەنىگە ئىگە قىلىش ئىدى. ئەپسۇس، ئىككى ئاي بولغان بۈگۈنكى كۈنلەردە بۇ ئارزۇيۇمنىڭ سۆگەتتىن ئامۇت تەلەپ قىلغاندەك بىر ئىش ئىكەنلىكىنى تۇنۇپ يەتمەكتىمەن.
  مېنى بۇنچلىك ئۈمدسىزلەندۈرگەن نەرسە قانداقتۇر تور بىكەتنىڭ باشقۇرۇلىشى ياكى بېكەتنىڭ كۆرۈنمە يۈزى ئەمەس ، بەلكى ئىنكاس قەھەتچىلىكىدۇر. بىر پارچە ئەسەر يازغۇچىنىڭ قان-تەرىنىڭ مەھسۇلى، ئۇ مۇنبەرگە يوللانغان ئىكەن ئادەم بۇلۇش سۈپتىمىزدە ئادەملەرگە خاس تەمەخورلۇق بىلەن باشقىلاردىن ئىنكاس شەكلىدە كەلگەن خىلمۇ خىل باھالارنى كۈتىمىز، ھەم ئەسەرنىڭ باشقىلارغا يارىغان- يارىمىغانلىقىنى ئىنكاس ئارقىلىق دەڭسەيمىز. ئەگەر ئىنكاس بولمىسا خۇددى ئۇسسۇزلىقىمىز قانمىغاندەك ياكى تېما يوللاپ قىچىشمىغان يەرنى قاشلاپ ئارتۇق ئىش قىلىپ سالغاندەك تۇيغۇدا بولۇپ كۆڭلىمىز يېرىم بولىدۇ. ئەمما مۇنبىرىمىزدە يەنە بىر خىل ئىنكاسلار ئادەمنى تېخىمۇ بىئارام قىلىدىغان بولۇپ،  ئۇ دەل نۇسخىلانغان، بىكارچىلىقتىن يېزىپ قۇيۇلغان، باشقىلارغا ياخشى كۆرىنىش مەقسىدىدىكى ئىنكاستۇر.
مەن يازغۇچىلار مۇنبىرىدىكى بۇ خىل ماختاش ،  ئۇچۇرۇش تۈسىدىكى ھېچقانداق سەۋىيە كەتمەيدىغان ئىنكاسلارنى ھەر قېتىم كۆرسەم شۇنچىلىك بىئارام بولىمەنكى ،  ئېينىشتىيىننىڭ «مېنىڭ دۇنيا قارىشىم» دېگەن ماقالىسىدىكى «ئۇلاردا يىلىك بولسىلا يېتەرلىك ئىدى، مېڭە ئۇقۇشماسلىقتىن بېرىلىپ قالغان » دېگەن جۈملىلىرىدىكى ئېسىمگە كېلىدۇ،  ھەربىر ئاقىل قەلەم تەۋرەتكۈچى ئەسىرنىڭ توردا نوقۇل ماختىلىشنى ئەمەس بەلكى كەمچىلىكنىڭ كۆرسىتىلىپ شۇ ئارقىلىق كەلگۈسىگە تېخمۇ ياخشى ئاساس سېلىشنى ئۈمد قىلىدۇ. بۇ خىل «بەك ياخشى يېزىپسىز، تولىمۇ ياخشى سۈرەتلەپسىز» دېگەندەك ئاپتۇر بېرەر سائەت مۈكچىيىپ ئولتۇرۇپ يازغان ئەسەرگە ئەستايىدىل بولماسلىق ياكى گەپ تاپالماي دەپ سالغان بۇ سۆزلەر ئاپتور ئەقلىگە قىلىنغان مەسخرىدۇر.
ھەرقانداق ئىلىم مۇنازىرە ئارقىلىق،  كەمچىلىك ياكى نۇقسانلارنى سەمىمىي كۆرسىتىپ بېرىش ئارقىلىق تەرەققىي قىلىدۇ. باشقىلارغا يامان كۆرىنىپ قېلىشدىن قورقۇپ يېزىلغان ، ئوبىكتىپ مەيداندا تۇرۇپ يېزىلمىغان ھەر بىر ئىنكاس ماھىيەتتە ئۆز ۋىجدانغا قىلىنغان ھاقارەت، يازغۇچىغا قىلىنغان قەسىتتۇر.
يازغۇچىلار مۇنبىرىنىڭ ھەممىسى شۇنداقمۇ-يا؟ دەپ شىنجاڭ يازغۇچىلار تورىنىڭ خەنزوچىسىنى ئۆرۈپ –چۆرۈپ قاراپ باقتىم، بىراق، ئۇنىڭدا ئۇنداق «يۇملاق تاۋۇزلارچە ئىنكاس»نى ئۇچىراتمىدىم، بەلكى قەدەمدە كۆزۈمگە چېلىققىنى ھامان ئۆزگىچە قاراش ۋە ئوخشىمىغان ئاۋاز بولدى. مەن بۇنىڭدىن ئۇلارنىڭ ئەدەبىياتنىڭ تەرەققىي قىلىشنىڭ يەنە بىر سەۋەبىنى تاپقاندەك بولدۇم.
ھەممىنى «ياخشى يېزىپسىز» دەپ بىر-بىرلەپ ماختاپ چىقىش ئەمىلىيەتتە ھەممىسنىڭ ناچار يازغانلىقىغا قىلىنغان يۇشۇرۇن ئىشارىدۇر، ناچار نەرسە يوق ھەممىسى ياخشى يەر ئەمەلىيەتتە ھەممىسى ياخشى بولمىغان يەردۇر.
مەن «مەن ياخشى يېزىپىسىز» دېگەن ئەرزان ئىنكاسقا ئۆچ ئەمەس، بىراق، توختىماي باشقىلارنى ماختاپ، مۇنبەردە دائىم كۆزگە چېلىقىپ تۇرۇشنى ئىستەيدىغان ياكى ياخشىچاق بولىشنى نىشان قىلغان ئىنكاسچىلارنى كۆرسەم ئۇلارغا تولىمۇ ئىچىم ئاغرىپ قالىدۇ. «ياخشى يېزىپسىز» دېگەن تومتاق ئىنكاسنىڭ ئاخرىغا قوشۇپ زادى ئەسەرنىڭ قەيىرىنىڭ ياخىشى، نېمە ئۈچۈن ياخشىلىقىنى كۆرسىتىپ بەرسە قانچىلىك سۆيۈملۈك بولۇپ كېتەتتى دەپ قالىمەن ئىچىمدە.
ئاندا –ساندا يېزىلىپ قالىدىغان، خېلى سەۋىيلىك بىر قىسىم ئىنكاسلارنى كۆرسەم سۆيۈنۈپ،  شۇلار بىلەن تۇنۇشۇپ قالغۇم كېلىپ كېتىدۇ. نوپۇزغا قارىماي ئەسەرنىڭ كەمچىلىكىنى كۆرسىتىپ بېرىدىغان ئىنكاسلارنى كۆرسەم تېمىنى كۆرگەندىنمۇ شادلىنىپ «ئوغۇل!!!» دەپ تاشلايمەن.
مەنچە مانا مۇشۇنداق ئوغوللار بولغان، خاتانى كۆرسىتىپ ئۆز يولىدا گۈس-گۈس دەسسەپ ماڭالايدىغان كىشىلەر بار يەردىلا تەرەققىيات بولىدۇ، گۈللىنىش بولىدۇ.
مۇنبەردە ئاشۇنداق دادىل، «يولۋاسنىڭ يۈرىكىنى يىگەن» ئەزىمەت ئىنكاسچىلار بولغاندىلا قاينام تاشقىنلىق بارلىققا كېلىپ، ئەدەبىياتىمىز ئاندىن ئەدەبىيات، يازغۇچىلار تورىمىز ئاندىن ئىسمى-جىسمىغا لايىق يازغۇچىلار تورى بولىدۇ.  
بۇ يازمىنى ئاخىرىدا   Erchin تەھرىرلىگەن. ۋاقتى  2015-3-6 01:55  

ياخشى تېمىكەن!
بىرەر ئېغىز گەپمۇ نېسى قالمايدىغان بۇ مۇنبەردە،ئەسلى باشقا ئىنكاسنى يازغان ،خاتىرجەملىگىم ئۈچۈن ئۆچىرىۋېتىپ،‹‹ياخشى تېمىكەن!››-دەپ، يېزىپ قويدۇم.
لېكىن ‹‹ياخشى تېمىكەن!››-دىگەن، بۇ ئىنكاسنى  سىز ياراتمىغان بىلەن، ماڭا نىسپەتەن خېلى مۇھىم گەپ.

بۇ يازمىنى ئاخىرىدا   رىشتىم تەھرىرلىگەن. ۋاقتى  2015-3-11 00:28  

     بەزىدە ئويلىنىشقا تىگىشلىك بولمىغان مەسىلىلەر ئۈستىدە تەبىئىلا تەپەككۈر قىلىقا مەجبۇر بولىشىمىزدىكى سەۋەپلەرنى، يەنىلا سەۋەپلەرگە ئارتىپ تۇرايلى....لىرىكا بۇ يازمىنى ئاخىرىدا   لېرىكا تەھرىرلىگەن. ۋاقتى  2015-3-6 10:36  

ئۈششۈك ھەرىسىدەك نەشتەر سانچىش، مازغاپتەك قۇرۇق ماختاشتىن خالى، سەمىمى، تېتىملىق ئىنكاسلار كۆپەيسە، بۇ ھەممىمىزگە پايدىلىق بۇلاتتى.

نۆۋەتتە يولغا قويۇلماقچى بولغان ‹‹تور ئۇچۇر كەسپىنى باشقۇرۇش چارىسى››نىڭ‹‹تور ئابۇنتلىرى ھەقىقى ئىسمى بىلەن تىزىملىتىش››تۈزۈمى ئەمەلىيلەشكەندىن كېيىن كۆرىمىزكى: ئۇ چاغدا ‹‹ئەسەر››لەرگە قارىتىلغان ‹‹شىكەر››سۆزلەر يەنىمۇ ‹‹باراقسانلىشى››مۇمكىن.

ئەسسىلامۇ ئەلەيكۇم، ئورۇنلۇق پىكىردىن بىرنى ئوتتۇرىغا  قويۇپسىز، قېنى بۇنىڭغا ھەقىقى قەلەم تەۋرەتكۈچى يازغۇچىلىرىمىز، ئوقۇتقۇچى- ئۇستازلىرىمىز  ئۆز كۆز قاراشلىرىنى ،پىكىر-تەلەپلىرىنى ئوتتۇرىغا قويۇپ باقسۇن!!!

ماۋۇ جېنى بار گەپ بولۇپتۇ ، تورنىڭ ئ‍ىشىكىدە ئ‍ولتۇرۇپ كىم كىرسە شۇنىڭغا قۇرۇقتىن قۇرۇق سالام بېرىپ قويىدىغانلار قۇرۇق رەسمىيەتچىلىكتىن كۆرە يازغۇچىغا نەپ بېرىدىغان ئ‍ىككى ئ‍ېغىز گەپ قىلىشنى ئ‍ۆگەنسە ئەجەپ ئەمەس

توغرا دەيسىز، ھازىر مەن «بەك ياخشى يېزىپسىز ياكى قەلەم تۇلپارىڭىز ھارمىغاي » دېگەندەك ھېچ ئىشتىن ھېچ ئىش يوق يېزىپ قۇيۇلغان ئنكاسلارنى كۆرسەم ئاپتۇرنى مەسخىرە قىلىۋاتقاندەك ياكى ئىنكاسچىلارنى بىر نەرسە تەمە قىلىۋاتقاندەك تۇيغۇدا بولىدىغان بولۇپ قالدىم،    بۇ خىل .ئىنكاسلار مۇنبەر قۇرۇلغان دەسلەپكى مەزگىللەردە دېيىلسە يارىشىدۇ ئەمما بۇ خىل ئەھۋال داۋام قىلىۋەرسە  بىنورماللىق ھېسابلىنىدۇ،  
     ئاپتۇر مۈكچىيىپ ئولتۇرۇپ جاپا تارتىپ  يازغان تۆت بەش بەت ئەسەرگە ئۈچ تۆت قۇر سەمىمىي باھا بەرمەسلىك ئەسەر ئاپتورىغا قىلىنغان پەرۋا قىلماسلىق ۋە كۆزگە ئىلماسلىقتىن ماھىيەتتىن ئېلىپ ئېيتقاندا ئۆزەم سۈيمەن دەپ جار سېلىۋاتقان ئەدەبىياتقا بولغان سۇسلىقتىن باشقا نەرسە ئەمەس.

ئەستايىدىل ئىنكاس يىزىش ئۆچۈن،ئەڭ ئاۋۋال ئەستايىدىل ئوقۇرمەن بولۇش كېرەك. كۆڭۈل قۇيۇپ، بىر نەچچە قېتىم ئوقۇپ كاللىدا بىرەر نەرسە ئويغانمىسا ،ياكى تەسىر قىلمىسا سىزدېگەندەك ئىنكاسنى يازغىلى بولمايدۇ. شۇنداق ئىنكاسنى يىزىش ئۆچۈن، كاللىنى ياكى يۈرەكنى ۋە ياكى تۇيغۇنى زەرەتلىيەلىگۈدەك كۈچى بار ئەسەر بولىشى كېرەك. يازغۇچىلار تورىدىكى كۆپىنچە يازغۇچىلىرىمىز قەلىمى پىشقان ، تورى بار يازغۇچىلار،مۇنداقچە ئېيتقاندا كۆپىنچىسىنىڭ‹ ئىستىمال› سەۋىيىسى يۇقىرى، ۋاقتى قىس، شۇڭا ئۆزلىرىنىڭ ئەسەر ئوقۇش ئىستىكىنى قاندۇرالمايدىغان تېمىلارنى كۆرۈپ بولالمايدۇ، بىزگە شۇنداق ياخشى تۇيۇلغان ئەسەرلىرىمىز ئۇلارغا تېتىماي قالىدۇ. شۇنداقتىمۇ ئەستايىدىللىق بىلەن ئوقۇپ، يېتەكلىگەن ئاساستا پىكىر بېرىشكە ۋاقتى يېتىشمەي قېلىشى مۇمكىن. دەپ ئويلىدىم ئۆزەمچە. يەنە بىر قىسىم ئىنكاسلار ئىنكاس يىزىش ئۆچۈنلا يىزىلغان بولغاچقا، ياخشى چىقىپتۇ،ئوبدان بوپتۇ دىگەندەك ، يا ئادەمگە زىيان قىلمايدىغان، ياپايدا قىلمايدىغان دورىدەك ئىنكاسلار يىزىلىدۇ. ئۇنداق ئىنكاسنى يازغۇچى ھەتتا يازغان نەرسىڭىزنى بىر قۇرمۇ ئوقۇمايلا يازغان بولىشىمۇ مۇمكىن.
ئانچە مۇنچە  باشقا مۇنبەرلەرنى ئارىلاپ كۆرگىنىڭىزدە، ھىچ بولمىسا باشقىلارنىڭ ناھايىتى قىزغىنلىق بىلەن ئەسىرىڭىزنى كۆرگەنلىكىنى ھىس قىلىپ تۇرىسىز. ئۇلار ئەسىرىڭىزگە ئىلمى پىكىرلەرنى بېرەلمىسىمۇ، ئەجەپ قىزىقارلىقكەن، داۋامىنى قاچان يازىسىز، ئاۋۇ پېرسۇناژ ئۇنداق بوپتۇ ھە، قانداق قىلار ئەمدى.. دىگەندەك ئىنكاسلار بىلەن ئۆزىنىڭ ئەسىرىڭىزگە ھەقىقەتەن قىزققانلىقىنى بىلدۈرۈپ تۇرىدۇ. مەيلى ئەسىرىڭىز ياخشى بولسۇن يامان بولسۇن ئۇلاردا قىزغىنلىق بار. مەمتىمىن ھۇشۇرنىڭ مۇساپىرلار قاۋىقى، ناملىق ھىكايىسىدىكى بىر توپ ئاقكۆڭۈل كىشىلەردەك، قۇلىقىغا خۇشياقمىسىمۇ  ،ئەدەپ ئۈچۈن ناھايىتى قىزغىنلىق بىلەن ئالقىشلىغىنىدەك ،شۇ ئارقىلىق سىزنى قوللىغىنىدەك بىر ئىش.
لېكىن يازغۇچىلار مۇنبىرىمىز باشقا مۇنبەرلەرگە ئوخشىمايدۇ، ھەر بىر ئۇستازنىڭ بىر جۈملە سۆزىمۇ بىر ئوبزۇردەك سىزنىڭ نەتىجىلىرىڭىزنى مۇئەييەنلەشتۈرگەنلىككە ھىساپ بوپ قالىدۇ. شۇڭا ئۇلار ئالدىراپ ئىنكاس يازسا بولمايدۇ. بىر كەسىپ ئەھلىنىڭ يەنە بىر كەسىپ ئەھلىنى ئېتراپ قىلمىقى قىيىن  ئىش. شۇڭىمۇ يەنە ئالدىراپ ئىنكاس يېزىلمايدۇ. ئۇلارنىڭ ئەسىرىڭىزنى ياقتۇرغىنى بىر ھەقىقى ئەدىبنىڭ ياقتۇرغىنىغا تەڭ بولۇپ قالىدۇ ، شۇڭا ھەر قاچان ئويلاپ يازمىسا بولمايدىغان ئىش چىقىدۇ.
  شۇڭا، باشقىلارنى قايىل قىلىش ئۆچۈن ،ئۆز ئىختىيارى بىلەن ئىنكاس يېزىشقا قىستاش ئۆچۈن، ئۈزلۈكسىز تىرىشىشلا كېرەك. مەن سىزنىڭ ئىنكاس ئۆچۈن ئەسەر يازمايدىغانلىقىڭىزنى ،پەقەت قىزغىنلىقىڭىزنىڭ جاۋاپسىز قالغىنى ئۆچۈن كۆڭلىڭىز يېرىم بولغىنىنى ھىس قىلىپ كۆز قارىشىمنى دىگۈم كەپ قالدى. ئەيىپكە بۇيرىمىغايسىز.
ئىنكاسقا خۇشتار بولغان بولساق، شۇنچىكىم تېمىمىزغىمۇ نەچچە ئون ھەتتا نەچچە يۈز بەتلەپ ئىنكاس يىغىپ كېتىدىغان مۇنبەرلەرگە يوللىساق تامامەن بولاتتى، لېكىن يازغۇچىلار مۇنبىرى خاسلىققا ئىگە مۇنبەر بولغاچقا ، ئاشۇ سەۋىيىلىك كىشىلەرنىڭ ئاغزىنى ئاچۇرۇش ئۆچۈن ئەڭ ئاز ئۇلارچىلىك سەۋىيە ھازىرلىشىمىزغا توغرا كېلىدىكەن.
شۇڭا مەن سىزنىڭ يەنىلا ئىنكاسلارغا ئېتىبار قىلماي، توختىماي تىرىشىشىڭىزنى، ئىزچىل بەل قويماسلىقىڭىزنى تىلەيمەن. بىر ياخشى ،ئېسىل ئەسەرنىڭ ھەرگىز ئوقۇشسىز ھەم ئىنكاسسىز قالماسلىقىغا ئىشىنىشىڭىزنى ئۈمىد قىلىمەن.

بۇ تېما تولىمۇ جايىدا يېزىلىپتۇ. مەنمۇ تىزىملاتقىلى بىر يىلدىن ئاشتى. خېلى جىق ئەسەرلىرىمنى يوللىدىم. كەمچىلىك ۋە ئارتۇقچىلىقلىرىمنى ككرسىتىپ بەرگەن ياخشى ئىنكاسلارمۇ چۈشتى. بىراق يەنىلا سىز دېگەندەك قۇرۇق ئىنكاس جىق. مەنمۇ ھەر بىر ئاپتورنىڭ ئەسىرىنى كۆرسەم ئەستايىدىل ئىنكاس يېزىپ باقتىم. ياخشىنى ياخشى بوپتۇ دەپ ياخشى بولغان تەرىپىنى كۆرسىتىپ بەرسىڭىز خوشال بولىدىكەن. لېكىن ماۋۇ تەرەپلەردىن كەتكۈزۈپ قويۇپسىز، مۇنداقراق بولسا قانداق بولار، دىگەن ئىنكاسلارنى مۇتلەق كۆپچىلىك ياخشى كۆرمەيدىكەن. مەن يېڭى ھەۋەسكارلارغىمۇ، قەلىمى پىشقان ئاپتورلارغىمۇ يېزىپ باقتىم. ھېچقايسىسى ياقتۇرمايدىكەن. شۇڭا مۇبارەكلەشنى ئاساسىي تېما قىلغان شاتۇتىلارچە ئىنكاس يازغاندىن يازمايلا قوياي، دەپ  ئۇزۇندىن بۇيان ئىنكاسمۇ يازمىدىم، ئەسەرمۇ يوللىمىدىم. ئەڭ ياخشى ئىنكاسچى-جاپاكەش مۇھەررىرلەر ئىكەن. ئۇلار ياخشى بولسا باسىدىكەن، ياخشى بولمىسا باسمايدىكەن.

راستىنى دىسەم، يېقىندىن بۇيان بۇ مۇنبەردە ئىنكاس يازغۇدەك ،ئوقۇغۇدەك تېمىمۇ قالمىغىلى تۇرۇپتۇ، باش بەتنىڭ سول تەرىپىدىكى كونا مۇنبەر، دىگەن جاينى بىسىپ ، كونا مۇنبىرىمىزگە قاراپ باقساق، بۇرۇن نەقەدەر ئىسىل ئەسەرلەرنىڭ يوللانغىنىدىن، ھازىر بولسا بارغانچە پاخپاخلىشىپ كېتىۋاتقاندەك تۇيغۇ بېرىدۇ ئادەمگە.بىزنىڭ بەزى ئەسەرلىرىمىزنى تەستىقلىماي ئۆچۈرۈپ تاشلىغان ئەرچىن ئاكىمىز بىلەن ئۇرۇشقىمىز كەپ كەتكەن بىلەن، يەنە بىر قىسىم تورداشلارنىڭ ، شۇنداقمۇ ئەسەرنى تەستىقلىغىنىغا ئەرچىن ئاكىمىز بىلەن ئۇرۇشقىسى كەپ كېتىپ بارىدىغاندۇ بەلكىم. سەن نىمە قىلىۋاتىسەن بۇ مۇنبەرنى ، ئوقۇغۇدەك ئەسەر تەستىقلىماي دەپ...
شۇڭا ، ياخشى ئىنكاس يوق دەپ ئاغرىنماي، ياخشى بىر نەرسە يازالمىدىم دەپ ئۆزىمىزدىن بەكرەك ئاغرىنىشىمىز ئۆزىمىزگىمۇ مۇنبەر سۈپىتىگىمۇ پايدىلىق بولىشى مۇمكىن.

ھاياتلىق ، ماڭا ھەم ساڭا پۇرسەت ،
‹‹ئېلىببە››- چۈشۈنۈپ ياشا پەقەت .
ئوقۇغىن، يازغىن ئەبەدىلئەبەد،
ئەل-خەلقىمگە يەتكۈزۈپ مەنپەئەت .

10«ئېغىز كاپ-كاپتىن بىر ئېغىز شىپ-شاپ ياخشى ''دېگەندەك،ئىنكاس يازغۇچىلار ئادەمگە ئەمەس ،يوللانغان ئەسەرنىڭ سۈپىتىنى ئاساس قىلىپ،ئىنكاس يازغىنىمىز تۈزۈك.بۇ ئىنكاس يېزىش ئىشىدا ھەر ۋاقىت «تارىم''نەشىرىياتىنىڭ ئادەمگە قارىماي،ئەسەر سۈپىتىگە قاراش،ئەسەر ئەۋەتكۈچى ھەر قانچە ساقالدىمان ئەپەندى بولسىمۇ،ئەسەرنىڭ سۈپىتىنى ئاساس قىلىش...،ياخشى ئەسەرلەرنى چۈشۈرۈپ قويماسلىق،ناچار ئەسەرلەرگە ئورۇن بەرمەسلىك ...'' پىرىنسىپىنى  قەتئى ئىجىرا قىلغاندىلا ،»يازغۇچىلار مونبىرى''نىڭ يۈكسەك ئابىرۇيىنى ساقلاپ قالغىلى ،دان بىلەن ئەخلەتنى ھەقىقى يۇسۇندا ئايرىپ چىققىلى بولىدۇ.
تېما يوللىغۇچىنىڭ ئېسىل پەزىلىتىگە ئاپىرىن!

بۇنداق ئەھۋال ھەقىقەتەنمۇ مەۋجۇت. بەزىدە كۆڭۇل ئاياپ ئنكاس يازدىكەنمەن، بەزىدە سەممىي ئنكاس يازىمەن بىراق سەممىي گەپ قۇلاققا ياقمايدىكەن.

مەنچە ھەربىر ئىنكاس بىر مىكرو ئەدەبىي تەنقىددۇر، باھا يازغۇدەك ياخشى ئەسەر بولمىسا ياخشى ئەمەس ئەسەرنىڭ ياخىش بولالماسلىقىدىكى سەۋەبلەرنى كۆرسىتىپ بەرسە تامامەن بولىدۇ،  ئەدەبىي تەنقىد پەقەت ياخىش ئەسەر ئۈستىدىلا يېزىلمايدۇ.  قانچە تەنقىد يېزىشقا ئەرزىمەيدۇ،  دەپ نەزەردىن ساقىت قىلغانسىرى مۇنبەرنىڭ سۈپىتى شۇنچە تۆۋەنلەپ بارىدۇ،
روھىي جەھەتتىن بىخودلىشىپ ئۆز كەسپىگە سوغوق مۇئامىلە تۇتىدىغان كلىشلەرگە بىز ئۇلارغا  نوبىل مۇكاپاتىغا يارىغۇدەك ئەسەر يوللىساقمۇ يەنە سۈكۈت قىلىپ تۇرىۋېرىدۇ.